Quel est le site Web ?

https://www.facebook.com/WanderlustOmar

With Omar Taher - مع عمر طاهر, 5ème arrondissement, Paris (2026)

25/06/2026

دي البلاد اللي اتأهلت ل حد دلوقتي لدور ال 32 في كأس العالم 2026

- سوسيرا 🇨🇭 ( مركز أول مجموعة )
- كندا 🇨🇦 ( مركز تاني مجموعة)
- البرازيل 🇧🇷( مركز أول مجموعة)
- المغرب 🇲🇦( مركز تاني مجموعة )
- المكسيك 🇲🇽( مركز أول مجموعة )
- جنوب أفريقيا 🇿🇦( مركز تاني مجموعة )

----
● دول ضمنت التأهل 100% من قبل ما تلعب الماتش التالت لها في المجموعات

- أمريكا 🇺🇸
- الأرجنتين 🇦🇷
- فرنسا 🇫🇷
- النرويج 🇳🇴
- ألمانيا 🇩🇪
- كولومبيا 🇨🇴

----

● دول في المركز التالت ممكن تتأهل ب نسبة كبيرة جدا

- البوسنة و الهرزك 🇧🇦 ( مركز تالت مجموعة 4 نقاط)
----

● دول في المركز التالت فرصتهم مش كبيرة أو ضعيفة للتأهل حسب نتايج بقية المجموعات في المركز التالت

- كوريا الجنوبية 🇰🇷 ( مركز تالت مجموعة 3 نقاط ب فارق أهداف 1-)
- سكوتلاندا 🏴󠁧󠁢󠁳󠁣󠁴󠁿 ( مركز تالت مجموعة 3 نقاط ب فارق أهداف 3-)
----
● دول خرجت من كأس العالم مركز رابع مجموعة لحد دلوقتي
- قطر 🇶🇦
- التشيك 🇨🇿
- هايتي 🇭🇹

24/06/2026

بوست 76 : هل تقديم الأسرة كلها مع بعض على فيزا شنجن ممكن يبقى سبب رفض أحيانا؟
📌 من الأسباب الشائعة اللي ممكن تؤدي لرفض طلب فيزا للأسرة كلها أو حتى لفرد منها إنهم يقدموا كلهم مع بعض في نفس الوقت.

📌 الأسباب المحتملة للرفض:
1️⃣ الشك في نية العودة
السفارة ممكن تشوف إن تقديم الأسرة كلها مع بعض فيه احتمال إن الرحلة تتحول لهجرة منظمة، خصوصا لو مفيش روابط قوية تثبت رجوعكم (شغل، دراسة، ممتلكات...).

2️⃣ التغطية المالية
كشف الحساب أو الدخل ممكن مايكونش كافي لتغطية تكاليف السفر لكل أفراد الأسرة. وده بيعتبر عبء مالي كبير مقارنة بالموقف المالي الحقيقي للأسرة.

3️⃣ الرفض الجزئي أو الكلي

🔹 ممكن يتقبل طلب فرد واحد من الأسرة بس والباقي يترفضوا.
** أحيانا العكس: فرد واحد يترفض والباقي يتقبلوا.
🔹 وفي حالات تانية: الكل يترفض حتى لو في فرد عنده تاريخ سفر كويس في شنجن. السبب؟ لأنهم شايفين إن نيتكم تسافروا مع بعض، فبيقرروا يرفضوا المجموعة كلها.

*** طبعا ده مش معناه خالص إن ممكن يقبلوا الأسرة كلها و ده برضو بيحصل حسب ظروفهم و تقييمهم..
--

📌 تجارب حقيقية

🔹 مثال 1 👨‍👩‍👦: أسرة قدمت فيزا ألمانيا من أم و أب و أبنهم على فيزا ألمانيا و عندهم تاريخ سفر
>>> قبلوا الأسرة كلها ماعدا الأم
*** و الحقيقة التجربة دي أنا اتدخلت فيها عشان هم كلموني و بعض شوية نصايح لتقوية الروابط و الضمانات و لما قدموا تاني كلهم اتقبلوا لفيزا ألمانيا بما فيهم الأم ✅

🔹مثال 2 👨‍👩‍👧‍👦: أسرة مصرية مقيمة في قطر قدمت و رغم إن عندهم تاريخ سفر يعتبر متوسط و الأب عنده تاريخ سفر في شنجن اترفضوا كلهم
** التجربة دي متكررة مع أكتر من أسرة علي

🔹مثال 3 👥️ : بعض الأسر أخدوا كلهم الفيزا و منهم اللي اترفض في مرة تانية أو تالتة سواءا الأسرة كاملة أو بعضها أو شخص منهم..
---
📌 النصائح:

لو هتقدموا كأسرة، لازم يكون فيه روابط قوية تثبت رجوعكم:
🔹 الأب/الأم لازم يكون عندهم موقف مهني ومالي واضح.
🔹 الأبناء لازم يوضحوا الروابط الدراسية لو فيه
🔹 الروابط الاجتماعية بتفرق و شرحتها في بوست 46
🔹 وجود تاريخ سفر سابق بيساعد أحيانا.
🔹 الوضع المالي لازم يغطي الرحلة بمرونة، من غير ما يظهر إن فيه عبء أو مخاطرة.

*** في حالة الرفض:
⚠️ مش بنصح تعيدوا التقديم للأسرة كلها مرة واحدة حتى مع تغيير الدولة خصوصا لو مافيش تاريخ في شنجن.
✅ الأفضل تحسين الروابط الأول.
✅ أو التقديم لجزء من الأسرة بس في الرحلة الجاية لحد ما يتحسن الوضع المالي والمهني وتبان الصورة أوضح للسفارة.

24/06/2026

عشان ناس كتيرة سألتني عن اللغة الفرنسية
فكرة بسيطة عن طريقة التعليم و هاعمل عنها فيديوهات أكتر
مفيدة جدا للهجرة ل كندا و الدراسة باللغة الفرنسية و العمل!!

24/06/2026

عندي لك طريقة تسهل جدا هجرة كندا و ممكن تضمنها.
و أعرف مجموعة من الناس هاجروا كندا من خلالها .
و اسمها PNP يعني الهجرة عن طريق ترشيح مقاطعة
Provincial Nominee Program 🇨🇦
—————————

📌 الهجرة عن طريق ترشيح المقاطعات (PNP) – شرح شامل 2026
📍 عارف ليه الطريقة دي أحسن طريقة و مضمونة ؟

عشان بتمنحك 600+ مرة واحدة في ملفك..
تلاقي واحد بيشقى و يتعب عشان 400 نقطة لكن الترشيح من المقاطعة يمنحك 600 و أكتر على النقاط اللي عندك أصلا 😲
و ده معناه إن هجرتك مضمونة بالترشيح ده.

لو هدفك الهجرة إلى كندا لكن نقاطك في Express Entry مش عالية كفاية، فبرنامج المقاطعات (PNP) هو واحد من أقوى الطرق للحصول على الإقامة الدائمة في كندا.
الـ PNP ببساطة هو نظام تخلي كل مقاطعة كندية تختار المهاجرين اللي تحتاجهم حسب سوق العمل عندها.
_______________

📌 أولاً: ايه هو برنامج PNP؟

برنامج Provincial Nominee Program يسمح لكل مقاطعة كندية إنها:
تختار مهاجرين مناسبين لسوق العمل المحلي و ترشحهم للإقامة الدائمة (PR) سواء عبر Express Entry أو بشكل مباشر

📌 أهم نقطة: لو حصلت على ترشيح من مقاطعة → بتاخد +600 نقطة CRS في Express Entry
وده عمليا بيضمن لك دعوة للهجرة..
________________

📌 أهم المقاطعات المشاركة في الهجرة
كل مقاطعة عندها شروط مختلفة حسب احتياجاتها:

🟡 ساسكاتشوان (Saskatchewan)
مطلوب عمال مهرة + حرفيين
نظام نقاط واضح وسهل المتابعة

🔵 أونتاريو (Ontario)
أكبر سوق عمل في كندا
مطلوب: هندسة و طب و تمويل و تكنولوجيا المعلومات

🟢 ألبرتا (Alberta)
فرص كبيرة للعمالة التقنية والبترول
نقاطها أحيانا أسهل من غيرها

🔴 بريتش كولومبيا (British Columbia)
تركيز على التكنولوجيا و طلب عالي على المبرمجين

🟣 مانيتوبا (Manitoba)
من أسهل المقاطعات نسبيا
تفضل الأشخاص اللي عندهم أخ أو جد من الأسرة هناك أو خبرة عملية في أي مجال أو حرفة

🟠 نوفا سكوشا / نيو برونزويك
برامج للهجرة حتى بدون عقد عمل أحيانا
فرص جيدة للمهن المتوسطة
__________________

📌 نظام النقاط في PNP
كل مقاطعة عندها نظام تقييم خاص، لكن بشكل عام بيعتمد على:
📍نقاط أساسية:
● العمر
● التعليم
● الخبرة
● اللغة (IELTS / TEF)
● ممكن عقد عمل حسب المقاطعة
● صلة بالمقاطعة (دراسة / أقارب / تجربة)
📌 بعض البرامج ما تحتاجش عقد عمل أصلا

__________________________

📌 ازاي PNP يسهل Express Entry؟
لو قدمت هجرة Express Entry:

نقاطك ممكن تكون 300–450
لكن مع ترشيح PNP تحصل +600 نقطة مباشرة
يعني: بتتخطى كل المنافسين تقريبا
📌 المهن المطلوبة في كندا (2026)
أهم المهن المطلوبة حاليا:

🔹 تكنولوجيا المعلومات
مطور برمجيات — Software Developer
محلل بيانات — Data Analyst
متخصص أمن سيبراني — Cybersecurity Specialist
مهندس سحابة — Cloud Engineerr

🔹 الصحة
ممرض / ممرضة — Nurse
تقني طبي / فني مختبر — Medical Technician
مقدم رعاية / مساعد رعاية — Caregiver

🔹 الهندسة
مهندس ميكانيكا — Mechanical Engineer
مهندس مدني — Civil Engineer
مهندس كهرباء — Electrical Engineer

🔹 حرف ومهن تقنية

كهربائي — Electrician
لحّام — Welder
سائق شاحنة — Truck Driver

🔹 أعمال وإدارة
محاسب — Accountant
محلل مالي — Financial Analyst
مدير مشاريع — Project Manager

_____________________

📌 طريقة التقديم خطوة بخطوة

1️⃣ إنشاء ملف Express Entry على موقع الحكومة الكندية
إدخال البيانات (خبرة، تعليم، لغة)

2️⃣ اختيار المقاطعة المناسبة حسب تخصصك وسوق العمل
3️⃣ التقديم على PNP عبر موقع المقاطعة مباشرة
4️⃣ الحصول على ترشيح (Nomination)
لو تم قبولك تحصل على +600 نقطة

5️⃣ دعوة رسمية PR
و ساعتها تبقى اتقبلت و تعمل طلب الإقامة الدائمة

📍 نصائح مهمة لزيادة فرصك
✔ اللغة مهمة (IELTS مهم جدا) و لو لغة فرنسية فرصتك أكبر كتير
✔ ركز على المهن المطلوبة
✔ اختار مقاطعة تناسب تخصصك
✔ تابع سحوبات PNP باستمرار
____________________

📌 من الآخر
برنامج PNP هو أقوى طريق للهجرة لو نقاطك ضعيفة
كل مقاطعة عندها احتياج مختلف
الترشيح = مفتاح الإقامة الدائمة

24/06/2026

بوست 75: جواب رفض صريح من بنت من بنجلاديش 🇸🇪❌

📌 النهارده هاعرض معاكم حالة حقيقية ..
بنت من بنجلاديش بعتتلي جواب الرفض اللي وصلها من سفارة السويد، و استأذنتها إني أنشره هنا عشان الكل يستفيد، لأنه بيوضح أسباب الرفض بشكل واضح وصريح جدا..

---

📌 ملخص الرفض

1️⃣ الشك في الرجوع
السفارة لازم تتأكد إنها هتسيب منطقة شنجن قبل انتهاء الفيزا. و فيه شكوك ، و ده سبب رفض.

2️⃣ الجنسية وسياسة الفيزا
حاملي جوازات بنجلاديش عندهم شروط صارمة. الفيزا ممكن تتوافق لو الغرض واضح جدا والشخص مستقر في بلد إقامته. تاريخ السفر السابق في شنجن بيساعد و هي ماعندهاش تاريخ في شنجن

3️⃣ تاريخ السفر السابق
مازارش شنجن قبل كده، فمفيش دليل على الرجوع بعد أي زيارة. ده عامل سلبي في التقييم.

4️⃣ خطة السفر والـ Cover Letter
الخطاب وخطة السفر مكتوبة بشكل عام وغامض، مشابهة لخطابات سابقة، وده بيضعف مصداقيتها.

5️⃣ حجوزات الفنادق
الحجوزات المقدمة اتلغت، وده زود الشكوك إن الغرض من السفر مش واضح والورق ممكن يكون متلاعب فيه..

📍 النتيجة
المستندات والمعلومات مش موثوقة، وفيه شكوك قوية في نيتك للرجوع. القرار النهائي: رفض الفيزا و ده هو رفض رقم 10 أو رقم 2 المشهور و يتضاف له رقم 13 لوجود شكوك لعدم العودة..
---

📌 الدروس المستفادة:

✅ قدم على فيزا شنجن من دولة سياحية و تجنب التقديم على دول زي السويد و النرويج و فنلندا و غيرهم اللي معروفين إنهم أقل سياحة و مش منطقي السفر لهم لشخص ماعندوش تاريخ سفر خصوصا في شنجن
✅ ضروري يكون عندك روابط و ضمانات جيدة من حيث الوضع المهني و الموقف المالي و كشف الحساب البنكي و كل الروابط التانية ( عرضتهم كلهم في بوست 43 )
✅ خطاب التغطية Cover Letter ، اكتبه مطابق لحالتك و الأحسن بنفسك و بلاش تنقله من أي موقع أو من شخص و الأحسن بلاش ChatGPT
✅ حجوزات الفندق لازم دايما تفضل فعّالة و مش ملغية عشان ده بيعرضك للرفض..

24/06/2026

من الكلمات الفرنسية هي Kiffer يعني يتكيف من حاجة 😂
جاية من الكيف يعني يحب حاجة أو يتكيف منها..
مثلا
Je kiffe cette musique.
- الموسيقى دي بتكيفني يعني بحب أو بستمتع بالموسيقى ده
Le chocolat, c'est mon kiffe
- الشيكولاته هي كيفي
---
تعرفوا إن دخل كلمات في الشارع الفرنسي و العامية الفرنسية و خصوصا في الضواحي و أصلها عربي..
و موجودة برضو في الفرنسية في بلجيكا و سوسيرا..

بس نصيحة بلاش تستخدم الكلمات دي عشان الناس هاتشوف إنك حد غير راقي أو شوارعجي 😂 أو حتى بذئ Vulgaire
رغم إنه ده ممكن يعجب طبقة معينة 😅
لكن لازم تبقى عارف الكلمات دي عشان لو سمعتها في مكان تفهم..

بس حذاري تقولها في الشغل أو في مقابلة أو في كتابة رسمية أو حتى في التعامل مع أغلب الفرنسيين..

و دي أمثلة

🔹 Meskine / Meskina ← مسكين / مسكينة للشخص الغلبان أو المثير للشفقة.
🔹 Bled ← بلد الأصل أو المدينة اللي مهاجر جاي منه
Je rentre au bled cet été.
راجع بلدي الصيف ده
🔹 Baraka ← بركة الحظ أو النعمة أو الخير.
🔹 Wallah ← والله للتأكيد على صدق الكلام.
🔹 Inchallah ← إن شاء الله عند الحديث عن المستقبل.
🔹 Machallah ← ما شاء الله للتعبير عن الإعجاب.
🔹 Hamdoullah ← الحمد لله .
🔹 Astaghfirullah ← أستغفر الله خصوصا بين الشباب المسلمين.
🔹 Khouya ← خويا (أخي) بمعنى "يا صاحبي" أو "يا أخي.
🔹 Sahbi ← صاحبي بمعنى الصديق أو الزميل.
🔹 Kiffer ← كيف من أكثر الكلمات انتشارا في فرنسا. معناها: يحب أو يستمتع بشيء
🔹 Maboul ← مهبول بمعنى مجنون أو غريب الأطوار.
🔹 Toubib ← طبيب كلمة قديمة جدا في الفرنسية العامية.
🔹 Flouze ← فلوس بمعنى المال.
🔹 Seum ← سُمّ من أشهر كلمات الشباب حاليا. تعني الإحباط أو الغيظ أو الحقد بعد خيبة أمل.
J'ai le seum.
🔹 Zarma ← زعمة تقال للسخرية أو التشكيك.
Zarma il est riche !
🔹 Hchouma ← حشومة للعيب أو التصرف غير اللائق.
🔹 Fissa ← بسرعة أو حالا زي في ثانية
Viens fissa !
🔹 Ni quer ← معناها نفس المعنى الجن سي و ممكن تتقال زي العرب بمعنى دمرت أو بهدلت حاجة
🔹 Roumi / Roubi من "رومي"، وتستخدم أحيانا للإشارة إلى الأوروبي أو الفرنسي.
🔹 Chouf ← شوف بمعنى "انظر" أو "راقب". وأصبحت معروفة من خلال تعبيرات الشارع وبعض الأفلام.
🔹 Wesh معناها ايه ، ماذا و من المغربي
Wesh, ça va ?

و فيه غيرهم ..
ملحوظة الكلمات دي من معرفتي الشخصية سمعتها خلال فترة قصيرة عشتها في أحد ضواحي باريس و هي Cergy و هي من الضواحي الجميلة..

لو حد يعرف كلمات تانية ممكن يقولها ..
مين سمع كلمة من الكلمات في الفرنساوي قبل كده ؟

24/06/2026

صور طالعة نازلة و هو ده رتم الشوارع في والونيا بلجيكا 😁
من تصويري من منطقة قريبة في لييج 🇧🇪
صباح النور 🌹

23/06/2026

بوست 74: إزاي تعالج رفض فيزا شنجن؟ بوست شامل

📌 رغم إن فيه 17 سبب رسمي للرفض اتكلمت عنهم في بوست 73 ، لكن فيه 4 أسباب هما الأشهر و بيتكرروا كتير جدا و هاعرضهم مع علاجهم..

----
🔹 السبب 2: مافيش مبرر واضح لغرض ومدة الإقامة

📌 السفارة مش مقتنعة بغرض الزيارة أو شايفة إن الشروط مستوفية و ده أكتر سبب للأسف ممكن ناس عندها ظروف جيدة تترفض بسببه و بيبدو أحيانا غير مقنع و كإنه حجة للرفض و لكن أسبابه ممكن ترجع لأي سبب من الأسباب دي :

● حجوزات الفندق ملغية أو مش متوافقة مع خطة السفر أو الطيران مش متوافق مع خطة الرحلة
● كشف الحساب البنكي غير كافي لتغطية تكاليف الرحلة بشكل مرن بحيث إن مايكنش حتى التكاليف دي بتمثل جزء كبير من مدخراتك أو إدخارك السنوي من الدخل
● كشف الحساب البنكي غير متوافق مع الدخل المعلن في شكل التحويلات و الوادائع و ينقص للمصداقية
● خطة الرحلة مش واضحة أو غير مقنعة
● أسباب تانية فيها عدم توافق أو تضارب في المعلومات اللي في الابلاشكين
● أحيانا مافيش إذن من الشركة للأجازة واضح أو أي خطاب عمل HR Letter مش كامل

🔴 للأسف السفارات قليل لما بتقول السبب بالضبط و يبقى عملوا معاك واجب لو قالوا السبب بالتحديد..

📍مثال: بعض الأعضاء في الجروب السفارة شرحتلهم إن سبب الرفض هنا كان إن حجز الفندق ملغي

✅ الحل:

▪️قدم برنامج أو خطة سفر (خط سير) واضح: مواعيد طيران + حجوزات فنادق + خطة للأنشطة.
▪️ كشف حساب بنكي كافي و متوافق مع الدخل
▪️خطاب عمل HR Letter مضبوط و كامل و متوافق مع خطة الرحلة
▪️ لو أي نقطة مش واضحة في الابلاكشين توضحها في خطاب تغطية Cover Letter

** لو السبب رقم 2 هو سبب الرفض لوحده أنصحك تقدم على طعن و إن كان بعض دول شنجن الطعن على الرفض مش بيكون عملي و مش مفيد ( هاتكلم في بوست جاي عن الطعن )

---

🔹 السبب 10: المعلومات المقدمة عن الغرض أو الشروط غير موثوقة
📌 يشبه سبب 2 و لكن مع الفرق إن هنا مافيش ثقة في المستندات نفسها أو الأوراق اللي مقدمها و فيه شك بعدم صحتها سواءا كشف حساب بنكي أو HR Letter أو حجوزات فندق و طيران أو غيرهم أو واثقين في صحتها لكن شايفين غرض السفر غير قوي بالشكل الكافي..

🔴 هنا السفارة عندها شك في عدم صحة الأوراق و غرض السفر لكن مش متأكدة إن فيه تزوير في الأوراق بالضرورة و بالتالي الرفض هنا مش بترتب على حظر/بلوك زي في حالة تأكدهم من التزوير ( هاتكلم في البوست اللي جاي عن التزوير و الحظر )

✅ الحل:

▪️خلي أوراقك كلها متطابقة و مضبوطة وواضحة : بيانات الابلكيشن + جواز السفر + ورق الشغل + كشف الحساب البنكي.
▪️متقدمش أي ورق شكله ضعيف أو ممكن يبان إنه مش رسمي.
▪️لو فيه اختلاف (زي وظيفة جديدة) أو أي حاجة مش واضحة → وضح ده في Cover Letter
▪️ لو عمل حر حاول تقدم أوراق تثبت النشاط مثلا..

** لو ده سبب الرفض برضو فيه فرصة للطعن كويسة.

---

🔹 السبب 12: شكوك في صحة أو مصداقية المستندات
📌 السفارة شكت بشكل صريح إن الورق مزيف أو مش موثق (زي عقد عمل قديم من غير ختم، أو كشف حساب مطبوع أونلاين).

✅ الحل:

▪️استخدم مستندات أصلية و مختومة رسميا (شهادات بنكية مختومة – عقد عمل موقع – خطاب عمل HR letter كامل و واضح ).
▪️تجنب أي أوراق فيها أخطاء أو ناقصة بيانات.
▪️لو في ورق مترجم → لازم مكتب ترجمة معتمد.

** ده سبب برضو ينفع الطعن عليه و يمكن معالجته لو الأوراق سليمة و هنا الرفض ده مش بسبب حظر عشان ده شك في صحة المستندات لكنهم مش متأكدين من وجود تزوير.

---

🔹 السبب 13: شكوك في نيتك العودة قبل انتهاء الفيزا
📌 ده أكتر سبب صعب معالجته و سببه هو عدم وجود أو نقص في الروابط و الضمانات اللي تضمن العودة بعد الزيارة سواءا
● الموقف المالي و قوة الدخل و استقراره مش قوي
● الوضع المهني و استقرار العمل و أحيانا المسمى الوظيفي مش قوي
● غياب بعض العوامل زي الروابط العائلية أو الاجتماعية أو حتى تاريخ السفر أحيانا ( علما أن العوامل دي جيدة لكنها مش شرط )
● أحيانا سفر كل أفراد العائلة كلها و قلقهم من وجود خطة لهجرة غير شرعية
● مخالفات سابقة أو رفض قديم لفيزا شنجن أو حتى لبعض التأشيرات التانية
● التقييم للروابط والضمانات ككل غير قوية بالشكل الكافي اللي يكون فيه ثقة للعودة بعد الزيارة.

✅ الحل:

▪️قدم روابط قوية لبلدك: ده غالبا هياخد وقت عشان تحسن من الوضع المهني و الموقف المالي و بشكل عام من الروابط اللي تضمن العودة بعد الزيارة ( شرحتهم في بوست 43 بالتفصيل )
و قدم كل الروابط و الأدلة اللي تثبت نيتك للعودة بعد الزيارة
▪️ بلاش تستعجل في التقديم تاني و خد وقتك لمعالجة أسباب الرفض
** الطعن مع سبب 13 نجاحه مش كبير خصوصا لو ماعندكش أي تاريخ سفر في شنجن و محتاج في أغلب الحالات وقت للمعالجة

---

⚠️ نصايح مهمة:

▪️ لو اترفضت بسبب أي سبب من دول، متقدمش تاني بنفس الأوراق حتى لو ده بيعدي مع بعض الناس بس دي مش القاعدة أو لازم تصلح المشكلة وتوضحها في Cover Letter مع التقديم الجديد.
▪️ قدم طعن حسب البلد اللي مقدم منها حسب سبب الرفض.. سبب رقم 13 و الرفض من بعض الدول مش بيكون مفيد دايما التقديم على طعن..
▪️بلاش الاستعجال في التقديم بعد الرفض عشان الرفض المتكرر بيصعب الموضوع أكتر بكتير و أحيانا بيعرض بعض الناس للحظر و عالج الأسباب قبل ما تقدم تاني على قد ما تقدر و الأهم إن تلاقي إن فيه تغير ملحوظ للأفضل في ظروفك و الروابط قبل ما تقدم تاني

23/06/2026

ياريت يا جماعة لو حد عايش في الإمارات و يعرف النظام هناك يساعد و يكتب في التعليقات ايه الموقف بالنسبة له..
واحد من المتابعين بعت لي و طلب مني أنزل سؤاله
شكرا دايما لمساعدتكم !!

23/06/2026

حاجة من الحاجات اللي بحبها في بلجيكا
هي إن لما بيجي صيف حر كل كام سنة زي صيف 2026،
الحر مش بيكون أوفر..
يعني في عز الحر الصيف ده في باريس °36 دلوقتي
و في غرب فرنسا في مدينة Nantes وصلت ل °42
درجة الحرارة عندي في بلجيكا °28
طبعا مش كل صيف بيجي الحر ده ، يعني أفتكر آخر حر حسيته جامد كان في صيف 2022 و قبله صيف 2019..
بس عموما ده من أسباب إني بفضل بلجيكا في الصيف عن البلاد اللي حواليها..

With Omar Taher - مع عمر طاهر

25/06/2026

24/06/2026

24/06/2026

24/06/2026

24/06/2026

24/06/2026

24/06/2026

23/06/2026

23/06/2026

23/06/2026

Adresse

Site Web

Notifications

Raccourcis

Partager

Type