Senior Ahmed

28/06/2026

لو حد معاه فيزا اسبانيا او شنجن عامة وعايز يسافر بدون ما يدفع جنية لمدة 5 ايام شامل الطيران والاقامة يتواصل معايا
عندي حد طلب مني شخص لبرنامج ممول شامل كل حاجه
شخص واحد مش جروب او اسرة او عرسان علشان يكون الامر واضح

25/06/2026

19/06/2026

تأشيرة اليابان 🇯🇵

في طريقتين للحصول على الفيزا
الطريقة الأولى وهي التقليدية من السفارة
الطريقة التانية و هي ال E فيزا او الفيزا الالكترونية

الطريقة التانية تقدم عليها فقط لو انت معاك اقامة سارية دائمة او مؤقتة في بريطانيا او امريكا او السعودية او دول تانية حتلاقي القائمة كاملة على موقع وزارة الخارجية اليابانية لو عملت بحث ب The JAPAN eVISA system (electronic visa)

انا هنا للطريقة الاولي
الطريقة دي ببساطة انك بتملى استمارة اونلاين على الموقع الخاص بالسفارة وبتطبعها وتاخدها معاك تمضي عليها قدام موظف السفارة
وتاخد معاك الورق ده
١-صورة شخصية
٢-حجز الطيران
٣-حجز فندق
٤-حساب بنكي ٣ شهور
٥- جدول الرحلة ومعاها خطاب محترم كده
٦-جواب اتش ار مختوم وممضي
٧- اي باسبور قديم لو عندك
بتتسأل سؤالين ف السفارة وبعدها تاخد ورقة وتمشي وتروح بعدها ب ٥ ايام عمل. بتدفع وقت الحصول علي الفيزا فقط غير كده مش بتدفع ومفيش اختام ع الباسبور في حالة الرفض

14/06/2026

#فيزاكولومبيا
احسن حاجه انها تأشيرة الكترونية يعني لا هتروح سفاره ولا محتاج معاد ولا وجع قلب. بتطلع ف اسبوعين عمل وممكن توصل اشهر
هبتدي باهم ورقه بتقدمها ومن غيرها الفيزا تترفض علطول
١-اقرار بتكتب فيه بياناتك والغرض من السفر وانك مقتدر ماديًا وتمضي
٢- جواز سفر ساري ٦ شهور
٣-صورة حديثة 3*4 حد اقصي 300 KB

٤-اتش ار ليتر من شغلك فيه مرتبك ومختوم ومترجم طبعا لو عربي
٥-كشف حساب بنكي لاخر 6 اشهر بمبلغ كويس لانهم بيدققوا طبعا. طيب لازم حسابي يكون فيه كام ؟ مش مهم لانه مبيبصش للرقم اد ما بيبص للحركة بس الرقم لازم يكون مقبول لواحد هيصرف طيران بس مش اقل من ٦٠-٧٠ الف جنيه
٦-حجز مبدائى للطيران ذهاب و عودة وحجز فندق كمان لانه دلوقتي بيكتبلك ع الفيزا فندقك وممكن تكنسله بعدين عادي
٧- ودلوقتي بقوا يطلبوا تأمين سياحى ضد الامراض طوال مدة الاقامة فى كولومبيا لان الاول مكنوش بيطلبوه وتأمين أمان اللي ع الباسبور مقبول
٨-لو معاك فيز او باسبور قديم عليه فيز لاي دول تانيه ارفعه هيدعم موقفك جداً
——————————————-

الورق جاهز هتقدم ازاي ؟
هتبعت للسفارة ايميل هيردوا عليك ب لينك هتدخل تملي البيانات وورقك طبعاً جاهز pdf والورق كله ميعديش 5 MB ويكون ابيض واسود ومعاك ٣٠ دقيقه تملئ الابليكشن
ايوه عملنا كل ده وكله تمام وبعدين؟
بعد ما ترفع كل ده هيبعتولك لينك دفع علشان يدرسوا ملفك هتدفع تقريبا ٥٢ دولار انا مش متذكر الرقم بالظبط. ردهم حاجه من تلاته

١- رفض هيبعتلك رفض
٢-محتاجين ورق زياده هيبعتلك برضوا يقولك هما محتاجين ايه
٣-اتقبلت هيبعتلك لينك جديد خالص لدفع حوالي ٨٢ دولار تقريبا وبعدها الدفع بيومين هيبعتلك الفيزا علي الايميل
مدتها حسب السفاره كانوا بيدوها ٣ شهور ف المعظم لكن دلوقتي بقوا ممكن يدوهالك علي اد ما بتطلب عادي.
طب الفيزا صعبه؟ لا مش صعبه لو ورقك تمام هتاخدها مليون ف الميه وده اللي جربته مرتين لان معايا فيزتين لكولومبيا