30/10/2026
🚨 أوعى تعمل الحركة دي لو أنت صاحب شقة مأجرها.. لأنك ممكن تتحول من صاحب حق لمتهم!
لو أنت مالك شقة ومأجرها، والمستأجر اتأخر في دفع الإيجار، أو امتنع عن السداد، أو انتهى عقد الإيجار بتاعه ورفض يسيب الشقة.. خلي بالك من تصرف ممكن يضيع حقك ويعرضك للمساءلة الجنائية!
أوعى تكسر باب الشقة وتدخلها بنفسك!
بشوف ناس كتير بتنصح أصحاب العقارات وتقول لهم: اكسر الباب وادخل، دي شقتك وملكك!
لكن الكلام ده ممكن يدخلك في مشكلة قانونية أنت في غنى عنها.
ليه؟
لأن القانون مش بيحمي الملكية بس، ده كمان بيحمي الحيازة، ومينفعش تاخد حقك بإيدك حتى لو كنت صاحب الملك.
يعني إيه الكلام ده؟
يعني لو المستأجر امتنع عن دفع الإيجار، أو انتهت مدة عقد الإيجار ورفض يسلمك الشقة، يبقى من حقك تلجأ للقضاء وتتخذ الإجراءات القانونية وترفع دعوى طرد لاسترداد شقتك بالطريق القانوني.
لكن إنك تكسر الباب وتدخل بالقوة وتنتزع حيازة المستأجر بنفسك، ممكن تعرض نفسك لاتهامات جنائية وعقوبات، وتدخل في نزاعات أنت مش محتاجها، فضلًا عن احتمالية اتهامك بالاستيلاء على منقولات أو متعلقات خاصة بالمستأجر.
خد بالك.. مش معنى إن الشقة ملكك إن من حقك تستردها بالقوة!
خليك دايمًا صاحي وواعي، وخد حقك بالقانون، لأنك ممكن تكون صاحب الحق في البداية، لكن بسبب تصرف غلط تلاقي نفسك متهم بدل ما تكون صاحب شكوى.
⚖️ القانون في صفك لو اتعاملت معاه صح.
المستشار / مصطفى كامل
#محامي