15/09/2026
سینٹ بوناوینچر ہائی اسکول حیدرآباد میں وفاقی محتسب کے حوالے سے آگاہی سیشن
حیدرآباد، 10 ستمبر 2026: وفاقی محتسب سیکرٹریٹ، ریجنل آفس حیدرآباد کے زیرِ اہتمام سینٹ بوناوینچر ہائی اسکول حیدرآباد میں وفاقی محتسب کے کردار، خدمات اور عوامی شکایات کے ازالے کے حوالے سے ایک خصوصی آگاہی سیشن منعقد کیا گیا۔
سیشن میں جناب غلام رسول اپن، سینئر ایڈوائزر و انچارج، ریجنل آفس حیدرآباد اور ڈاکٹر سید رضوان احمد، ایڈوائزر نے طلبہ سے خطاب کیا۔ جناب غلام رسول اپن نے وفاقی محتسب کے ادارے کا مختصر تعارف پیش کرتے ہوئے اس کے دائرۂ اختیار، کردار اور وفاقی سرکاری اداروں سے متعلق عوامی شکایات کے مفت اور فوری ازالے کے طریقۂ کار سے آگاہ کیا۔
جناب غلام رسول اپن نے طلبہ کو تعلیم پر بھرپور توجہ دینے، سخت محنت، نظم و ضبط اور مستقل مزاجی کے ساتھ اپنے اہداف حاصل کرنے کی تلقین کی۔ انہوں نے خوشی کا اظہار کرتے ہوئے بتایا کہ وہ خود بھی سینٹ بوناوینچر اسکول کے سابق طالب علم ہیں اور انہوں نے اپنی اسکولی تعلیم اسی ادارے سے حاصل کی۔
ڈاکٹر سید رضوان احمد نے طلبہ سے خطاب کرتے ہوئے انہیں محنت، مطالعہ اور اپنے مقرر کردہ اہداف کے حصول کے لیے مسلسل جدوجہد کی ترغیب دی۔ انہوں نے طلبہ پر زور دیا کہ وہ انگریزی زبان سیکھنے اور اس پر عبور حاصل کرنے پر خصوصی توجہ دیں، کیونکہ موجودہ دور میں انگریزی پاکستان سمیت دنیا بھر میں اعلیٰ تعلیم، پیشہ ورانہ ترقی اور کامیابی کے لیے انتہائی اہم ہے۔ ڈاکٹر سید رضوان احمد نے بھی بتایا کہ وہ سینٹ بوناوینچر اسکول کے سابق طالب علم ہیں اور ان کی اسکولی تعلیم بھی اسی ادارے سے ہوئی ہے
سیشن کے آغاز پر جناب سلیم انجم، پرنسپل، سینٹ بوناوینچر ہائی اسکول اور سر عبدالرؤف شیرانی، آفس سپرنٹنڈنٹ و سینئر ڈسپلن انچارج نے معزز مہمانوں کا پرتپاک استقبال کیا۔ اس موقع پر اسکول انتظامیہ اور وفاقی محتسب سیکرٹریٹ کے افسران کے درمیان خوشگوار ماحول میں مفید گفتگو اور مختلف امور پر تبادلۂ خیال بھی ہوا۔
آگاہی سیشن کے دوران طلبہ کو وفاقی محتسب سیکرٹریٹ میں شکایات درج کرانے کے طریقۂ کار اور دستیاب آن لائن سہولیات کے بارے میں بھی معلومات فراہم کی گئیں۔ طلبہ نے سیشن میں بھرپور دلچسپی کا اظہار کیا۔
سیشن کے تمام انتظامات کی ذمہ داری جناب عفان علی، ڈی پی اے و میڈیا فوکل پرسن، ریجنل آفس حیدرآباد نے احسن طریقے سے انجام دی اور پروگرام کے کامیاب انعقاد میں اہم کردار ادا کیا۔
وفاقی محتسب سیکرٹریٹ کی جانب سے تعلیمی اداروں میں ایسے آگاہی سیشنز کا مقصد نوجوان نسل کو اپنے حقوق، وفاقی محتسب کے کردار اور شکایات کے ازالے کے نظام سے آگاہ کرنا، جبکہ طلبہ کو تعلیم، محنت اور مثبت سوچ کے ذریعے اپنے مستقبل کے اہداف حاصل کرنے اور ملک و قوم کی ترقی میں اپنا مؤثر کردار ادا کرنے کی ترغیب دینا ہے۔
وفاقی محتسب — عوام کی آواز، فوری اور مفت انصاف کی جانب ایک مؤثر قدم۔
