02/10/2026
Nagpasya ang na ang pagsuko sa karapatan sa minanang ari-arian ay maaaring ituring na isang donasyon kung nagpapakita ito ng layuning magbigay ng donasyon at natutugunan ang mga legal na kinakailangan.
Sa isang Desisyong isinulat ni Associate Justice Jhosep Y. Lopez, isinantabi ng Ikalawang Dibisyon ng Korte Suprema ang pinagsamang mga petisyon ni Felix G. Cruz at pinagtibay nito ang mga desisyon ng Court of Appeals (CA) na kumikilala sa bisa ng paglilipat ng dalawang minanang ari-arian nina Luis at Rosita Cruz sa kanilang mga anak na sina Robin at Osias.
Nag-ugat ang kaso sa dalawang lupang naiwan ni Judy Cruz na namatay na dalaga at walang iniwang testamento. Naiwan niya ang kanyang mga magulang na sina Luis at Rosita at limang kapatid, kabilang sina Felix, Robin, at Osias.
Matapos mamatay si Judy, magkahiwalay na pumirma sina Luis at Rosita sa notarized na Waivers of Rights kung saan isinuko nila ang kanilang mga karapatan sa mga ari-arian pabor kina Robin at Osias.
Kalaunan, lumagda sina Robin at Osias sa isang Extrajudicial Partition and Settlement of Estate at ipinarehistro sa kanilang mga pangalan ang mga ari-arian.
Pumirma rin sina Felix at dalawa pa nilang kapatid na sina Doris at Henry sa mga waiver kung saan isinuko nila ang anumang interes nila sa mga ari-arian. Si Felix, na abogado ng pamilya, ang naghanda ng mga dokumentong ito.
Matapos mamatay ang kanilang nanay, hiniling ni Felix na ipawalang-bisa ang paglilipat ng mga ari-arian at kanselahin ang mga titulo na nakapangalan kina Robin at Osias. Iginiit ni Felix na walang bisa ang paglilipat at dapat ay nanatiling bahagi ng ari-arian ng ina nilang si Rosita ang mga lupa kung saan may karapatan siyang manahin bilang isa sa mga tagapagmana.
Pinagtibay ng Korte Suprema ang mga desisyon ng trial court at Court of Appeals na nagsantabi sa reklamo ni Felix at kumikilala sa Waivers of Rights na pinirmahan nina Luis at Rosita bilang mga mabisang donasyon pabor kina Robin at Osias.
Ipinaliwanag nito na nang mamatay si Judy, awtomatikong napunta sa kanyang mga magulang bilang mga legal na tagapagmana ang pagmamay-ari ng kanyang mga ari-arian.
Bagamaโt tinawag na Waivers of Rights ang mga dokumentong nilagdaan nila, napag-alaman ng Korte Suprema na ang tunay na layunin nina Luis at Rosita ay i-donate ang mga ari-arian kina Robin at Osias.
Sa ilalim ng Article 749 ng Civil Code, kinakailangan ang mga sumusunod para maging mabisa ang donasyon ng real property: (1) mababawasan ang ari-arian ng donor; (2) magkakaroon ng katumbas na pagtaas sa ari-arian ng donee; (3) may layuning mag-donate; (4) maisagawa ang donasyon sa isang pampublikong dokumento; at (5) tanggapin ito ng donee. Kung nakasaad ang pagtanggap sa isang hiwalay na dokumento, dapat itong ipaalam sa donor.
Natugunan ang mga kinakailangang ito sa kasong ito. Isinuko nina Luis at Rosita ang kanilang pagmamay-ari sa mga ari-arian pabor kina Robin at Osias sa pamamagitan ng mga notarized na dokumentong hayagang nagbibigay ng pahintulot para sa paglilipat ng mga ito.
Samantala, tinanggap nina Robin at Osias ang donasyon nang isagawa nila ang Extrajudicial Partition and Settlement at ipinarehistro sa kanilang mga pangalan ang mga ari-arian. Ipinaalam nila kina Luis at Rosita ang kanilang pagtanggap sa pamamagitan ng mga hakbang na ito.
Basahin ang press release sa https://sc.judiciary.gov.ph/?p=174097.
Basahin ang Desisyon sa https://sc.judiciary.gov.ph/?p=168026.
Sumunod sa Credit Attribution Policy ng SC PIO: https://sc.judiciary.gov.ph/credit-attribution-policy/.
