27/06/2025
Sa ating lingguhang programa ngayong umaga ay idinaos sa ating lungsod ang pormal na panunumpa sa tungkulin ng mga halal na opisyal ng 4Ps Partylist kasunod ang isang programang pasasalamat at pagpupugay sa ating mga outgoing na konsehal at vice mayor.
Sa unang yugto ng programa ay napili tayo na pamunuan ang panunumpa sa tungkulin nina Congressman Marcelino Libanan at Congressman JC Abalos na muling uupo bilang kinatawan ng 4Ps Partylist. Isang karangalan ito para sa akin at kinikilala ng Mandaluyong ang lahat ng tulong na naibigay ng 4Ps Partylist sa mga Mandaleño.
Sa pangalawang yugto ng programa ay binigyan naman natin ng pasasalamat at pagkilala kay Konsehal Rodolfo "Kuyog" Posadas, na nagsilbing konsehal ng District 1 ng tatlong termino, simula July 1, 2016 at magtatapos itong June 30, 2025. Maraming salamat Konsehal Kuyog at hindi matatawaran ang kabuoang 36 taon sa serbisyo publiko.
Pasasalamat at pagkilala din ang ating iginawad kay Konsehal Anthony Suva na nagsilbi din sa District 1 simula noong 2022. Ngunit hindi dito nagtatapos ang paglilingkod ni Konsehal Suva dahil siya ay nakatakdang umupo muli bilang Vice Mayor ng Mandaluyong sa darating na July 1, 2025.
Atin ding binibigyan ng pasasalamat si Vice Mayor Menchie Abalos sa kaniyang natatanging panunungkulan mula July 1, 2022 at hindi niya iiwan ang serbisyo publiko dahil siya ay nakatakdang pumalit sa akin bilang susunod na Punong Lungsod ng Mandaluyong sa darating na buwan.
Bilang pagtatapos ay ako naman ang nagpapasalamat sa iginawad sa akin ng Sangguniang Panlungsod. Isang karangalan para sa inyong lingkod na tumayo muli bilang ama ng lungsod at nagpapasalamat ako sa lahat ng kawani ng city hall. Kung hindi dahil sa kanilang kasipagan ay hindi natin makakamit sa Mandaluyong ang tagumpay at kaunlaran na tinatamasa nito sa kasalukuyan.
Kaya't ang pagkilalang ibinigay ninyo sa akin ay hindi lamang ito para sa akin kundi para sa lahat ng kawani ng pamahalaang lungsod. Mabuhay kayo! Mabuhay ang Mandaluyong!
