Ako ay nagpasimula ng isang damayan para hikayatin ang mga kapwa kong mga Cordonians na tumulong sa pagpapabuti ng ating bayan. Ang motto natin na “God Bless Cordon” ay isang panalangin sa Diyos na sana ay pagpalain niya ang ating bayan kabilang ang ating mga pamilya, ang ating mga lupang pinagtataniman, ang ating mga simbahan na nagtuturo ng kabutihan, at ang ating mga opisyales na namumuno sa atin.
Alam kong minamahal nating lahat ang Cordon at para patuloy na pagpalain ng Diyos ang ating bayan, naniniwala ako na kailangan nating gawin ang mga sumusunod:
1. Mahalin ang Diyos
Una sa lahat, kailangan nating patatagin pa ang ating pananampalataya at pagmamahal sa Diyos. Ang totoong nagmamahal sa Diyos ay sumusunod sa kanyang utos na mahalin ang kapwa tao. Naniniwala ako na kung minamahal natin ang Diyos, maayos ang ating pakikitungo sa ibang tao.
2. Panatilihin ang Integridad
Ang ating integridad ay bunga ng ating pagmamahal sa Diyos. Kung minamahal natin ang Diyos, hindi tayo gagawa ng mga bagay na labag sa kanyang kagustuhan at gagawin lagi natin kung ano ang tama sa mata ng Diyos at ng tao.
3. Bukas sa Disiplina
Kung sakali mang makagawa tayo ng hindi tama, kailangang bukas tayo sa pagtatama para maisaayos ang ating mga buhay. Tanggapin natin ang pagdidisiplina sa atin para maitama ang ating pagkakamali.
4. Patuloy na Edukasyon
Kailangan nating ipagpatuloy ang pagdagdag sa ating kaalaman para maintindihan natin kung ano ang tama at mali. Kailangan din nating ituro sa mga bata kung ano ang mabuti at masama. Sana ay lagi nating pipiliin ang mabuti at hindi ang masama para laging maayos ang ating pakikisama sa lahat ng tao.
5. Sumunod sa Batas
Kailangan din nating sumunod sa mga batas saan mang lugar sa ating bayan. Magiging maayos ang ating mga paaralan, bukirin, palengke, at iba pang mga lugar kung lahat tayo ay hindi lumalabag sa anumang alituntunin.
6. Busilak na Layunin
Sana ay magkaroon tayo ng busilak na layunin sa buhay para lagi tayong handang tumulong sa lahat ng taong nangangailangan ng ating pagdamay.
Para matandaan natin ang aking mga sinabi, imemorize lang natin ang G-I-D-E-O-N.
G for God: mahalin nating lubos ang Diyos.
I for Integrity: panatilihing malinis ang ating integridad.
D for Discipline: kailangang bukas tayo sa pagdidisiplina.
E for Education: edukasyon para malaman ang mabuti at masama.
O for Obedience: maging masunurin tayo sa batas.
At N for Noble purpose in life: maging laging handa sa pagtulong sa kapwa.
Idinadalangin ko na sana ay lagi tayong pagpalain ng Diyos.
God bless Cordon.
