20/04/2026
Nilinaw ng ang pagtatangi sa aplikasyon ng acts of lasciviousness sa ilalim ng Republic Act (RA) Blg. 7610, o ang Special Protection of Children Against Abuse, Exploitation and Discrimination Act, at acts of lasciviousness sa ilalim ng Revised Penal Code (RPC).
Sa isang Desisyon na isinulat ni Associate Justice Henri Jean Paul B. Inting, pinagtibay ng En Banc ng Korte Suprema ang hatol na guilty kay Jeffrey L. Gramatica (Gramatica) para sa acts of lasciviousness sa ilalim ng Seksyon 5(b) ng RA 7610, pero binago ang hatol sa isa pang akusado, si ###2660399, at inilapat ang acts of lasciviousness sa ilalim ng Artikulo 366 ng Revised Penal Code (RPC).
Sa mga pinagsamang kasong ito na kinasasangkutan ng mga menor de edad na sina AAA, BBB, at CCC, naglatag ang Korte Suprema ng mga patnubay para matiyak ang wastong pagsasakdal ng mga kaso sa ilalim ng dalawang magkaibang batas na ito.
Kinasuhan si Gramatica ng acts of lasciviousness sa ilalim ng Seksyon 5(b) ng RA 7610 dahil sa pakikipagtalik kina AAA at BBB, na kapwa nalulong sa shabu.
Samantala, kinasuhan naman si ###266039 ng kaparehong kaso dahil sa panghihipo sa maseselang bahagi ng katawan ng kanyang apo na si CCC habang ito’y natutulog.
Depensa ni Gramatica, niligawan niya si BBB at nagkaroon sila ng sekswal na pagsasama pero hindi niya alam na isa itong menor de edad. Itinanggi naman ni ###266039 ang mga akusasyon at sinabing ginising lang niya si CCC para humingi ng tulong sa paglagay ng gamot sa mata.
Kapwa nagdesisyon ang Regional Trial Court at Court of Appeals na parehong nagkasala sina Gramatica at ###266039 ng acts of lasciviousness sa ilalim ng Seksyon 5(b) ng RA 7610 laban kina BBB at CCC.
Ang isang menor de edad ay sinasabing ginawan ng iba pang pang-aabusong sekswal kapag sila ay naging biktima ng acts of lasciviousness nang may kasamang pamimilit o impluwensiya ng nakatatanda. Sa kasong ito, 14 lang si BBB at 17 si CCC noong nangyari ang insidente. Si Gramatica ay 23, samantalang si ###266039 ay 62.
Pinagtibay ng Korte Suprema ang hatol kay Gramatica sa ilalim ng RA 7610, ngunit binago ang hatol ni ###266039 sa acts of lasciviousness sa ilalim ng Revised Penal Code (RPC). Ayon sa Korte, hindi angkop ang RA 7610 kung ang menor de edad ay ganap na walang kamalayan, pinilit lang, o walang kamalay-malay, dahil sa ganitong sitwasyon, hindi maituturing na sumang-ayon ang biktima sa pakikipagtalik.
Sa ilalim ng Seksyon 5 ng RA 7610, ang mga batang biktima ay sumailalim sa iba pang anyo ng sekswal na pang-aabuso bilang nakikilahok sa pakikipagtalik o malisyosong gawaing sekswal dahil sa pamimilit o impluwensiya ng isang nakatatanda.
Para malinaw ang saklaw ng acts of lasciviousness sa ilalim ng RA 7610 at sa ibang kaugnay na krimen sa ilalim ng RPC, naglatag ang Korte Suprema ng mga patnubay at isinasaalang-alang din ang RA 11648 na nagtaas ng edad ng sexual consent sa 16 taong gulang.
Una, angkop ang Seksyon 5(b) sa mga batang may edad 16 hanggang mas mababa sa 18 na sumasailalim sa sekswal na pang-aabuso.
Ikalawa, saklaw nito ang mga sitwasyon kung saan may depektibong pahintulot. Maaaring tila sumasang-ayon ang menor de edad, ngunit hindi ito bunga ng malayang kalooban kundi dahil sa pamimilit o impluwensiya ng isang nakatatanda. Kaya’t isang krimen ang pakikipagtalik sa batang pinagsamantalahan sa prostitusyon o sumailalim sa sekswal na pang-aabuso, kahit pa tila may pahintulot.
Ikatlo, hindi ito naaangkop kung ang akto ay may kasamang puwersa, pananakot, panlilinlang, pag-alis ng katinuan, kawalan ng malay, o matinding pang-aabuso ng awtoridad. Sa ganitong mga kaso, ang krimen ay papasok sa acts of lasciviousness sa ilalim ng RPC.
Ikaapat, kung ang biktima ay wala pang 12 o wala pang 16 taong gulang, at hindi saklaw ng Seksyon 5(b), ang krimen ay r**e o acts of lasciviousness sa ilalim ng RPC.
Sa kasong ito, si BBB ay isang batang pinagsamantalahan sa prostitusyon o iba pang sekswal na pang-aabuso dahil nakipagtalik siya kay Gramatica kapalit ng isang konsiderasyon, ang shabu, kaya may kriminal na pananagutan si Gramatica sa ilalim ng Seksyon 5(b) ng RA 7610.
Samantala, hindi naaangkop ang Seksyon 5(b) ng RA 7610 kay ###266039. Nilinaw ng Korte Suprema na hindi saklaw ng RA 7610 ang lahat ng acts of lasciviousness laban sa mga menor de edad na may edad 12 hanggang mas mababa sa 18. Ang batas ay naaangkop lamang kapag ang mga menor de edad ay nagbigay ng depektibong pahintulot sa gawaing sekswal.
Sa kasong ito, hindi sumang-ayon si CCC sa acts of lasciviousness dahil natutulog siya at wala siyang malay. Hindi ginamit ni ###266039 ang pamimilit o impluwensiya, kundi umasa sa kanyang moral na awtoridad bilang lolo niya, na itinuturing bilang pananakot. Dahil dito, pananagutan ni ###266039 ang acts of lasciviousness sa ilalim ng Artikulo 336 ng RPC, sa halip na RA 7610.
Para sa acts of lasciviousness sa ilalim ng Seksyon 5(b) na kinasasangkutan si BBB, hinatulan si Gramatica ng maximum na 17 taon, apat na buwan, at isang araw na pagkakakulong at iniutos na magbayad kay BBB ng PHP 150,000 bilang kabayaran at danyos, pati na rin ng multa na PHP 15,000.
Para sa acts of lasciviousness sa ilalim ng Artikulo 336 ng RPC, hinatulan si ###266039 ng maximum na anim na taon na pagkakakulong at iniutos na magbayad kay CCC ng PHP 450,000 bilang kabayaran at danyos na may karampatang interes.
Kinilala ng Korte Suprema na sa ilalim ng kasalukuyang mga batas, si ###266039, na gumawa ng kasuklam-suklam at asal-hayop na gawain laban sa kanyang menor de edad na apo, ay nahaharap sa mas mababang parusa kumpara sa RA 7610. Hinimok nito ang lehislatura na amyendahan ang umiiral na mga batas upang mas maprotektahang mabuti ang mga bata.
Basahin ang press release sa https://sc.judiciary.gov.ph/?p=162863.
Basahin ang buong Desisyon sa https://sc.judiciary.gov.ph/?p=162842.
Basahin ang Hiwalay na Sumasang-ayon na Opinyon ni Senior Associate Justice Marvic M.V.F. Leonen sa https://sc.judiciary.gov.ph/260233-266039-separate-concurring-opinion-senior-associate-justice-marvic-m-v-f-leonen/.
Basahin ang Sumasang-ayon na Opinyon ni Associate Justice Alfredo Benjamin S. Caguioa sa https://sc.judiciary.gov.ph/260233-266039-concurring-opinion-associate-justice-alfredo-benjamin-s-caguioa/.
Basahin ang Hiwalay na Sumasang-ayon na Opinyon ni Associate Justice Rodil V. Zalameda sa https://sc.judiciary.gov.ph/260233-266039-separate-concurring-opinion-associate-justice-rodil-v-zalameda/.
Sumunod sa Credit Attribution Policy ng SC PIO: https://sc.judiciary.gov.ph/credit-attribution-policy/.
