13/05/2026
Nilinaw ng na ang kawalan ng isang kontraktor ng mga kasangkapan, kagamitan, o makinarya ay hindi agad nangangahulugan na sangkot ito sa ipinagbabawal na labor-only contracting kung hindi naman kailangan ang mga kagamitam sa mismong trabahong ipinakontrata.
Sa isang Desisyon na isinulat ni Associate Justice Henri Jean Paul B. Inting, idineklara ng Ikatlong Dibisyon ng Korte Suprema na isang lehitimong job contractor ang MMA Competent Manpower & General Services, Inc. (MMA) at siyang tunay na employer nina Richard Delera at Dionel Quiling (mga nagpetisyon).
Isang domestic corporation ang MMA na nag-aalok ng human resource at support services sa mga kliyente, kabilang ang Philippine Foremost Milling Corp. (PFMC) kaugnay sa flour milling at Amigo Logistics Corp. (Amigo) na namamahala sa logistics tulad ng warehousing at trucking.
Itinalaga ng MMA ang mga nagpetisyon sa PFMC at Amigo bilang feed mill bagger at pollard stacker. Matapos silang maiulat dahil sa mga paglabag sa patakaran, isinailalim sila sa preventive suspension ng MMA ngunit napawalang-sala at napawalang-bisa ang mga paratang laban sa kanila.
Hiniling ng PFMC at Amigo ang reassignment ng mga nagpetisyon. Kinailangan silang ilagay ng MMA sa floating status noong una pero kalaunan ay inalok ng reassignment sa Cavite at Bataan, na kanilang tinanggihan. Nagsampa sila ng reklamo para sa iligal na dismissal. Sinabi nilang isang labor-only contractor ang MMA at mga regular na empleyado sila ng PFMC at Amigo.
Nagpasya ang Korte Suprema na isang lehitimong kontraktor ng paggawa ang MMA, na may malaking pondo na nagkakahalaga ng PHP 27 milyon, kahit na wala itong mga kasangkapan, kagamitan, o makinarya.
Kinilala ng Korte Suprema ang pagkakaiba ng legitimate labor contracting (lehitimong pangongontrata ng paggawa) at ng ipinagbabawal na labor-only contracting. Sa lehitimong pangongontrata, maaaring kumuha ang mga employer ng isang kontraktor para magsagawa ng mga partikular na trabaho, basta’t sapat ang pondo at mga kagamitan ng kontraktor. Sa ipinagbabawal na labor-only contracting, nagbibigay lamang ang kontraktor ng mga manggagawa nang walang sapat na pondo at kagamitan, at nagsasagawa ang mga manggagawa ng mga tungkuling direktang may kaugnayan sa pangunahing negosyo ng employer.
Sa kasong Conqueror Industrial Peace Management Cooperative v. Balingbing, na nagbibigay ng limitadong eksepsiyon kung saan ang trabaho ay pansuporta lamang at hindi nangangailangan ng mga kagamitan, sinabi ng Korte Suprema na nagsagawa ang mga nagpetisyon ng mga post-production na gawain katulad ng pagpapakete at pag-iimbak, na sumusuporta lamang sa operasyon ng PFMC at Amigo.
Dahil hindi nangangailangan ng espesyal na makinarya o teknikal na kadalubhasaan ang mga tungkuling ito, nagpasya ang Korte na maaari itong ipakontrata kahit walang malaking pamumuhunan sa mga kagamitan.
Basahin ang press release sa https://sc.judiciary.gov.ph/?p=165353.
Basahin ang Desisyon sa https://sc.judiciary.gov.ph/?p=164807.
Sumunod sa Credit Attribution Policy ng SC PIO: https://sc.judiciary.gov.ph/credit-attribution-policy/.
