Edmond Cuschieri

10/10/2026

Tagħmel ħalba xita u diversi garaxxijiet fi Triq il-Għasel, il-Mosta, jisfaw mgħarrqa bl-ilma u żbruffat tad-drenaġġ. Din hija s-sitwazzjoni wara x-xogħol ħażin li sar minn Infrastructure Malta.

Ir-residenti qed ibatu l-konsegwenzi ta’ xogħol li kellu jsir sewwa mill-ewwel u li għalih żgur tħallsu flus tajba.

Dan qed ngħidu għaliex, qabel sar dan ix-xogħol, f’din it-triq qatt ma kien hemm problemi ta’ dan it-tip. Għalhekk ma jistax ikun li nwaħħlu fin-natura u nieqfu hemm. Irridu naraw kif ix-xogħol li sar ħoloq din il-problema u min se jerfa’ r-responsabbiltà għaliha.

Issa x’se jiġri? Ir-residenti se jitħallew jiffaċċjaw din il-problema waħedhom? X’għajnuna se jingħataw għall-ħsarat li ġarrbu, u meta se jsir ix-xogħol meħtieġ biex ma jerġgħux jispiċċaw fl-istess sitwazzjoni mal-ħalba xita li jmiss?

30/09/2026

Nikkundanna bil-qawwa l-aggressjoni fuq il-pulizija li seħħet illum fil-Belt u nesprimi s-solidarjetà tiegħi mal-membri involuti. Nawgura fejqan ta’ malajr lil dawk li weġġgħu waqt li kienu qed jaqdu dmirhom.
Mingħajr ma nidħol fil-mertu tal-każ, għandna nistaqsu bis-serjetà jekk il-pulizija humiex jingħataw it-taħriġ prattiku u l-appoġġ meħtieġ biex jaffaċċjaw il-vjolenza. L-SOPs għandhom jagħtuhom direzzjoni ċara u fiduċja biex jaġixxu skont il-liġi, mhux inisslu fihom il-biża’ li jagħmlu xogħolhom.
Min jipproteġina għandu jkun protett, imħarreġ u sostnut. Meta l-pulizija jibżgħu jaġixxu, is-sigurtà tagħna lkoll tbati.

20/09/2026

Nistedinkom taqraw dawn ħsibijieti li jidhru fil-ħarġa tal-Mument u li jkomplu mid-diskors tiegħi ta' nhar il-Ġimgħa fuq il-Fosos.

19/09/2026

Mument waqt intervent tiegħi lbieraħ fuq il-Fosos matul il-festi tal- Indipendenza.
Bħal dejjem kien ta' pjaċir u unur li niltaqa' magħkom u nsir nafkom aktar.
Inħeġġiġkom sabiex kemm ilejla u kemm għada tiġu ħdejna ħalli ngawdu dawn iċ-ċelebrazzjonijiet u flimkien nkomplu nagħtu appoġġ lill-maħbub tagħna Dr Alex Borg u lil Partit Nazzjonalista.

30/08/2026

Nistedinkom taqraw il-kontribuzzjoni tiegħi għal din il-ġimgħa fuq il-gazzetta il-Mument.

26/08/2026

https://tvmnews.mt/news/tislima-lil-fr-ray-bonnici-fi-tmiem-is-servizz-tieghu-mal-korp-tal-pulizija/

Ftit jiem ilu, Fr Ray Bonniċi, l-kapillan tal-korp tal-pulizija irtira wara servizz twil ta’ aktar minn tletin sena.
Fr Ray, nixtieq nirringrazzjak minn qalbi għas-snin kollha li fihom ħdimt fis-skiet, ħafna drabi ’l bogħod mill-għajnejn, biex tkun ta’ sostenn għall-membri tal-Korp u għall-familji tagħhom.
Kien hemm żminijiet fejn fil-Korp ftit li xejn kien jeżisti sostenn professjonali għal min ikun għaddej minn trawma jew minn żmien diffiċli. F’dawk il-mumenti, għal ħafna membri, kont int li kont hemm: biex tisma’, biex tagħti kelma ta’ faraġ u, fuq kollox, biex tkun spalla għal min kellu bżonnha.
Dan huwa servizz li forsi mhux dejjem jidher u mhux dejjem jingħata l-għarfien li jixraqlu, iżda dawk li għaddew mill-Korp matul dawn is-snin jafu kemm kien importanti.
Għal dan kollu, Fr Ray, grazzi mill-qalb.
Nawguralu kull ġid għal dan il-kapitlu ġdid ta’ ħajtu.

Read in English Il-Kappillan tal-Korp tal-Pulizija, Fr Raymond Bonnici illum temm is-servizz tiegħu mal-Korp tal-Pulizija…

16/08/2026

Bonġu,
Nistedinkom taqraw l-artiklu tiegħi ta' din il-ġimgħa li ssibuh fil-ħarġa tal-gazzetta Il-Mument illum 16/08/2026.

13/08/2026

Issa li mid-dehra ser tingħalaq l-Għassa ta’ Birkirkara, f’waħda mill-akbar lokalitajiet f’Malta u b’waħda mill-akbar popolazzjonijiet, wieħed bilfors jistaqsi: x’inhu l-pjan?
Għax diffiċli wieħed jemmen li r-ripussess tal-fond mis-sidien tiegħu hija xi ħaġa li niżlet mis-sema mil-lum għal għada. Jekk is-sidien tal-fond ilhom jieħdu passi sabiex jieħdu lura l-proprjetà tagħhom, l-awtoritajiet żgur kellhom, jew tal-inqas messhom kellhom, żmien biżżejjed sabiex jippreparaw għal din l-eventwalità.
Allura għaliex jidher li wasalna sal-punt li Għassa tal-Pulizija f’lokalità importanti bħal Birkirkara tista’ tagħlaq mingħajr ma jidher li hemm diġà alternattiva ċara u lesta?
Fejn hu l-ippjanar? Fejn hu l-fond alternattiv? Fejn hu l-pjan ta’ kontinġenza sabiex jiġi żgurat li r-residenti ta’ Birkirkara ma jitilfux servizz essenzjali?
Għassa tal-Pulizija mhijiex ħanut li jekk jagħlaq illum, għada nfittxu post ieħor. Hija parti mill-infrastruttura tas-sigurtà ta’ lokalità u għandha tkun ippjanata bħala tali.
U dan kollu jkompli jqajjem mistoqsijiet aktar serji dwar kif qiegħda tiġi ppjanata l-preżenza tal-Pulizija fil-komunitajiet tagħna. Fl-istess waqt li qed nisimgħu bis-suldati fit-toroq sabiex jgħinu fiż-żamma tal-ordni pubblika, issa qed nisimgħu wkoll li waħda mill-akbar lokalitajiet tal-pajjiż tista’ titlef l-Għassa tagħha.
Ma riedux ukoll ninsew li din l-għassa kienet taqdi ukoll l-irħula ta' Hal-Lija, Hal-Balzan, L-Iklin u H' Attard li l-għasses fihom ilhom li ngħalqu żmien.
Allura x’ser nagħmlu? Nkomplu Naagħlqu l-għasses u mbagħad nitfgħu l-Armata tagħmel patrol fit-toroq?
Birkirkara jistħoqqilha risposta ċara. Ir-residenti għandhom dritt ikunu jafu mhux biss jekk l-Għassa ser tagħlaq, iżda x’kien il-pjan tal-awtoritajiet minn meta sar magħruf li l-fond seta’ jiġi ripussessat mis-sidien, u x’inhu l-pjan issa sabiex is-servizz tal-Pulizija fil-lokalità jibqa’ jingħata mingħajr interruzzjoni.
Is-sigurtà pubblika titlob ippjanar minn qabel, mhux soluzzjonijiet ta’ emerġenza wara li l-problema tkun diġà waslet fuq l-għatba.

12/08/2026

Milli jidher ittieħdet deċiżjoni politika li ġewwa s-Swieqi u l-inħawi tal-madwar jibdew jiġu skjerati suldati sabiex jgħinu fiż-żamma tal-ordni pubblika.
Ħafna laqgħu din l-aħbar b’sodisfazzjon u nifhem għalfejn kellha titieħed din id-deċiżjoni u x' wassal għal tali talba. Imma naħseb li qabel nifirħu għandna nieqfu ftit u nifhmu xi tfisser verament deċiżjoni bħal din.
Li jkollok suldati fit-toroq sabiex tinżamm l-ordni pubblika mhijiex xi ħaġa normali f’pajjiż demokratiku. Malta m’għandhiex korpi paramilitari bħall-Carabinieri fl-Italja jew il-Gendarmerie fi Franza. Għandna separazzjoni ċara bejn ir-rwol tal-Pulizija u dak tal-Forzi Armati, u għal raġuni tajba.
Il-Pulizija huma mħarrġa sabiex jaħdmu kuljum mal-popolazzjoni ċivili, jinfurzaw il-liġi, jipprevjenu r-reati u jżommu l-ordni pubblika. Is-suldat għandu taħriġ, funzjoni u mentalità operattiva differenti.
Għalhekk, jekk wasalna f’punt fejn jeħtieġ li ndaħħlu lis-suldati fit-toroq biex jagħmlu xogħol li normalment huwa tal-Pulizija, il-mistoqsija għandha tkun waħda serja ħafna:
X’wassalna s’hawn?
Li ser inniżlu l-armata fit-toroq tagħna ma jfissirx li saret xi rebħa għaż-żamma tal-ordni. Għall-kuntrarju, hija ammissjoni li l-problema tal-ordni pubblika kibret tant li l-istrutturi ordinarji tal-Istat m’għadhomx jitqiesu bħala biżżejjed sabiex ilaħħqu magħha.
U hemm mistoqsijiet oħra li rridu nagħmlu. X’se jkunu eżattament is-setgħat tas-suldati? Taħt liema qafas legali se jaġixxu? Min se jkun responsabbli mill-operat tagħhom? X’taħriġ għandhom sabiex jintervjenu f’sitwazzjonijiet ma’ ċittadini? X’inhuma r-regoli dwar l-użu tal-forza, it-tfittxija, iż-żamma ta’ persuni u l-arrest?
Dawn mhumiex dettalji. Dawn huma mistoqsijiet li jolqtu direttament id-drittijiet taċ-ċittadini u r-responsabbiltà tal-Istat.
Ilna ngħidu li rridu ninvestu bis-serjetà fil-Korp tal-Pulizija: aktar riżorsi, aktar preżenza fit-toroq, kundizzjonijiet aħjar u Korp b’saħħtu biżżejjed biex jagħmel xogħlu.
Jekk minflok wasalna biex nibagħtu lis-suldati jagħmlu xogħol ta’ ordni pubblika, xogħol il-puizija, allura m’għandniex għalfejn niċċelebraw.
Għandna għalfejn ninkwetaw dwar kif wasalna s’hawn.
F’demokrazija normali, is-suldat jiddefendi l-pajjiż.
Il-Pulizija jżommu l-ordni fost il-popolazzjoni ċivili.
Meta nibdew inħalltu dawn iż-żewġ rwoli, ikun wasal iż-żmien li nagħmlu mistoqsijiet serji ħafna.

26/07/2026

Il-Ħadd it-tajjeb lil kulħadd.

Nistedinkom taqraw il-kontribuzzjoni tiegħi ta' din il-ġimgħa fil-gazzetta il-Mument.