Хуульч А.Базар

17/04/2026

Үндэсний цэцэрлэгт хүрээлэнгийн газарт Стадион, Театр барина гэх НИТХ-ын шийдвэрийг шүүхийн маргаан дуустал түдгэлзүүлэх шийдвэрийг анхан шатны шүүх гаргалаа.

Шүүгчийн захирамжид хэргийн оролцогчид гомдол гаргах эрхтэй. Өнөөдрийн захирамж нь эцсийн шийдвэр биш гэсэн үг. Гэхдээ ямартай ч анхан шатны шүүх бидний хүсэлтийг хүлээж авлаа.

Хуульч А.Базар, Б.Амгаланбаатар
Kheruga Partners LLC

16/04/2026

Үндэсний цэцэрлэгт хүрээлэнгийн газартай холбоотой маргааны шүүхийн урьдчилсан хэлэлцүүлэг 1 хоногоор хойшлогдлоо.

Үндэсний цэцэрлэгт хүрээлэнгээс төлөөлөл ирээгүйтэй холбоотой хэлэлцүүлэг хойшлов.

Өмнө 2026.4.06-ны өдөр шүүхийн хэлэлцүүлэг болоход бас Хүрээлэнгээс хүн ирээгүй гэх шалтгаанаар актын биелэлт түдгэлзүүлэх асуудал хэлэлцэхийг хойшлуулж байсан.

Маргааш 11:00 цагаас урьдчилсан хэлэлцүүлэг болно.

Хуульч А.Базар
Kheruga Partners LLC

10/04/2026

Хүрээлэнгийн газартай холбоотой захиргааны хэрэгт урьдчилсан хэлэлцүүлэг зарлагдав.

2026.4.16-ны өдөр 11.00 цагаас Нийслэл дэх Захиргааны хэргийн анхан шатны шүүхэд урьдчилсан хэлэлцүүлэг болно. Уг хэлэлцүүлгээр НИТХ-ын Тогтоолын биелэлтийг захиргааны хэрэг шүүхээр шийдэгдэх хүртэлх хугацаагаар түдгэлзүүлэх тухай бидний хүсэлтийг хэлэлцэнэ.

Урьдчилсан хэлэлцүүлэг шүүхийн байранд нээлттэй болох тул сонирхсон хүмүүс очиж сууж, үзэж болдог. Гэхдээ танхимын багтаамжаас хамаараад олон хүн суух боломжгүй.

Хуульч А.Базар
Kheruga Partners LLC

07/04/2026

Үндэсний цэцэрлэгт хүрээлэнгийн маргааны тухай

Шүүхээс 2026.4.06-ны өдөр урьдчилсан хэлэлцүүлэг хийгээд нотлох баримт цуглуулах тухай бидний бүх хүсэлтүүдийг хангаж шийдвэрлэсэн. Хариуцагч болох НИТХ талаас гаргасан хүсэлтийн зарим хэсгийг хангаж бас нотлох баримт цуглуулахаар болсон. Хүрээлэнгийн үйл ажиллагааны тайлан, анх Хүрээлэнг байгуулсан шийдвэрүүд, тэндэх усны нөөцийн талаар, худагны талаар, Хүрээлэнгийн төлөвлөлтийн талаар гэх мэт баримтуудыг цуглуулахаар болсон.

Урьдчилсан хэлэлцүүлэгт Үндэсний цэцэрлэгт хүрээлэн талаас хүн оролцоогүй. Тийм учраас НИТХ-ын шийдвэрийг түдгэлзүүлэх тухай бидний хүсэлтийг шүүх хэлэлцэхгүй хойшлуулсан. Хүрээлэнгийн төлөөллийг оролцуулж байж тус асуудлыг хэлэлцэхээр болсон.

За шүүх дэх ажлын явц нэг иймэрхүү байна даа.

Хуульч А.Базар
Kheruga Partners LLC

30/03/2026

Хүрээлэнгийн маргааны талаарх шинэ мэдээлэл

Хүрээлэнгийн газарт театр, стадион барих шийдвэрийг хүчингүй болгуулахаар шүүхэд хандсаны дагуу шүүхийн процесс үргэлжилж байгаа.

Дараах хоёр шинэ мэдээг хүргэмээр байна.

1) Тухайн маргааны улмаас Хүрээлэнгийн эрх, хууль ёсны ашиг сонирхол хөндөгдөнө гэж үзэж, захиргааны хэрэгт Үндэсний цэцэрлэгт хүрээлэнг оролцуулах тухай бидний хүсэлтийг шүүх хангасан. Одоо Хүрээлэн шүүхийн маргаанд оролцоод явна.

2) 2026.4.06-ны өдөр 10.00 цагаас урьдчилсан хэлэлцүүлэг болно. Үүгээр бидний гаргасан нотлох баримтууд цуглуулах хүсэлтүүдийг шийдвэрлэхээс гадна актын биелэлтийг түдгэлзүүүлэх асуудлыг бидний хүсэлтийн дагуу хэлэлцэнэ.

Хэрэв НИТХ-н шийдвэрийн биелэлтийг шүүхээс түдгэлзүүлвэл шүүхийн маргаан дуустал Хүрээлэнгийн газарт барилгын ажил явагдахгүй болно.

Хуульч А.Базар
Kheruga Partners LLC

27/03/2026

Явган хүний замыг чөлөөлүүлж, аюулгүй зорчих боломж бүрдүүлэх өмгөөллийн ажлыг хийсэн юм.

Одоо шүүхийн шийдвэр нь биелэгдэж, энэ хууль бус барилгыг буулгачвал явган хүний зам чөлөөтэй болох гээд байна.

23/03/2026

Цэцэрлэгт хүрээлэнд барилга барих тухай Нийслэлийн иргэдийн Төлөөлөгчдийн Хурлын шийдвэрийг хүчингүй болгуулахаар шүүхэд хандаад явж байна. Шүүхийн процесс үргэлжилж байгаа.

Нийслэлийн Хурлаас шүүхэд хариу тайлбар ирүүлэхгүй байсааар байгаад саяхан тайлбар ирүүлсэн.

Бид Хурлын шийдвэрийг түдгэлзүүлж өг гэдэг хүсэлтийг шүүхэд өгсөн. Нийслэлийн иргэдийн Төлөөлөгчдийн Хурлын шийдвэрийг түдгэлзүүлэх эсэх асуудал удахгүй шүүхээр шийдэгдэнэ.

НИТХ-аас шүүхэд ирүүлсэн тайлбартай зургаар танилцана уу 👇

25/02/2026

Нийслэлийн иргэдийн Төлөөлөгчдийн Хурлаас Үндэсний цэцэрлэгт хүрээлэнгийн газарт Театр, стадион барих шийдвэр гаргасныг бид хүчингүй болгуулахаар шүүхэд хандсан билээ. Шүүх манай нэхэмжлэлийн дагуу хэрэг үүсгэж, НИТХ-д нэхэмжлэлийг гардуулсан бөгөөд тайлбар өгөхийг шаардсан.

Гэвч Нийслэлээс шүүхэд тайлбар ирүүлэхгүй байсаар л байна…

23/02/2026

Залилагчдад таны хувийн мэдээлэл хэрэгтэй байдаг❗️

Яагаад гэвэл таны банкны данс руу нэвтрэх гээд байгаа юм. Тэгээд таны мөнгийг хуу хамаад алга болно.

Иймд таны хувийн мэдээллийг асууж, нэхэж эхэлсэн л бол та маш няхуур хандаж, шалгаж эхэл❗️❗️❗️

Тэдний хувийн мэдээлэл олж авах арга нь олон янз. Жишээ нь, банкнаас ирсэн мэт мэйл илгээх, “банкан дахь өөрийн мэдээллээ шинэчлэхгүй бол данс чинь хаагдах гэж байна” гэж бичих гэх мэт янз бүрийн аргаар таны хувийн мэдээллийг олж авдаг юм шүү.

13/02/2026

Би дараах хоёр төрлийн яриа, саналд жоохон дургүй талтай 👇

1️⃣Ямар ч цаг товлоогүй байж “өнөөдөр уулзах уу” гэдэг санал.

Хэн ажилгүй байж байв гэж дээ. Ихэнхдээ төлөвлөсөн ажилтай болохоор шууд тэр өдөртөө уулзах боломж хомс шүү дээ. Яахав, дотно найз, ах дүү бол өөр хэрэг.

2️⃣Юу ярих нь тодорхойгүй зүгээр л “уулзаж байгаад ярих уу” гэдэг санал.

Нээх дотно, хувийн харилцаатай биш бол, ажил ярих гэж байгаа бол энэ онцгүй шд. Жишээ нь, нэг ажил байна, зөвлөгөө авах гсн юм, өмгөөлүүлэх гэсэн юм гэнэ. Ядаж товч мэдээлэл өгөөч, ямар зүйл бол гэхээр “уулзаж байгаад ярих уу” гэнэ.

Үгүй ээ. Надад хэрэгцээгүй, миний чадахгүй эсвэл би ажиллахыг хүсэхгүй зүйл байвал уулзаж байгаад ярих нь цаг үрсэн хэрэг болно. Иймд уулзах эсэхээ шийдэхийн тулд ядаж товч мэдээлэл өгвөл зүгээр санагддаг шүү.

За тэгээд зөвөөр ойлгоод, хэдүүлээ алдаагаа бага багаар засаад явбал хөгжинэ дөө. Бид бүгдээрээ сул талтай, дутагдалтай. Гол нь тэрийгээ засаад хөгжөөд явах чухал.

08/01/2026

Шүүх нэхэмжлэлийг хүлээж авсан тул шүүхийн процесс үргэлжилж байгаа болно🔥🙏

Үндэсний цэцэрлэгт хүрээлэнгийн 40 га газарт Театр, стадион барих тухай шийдвэрийг Нийслэлийн иргэдийн Төлөөлөгчдийн хурлаас гаргаад байгаа билээ.

Өмгөөлөгч Б.Амгааланбаатарын хамт НИТХ-ын тухайн шийдвэрийг хүчингүй болгуулах нэхэмжлэлийг шүүхэд гаргалаа. Учир нь, Хүрээлэнгийн газар бол ундны усны нөөц, усны хамгаалалтын бүсэд хамаардаг, иргэд амарч зугаалдаг чухал газар. Иймд хүрээлэн буй орчныг хамгаалах, нийтийн эрх ашгийг хамгаалах үүднээс ийнхүү шүүхэд нэхэмжлэл гаргалаа.

Хэрэв шүүх бидний нэхэмжлэлийг хүлээж авбал НИТХ-ын дээрх шийдвэр хууль ёсны эсэхийг хэлэлцэх болно. Нэхэмжлэл хүлээн авах эсэхийг шүүх 7 хоногт багтаан шийдэх учиртай.

Шүүхийн үйл явцын талаар мэдээлэл өгч байх болно.

02/01/2026

Үндэсний цэцэрлэгт хүрээлэнгийн газарт барилга барих нь зөв үү?

Би үүнийг буруу, хууль бус гэж үзсэн тул тухайн шийдвэрийг хүчингүй болгуулахаар шүүхэд хандсан.

Шүүх нэхэмжлэлийг хүлээн авах эсэхийг 2026.01.06-ны өдөрт багтаан шийднэ. Хэрэв нэхэмжлэл хүлээн авбал хэрэг үүсэж, шийдвэр хуульд нийцсэн эсэхийг шүүх дэнслэх болно.

Хүрээлэнгийн газарт театр, стадион барих нь зөв үү? Та юу гэж бодож байна? Өөрийн бодол, саналаа хуваалцахыг хүсье.

Хуульч А.Базар
Kheruga Partners LLC