23/08/2026
အခုတလော #ဆောက်လုပ်ခွင့်ပါမစ် ကိစ္စနဲ့ပက်သက်ပြီးဂယက်ထလို့ အိမ်ဆောက်မယ်ဆို ဆောက်လုပ်ခွင့်ပါမစ်လျှောက်ထားပုံလေးကို ပြောပြချင်ပါတယ်။
ကျနော်က သန်လျှင် Base Construction ဖြစ်လို့ သန်လျှင်မှာ အိမ်ဆောက်မယ်ဆို သန်လျှင်စည်ပင်မှာ ဆောက်လုပ်ခွင့်လျောက်ပုံကို ပြောပြမယ်။
သန်လျှင်မြို့နယ် စည်ပင်သာယာရေးအဖွဲ့တွင် အိမ်ဆောက်လုပ်ခွင့် (ပါမစ်) လျှောက်ထားရန်အတွက် အောက်ပါအတိုင်း အဆင့်ဆင့် ဆောင်ရွက်ရပါမည်။
အဆင့် (၁) - လျှောက်လွှာထုတ်ယူခြင်း
* မိမိ၏ မြေပိုင်ဆိုင်မှုအထောက်အထား (ပုံစံ-၁၀၅) အား ယူဆောင်၍ သန်လျှင်မြို့နယ်စည်ပင်ရုံးတွင် အိမ်ဆောက်လုပ်ခွင့် လျှောက်လွှာပုံစံကို ထုတ်ယူပါ။
* (မှတ်ချက်။ ။ ပုံစံ-၁၀၅ သက်တမ်းကုန်နေပါက မြေစာရင်းဦးစီးဌာနရုံးတွင် သက်တမ်းတိုးခြင်းကို ကြိုတင်ဆောင်ရွက်ထားရပါမည်။)
အဆင့် (၂) - လိုအပ်သော စာရွက်စာတမ်းပြင်ဆင်ခြင်း
လျှောက်လွှာနှင့်အတူ ပူးတွဲတင်ပြရန် ပြင်ဆင်ရမှာတွေကတော့
2ထပ်ခွဲနှင့်အောက် အဆောက်အဦးများအတွက်
* ပိုင်ဆိုင်မှုအထောက်အထား အနေနဲ့ မြေပုံနှင့် မြေရာဇဝင် (ပုံစံ-၁၀၅) မူရင်း။
* ပိုင်ရှင်အထောက်အထား အဖြစ် အိမ်ထောင်စုဇယားမိတ္တူနှင့် မှတ်ပုံတင်မိတ္တူ၊ မှတ်ပုံတင်ပြီး အရောင်းဝယ်စာချုပ် မိတ္တူ။
* အနည်းဆုံး RE (Construction) လက်မှတ်ထိုးထားသော Architecture Drawing တစ်စုံ
3ထပ်နှင့်အထက် အဆောက်အဦးများအတွက်
အထက်ပါစာရွက်စာတမ်းများအပြင်
* Architecture Drawing၊ Structure Drawing တို့ကိုမှတ်ပုံတင်အင်ဂျင်နီယာ RSE Engineer လက်မှတ်
ရေးထိုးထားရမည်။ (မြန်မာနိုင်ငံအဆောက်အအုံဆိုင်ရာ လုပ်ထုံးလုပ်နည်း MNBC-2025 နှင့်အညီ ဖြစ်ရမည်)။
* Etab Soft Copy & Structure Calculation: အဆောက်အအုံ ကြံ့ခိုင်မှုတွက်ချက်မှုနှင့် ဆော့ဖ်ဝဲလ်ဖိုင်။
* Stability Checking: အဆောက်အအုံ တည်ငြိမ်မှုစစ်ဆေးချက်။
* Soil Test: မြေစမ်းသပ်ချက် အစီရင်ခံစာ။
* ရေဆွဲပုံစံများ: အဆောက်အအုံ၏ အရှေ့၊ အနောက်၊ ဘေးတိုက်အမြင်ပုံများ၊ ဖြတ်ပိုင်းပုံများနှင့် အင်ဂျင်နီယာဌာနက သတ်မှတ်ထားသော ပုံစံအတိုင်း ပြည့်စုံစွာ ဆွဲသားထားသော ရေဆွဲပုံစံ။
အဆင့် (၃) - လျှောက်လွှာဖြည့်စွက်ခြင်းနှင့် ဝန်ခံကတိပြုခြင်း
* အဆောက်အအုံဆောက်လုပ်ခွင့်လျှောက်လွှာ မှာအိမ်ရှင်အမည်၊ ဆောက်လုပ်မည့်နေရာ ၊ အဆောက်အအုံအမျိုးအစား ၊ အခြေခံအုတ်မြစ် အမျိုးအစား၊ နံရံ၊ ကြမ်းခင်း၊ အမိုး၊ အလျား/အနံ/အမြင့် တို့ကို ပြည့်စုံစွာ ဖြည့်စွက်ရပါမည်။
* ဝန်ခံချက် : ခွင့်ပြုချက်ရရှိသည့်အတိုင်း ဆောက်လုပ်ရန်၊ (၃ ထပ်နှင့်အထက်ဖြစ်ပါက) ဖောင်ဒေးရှင်း၊ တိုင်၊ ယက်မ ဆောက်လုပ်ပြီးတိုင်း စည်ပင်သို့ အဆင့်ဆင့် အစစ်ဆေးခံရန်၊ အစစ်ဆေးမခံဘဲ ကွန်ကရစ်လောင်းပါက အရေးယူမှုခံယူရန် ဝန်ခံလက်မှတ်ရေးထိုးရပါမည်။
* ဝန်ခံကတိပြုလွှာ : သတ်မှတ်ထားသော မြေနေရာနှင့် စတုရန်းဧရိယာထက် ကျော်လွန်ဆောက်လုပ်ခြင်း၊ လွဲမှားခြင်းရှိပါက ဖြိုဖျက်သည်အထိ အရေးယူမှုကို ခံယူပါမည်ဟု အိမ်ရှင်မှ ဝန်ခံကတိပြု လက်မှတ်ရေးထိုးရပါမည်။
အဆင့် (၄) - ပတ်ဝန်းကျင်နှင့် ရပ်ကွက်အုပ်ချုပ်ရေးမှူး ထောက်ခံချက်ရယူခြင်း
* မိမိဆောက်လုပ်မည့် အဆောက်အအုံအနီးပတ်ဝန်းကျင်ရှိ အရှေ့၊ အနောက်၊ တောင်၊ မြောက် အိမ်နီးနားချင်းများမှ ကန့်ကွက်ရန်မရှိကြောင်း (အမည်နှင့် လက်မှတ်) ရယူရပါမည်။
* ၎င်းနောက် သန်လျှင်မြို့နယ်၊ သက်ဆိုင်ရာ ရပ်ကွက်အုပ်ချုပ်ရေးမှူးရုံး သို့သွားရောက်၍ ကန့်ကွက်ရန်မရှိကြောင်း စစ်ဆေးမှုခံယူကာ ရပ်ကွက်အုပ်ချုပ်ရေးမှူး၏ ထောက်ခံချက် လက်မှတ်နှင့် တံဆိပ် ရယူရပါမည်။
အဆင့် (၅) - စည်ပင်ရုံးသို့ လျှောက်လွှာတင်ပြခြင်းနှင့် ကွင်းဆင်းစစ်ဆေးခံခြင်း
* ဖြည့်စွက်ထားသော လျှောက်လွှာ၊ ထောက်ခံချက်များနှင့် အင်ဂျင်နီယာပုံစံများကို စည်ပင်ရုံးသို့ တင်ပြပါ။
* သန်လျှင်မြို့နယ်စည်ပင်သာယာရေးအဖွဲ့မှ ရပ်ကွက်တာဝန်ခံအင်ဂျင်နီယာ က မြေပြင်သို့ လာရောက်ကွင်းဆင်းစစ်ဆေးပါမည်။
* (သတိပြုရန်။ ။ ပေ(၄၀×၆၀) မြေ၌ အနည်းဆုံးအဆောက်အအုံ၏ ဘေးနှစ်ဘက်တွင် ၃ ပေ၊ ရှေ့နောက်ကို ၅ ပေ ချန်လှပ်၍ ဆောက်လုပ်ရပါမည်။)
အဆင့် (၆) - ကျသင့်ငွေပေးသွင်းခြင်းနှင့် ပါမစ်ထုတ်ယူခြင်း
* ကွင်းဆင်းစစ်ဆေးမှု အောင်မြင်ပြီးနောက် စည်ပင်သာယာရေးအဖွဲ့မှ သတ်မှတ်ထားသော အဆောက်အအုံ တန်ဖိုးဖြတ်ခွန်နှင့် စည်ပင်အခွန်အခများကို ပေးသွင်းရပါမည်။
* ငွေသွင်းပြီးပါက စည်ပင်သာယာရေးအဖွဲ့၏ အတည်ပြုချက်ဖြင့် တရားဝင် "အဆောက်အအုံဆောက်လုပ်ခွင့်ပါမစ်" ကို ထုတ်ယူရရှိမည် ဖြစ်သည်။ ပါမစ်ရရှိပြီးမှသာ အိမ်ဆောက်လုပ်ခြင်းလုပ်ငန်းကို စတင်ရပါမည်။
Crd. Thiha Su Aung
