07/05/2025
~~မိဘတွေကွဲလျှင် ကလေးကို ဘယ်သူပိုင်သလဲ~~
(သားသမီး ထိန်းသိမ်းရေးအကြောင်းသိကောင်းစရာ)
မိဘတွေ ကွဲကြ တဲ့အခါ သားသမီးဖြစ်သူကလေးတွေကို ဘယ်သူ ပိုင်သလဲဆိုတဲ့ မေးခွန်းက အမေးများကြပါတယ်။
လင်မယားတွေ ကွဲတဲ့အခါ သားသမီးထိန်းသိမ်း ရေးနဲ့ ပတ်သက်ပြီး တဦးနဲ့တဦး ကြည်ဖြူစွာ ထိန်းသိမ်းခွင့်ပေးတယ်ဆိုရင်တော့ ပြသာနာမရှိကြပါဘူးး။
သူယူမယ် ငါယူမယ် အငြင်းပွါးကြတဲ့အခါ ကလေးကို ယောက်ျားက ပိုင်တယ် မိန်းမက ပိုင်တယ်ဆိုတဲ့ စကားတွေ အရပ်ထဲမှာ ကြားဖူးကြမှာပါ။
တကယ့် ဥပဒေအရဆုံးဖြတ်မှုတွေက
ကလေးက အရမ်းနုနယ်ပြီး ငယ်ရွယ်သေးတဲ့ အရွယ်ဆိုရင် မိခင်ကသာ ကောင်းစွာ ထိန်းကြောင်းနိုင်တယ်ဆိုပြီး မိခင်ဖြစ်သူကို ပေးလေ့ရှိပါတယ်။
တရားရုံးရဲ့ အဓိကဆုံးဖြတ်မှုသည် ကလေးငယ်ရဲ့ အကျိုးကျေးဇူးကို အဓိကထားဆုံးဖြတ်လေ့ရှိပါတယ်။ ကလေးရဲ့ ကျန်းမာရေး၊ နေထိုင်ရေး၊ ပညာရေး၊ စာရိတ္တပြုပြင်ရေး အစရှိတဲ့ အချက်အလက်တို့မှာ အဖေဖြစ်သူက ကောင်းအောင်လုပ်ပေးနိုင်မလား အမေဖြစ်သူက ကောင်းအောင်လုပ်ပေးနိုင်မလား အစသဖြင့် သုံးသပ်ပြီး ရွေးချယ်ပေးလေ့ရှိပါတယ်။
တရားရုံးဟာ ကလေးအုပ်ထိန်းခွင့်နဲ့ပတ်သက်ရင် အုပ်ထိန်းသူနှင့်အုပ်ထိန်းခံရသူများ အက်ဥပဒေအရ အဆုံးအဖြတ်ပေးကြတယ်။ အဲ့ဒီ အုပ်ထိန်းသူနှင့် အုပ်ထိန်းခံရသူများ အက်ဥပဒေရဲ့ ဥပဒေပုဒ်မ-၁၇ တွင်အောက်ပါအတိုင်းပြဌာန်းထားသည်။
(၁) အရွယ်မရောက်သေးသူ တစ်ယောက်အတွက် အုပ်ထိန်းသူကိုခန့်ထားရာတွင်(သို့) ကြေညာရာတွင် တရားရုံးသည်ဤပုဒ်မပါ ပြဌာန်းချက်များကို အထောက်အထားပြုလျက် အရွယ်မရောက်သေးသူနှင့် သက်ဆိုင် သော ဥပဒေနှင့်ညီညွတ်စွာ အရွယ်မရောက်သေးသူ၏ ကောင်းကျိုးချမ်းသာရရှိမှုကို လမ်းညွှန်အဖြစ် ခံယူ ထားရှိရမည်။
(၂) အရွယ်မရောက်သေးသူ၏ကောင်းကျိုးချမ်းသာ ရရှိစေရန်အတွက် စဉ်းစားရာ၌ တရားရုံးသည်-
(က) အရွယ်မရောက်သေးသူ၏ အသက်အရွယ် ကျား/မ ကိုးကွယ်သည့်ဘာသာ၊
(ခ) အုပ်ထိန်းသူ၏ အကျင့်စာရိတ္တ၊ အုပ်ထိန်းနိုင်စွမ်းရှိမရှိနှင့် အရွယ်မရောက်သေးသူနှင့် သွေးနီးစပ်မှု၊
(ဂ) အရွယ်မရောက်သေးသူ၏ ကွယ်လွန်ပြီးဖြစ်သော မိဘနှစ်ပါး၏ဆန္ဒ(ရှိခဲ့လျှင်)၊
(ဃ) အရွယ်မရောက်သေးသူနှင့် အုပ်ထိန်းလိုသူတို့၏ ယခုနှင့်ယခင် ဆက်ဆံမှုအခြေအနေတို့ကို ဂရုပြုရမည် လို့ ပြဌာန်းထားတယ်။ အဲ့ဒီအချက်အလက်တွေနဲ့ အညီ ဆုံးဖြတ်လေ့ရှိတယ်။
မိခင်ဖြစ်သူဟာ အကျင့်စာရိတ္တပျက်ပြားသူ ဒါမှမဟုတ် ကလေးကို အုပ်ထိန်းမှုမပေးနိုင်ကြောင်း အကြောင်းပြချက် လုံလောက်အောင်မပေးနိုင်ပဲ ဥစ္စာပစ္စည်း ကုံလုံကြွယ်ဝခြင်း မရှိဆိုသော အကြောင်းပြချက်ဖြင့် သားသမီးအုပ်ထိန်းခွင့် မရှိဟုမဆိုနိုင်ပေ လို့ စီရင်ထုံးတခုမှာ ဖွဲ့ဆိုထားတယ်။
ဆိုတော့ သားသမီးအုပ်ထိန်းခွင့် က ဆင်းရဲ ချမ်းသာ နဲ့ မသတ်မှတ်ဘူး။
အချုပ်ဆိုရမယ်ဆိုလျှင်
သားသမီးအုပ်ထိန်းခွင့်မှာ အဓိကဟာ သားသမီးရဲ့ ကောင်းကျိုးချမ်းသာကိုသာ ကြည့်ရတာပါ။
သားသမီးတို့ရဲ့ ကျန်းမာရေး၊ နေထိုင်ရေး၊ ပညာရေး၊ စာရိတ္တပြုပြင်ရေး စသည့်အချက်အလက်တို့မှာ အမိက ကောင်းအောင်လုပ်နိုင်မလား? အဖက ကောင်းအောင် လုပ်နိုင်မလား? စတဲ့အချက်တွေပေါ်စဉ်းစားဆုံးဖြတ်ပါတယ်။
ဆင်းရဲတယ်ဆိုတဲ့ အကြောင်းပြချက်ကြောင့် သားသမီးအုပ်ထိန်းခွင့် မဆုံးရှုံးနိုင်ပါဘူး။
ကလေးဟာ စဉ်းစားတွေးခေါ်နိုင်တဲ့ အရွယ်ဆိုရင် ကလေးရဲ့ ဆန္ဒကို အလေးပေးရမယ်။
အထက်မှာဖော်ပြခဲ့တဲ့ အုပ်ထိန်းသူနှင့်အုပ်ထိန်းခံရသူ များအက်ဥပဒေ ပုဒ်မ ၁၇ပါ အချက်အလက်တွေအတိုင်း ဆုံးဖြတ်ပါတယ်။
ဘာသာဓလေ့တွေနဲ့လည်း ကလေးအုပ်ထိန်းခွင့်နဲ့မဆိုင်ပါဘူးး။
အကယ်၍ ဒီထပ်အသေးစိတ် သိလိုသည်ပဲ ဖြစ်စေ၊ ဥပေဒေနှင့်ပတ်သတ်သည့် အကြောင်းအရာများ မေးမြန်းလိုသည်ဖြစ်စေ
Viber /Ph( 09781102019 ) သို့လည်းကောင်း Page Messenger သို့လည်း ကောင်း ဆက်သွယ် မေးမြန်းနိုင် ပါသည်။
လေးစားစွာဖြင့်
ရှေ့နေဦးရဲဇော်သိန်း
