19/03/2026
شي حوايج كنديروهم بلا مانعيقو وكيوقفو لينا الرزق ويسدو علينا البيبان
1- ترمي النعمة فالزبل: كتسالي الماكلة وتجمع داكشي لي شاط ديال الخبز ولا الدجاج وتلوحو فميكة الزبل.. هاد الاستهانة بالنعمة كطير البركة من الدار بصح! السيدة عائشة رضي الله عنها، دخل عليها النبي ﷺ لقاها طيحات طريف دالخبز، مسحو وقال ليها: "يَا عَائِشَةُ أَحْسِنِي جِوَارَ نِعَمِ اللَّهِ فَإِنَّهَا قَلَّ مَا نَفَرَتْ مِنْ أَهْلِ بَيْتٍ فَكَادَتْ أَنْ تَرْجِعَ إِلَيْهِمْ". حتارم النعمة، واخا غير تجمعها فميكة نقية وتحطها لشي حيوان ولا طير ياكلها.
2- الشفايت المخبية ففشل عباد الله: تسمع بلي فلان لي ماكتحملوش جراو عليه من الخدمة ولا خسر فلوسو، وتحس بواحد الفرحة لداخل.. هاد الإحساس بوحدو كيحطك فخطر كبير، حيت كتفرح لزوال النعمة على شي حد من عباد الله. النبي ﷺ قال: "لَا تُظْهِرِ الشَّمَاتَةَ لِأَخِيكَ فَيُعَافِيَهُ اللَّهُ وَيَبْتَلِيكَ". الآية كتقلب فالبلاصة، وداك لي فرحتي فخسارتو كيعوضو ربي، ونتا كيتسد عليك باب الرزق حيت قلبك نسى الرحمة.
3- تسب باب الرزق لي محلول ليك كل صباح: تفيق مع الصونيت ديال المكالة وتنفخ وتسب فالخدمة والمدير والشركة.. نتا هنا راك كدير "كفر النعمة" مكمول بلا ماتحس.. كاينين ملايين كيتماو غير ربع هاد مساحة الأمان المادي لي نتا فيها. سيدي ربي قالها واضحة: ﴿وَلَئِنْ كَفَرْتُمْ إِنَّ عَذَابِي لَشَدِيدٌ﴾. كفر النعمة ماشي غير تلوحها، كفر النعمة هو تجيك تقيلة وتكرهها. طلق وجهك ونتا غادي لخدمتك واحمد ربي واخا تكون عيان؛ الشكر على الباب الضيق هو الساروت الوحيد للباب الواسع
4- تبيع حاجة فيها الديفو وتخبيه ولا تكذب باش تبيع: الفلوس غتدخل للجياب أيه، ولكن مافيهاش حس البركة.. النبي ﷺ هدر على البيع والشرا وقال: "فَإِنْ كَذَبَا وَكَتَمَا مُحِقَتْ بَرَكَةُ بَيْعِهِمَا". الدرهم الحلال الصافي كيطرح البركة فصحتك ووليداتك
5- الذنوب المخبية لي كتساهل بيها: المشكيل ماشي هو تغلط، حيت كاملين كنغلطو، المشكيل هو تستهان بالذنب بحجة "راه كاع الناس كيديروها"! النبي ﷺ قال فواحد الحديث كيخلع: "إِنَّ الرَّجُلَ لَيُحْرَمُ الرِّزْقَ بِالذَّنْبِ يُصِيبُهُ". هادوك الذنوب لي كدير بوحدك كيديرو بحال شي كور سيركوي (Court-circuit) فسلك الرزق لي ممدود ليك
6- تزير السمطة على دارك بحجة كتأمن المستقبل: تستخسر الفلوس فموالين الدار وتضيقها عليهم ونتا عندك، غير حيت خايف من غدا. القرآن لخص هاد القضية فجملة: ﴿الشَّيْطَانُ يَعِدُكُمُ الْفَقْرَ﴾. وسيدي ربي كيقول فالحديث القدسي: "أَنْفِقْ يَا ابْنَ آدَمَ يُنْفَقْ عَلَيْكَ". بحبحها شوية على عائلتك وما تخافش.
7- تنسى الاستغفار فزحمة الوقت: الآية واضحة وباينة: ﴿فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا * يُرْسِلِ السَّمَاءَ عَلَيْكُم مِّدْرَارًا * وَيُمْدِدْكُم بِأَمْوَالٍ وَبَنِينَ﴾. دير ليك ورد ديال الاستغفار كل نهار وماتغفلش عليه.
8- التكبر والعياقة على لي كثر منك ضعفا: تغوت على مول الليفريزون حيت تعطل بزز منو، ولا تستخسر تعطي لمول النظافة شي صرف بحجة "راه كيشد الخلصة". ماتعرفش بلي رزقك وتيسير خدمتك يقدر يكون معلق فدعوة ديال داك الدرويش! النبي ﷺ عطانا قاعدة تفيقنا كاملين: "هَلْ تُنْصَرُونَ وَتُرْزَقُونَ إِلَّا بِضُعَفَائِكُمْ؟". تجبر بخاطر الناس البسيطة وتواضع معاهم، هادا هو الكود (Password) الحقيقي ديال خزنة الأرزاق.
9- تنسب النجاح غير لشطارتك: ملي كتقفل شي خدمة واعرة ولا كتدخل شي بركة ديال الفلوس وكتقول فخاطرك "أنا لي ضربت تمارة وهادي شطارتي".. نتا هنا بلا ماتحس كدير بحال قارون ملي قال ﴿إِنَّمَا أُوتِيتُهُ عَلَىٰ عِلْمٍ عِندِي﴾. ملي كتنسى بلي التيسير وتفتيح البيبان جا من عند الله، كتمشي البركة من داك الإنجاز نيت. غير تنجح ولا تخلص، تنفس وقول برضا: ﴿هَٰذَا مِن فَضْلِ رَبِّي﴾.
10- تشكي وتتباكى باش تهرب من العين: شي حد يسولك كي داير، وتقول ليه "غير المشاكل والدنيا مقلوبة" ونتا مستور وعندك الخير، غير كدير هكاك حيت خايف من العين.. نتا هنا بلا ماتعيق كتصيفط رسالة ديال الجحود للسما. قول "الحمد لله فضل ونعمة من عند الله" وما تخافش؛ الحمد هو الحصن المنيع لرزقك، ماشي الشكاوي.
11- تحلف بالكذوب باش تدوز البيعة: تحلف للكليان بلي هادي آخر بياسة، ولا بلي راك خاسر فهاد الخدمة غير باش تقنعو.. السلعة غتباع وغتدخل الفلوس لجيبك فعلا، ولكن النبي ﷺ قال: "الْحَلِفُ مَنْفَقَةٌ لِلسِّلْعَةِ مَمْحَقَةٌ لِلْبَرَكَةِ". يعني الفلوس غتجي ولكن غتطير فشي مرض ولا طوموبيل تخسر ولا تخربيق ما عندو معنى.
12- تشكي للناس من الغلا والكريدي: تركب فمواصلات ولا تريح مع صحابك وتبدا تشكي.. النبي ﷺ حذرنا من هاد الفخ وقال: "مَنْ نَزَلَتْ بِهِ فَاقَةٌ فَأَنْزَلَهَا بِالنَّاسِ لَمْ تُسَدَّ فَاقَتُهُ". ملي كتنزل شكوتك لعباد الله، راك كتسحب الدوسي ديال أزمتك من يد الرزاق وكتلوحو فحضن عبد عاجز بحالك.. خلي شكوتك لله فوق السجادة، وقول الحمد لله قدام الناس.
وما تنسانيش من شي دعوة دالخير ملي يفرجها عليك الله.
