01/05/2022
පවුල් ආරවුල් හා සම්බන්ධ නීතිය සරලව
==============================
විවාහ බන්ධනය තුළ වරින්වර මතු වන ගැටළු,අර්බුද විවිධාකාර ය.එම සියලු ප්රශ්නවලට නීතිමය විසඳුම් නැතත් යම් යම් ගැටළුවලට ගත හැකි නීතිමය ක්රියාමාර්ග ඇත.
විවාහයක් දෙදරා ගිය විට දෙදෙනාට එකට සිටීමට හැකියාවක් නැත්නම් ගත හැකි නීතිමය විසඳුම දික්කසාදය ලබා ගැනීමයි.සාමාන්ය විවාහ ආඥාපනතේ දික්කසාදය ලබා ගත හැකි වැරදි තුනක් දක්වා ඇත.
01.විවාහ වූ පසු සිදු කෙරෙන අනාචාරය
02.ද්වේශ සහගත අතහැර යාම
03.විවාහ වන විට පවත්නා සුවකළ නොහැකි ලිංගික බෙලහීනතාවය
අනාචාරය ලංකාවේ අපරාධමය වරදක් නොවූවද දික්කසාදය ලබා ගැනීමේ එක් පදනමක් ලෙස සලකයි.අනාචාරය මත පවරන නඩුවකදී එය සාධාරණ සැකයෙන් ඔබ්බට ඔප්පු කළ යුතු වේ.මේ සදහා ප්රබල සාක්ෂි ඉදිරිපත් කළ යුතු අතර ඒවා අතර වීඩියෝ දර්ශන ,කෝල් රෙකෝඩින්ග් ,හොටෙල් බිල්පත්,පෙම් හසුන්,එස් එම් එස් පණිවිඩ හෝ ඇසින් දුටු සාක්ෂි වැදගත් තැනක් ගනී.මෙවැනි නඩුවකදී අනාචාරයේ යෙදෙන අනෙක් පාර්ශවය සම විත්තිකරුවෙකු කළ යුතු අතර ඔහුගෙන් වන්දි ඉල්ලා සිටීමේ හැකියාව ද පවතී.ද්වේශ සහගත අතහැර යාම යනු විත්තිකරු තමාව ද්වේශ සහගතව අත් හැර ගිය බවයි.මෙහිදී අනාචාරය ඔප්පු කරනවා මෙන් දැඩි ඔප්පු කිරීමේ භාරයක් පැමිණිල්ලට නොමැත.එසේම"අනුමිත ද්වේශ සහගත අතහැර යාම " මත ද දික්කසාද නඩුවක් පැවරීමේ හැකියාව ඇත.මෙයින් අදහස් වන්නේ යම් අයෙකුට තම ස්වාමිපුරුෂයා හෝ බිරිඳ සමග සතුටින් සාමකාමීව ජීවත්වීමට නොහැකි වූ නිසා වෛවාහක නිවස අතහැර ගිය බවයි.ලිංගික බෙලහීනතාවය මත පවරන දික්කසාද නඩු දක්නට ඇත්තේ ඉතා අල්ප වශයෙනි.නමුත් වෛද්ය විද්යාත්මකව ඔප්පු කළ හැකි නම් මෙම පදනම මත නඩු පැවරීමට හැකිය ඇත.ඉහත පදනම්වලින් එකක් මත පවරන දික්කසාද නඩුවක් විභාගයට නියම කිරීමට පෙර පවුල් උපදේශක හමුවට කැදවන බැවින් එහිදී දෙදෙනා නැවත සමගි වී පවුල් ජීවිතය පටන් ගැනීමට තීරණය කළහොත් නඩුව තවදුරටත් පවත්වාගෙන යාමේ අවශ්යතාවයක් නොමැත.එසේම දික්කසාදය ලබා දීමට අනෙක් පාර්ශවය විරුද්ධ නොවුනහොත් මාස 6-8 වැනි කලකින් ඔබට දික්කසාදය ලබා ගත හැක.එම කාලය අදාල අධිකරණයේ කැඳවන නඩු ප්රමාණය මත තීරණය වේ.යම් අයෙකුගේ බිරිඳ හෝ ස්වාමිපුරුෂයා තමන් හා දරුවන් නඩත්තු කිරීම නොකරන අවස්ථාවක මහේස්ත්රත් අධිකරණයේ නඩත්තු නඩුවක් පැවරීමේ හැකියාව පවතී.මෙහිදී යම් අයෙකුට තමා හා තම දරුවන් නඩත්තු කර ගත නොහැකි නම් මාසික නඩත්තු දීමනාවක් ඉල්ලා නීතීඥවරයෙකු මාර්ගයෙන් මෙය පැවරිය යුතුය.අධිකරණය විසින් පැමිණිලිකාරියට ගෙවිය යුතු නඩත්තු මුදල උත්තරකරුගේ
1.ආදායම
2.වත්කම්
3.අවස්තානුගත කරුණු
මත තීරණය කරයි.නඩත්තු සම්බන්ධව සාක්ෂි විමසීමේ පරීක්ෂණයට යාමට පෙර අතුරු ආඥාවක් කිරීමට මහේස්ත්රත්වරයාට බලය ලැබේ. .ඒ අනුව මාසික දීමනවක් නියම කරනු ලැබේ.සාක්ෂි විමසීමට ගන්න විභාගයෙන් අනතුරුව ඉල්ලුම්කාරියගේ හෝ ඉල්ලුම්කාරුගේ ඉල්ලිමට අවසර දීම හෝ ප්රතික්ෂේප කිරීම කළ හැකියි.කිසිඳු අවස්ථාවක ඉල්ලුම්කාරියගේ ඉල්ලන මුදලම ඇයට ගෙවීමට යාන්ත්රිකව නියෝග ලබ දීමක් අධිකරණය කරනු නොලබයි.නඩත්තු මුදල සම්බන්ධව දෙපාර්ශවය එකග වන අවස්ථාවක එවැනි සාක්ෂි විමසීමකින් තොරව අදාල මුදල මාසිකව ගෙවීමට නියම කරනු ලබනවා.මීළගට සලකා බැලිය යුතු විශේෂ කරුණක් ඇත.එනම් නඩත්තු නඩුවක් පැවරූ විටෙක විදේශ ගමන් තහනමක් පනවනවා ද යන්නය.අධිකරණයක් විසින් සාමාන්යයෙන් විදේශ ගමන් තහනම් පැනවීම් කරනු ලබන්නේ අපරාධ නඩුවලදි ය.අධිකරණයට පුද්ගලයෙකුට එරෙහිව විදේශ ගමන් තහනමක් පැනවීමට බලය ලැබෙන්නේ 1948 අංක 20 දරණ ආගමන විගමන පනතේ 54 (C) වගන්තිය යටතේය(ඇප පනතේ අපේක්ෂිත ඇප යටතේ වෙනත් අවස්ථාවක් ඇත.එය මෙම සිදුවීමට අදාල නොවේ).මේ වගන්තිය යටතේ කටයුතු කළ යුතු ආකාරය Leo AM Claes V. Wilfred Van Els (2008 BLR 165) යන නඩුවේදී සාකච්ඡා වී ඇත.එහිදී ශ්රේෂ්ඨාධිකරණය ප්රකාශ කරන ලද්දේ අධිකරණයක් පුද්ගලයෙකුගේ ගමන් සීමා කිරීමේ නියෝගයක් ලබා දෙන අවස්ථාවක ඉතා සාධාරණ ආකාරයෙන් කටයුතු කළ යුතු බවත් එම විදේශ ගමන් තහනමට යටත් වන පුද්ගලයා කියා පාන කරුණු සවන් දිය යුතු බවත් ය.ඒ අනූව අධිකරණයක් කිසි විටෙක කිසිවෙකු විසින් ඉල්ලා සිටි පමණින් මෙවැනි නියෝග නිකුත් කරන්නේ නැත.සැකකරු හෝ විත්තිකරු විදේශගත වී අධිකරණය මග හැර සිටීමට ඉඩ ඇති බවට අධිකරණයට හැඟී ගියහොත් මෙවැනි තහනමක් පනවනු ලබයි.මෙවැනි තහනමක් පැවරූ අවස්ථාවක ඒ සම්බන්ධව ආගමන විගමන දෙපාර්තමේන්තුවට හා ගුවන්තොටුපලට දන්වා යවනු ලබයි.අදාල ගුවන්ගමන් බලපත්රය අධිකරණය භාරයට ගැනීම ද සිදු කරයි.සැකකරුට ගුවන්ගමන් බලපත්රයක් නොමැති අවස්ථාවක ඒ සම්බන්ධව කරුණු සදහන් කොට දිවුරුම් ප්රකාශයක් අධිකරණයට ඉදිරිපත් කිරීමට සිදු වේ.විදේශ ගමන් තහනමක් ඇති පුද්ගලයෙකුට හදිසි අවශ්යතාවයකට විදෙශගත වීමට අවශ්ය වුවහොත් ඒ සම්බන්ධව කරුණු දක්වා ගුවන් ගමන් තහනම ලිහිල් කර ගැනීමටද හැකියාව පවතී.නඩත්තු නඩුවක දී වගඋත්තරකරුට එරෙහිව ගුවන් ගමන් තහනමක් පැන වුවහොත් අධිකරණයේ අවසරය මත නඩුවට පෙනී සිටීමට ඇටර්නි බලපත්රයක් හරහා පුද්ගලයෙකු පත්කොට විදේශගත වීමට හැකියාව පවතී.අධිකරණයක් විසින් විදේශ ගමන් තහනමක් පනවන සෑම අවස්ථාවම ඉතා සැලකිලිමත් විය යුතු වනවා.එයට හේතුව වන්නේ ඉන් පුද්ගලයෙකුගේ මූලික අයිතිවාසිකමක් වන "යාම ඒම් කිරීමේ නිදහස" සීමා වන නිසාය.වෛවාහක පාර්ශවයන්ගේ බොහෝ ගැටළු සාමකාමීව විසදා ගැනීමට නොහැකි වුවහොත් කෙලවර වන්නේ පහරදීම්වලිනි.කිසිදු ආකාරයකින් විවාජයේ එක් පාර්ශවයකට අනෙක් පාර්ශවය තාඩනයට පීඩනයට ලක් කිරීමට හෝ පහරදීමට අයිතිය නැත.මෙවැනි අවස්ථාවක දී ගත හැකි ක්රියාමාර්ගය නම් 2005 අංක 34 දරණ ගෘහස්ථ ප්රචණ්ඩ ක්රියා වැලැක්වීමේ පනත යටතේ මහේස්ත්රාත් අධිකරණයක නඩු පවරා තමන්ට වන ශාරීරික පීඩා වලක්වා ගැනීමට අධිකරණයෙන් නියෝගයක් ලබා ගැනීමයි.මුල් අවස්තාවේදී අතුරු ආරක්ෂක ආඥවක් නිකුත් කරන අතර එමගින් පීඩාවට පත් වන තැනැත්තා වාසය කරන ස්ථානයකට,සේවය කරන ස්ථානයකට හෝ පාසලකට වග උත්තරකරු ඇතුළුවීම වලක්වා ලීමට කටයුතු කළ හැක.
ඉහත සාකච්ඡා කරන ලද ආකාරයේ පවුල් ආරවුල් මත නීතිමය ක්රියාමාර්ග ගැනීම සදහා ඔබට පුද්ගලිකව නිතීඥවරයෙකු පත් කර ගැනීමට තරම් ආර්ථික හැකියාවක් නොමැති අවස්ථාවක "ශ්රී ලංකා නීති ආධාර කොමිෂන් සභාව " මගින් නොමිලේ නීතීඥ සහයක් ලබාගැනීමේ හැකියාව පවතී.ඊට අමතරව කොළඹට ආසන්න ප්රදේශයේ කාන්තාවන්ට මෙවැනි අවස්ථාවල නොමිලේ නීතිඥ සහය ලබා දෙන රාජ්ය නොවන ආයතන ද පවතී.
(මෙම ලිපිය සම්පූර්ණයෙන්ම සාමාන්ය ජනතාවගේ දැනගැනීම සඳහා පළ කරන ලද්දකි)
~නීතීඥ සාරංග වාදසිංහ~
