17/06/2026
🇰🇭មតិច្បាប់ លើបញ្ហាផ្ទេរប្រាក់ច្រឡំ ឬ តាមការឆបោក
១. ករណីមានការបោកប្រាស់ (Fraud/Scam) ឬសកម្មភាពសង្ស័យ
ក្នុងករណីមានការបោកប្រាស់ ឬសកម្មភាពមិនប្រក្រតី ធនាគារពាណិជ្ជមានសិទ្ធិ និងកាតព្វកិច្ច ក្នុងការចាត់វិធានការជាបន្ទាន់៖
ការផ្អាកគណនីជាបណ្តោះអាសន្ន៖ ផ្អែកលើអនុក្រឹត្យស្តីពីការប្រឆាំងការលាងលុយកខ្វក់ និងហិរញ្ញប្បទានភេរវកម្ម ក៏ដូចជាការណែនាំផ្ទៃក្នុងរបស់ធនាគារជាតិ ធនាគារពាណិជ្ជអាចធ្វើការឃាត់ ឬបង្កកទឹកប្រាក់ជាបណ្តោះអាសន្ន (Temporary Hold/Freeze) ក្នុងរយៈពេលខ្លីមួយ នៅពេលទទួលបានបណ្តឹងរាយការណ៍ភ្លាមៗពីជនរងគ្រោះ ឬនៅពេលប្រព័ន្ធរកឃើញប្រតិបត្តិការសង្ស័យ។
គោលបំណង៖ ដើម្បីទប់ស្កាត់កុំឱ្យជនល្មើសដកប្រាក់ ឬផ្ទេរប្រាក់នោះបន្តទៅគណនីផ្សេងទៀត ទម្រាំមានចំណាត់ការផ្លូវច្បាប់ជាផ្លូវការ។
២. ករណីផ្ទេរប្រាក់ដោយច្រឡំ (Wrong/Mistaken Transfer)
សម្រាប់ករណីផ្ទេរប្រាក់ខុសគណនីដោយអចេតនា នីតិវិធីមានភាពខុសប្លែកបន្តិច៖
ធនាគារពាណិជ្ជមិនអាចកាត់លុយ ឬបង្កកលុយពីគណនីរបស់អ្នកទទួលខុសនោះភ្លាមៗតាមចិត្តចង់បានឡើយ ប្រសិនបើគ្មានការយល់ព្រមពីម្ចាស់គណនី (អ្នកទទួល)។ នេះជាការការពារសិទ្ធិឯកជនភាព និងសុវត្ថិភាពគណនីអតិថិជន។
យន្តការដោះស្រាយ៖ នៅពេលទទួលបានបណ្តឹងតវ៉ាភ្លាមៗ ធនាគារពាណិជ្ជខាងអ្នកផ្ទេរ នឹងធ្វើការទាក់ទងទៅធនាគារខាងអ្នកទទួល (ក្នុងករណីខុសធនាគារគ្នា) ដើម្បីឱ្យធនាគារនោះទាក់ទងទៅកាន់ម្ចាស់គណនីដែលទទួលបានប្រាក់ច្រឡំ ឱ្យធ្វើការផ្ទៀងផ្ទាត់ និងបង្វិលសងមកវិញដោយស្ម័គ្រចិត្ត។ ក្នុងករណីអ្នកទទួលមិនព្រមបង្វិលសងមកវិញដោយស្ម័គចិត្ត ជនរងគ្រោះអាចធ្វើបណ្តឹងតាមផ្លូវច្បាប់បាន។
⚠️ លក្ខខណ្ឌផ្លូវច្បាប់ក្នុងការបង្កកប្រាក់ជាផ្លូវការ និងដាច់ខាត
ទោះបីជាធនាគារអាចធ្វើការផ្អាក ឬឃាត់ប្រាក់ជាបណ្តោះអាសន្នក្នុងករណីបន្ទាន់ (ជាពិសេសករណីបោកប្រាស់) ក៏ដោយ ប៉ុន្តែសម្រាប់ការបង្កកជាផ្លូវការ ឬការដកហូតសាច់ប្រាក់ គឺត្រូវតែមាន៖
១. ដីកា ឬបញ្ជាពីស្ថាប័នតុលាការ (ព្រះរាជអាជ្ញា ឬចៅក្រមស៊ើបសួរ) ។
២. បញ្ជាពីអាជ្ញាធរមានសមត្ថកិច្ច ដែលមានអំណាចតាមច្បាប់ (ដូចជា អគ្គស្នងការដ្ឋាននគរបាលជាតិ ឬអង្គភាពប្រឆាំងការលាងលុយកខ្វក់)។
អនុសាសន៍អនុវត្ត៖ ប្រសិនបើជួបករណីបោកប្រាស់ ឬផ្ទេរប្រាក់ច្រឡំ ជំហានដំបូងបំផុតគឺត្រូវ ទាក់ទងទៅផ្នែកបម្រើអតិថិជន (Hotline) របស់ធនាគារសាមីភ្លាមៗ ២៤/៧ ដើម្បីឱ្យពួកគេជួយពិនិត្យ និងឃាត់សាច់ប្រាក់ក្នុងប្រព័ន្ធជាបណ្តោះអាសន្ន បន្ទាប់មកត្រូវទៅស្វែងរកកិច្ចអន្តរាគមន៍ពីសមត្ថកិច្ច ឬដាក់ពាក្យបណ្តឹងផ្លូវការដើម្បីទទួលបានដីកាបង្កកសាច់ប្រាក់នោះ។
![[English Below]សន្និសីទតំបន់អាស៊ីប៉ាស៊ីហ្វិករបស់អង្គភាព Laworldនាថ្ងៃទី៣១ ខែមករា ឆ្នាំ២០២៦ លោកមេធាវី ឌឹម សុខហេង ប្រធានក្...](https://img5.lawfirms1.com/682/492/1553067176824926.jpg)
