24/12/2023
ថ្ងៃនេះឆ្លៀតពេលចែករំលែកចំពោះការយល់ឃើញ និងបទពិសោធន៍ខ្លះសម្រាប់បងប្អូននិស្សិតយើង
👉៣ សំណួរដែលតែងតែកើតមានចំពោះនិស្សិត ហើយតែងសួរមកខ្ញុំជារឿយៗ មានដូចជា៖
១-គ្រួសារពុំសូវមានលទ្ធភាពឱ្យរៀន តើធ្វើដូចម្តេចទើបរៀនចប់ចុងចប់ដើម?
២-តើធ្វើដូចម្តេចទើបរៀនពូកែ ឆាប់យល់ ឆាប់ចេះ ឆាប់ចាប់បាន?
៣-តើធ្វើដូចម្តេច ដើម្បីធ្វើការឱ្យត្រូវជំនាញដែលយើងរៀន?
ចំពោះសំណួរដែលចោទសួរខាងលើ ខ្ញុំនឹងចែករំលែកនូវការយល់ឃើញ និងបទពិសោធន៍មួយចំនួនដូចខាងក្រោម៖
១-គ្រួសារពុំសូវមានលទ្ធភាពឱ្យរៀន តើធ្វើដូចម្តេចទើបរៀនចប់ចុងចប់ដើម?
ក្នុងបរិបទសង្គមចំពោះគ្រួសារនីមួយៗ អាចមានអ្នកក្រអ្នកមាន ឬ អ្នកមធ្យម ហេតុនេះបើយើងស្ថិតនៅក្នុងស្ថានភាពជាអ្នកក្រ ឬ អ្នកមធ្យម ពុំសូវមានលទ្ធភាពរៀនបន្តនៅថ្នាក់បរិញ្ញាបត្រ យើងគួរតែស្វែងរកការងារណាដែលអាចផ្តល់ចំណូលឱ្យយើង ពោលគឺច្បាស់ជាការងារដែលពុំទាន់ត្រូវជំនាញទេ ប៉ុន្តែកុំមានការបារម្ភចំពោះការងារដែលមិនត្រូវជំនាញនោះ ព្រោះទើបរៀនឆ្នាំទី១ និងទី២ នោះទេ។ ចំពោះការងារកន្លែងនេះ មិនចាំតែការងារមួយមុខនោះទេ ការងារណាក៏ដោយឱ្យតែផ្តល់នូវប្រាក់ចំណូល ដើម្បីដោះស្រាយបញ្ហា ឧទាហរណ៍ជាក់ស្តែងកាលឆ្នាំ២០១៧ ខ្ញុំរៀនឆ្នាំទី១ ខ្ញុំធ្វើការនៅផ្សារ City mall ផ្នែកលក់ ក្រោយពីទំនេរពីការងារ ឬ ថ្ងៃសម្រាក ខ្ញុំទៅរត់តុតាមរោងការជាអ្នកចាប់ទឹកកក ភេសជ្ជៈ ក្នុងមួយថ្ងៃអាចបាន ៧ដុល្លារ ទៅ ១០ដុល្លារដែរ។ រហូតមកដល់ឆ្នាំ២០១៩ ខ្ញុំបានចូលរៀនថ្នាក់បរិញ្ញាបត្រជាន់ខ្ពស់ចំពោះចំណាយត្រូវកើនឡើងទ្វេដងខុសពីថ្នាក់បរិញ្ញាបត្រ ពេលនោះខ្ញុំធ្វើការជាជំនួយការមេធាវីនៅការិយាល័យមេធាវីមួយ ហើយខ្ញុំក៏មិនបោះបង់ការរកចំណូលផ្សេងៗទៀតដែរ ដើម្បីយកប្រាក់មកផ្តត់ផ្គង់ការងារសិក្សា ពេលនោះខ្ញុំធ្វើការដូចជា អ្នកលាងចានរោងការ រត់តុ អ្នកលក់សៀវភៅច្បាប់ អ្នកស៊ីឈ្នួលធ្វើឯកសារតិចតួច និងមានការងារផ្សេងៗទៀត។ មួយវិញទៀត បើបងប្អូននិស្សិតរកប្រាក់បានហើយ គឺត្រូវចេះគ្រប់គ្រងថវិកាដែរ កុំចំណាយផ្តេសផ្តាស បើចំណាយត្រូវមានខ្ទង់ ហើយត្រូវមានប្រាក់សន្សំទុកដើម្បីប្រើការជាចាំបាច់។ ចំពោះបញ្ហានេះ ត្រូវចេះដោះស្រាយដោយត្រូវធ្វើការបែបណាក៏បានឱ្យតែផ្តល់នូវចំណូលសម្រាប់យើងដើម្បីបន្តការសិក្សា កុំខ្លាចគេថាយើងអន់។ ម្យ៉ាងទៀត ចំពោះការសិក្សាយើងអាចស្វែងរកអាហារូបករណ៍ផងដែរ ក៏អាចសម្រាលបន្ទុកសម្រាប់យើងមួយកម្រិតធំដែរ។
២-តើធ្វើដូចម្តេចទើបរៀនពូកែ ឆាប់យល់ ឆាប់ចេះ ឆាប់ចាប់បាន?
ក្នុងករណីនេះខ្ញុំក៏មិនសូវពូកែដែរ តែត្រូវចាំថាគ្មានអ្នកណាពូកែជាងអ្នកណានោះទេ ព្រោះចំណេះដឹងមិនស្មើគ្នាឡើយ ប៉ុន្តែការរៀនពូកែវាស្តែងចេញយ៉ាងប្រត្យក្សតាមរយៈការខិតខំសិក្សា ការស្រាវជ្រាវ ការចោទសួរ រួមទាំងចូលរួមកម្មវិធីបណ្តុះបណ្តាលផ្សេងៗ ដើម្បីបានចំណេះដឹងថ្មី។ ស្ថានភាពនេះ បងប្អូននិស្សិតគួរតែសិក្សាដោយផ្តោតទៅលើការស្រាវជ្រាវជាចាំបាច់ ព្រោះថាការស្រាវជ្រាវអាចធ្វើឱ្យយើងដឹងពីរបកគំហើញថ្មីចំពោះចំណុចដែលយើងបានស្រាវជ្រាវ ជាក់ស្តែងខ្ញុំចូលចិត្តធ្វើឯកសារទុក សរសេរសៀវភៅ ឬ សរសេរអត្ថបទខ្លីៗ រួមទាំងចូលចិត្តស្រាវជ្រាវក្នុង Website ផ្សេងៗដែលពាក់ព័ន្ធនឹងជំនាញ។ បងប្អូននិស្សិតគួរតែអានឱ្យបានច្រើន វិភាគ ស្រាវជ្រាវឱ្យបានច្រើន ហើយចំពោះចំណុចណាដែលឆ្ងល់ត្រូវសួរគ្រូ ឬ សួរសិស្សច្បងដែលស្រាយនូវចម្ងល់របស់យើងបាន។ មួយវិញទៀត ការសិក្សាត្រូវតែដាក់វិន័យខ្លួនឯងថា ក្នុងមួយថ្ងៃត្រូវតែបានរៀន ទោះរៀនបាន ១ម៉ោង ឬ ២ម៉ោងក៏ដោយ ព្រោះការសិក្សាលើជំនាញនេះ គឺរៀនរហូតគ្មានថ្ងៃឈប់ឡើយ ដោយភ្ជាប់ពាក្យមួយថា Life-Long Learning។
៣-តើធ្វើដូចម្តេច ដើម្បីធ្វើការឱ្យត្រូវជំនាញដែលយើងរៀន?
ក្នុងស្ថានភាពនេះ បើយើងពុំមានបងប្អូនដែលធ្វើការត្រូវជំនាញដែលយើងរៀន ច្បាស់ណាស់ដំបូងឡើយយើងប្រាកដជាធ្វើការមិនត្រូវជំនាញនោះទេ ប៉ុន្តែចំណុចនេះបងប្អូននិស្សិតត្រូវដឹងខ្លួន មានការភ្ញាក់រលឹក និងស្វះស្វែងរកការងារណាដែលត្រូវជំនាញយើង។ ឆ្នាំទី២ ឬ ឆ្នាំទី៣ បងប្អូននិស្សិតគួរតែស្វែងរកការងារណាដែលត្រូវជំនាញធ្វើ ទោះបានប្រាក់តិច ឬ ច្រើនក៏ដោយ ព្រោះថាទម្រាំយើងចប់ថ្នាក់បរិញ្ញាបត្រក៏មានបទពិសោធន៍ការងារដែលត្រូវជំនាញខ្លះដែរ ជាក់ស្តែងខ្ញុំផ្ទាល់គឺដើរដាក់ CV មិនក្រោម ១០កន្លែងការងារទេ ប៉ុន្តែគេពុំបានហៅទៅសម្ភាសឡើយ តែក្នុងចិត្តមិនអស់សង្ឈឹមឡើយ រហូតបានធ្វើការត្រូវជំនាញខ្លះៗ ក្នុងឆ្នាំទី៣។ ដើម្បីរកការងារបានបងប្អូននិស្សិតមានចំណេះដឹងខ្លួនឯងសិនទាំងផ្នែកជំនាញ និងការងារបច្ចេកទេស (កុំព្យូទ័រ) ហើយបើបានភាសាទៀតគឺមានអាទិភាពច្រើន រួមទាំងការទំនាក់ទំនងត្រូវតែល្អ មានភាពស្មោះត្រង់ចំពោះមេ និងការទទួលខុសត្រូវខ្ពស់។ ហេតុដែលខ្ញុំចង់ឱ្យបងប្អូននិស្សិតធ្វើការត្រូវជំនាញ ព្រោះផ្នែកទ្រឹស្តី និងការអនុវត្តគឺនៅជាមួយគ្នាចោលគ្នាពុំបាន បើយើងបានរៀន រួមទាំងអនុវត្តទៀត យើងនឹងមានការយល់ដឹងច្រើន។
៣ សំណួរខាងលើនេះ ខ្ញុំបាទគ្រាន់តែចែករំលែកចំពោះការយល់ឃើញ និងបទពិសោធន៍ដោះស្រាយបញ្ហាមួយចំនួនដែលបងប្អូននិស្សិតតែងតែសួរមកខ្ញុំផ្ទាល់ ហើយក៏ឆ្លៀតពេលសរសេរអត្ថបទនេះចែករំលែកដល់បងប្អូននិស្សិត ករណីមានការលើសលស់ខ្វះខាតកន្លែងណាមិនសមរម្យ សូមមេត្តាអធ្យាស្រ័យ។
ចែករំលែកដោយលោកគ្រូ Chum Kiri អតីតនិស្សិតពុទ្ធិកសាកលវិទ្យាល័យព្រះសីហមុនីរាជា សព្វថ្ងៃជាក្រឡាបញ្ជីខេត្តព្រៃវែងហើយក៏ជាគ្រូបង្រៀននៅពុទ្ធិកសាកលវិទ្យាល័យព្រះសីហមុនីរាជាផងដែល។✍️
សូមគោរពអរគុណ🙏🏻
ពីខ្ញុំបាទ ជុំ គីរី
