CJL ជាមជ្ឈមណ្ឌលថ្មីមួយដែលត្រូវបានបង្កើតឡើងក្នុងខែកញ្ញា ឆ្នាំ២០០៨ ហើយមានទីតាំងស្ថិតនៅក្នុងសាកលវិទ្យាល័យភូមិន្ទនិតិសាស្រ្ត និងវិទ្យាសាស្រ្តសេដ្ឋកិច្ច(RULE)។ យើងហៅកាត់ថា “CJL” ដែលមកពីឈ្មោះកាត់ជាភាសាអង់គ្លេសថា “Research and Education Center for Japanese Law, Cambodia”។ ក្រៅពីប្រទេសកម្ពុជាក៏មានមជ្ឈមណ្ឌលដូចគ្នានៅក្នុងប្រទេសចំនួន៣ផ្សេងទៀតត្រូវបានបង្កើតដូចជា អ៊ូបេគីស្ថាន(ឆ្នាំ២០០៥), ម៉ុងហ្គោលី(ឆ្នាំ២០០៦)
និងវៀតណាម(ឆ្នាំ២០០៧)។
មជ្ឈមណ្ឌលទាំងអស់នេះត្រូវបានបង្កើតឡើងដោយមានការសហការរវាងសាកលវិទ្យាល័យណាហ្គោយ៉ារបស់ជប៉ុន និងសាកលវិទ្យាល័យក្នុងតំបន់ ក្នុងគោលបំណង បណ្តុះអ្នកជំនាញច្បាប់ជប៉ុន។ យើងបង្កើត “វគ្គច្បាប់ជប៉ុន” ដោយការជ្រើសរើសនិស្សិតឆ្នាំទី១ពីសាកលវិទ្យាល័យក្នុងតំបន់ប្រហែល២០នាក់ ហើយនិស្សិតទាំងនោះសិក្សាភាសាជប៉ុន និងច្បាប់ជប៉ុន រយៈពេល៤ឆ្នាំ។ និសិ្សតឆ្នាំទី១ និងទី២ សិក្សាផ្តោតលើភាសាជប៉ុន ហើយចាប់ពីឆ្នាំទី៣ទៅ ក្រៅពីការសិក្សាជាមួយគ្រូបង្រៀនច្បាប់ជប៉ុននៅតាមមជ្ឈមណ្ឌលនីមួយៗ និស្សិតក៏នៅទទួលបានការបង្រៀនពីចំងាយតាមរយៈ ប្រព័ន្ធវីដេអូខុនហ្វើរិន។ ដោយសារនិស្សិតត្រូវតែសិក្សាក្នុងសាកលវិទ្យាល័យក្នុងតំបន់ក្នុងពេលតំណាលគ្នាផងដែរនោះ និស្សិតមានការរវល់ជារៀងរាល់ថ្ងៃ។ ប៉ុន្តែ ការទទួលការអប់រំអំពីច្បាប់ជប៉ុន និងការសិក្សាច្បាប់ក្នុងសាកលវិទ្យាល័យក្នុងតំបន់ក្នុងពេលតំណាលគ្នានេះត្រូវបានគេសង្ឃឹមថាធ្វើអោយនិស្សិតមានចក្ខុវិស័យក្នុងការប្រៀបធៀបច្បាប់ជាមួយប្រទេសរបស់ខ្លួន ហើយថែមទាំងផ្តល់អោយមានការអភិវឌ្ឍន៍ច្បាប់របស់ប្រទេសខ្លួនថែមទៀត។
