01/06/2022
വടക്കാഞ്ചേരിയിൽ ഫാസ്റ്റ് ട്രാക്ക് പോക്സോ കോടതി അനുവദിച്ചു.
കേരളത്തിൽ പുതുതായി അനുവദിച്ച 28 ഫാസ്റ്റ് ട്രാക്ക് സ്പെഷ്യൽ കോടതികളുടെ പട്ടിക തീരുമാനിച്ചുകൊണ്ട് ആഭ്യന്തര വകുപ്പ് ഉത്തരവിറക്കി. G.O. (Ms.) No. 105/2022/HOME നമ്പർ ഉത്തരവ് പ്രകാരം അനുവദിച്ച 28 അതിവേഗ പോക്സോ കോടതികളിൽ ഒന്ന് വടക്കാഞ്ചേരിയിൽ അനുവദിച്ചു. ബലാത്സംഗ കേസുകളും പോക്സോ നിയമപ്രകാരമുള്ള കേസുകളും അതിവേഗം തീർപ്പുകൽപ്പിക്കുന്നതിനായുള്ള സ്പെഷ്യൽ കോടതിയാണ് ആരംഭിക്കുന്നത്. ഒന്നര നൂറ്റാണ്ട് പഴക്കമുള്ള വടക്കാഞ്ചേരി കോടതിയിൽ സബ് കോടതിയും, എം എ സി ടി കോടതിയും പോക്സോ കോടതിയും കുടുംബ കോടതിയും അനുവദിക്കണമെന്ന് ആവശ്യപ്പെട്ടുകൊണ്ട് 26.10.2021 നാണ് നിയമസഭയിൽ സബ്മിഷൻ ഉന്നയിച്ചത്. പോക്സോ കോടതി പരിഗണിക്കാമെന്നും സബ് കോടതിയുടെ മുൻഗണനാ പട്ടികയിൽ വടക്കാഞ്ചേരി മൂന്നാം സ്ഥാനത്തുണ്ടെന്നും ബഹു. മുഖ്യമന്ത്രി പിണറായി വിജയൻ സബ്മിഷന് മറുപടിയായി പറഞ്ഞിരുന്നു. തുടർന്ന് 28 ഫാസ്റ്റ് ട്രാക്ക് പോക്സോ കോടതികൾ കേരളത്തിൽ അനുവദിച്ച ഘട്ടത്തിൽ വടക്കാഞ്ചേരിയെ പരിഗണിക്കണമെന്ന് ആവശ്യപ്പെട്ട് മുഖ്യമന്ത്രിയെ കണ്ട് നിവേദനം നൽകിയിരുന്നു. അന്ന് അദ്ദേഹം നൽകിയ ഉറപ്പ് പാലിക്കപ്പെട്ടിരിക്കുന്നു. സ്ത്രീകൾക്കും കുട്ടികൾക്കുമെതിരായ അതിക്രമങ്ങളിൽ ശക്തമായ നീതിനിർവ്വഹണം കാലതാമസം കൂടാതെ നടപ്പിലാക്കുന്നതിനായുള്ള എൽഡിഎഫ് സർക്കാരിൻ്റെ ശ്രമങ്ങളെ അഭിനന്ദിക്കുകയാണ്. വടക്കാഞ്ചേരിയെ പരിഗണിച്ചതിലുള്ള നന്ദിയും അറിയിക്കുന്നു.
