18/10/2026
ഒരു മകന്റെ വലിയ സ്വപ്നങ്ങൾക്ക് വേണ്ടി സ്വന്തം ജീവിതത്തിലെ എല്ലാ സുഖങ്ങളും ആഗ്രഹങ്ങളും മാറ്റിവെച്ച്, തളരാതെ കൂടെനിന്ന ഒരു അച്ഛന്റെയും അമ്മയുടെയും കഠിനാധ്വാനത്തിന്റെ കഥ കൂടിയാണ് പ്രിയ സുഹൃത്ത് വിനോദിന്റെ മകൻ അനിരുദ്ധ് വിനോദിന്റെ ഈ ലോക ചാമ്പ്യൻഷിപ് വിജയം!
12 വർഷങ്ങൾക്ക് മുമ്പുള്ള ആ ഓർമ്മകൾ ഇന്നും കണ്ണിൽ തെളിഞ്ഞുനിൽക്കുന്നുണ്ട്... അന്ന് അവന് വെറും ആറ് വയസ്സ്. അണ്ടർ-6, അണ്ടർ-7 കാറ്റഗറികളൊന്നും ഇല്ലാത്തതുകൊണ്ട് സൗത്ത് സോൺ സ്കേറ്റിംഗ് ചാമ്പ്യൻഷിപ്പിൽ അണ്ടർ-8 വിഭാഗത്തിലാണ് അവൻ മത്സരിക്കാൻ ഇറങ്ങുന്നത്. ഹൈദരാബാദിലേക്കും കോയമ്പത്തൂരിലേക്കും ബസ് കയറി, ഒരാഴ്ചയോളം നീണ്ട ആ യാത്രയും, അക്കാലത്ത് പാലക്കാടൊന്നും സ്കേറ്റിംഗിന് അത്രയധികം ട്രാക്കുകളോ സൗകര്യങ്ങളോ ഇല്ലാതിരുന്നതുകൊണ്ട് വലിയ ട്രാക്കുകൾ ആദ്യമായി കണ്ടപ്പോൾ ആ കുഞ്ഞു മനസ്സിലുണ്ടായ കൗതുകവുമെല്ലാം ഇന്നലെ കഴിഞ്ഞതുപോലെ തോന്നുന്നു.
സ്വന്തം കാലത്ത് ക്രിക്കറ്റിൽ തനിക്ക് ആഗ്രഹിച്ച ഉയരങ്ങളിൽ എത്താൻ കഴിയാതെ പോയതിന്റെയും, അന്ന് ആരും തുണയ്ക്കാനോ പ്രോത്സാഹിപ്പിക്കാനോ ഇല്ലാതിരുന്നതിന്റെയും വിഷമങ്ങൾ വിനോദ് തന്റെ മകനിലൂടെ തീർക്കുകയായിരുന്നു. നല്ല പ്രാക്ടീസും ഫയലുകളുമുള്ള ഒരു ഓഫീസിലെ അഭിഭാഷകനായ വിനോദും, ഒപ്പം താങ്ങായി നിന്ന അമ്മ ദീപയും (അഡ്വക്കേറ്റ്സ് ആണ് രണ്ടുപേരും) മകന്റെ സ്കേറ്റിംഗ് പ്രാക്ടീസിനും മത്സരങ്ങൾക്കും വേണ്ടി സ്വന്തം കരിയറിലെയും ജീവിതത്തിലെയും എത്രയെത്ര തിരക്കുകളും നഷ്ടങ്ങളും സഹിച്ചാണ് ഒപ്പം നിന്നത്! മകൻ പുലർച്ചെ മൂന്ന് മണിക്ക് എണീറ്റ് പ്രാക്ടീസ് ചെയ്യുമ്പോൾ, അവനെയും കൂട്ടി കാറിൽ കോയമ്പത്തൂരിലേക്ക് യാത്രാ ചെയ്ത്, പ്രാക്ടീസ് കഴിഞ്ഞ് തിരിച്ചുവരുന്ന വഴിയിൽ വണ്ടിയിൽ വെച്ച് ഭക്ഷണം കൊടുത്തു ഡ്രസ്സ് മാറ്റി നേരെ സ്കൂളിലേക്ക് എത്തിക്കുന്ന ആ അച്ഛന്റെയും അമ്മയുടെയും കരുതൽ ഏതൊരു മകനും ലഭിക്കാവുന്ന ഏറ്റവും വലിയ ഭാഗ്യമാണ്.
പിന്നീട് വലിയ മത്സരങ്ങൾക്കായി ഹൈദരാബാദിലേയ്ക്ക് എത്തുമ്പോൾ ഞാനുമുണ്ടായിരുന്നു കൂടെ. ആ വലിയ ട്രാക്കിൽ കൊണ്ടുപോയി നിർത്തിയപ്പോൾ പേടികൊണ്ട് മടിച്ച് സമ്മർദ്ദത്തിലായ, ചേർത്തുനിർത്തി ഡ്രസ്സ് മാറി തിരികെ ട്രാക്കിലെത്തിച്ച ആ ആറുവയസ്സുകാരനിൽ നിന്ന്, അവൻ ഇന്നിവിടെ വരെ എത്തിനിൽക്കുന്നു! മത്സര ഓട്ടത്തിൽ അവനെ ആവേശത്തിലാക്കാൻ ട്രാക്കിന് ചുറ്റും ഒപ്പം ഓടിനടന്ന് പ്രോത്സാഹിപ്പിച്ച ആ പഴയ നാളുകൾക്ക് ഇന്ന് തികച്ചും അർത്ഥവത്തായ ഒരു മറുപടി ലഭിച്ചിരിക്കുകയാണ്. യൂറോപ്പിലെ ചാമ്പ്യൻഷിപ്പിൽ, സെക്കൻഡിന്റെ നൂറിലൊന്ന് (0.043) വ്യത്യാസത്തിൽ വെള്ളി മെഡൽ നേടി പോരാട്ടം തുടങ്ങിയ അവൻ, റോഡ് റേസിൽ ഒന്നാം സ്ഥാനത്തോടെ സ്വർണ്ണവും തൂക്കി ലോക ചാമ്പ്യൻ പദവിയിലേക്ക് നടന്നു കയറിയിരിക്കുന്നു!
ഈ വലിയ വിജയത്തിന് പിന്നിൽ ആ കുട്ടിയുടെ കഠിനാധ്വാനത്തോടൊപ്പം തന്നെ അച്ഛൻ വിനോദിന്റെയും അമ്മ ദീപയുടെയും അളവില്ലാത്ത ത്യാഗവും പ്രാർത്ഥനയുമുണ്ട്. തുടക്കം മുതൽ ആ കുഞ്ഞിക്കാലടികൾക്കൊപ്പം നിൽക്കാനും പ്രോത്സാഹിപ്പിക്കാനും സാധിച്ചതിൽ അതിയായ സന്തോഷവും അഭിമാനവും ചാരിതാർത്ഥ്യവുമുണ്ട്.
ലോകത്തിന്റെ നെറുകയിൽ നമ്മുടെ നാടിന്റെയും രാജ്യത്തിന്റെയും കൊടിയുയർത്തിയ പ്രിയപ്പെട്ട അനിരുദ്ധിനും, ആ താങ്ങായി നിന്ന വിനോദിനും കുടുംബത്തിനും ഹൃദയം നിറഞ്ഞ അഭിനന്ദനങ്ങൾ! തുടർ മത്സരങ്ങളിലും ഈ വിജയക്കുതിപ്പ് തുടരാനാകട്ടെ...
