02/08/2026
കോട്ടയം കളക്ടർമാർ ശ്രദ്ധ നേടുന്നു ❤️
കോട്ടയത്ത് അടുത്തകാലത്ത് ചുമതലയേറ്റ ജില്ലാ കളക്ടർമാർ വ്യത്യസ്തമായ ആശയങ്ങളിലൂടെയും ഇടപെടലുകളിലൂടെയും ശ്രദ്ധ നേടുകയാണ്.
മുൻ ജില്ലാ കളക്ടർ വി. വിഗ്നേശ്വരി ആരംഭിച്ച ‘Wall of Love’ ഏറെ ശ്രദ്ധിക്കപ്പെട്ട നല്ലൊരു സംരംഭമായിരുന്നു.
പിന്നീട് വന്ന ജോൺ സാമുവൽ കോട്ടയം ജില്ലയിൽ കൂടുതൽ ഐ.ടി പാർക്കുകൾ വരേണ്ടതിന്റെ ആവശ്യകത ചൂണ്ടിക്കാട്ടി. ഇപ്പോഴിതാ നാട്ടകത്തും പുതുപ്പള്ളിയിലും ഐ.ടി പാർക്കുകൾ വരുന്നു. കോട്ടയം ടൗണിൽ ആകാശപാതയും യാഥാർഥ്യമാകുന്നു.
ഇപ്പോഴത്തെ ജില്ലാ കളക്ടർ ചേതൻകുമാർ മീണ ഇന്ന് മഴയെ തുടർന്ന് കുട്ടികൾക്ക് അവധി പ്രഖ്യാപിച്ചതിനൊപ്പം എഴുതിയ വാക്കുകളാണ് ശ്രദ്ധ നേടുന്നത്.
ഔദ്യോഗികമായ ഒരു അവധി പ്രഖ്യാപനത്തിനപ്പുറം, കുട്ടികളോട് സ്നേഹത്തോടെയും കരുതലോടെയും ഉത്തരവാദിത്വബോധത്തോടെയും സംസാരിക്കുന്ന ഒരു കളക്ടറെയാണ് ഈ കുറിപ്പിൽ കാണുന്നത്.
കളക്ടർ ബ്രോ കുട്ടികളോട് പറഞ്ഞത് ❤️
“പ്രിയ വിദ്യാർത്ഥികളേ,
ഓരോ ദിവസവും അവധി പ്രഖ്യാപിക്കുമ്പോഴുള്ള നിങ്ങളുടെ സന്തോഷം എത്രമാത്രമുണ്ടെന്ന് എനിക്കറിയാം. പക്ഷേ, ഒന്നോർക്കുക, ഇത് കാലാവസ്ഥ സമ്മാനിച്ച ഒരു അവധിക്കാലമല്ല. നിങ്ങളുടെ സുരക്ഷയ്ക്കായുള്ള മുൻകരുതലാണ്.
അതുകൊണ്ട് ഈ അവധി ദിവസങ്ങളിൽ ജില്ലാ കളക്ടർ നിങ്ങൾക്ക് ചെറിയൊരു ചലഞ്ച് തരികയാണ്.
📚 കുറച്ച് പഠിക്കുക.
📖 നല്ലൊരു പുസ്തകം വായിക്കുക.
👨👩👧 കുടുംബത്തോടൊപ്പം സമയം ചെലവഴിക്കുക.
☕ മാതാപിതാക്കൾക്ക് മറ്റൊരു ‘ഹോം വർക്കായി’ സ്വയം മാറാതെ അവരെ സഹായിക്കുക.
ഏറ്റവും പ്രധാനപ്പെട്ടൊരു കാര്യം, അത്യാവശ്യ കാര്യങ്ങളില്ലെങ്കിൽ വീട്ടിൽത്തന്നെ കഴിച്ചുകൂട്ടുക.
നദികളുടെയും പുഴകളുടെയും വെള്ളച്ചാട്ടങ്ങളുടെയും അടുത്തേക്കും വെള്ളക്കെട്ടുള്ള റോഡുകളിലും മണ്ണിടിച്ചിൽ സാധ്യതയുള്ള സ്ഥലങ്ങളിലും പോകാതിരിക്കുക. പ്രകൃതി സുന്ദരമാണ്. പക്ഷേ, കനത്ത മഴ പെയ്യുമ്പോൾ പ്രകൃതിയെ ബഹുമാനിച്ചുകൊണ്ടുതന്നെ സുരക്ഷിതമായ അകലം പാലിക്കുക.
ആറും തോടും നിറഞ്ഞുകവിഞ്ഞൊഴുകുന്നത് കാണാൻ പോകാം എന്ന് കൂട്ടുകാർ വിളിച്ചാൽ ‘ഇല്ല’ എന്ന് ഉറപ്പിച്ചു പറയാൻ നിങ്ങൾക്കു കഴിയണം.
മാതാപിതാക്കൾ, വീട്ടിലെ പ്രായമായവർ, മറ്റു ബന്ധുക്കൾ, അയൽവാസികൾ എന്നിവരുടെയും വളർത്തുമൃഗങ്ങളുടെയും കാര്യത്തിൽ കുട്ടികൾ കരുതലുള്ളവരായിരിക്കണം. ഉത്തരവാദിത്വമുള്ള വിദ്യാർത്ഥി കുടുംബത്തിന്റെ അഭിമാനവും ശക്തിയുമാണ്.
വീണ്ടും സ്കൂൾ തുറക്കുമ്പോൾ നിറഞ്ഞ പുഞ്ചിരിയോടെ ക്ലാസിലെത്താൻ, മഴദിവസങ്ങൾ എങ്ങനെ ചെലവഴിച്ചു എന്ന് കൂട്ടുകാരോട് പറയാൻ നിങ്ങൾക്കു കഴിയണം.
അതുവരെ കുറച്ച് പഠിക്കുക.
ഒത്തിരി സന്തോഷിക്കുക.
പുറത്ത് വെള്ളം പൊങ്ങിയ സ്ഥലങ്ങളേക്കുറിച്ചുള്ള ആകാംക്ഷയല്ല, പുതിയ അറിവുകൾ നിങ്ങളുടെ മനസിൽ നിറഞ്ഞു കവിയട്ടെ.
സുരക്ഷിതരായിരിക്കുക, ജാഗ്രത പുലർത്തുക.
സ്നേഹത്തോടെ,
ചേതൻകുമാർ മീണ
ജില്ലാ കളക്ടർ”
❤️ ഒരു കളക്ടർ എന്നത് ഫയലുകളിൽ ഒപ്പിടുന്ന ഒരു ഉദ്യോഗസ്ഥൻ മാത്രമല്ല; ഒരു ജില്ലയ്ക്ക് പുതിയ ആശയങ്ങൾ നൽകാനും വികസനത്തിന് ദിശ കാണിക്കാനും ജനങ്ങളോടും കുട്ടികളോടും ഹൃദയപൂർവം സംവദിക്കാനും കഴിയുന്ന വ്യക്തിയുമാണ്.
കോട്ടയത്തിന് നല്ല ആശയങ്ങൾ പറയുന്ന, ജനങ്ങളോട് ചേർന്നുനിൽക്കുന്ന കളക്ടർമാർ ഇനിയും ഉണ്ടാകട്ടെ.
