03/03/2026
തൃശൂരിൽ വന്ന് ഏവരുടെയും പ്രിയങ്കരനായി തിരിച്ചു പോയ കലക്ടറാണ് അർജുൻ പാണ്ഡ്യൻ. പ്രായലിംഗതൊഴിൽ ഭേദമെന്യേ എല്ലാവരും കൂട്ടായിരുന്നു അദ്ദേഹത്തോട്. മികച്ച കലക്ടർക്കുള്ള റവന്യു വകുപ്പിന്റെ പുരസ്കാരം ഏറ്റുവാങ്ങി ദിവസങ്ങൾക്കകമാണ് അർജുൻ പാണ്ഡ്യനു സ്ഥലംമാറ്റമുണ്ടായത്.അപ്രതീക്ഷിതമായിരുന്നു.
ഇപ്പോഴിതാ തൃശൂരിന് പുതിയ കലക്ടർ. ശിഖ സുരേന്ദ്രൻ.ഹരിതക്കു ശേഷം തൃശൂരിലെ വനിതാ കലക്ടർ. മികച്ച അക്കാദമിക് നേട്ടങ്ങളോടെ പഠിച്ച് വന്ന്, സംസ്ഥാനത്ത് ഒന്നാം റാങ്കോടെ ഐ.എ.എസ് പാസായ ( 2018) ശിഖയെ അന്ന് ശ്രദ്ധിച്ചത് ഹരിതയെപ്പോലെത്തന്നെ മലയാളഭാഷയിൽ ഉള്ള മിടുക്കിലും താല്പര്യത്തിലുമാണ്. (മലയാളം പ്രധാന വിഷയമായി തിരഞ്ഞെടുത്താണ് സിവിൽ സർവീസ് എഴുതിയത്) പക്ഷേ അവരുടെ എഴുത്ത് വായിച്ചപ്പോഴാണ് കൂടുതൽ അവരെക്കുറിച്ചറിയുന്നത്.
ഒരു പെൺകുട്ടിയുടെ , കുടുംബത്തിന്റെ സ്വപ്നം എങ്ങനെ ഒരു സമൂഹത്തിൻ്റെ മുഴുവൻ പ്രതീക്ഷയായി വളർന്നിരിക്കുന്നു എന്ന് കണ്ണ് നിറഞ്ഞു. എത്രയോ പേർക്ക് പ്രചോദനമാണ്. എത്രയോ വീടുകളിൽ സ്വപ്നം കാണാൻ തടസ്സങ്ങളുള്ള കുട്ടികൾക്ക് ഊർജമാകുമിത്. അച്ഛന്റെ രോഗം, അമ്മയുടെ കഷ്ടപ്പാട്,
സാമ്പത്തിക ബുദ്ധിമുട്ടുകൾ
ഇതൊന്നും തൻ്റെ സ്വപ്നത്തെ തളർത്തിയില്ല. ആരും തലോടാനില്ലെങ്കിലും എവിടെയും പിന്മാറാതെ, തോറ്റു കൊടുക്കാതെ സ്വയം വിശ്വസിച്ച ഒരു പെൺകുട്ടിയുടെ യാത്ര.
അഭിമാനവും ആദരവും സ്നേഹവും.
Sikha Surendran
ശിഖ എന്നാൽ ജ്വാലയെന്നർഥം. കൊടുമുടിയെന്നും. അഗ്നിശിഖയായൊരു പെൺകുട്ടി.
കലക്ടറുടെ എഴുത്ത് വായിക്കൂ..👇🏻👇🏻👇🏻
സ്വപ്നം കാണുവാൻ പഠിപ്പിച്ചത് അച്ഛനാണ്. ഇന്ന് തൃശ്ശൂർ ജില്ലാ കളക്ടർ ആയി ചാർജ് എടുത്തപ്പോൾ, ഈ നിമിഷത്തിന് സാക്ഷ്യം വഹിക്കുവാൻ അച്ഛൻ കൂടി ഉണ്ടായിരുന്നെങ്കിൽ എന്ന് കൊതിച്ചു പോകുന്നു. ഡയാലിസിസ് കിടക്കയിൽ നിന്ന് അച്ഛൻ പകർന്നു തന്നത്ര ഊർജ്ജവും ആത്മവിശ്വാസവും മറ്റൊരു വ്യക്തിക്കും ഇതുവരെ എനിക്ക് നൽകാനായിട്ടില്ല. കണ്ണുകൾ ഈറനണിഞ്ഞാണ് ഈ കുറിപ്പ് എഴുതുന്നതെങ്കിലും, അച്ഛൻറെ അനുഗ്രഹങ്ങൾ എന്നും എന്നിൽ ഉണ്ടാകും എന്ന ഉറപ്പാണ് മുന്നോട്ടുള്ള എൻറെ ഊർജ്ജം. ചാർജ് എടുക്കുവാൻ കളക്ടറേറ്റിലേക്ക് ഇറങ്ങുന്ന നേരം, കാൽ തൊട്ടു തൊഴുതപ്പോൾ, അമ്മ വിതുമ്പിയതിന് കാരണം അച്ഛൻറെ അഭാവമാണ്. എന്നോടൊപ്പം ജില്ലാ കളക്ടറുടെ കാറിൽ കയറിയപ്പോഴും സങ്കടം കൊണ്ടു അമ്മ ഒന്നും മിണ്ടിയിരുന്നില്ല. അച്ഛൻ രോഗബാധിതനായപ്പോൾ ഏതാണ്ട് ഇരുപത് വർഷം ഞങ്ങൾക്കുവേണ്ടി വിയർപ്പൊഴുക്കി അധ്വാനിച്ചത് അമ്മയാണ്. കമ്പനിയിൽ ഏറെ സമയവും നിന്നു കൊണ്ടുള്ള ജോലിചെയ്ത് ക്ഷീണിതയായി വീട്ടിലെത്തുന്ന അമ്മയ്ക്ക്, മകൾക്ക് ഉപദേശങ്ങൾ നൽകുവാനോ, പഠനത്തിലെ സംശയങ്ങൾ ദൂരീകരിക്കുവാനോ അറിയുമായിരുന്നില്ല. സിവിൽ സർവീസ് കോച്ചിങ്ങിന് കുടുംബശ്രീയിൽ നിന്നും ,സഹകരണ ബാങ്കിൽ നിന്നും ലോണെടുത്ത് പഠിപ്പിക്കാൻ അയച്ചു. വീട്ടിലെ അവസ്ഥ മനസ്സിലാക്കി മറ്റൊരു ജോലിയോടൊപ്പം പഠിക്കാം എന്ന് കരുതിയപ്പോൾ പോലും അമ്മയും അച്ഛനും എന്നെ പിന്തിരിപ്പിച്ചു.
സിവിൽ സർവീസ് പരീക്ഷയുടെ ഉത്തരക്കടലാസുകളിൽ നിന്നും ജില്ലാ കളക്ടറുടെ കസേരയിലേക്ക് എന്നെ എത്തിച്ചത് ഞാൻ വായിച്ചു പഠിച്ച പുസ്തകങ്ങളും എഴുതി ശീലിച്ച ഉത്തരങ്ങളും മാത്രം അല്ല ; മറിച്ച്, പഠിച്ചു മടുത്തിരിക്കുമ്പോൾ , ചെയ്യാമെന്ന് കരുതി മാറ്റിവെക്കുമ്പോൾ , തോൽക്കും എന്ന് ഭയന്നിരിക്കുമ്പോൾ , എല്ലാം- തന്റെ മകൾ അത് നേടിയെടുക്കും എന്ന് ഉറച്ചു വിശ്വസിച്ച ഒരു അച്ഛനും ഒരു അമ്മയുമാണ്.
Joined as District Collector, Thrissur, today
Today is not just a professional milestone — it is the realization of a dream that first lived in my father’s heart. Becoming a District Collector was his dream for me before it became mine. Though he is no longer here to witness this day, I felt his blessings guiding me through every moment. I hope I have made him proud.
This achievement stands on the strength of my mother — a simple blue-collar worker in a company, whose days were long and whose work was strenuous. She worked tirelessly, often beyond her limits, quietly carrying the weight of our dreams on her shoulders. Her sacrifices are the foundation of this day.
And my sister — my constant source of encouragement — who never allowed me to give up on myself. Having both of them by my side when I assumed charge made the moment overwhelming and deeply emotional.
With gratitude, humility, and a heart full of memories, I step into this responsibility seeking everyone’s support and blessings.
