19/08/2026
“വാർദ്ധക്യത്തിൽ മാതാപിതാക്കൾക്ക് സംരക്ഷണവും അന്തസ്സും ഉറപ്പാക്കണം.”
മുതിർന്ന പൗരന്മാരുടെയും മാതാപിതാക്കളുടെയും സംരക്ഷണം ഉറപ്പാക്കാൻ ആവശ്യമായ സാഹചര്യത്തിൽ മക്കളെയും അവരുടെ കുടുംബത്തെയും സ്വത്തിൽ നിന്ന് ഒഴിപ്പിക്കാൻ വയോജന ട്രിബ്യൂണലിന് അധികാരമുണ്ടെന്ന് സുപ്രീം കോടതി.
മാതാപിതാക്കളെ സംരക്ഷിക്കാതെ, അവരുടെ സ്വത്തിൽ അവകാശം സ്ഥാപിച്ച് അവരെ തന്നെ ഉപദ്രവിക്കുന്ന മക്കൾക്കുള്ള ശക്തമായ മുന്നറിയിപ്പാണ് ഈ സുപ്രധാന വിധി. ⚖️
ജസ്റ്റിസുമാരായ പി.എസ്. നരസിംഹ, അലോക് ആരാധെ എന്നിവരടങ്ങിയ ബെഞ്ചിന്റേതാണ് വിധി.
എന്താണ് സുപ്രീം കോടതി പറഞ്ഞത്?
2007-ൽ കൊണ്ടുവന്ന Maintenance and Welfare of Parents and Senior Citizens Act-ന്റെ ലക്ഷ്യം തന്നെ വാർദ്ധക്യത്തിൽ മാതാപിതാക്കൾ നേരിടേണ്ടിവരുന്ന അവഗണന, അരക്ഷിതാവസ്ഥ, അപമാനം എന്നിവ ഒഴിവാക്കുകയാണെന്ന് കോടതി വ്യക്തമാക്കി.
മുതിർന്നവർക്ക് അന്തസ്സോടെയും ബഹുമാനത്തോടെയും സുരക്ഷിതമായും ജീവിക്കാനുള്ള അവകാശം ഉറപ്പാക്കുന്നതായിരിക്കണം നിയമത്തിന്റെ വ്യാഖ്യാനം.
“ഒരു സമൂഹം എത്രമാത്രം പരിഷ്കൃതമാണെന്ന് അളക്കുന്നത്, അതിലെ മുതിർന്നവരോട് എത്രമാത്രം അന്തസ്സോടെയും ബഹുമാനത്തോടെയും പെരുമാറുന്നു എന്നതിലൂടെയാണ്.”
വിധിക്ക് ആസ്പദമായ കേസിൽ സംഭവിച്ചത്...
ഉത്തർപ്രദേശുകാരനായ രവികാന്ത് ഗുപ്തയുടെ 81 വയസ്സുള്ള മാതാവിനാണ് സ്വന്തം വീട്ടിൽ നിന്ന് അപമാനകരമായ അനുഭവം നേരിടേണ്ടിവന്നത്.
രവികാന്ത് വാങ്ങിയ വീട്ടിൽ മകനും കുടുംബവും അദ്ദേഹത്തിന്റെ വൃദ്ധമാതാവും താമസിച്ചിരുന്നു.
എന്നാൽ പിന്നീട് കൊച്ചുമകനും ഭാര്യയും ചേർന്ന് മുത്തശ്ശിയെ ബലംപ്രയോഗിച്ച് വീട്ടിൽ നിന്ന് മാറ്റി ഓൾഡ് ഏജ് ഹോമിൽ എത്തിച്ചു.
മാതാവിന്റെ സംരക്ഷണത്തിനായി രവികാന്ത് മെയിന്റനൻസ് ട്രൈബ്യൂണലിനെ സമീപിച്ചു.
തുടർന്ന് മകനെയും കുടുംബത്തെയും വീട്ടിൽ നിന്ന് ഒഴിപ്പിക്കാൻ ട്രൈബ്യൂണൽ ഉത്തരവിട്ടു.
എന്നാൽ അലഹബാദ് ഹൈക്കോടതി ആ ഉത്തരവ് റദ്ദാക്കി.
ഇതോടെയാണ് രവികാന്ത് സുപ്രീം കോടതിയെ സമീപിച്ചത്.
സുപ്രീം കോടതിയുടെ നിർണായക ഇടപെടൽ ⚖️
അലഹബാദ് ഹൈക്കോടതിയുടെ ഉത്തരവ് സുപ്രീം കോടതി റദ്ദാക്കി.
മുത്തശ്ശിയെ സംരക്ഷിക്കാത്ത കൊച്ചുമകനെയും ഭാര്യയെയും വീട്ടിൽ നിന്ന് ഒഴിപ്പിക്കാൻ വയോജന ട്രിബ്യൂണലിന് അധികാരമുണ്ടെന്ന് സുപ്രീം കോടതി വ്യക്തമാക്കി.
സ്വത്ത് ലഭിക്കുന്നത് ഒരു അവകാശമായിരിക്കാം...
പക്ഷേ ആ സ്വത്തിന്റെ പേരിൽ സ്വന്തം മാതാപിതാക്കളെ അപമാനിക്കാനും ഉപേക്ഷിക്കാനും ആർക്കും അവകാശമില്ല.
വാർദ്ധക്യത്തിൽ മാതാപിതാക്കൾക്ക് വേണ്ടത് വലിയ സമ്പത്തല്ല...
അൽപ്പം സ്നേഹം, കരുതൽ, സുരക്ഷ...
അവർക്ക് അർഹമായ ഒരു അന്തസ്സുള്ള ജീവിതം. ❤️
മാതാപിതാക്കളെ സംരക്ഷിക്കുന്നത് ഒരു ബാധ്യത മാത്രമല്ല...
നമ്മളെ വളർത്തിയ കൈകളോടുള്ള ഏറ്റവും വലിയ കടപ്പാടാണ്. 🙏
