16/09/2026
🚘 ავტომობილის ხმაურის შემოწმება — რა უნდა იცოდეს თითოეულმა მძღოლმა?
თუ პოლიციამ ავტომობილის გამონაბოლქვის ხმაურის შესამოწმებლად გაგაჩერათ, მნიშვნელოვანია იცოდეთ, რომ გაზომვა უნდა ჩატარდეს კანონით განსაზღვრული წესების დაცვით.
📌 დასახლებულ პუნქტებში, ღამის 23:00 საათიდან დილის 08:00 საათამდე, ავტომობილის ხმაური არ უნდა აღემატებოდეს 80 დეციბელს.
როგორ უნდა ჩატარდეს შემოწმება?
1️⃣ აპარატის შემოწმება და დაკალიბრება
გაზომვამდე პოლიციელმა უნდა შეამოწმოს, ხომ არ აქვს აპარატს მექანიკური დაზიანება. აპარატი უნდა დაკალიბრდეს როგორც გაზომვამდე, ისე გაზომვის შემდეგ.
2️⃣ გარემოს ხმაურის შემოწმება
პოლიციელმა ჯერ უნდა გაზომოს გარემოს ხმაური. თუ ავტომობილისა და გარემოს ხმაურის დონეებს შორის სხვაობა 10 დეციბალზე ნაკლებია, გაზომვის შედეგები სარწმუნოდ არ მიიჩნევა.
მაგალითად, თუ გარემოს ხმაური 75 დეციბელია, ხოლო ავტომობილის — 82 დეციბელი, ასეთი გაზომვის შედეგი სარწმუნო არ არის.
3️⃣ ამინდის პირობები
გაზომვა დასაშვებია მხოლოდ მაშინ, როდესაც ჰაერის ტემპერატურა -10°C-დან +50°C-მდეა.
ასევე უნდა გაითვალისწინონ ძლიერი ქარი, წვიმა, ხმაურის ამრეკლი ზედაპირები და სხვა გარემოებები, რომლებმაც შეიძლება შედეგზე გავლენა მოახდინოს.
4️⃣ სად უნდა განთავსდეს აპარატი?
ავტომობილი უნდა იყოს გაჩერებული.
წესის თანახმად, მიზანშეწონილია აპარატის განთავსება:
• მაყუჩიდან დაახლოებით 50 სმ-ის დაშორებით (დასაშვები გადახრით ±1 სმ);
• მაყუჩის მიმართ 45°-იანი კუთხით;
• მაყუჩის სიმაღლეზე, მაგრამ მიწიდან არანაკლებ 20 სმ-ზე.
აპარატს უნდა ჰქონდეს ქარისგან დამცავი ღრუბელი და მის სიახლოვეს არ უნდა იყოს დაბრკოლება, რომელიც გაზომვაზე გავლენას მოახდენს.
5️⃣ როგორ მოწმდება ძრავის ბრუნი?
პოლიციელმა ძრავის ბრუნვის გასაკონტროლებლად ავტომობილს უნდა დაუკავშიროს სპეციალური მოწყობილობა, როგორც წესი, OBD პორტის მეშვეობით.
თუ OBD პორტი მიუწვდომელია (ავტომანქანას არ აქვს) შესაძლებელია დეტექტორის გამოყენება სხვა წესით.
გაზომვისას ძრავის ბრუნი უნდა გაიზარდოს ტახომეტრზე მითითებული მაქსიმალური ბრუნვის ნახევრამდე, თუ შემზღუდველი უფრო ადრე არ ამოქმედდება.
თუ ავტომობილის მაქსიმალური ბრუნი 5 000-ზე ნაკლებია, გამოიყენება 75%-იანი ზღვარი.
6️⃣ რომელ რეჟიმში იზომება ხმაური?
თუ ავტომობილს რამდენიმე ქარხნული მართვის რეჟიმი აქვს (მაგალითად, Normal და Sport), გაზომვა უნდა ჩატარდეს იმ რეჟიმში, რომელიც ყველაზე მეტ ხმაურს წარმოქმნის.
7️⃣ რამდენჯერ უნდა გაიზომოს ხმაური?
გაზომვა უნდა ჩატარდეს ზედიზედ სამჯერ.
საბოლოო შედეგად ითვლება სამი გაზომვის საშუალო არითმეტიკული მაჩვენებელი.
თუ სამი გაზომვის შედეგებს შორის სხვაობა 2 დეციბალს აღემატება, გაზომვა თავიდან უნდა ჩატარდეს.
8️⃣ რა ხდება, თუ ავტომობილს ორი მაყუჩი აქვს?
თუ მაყუჩები ერთმანეთისგან 30 სმ-ზე მეტი მანძილითაა დაშორებული, თითოეული ცალ-ცალკე უნდა შემოწმდეს.
საბოლოო შედეგად ჩაითვლება უფრო მაღალი მაჩვენებელი.
⚖️ რა ჯარიმაა გათვალისწინებული?
• პირველი დარღვევა — 100 ლარი და მართვის მოწმობის 10 ქულის დაკლება.
• განმეორებითი დარღვევა — 200 ლარი და 20 ქულის დაკლება.
• მესამე და ყოველი მომდევნო დარღვევა — 300 ლარი და 30 ქულის დაკლება.
📄 რა უნდა მოითხოვოთ დაჯარიმების შემთხვევაში?
გაზომვის შედეგები უნდა ამოიბეჭდოს და საჯარიმო ქვითართან ერთად გადმოგეცეთ.
თუ მიიჩნევთ, რომ გაზომვის პროცედურა დაირღვა, მნიშვნელოვანია დააფიქსიროთ კონკრეტული გარემოებები: მაგალითად, აპარატის დაკალიბრების არარსებობა, მაღალი ფონური ხმაური, არასწორი გაზომვის პირობები ან სამ გაზომვას შორის 2 დეციბალზე მეტი სხვაობა.
გაითვალისწინეთ: კანონით დადგენილი გაზომვის წესის დაცვა მნიშვნელოვანია როგორც საგზაო უსაფრთხოებისთვის, ისე მძღოლის უფლებების დასაცავად.
მძღოლმა უნდა იცოდეს არა მხოლოდ ის, თუ რამდენია დასაშვები ხმაურის დონე, არამედ ისიც, როგორ უნდა დადგინდეს მისი გადაჭარბება კანონიერად.
