24/06/2016
დღეს, 24 ივნისს, უზენაესი სასამართლოს გადაწყვეტილების გამოცხადებით საბოლოოდ დავასრულეთ სამ წლიანი დავა ჩვენი კლიენტის და უკვე თამამად შეგვიძლია ვთქვათ მეგობრების საქმეზე, რომელიც ეხებოდა სასაქონლო ნიშნით მარკირებული საქონლის უკანონო რეალიზაციას.
მოკლედ რომ ვთქვათ, ჩვენი მეგობრების მიერ საქპატენტში რეგისტრირებულ, სასაქონლო ნიშნით მარკირებულ საქონელს აწარმოებდა სხვა საწარმო და ახდენდა მის რეალიზაციას როგორც საქართველოში ასევე საზღვარგარეთ. ჩვენდა სამწუხაროდ, შესაბამისმა სამართალდამცავმა ორგანოებმა და ასევე საბაჟო ორგანოებმა მთელი ამ პერიოდის მანძილზე ვერ უზრუნველყვეს დაცული სასაქონლო ნიშით მარკირებული პროდუქციის რეალიზაციის აღკვეთა (მით უფრო რომ საქმე ეხებოდა ფარმაცევტულ პროდუქციას). თუმცა ჯერ ბათუმის სამოქალაქო სასამართლოს, შემდეგ ქუთაისის სააპელაციო სასამართლოს და ბოლოს უკვე საქართველოს უზენაესი სასამართლოს მეშვეობით შევძელით საბოლოო გამარჯვების მიღწევა და უკანონო მწარმოებელს ჩვენი მეგობრების სასარგებლოდ დავაკისრეთ დაახლოებით 480 000 ლარის ზიანის ანაზღაურება, რომელიც კომპანიას მიადგა მიუღებელი შემოსავლის სახით. აღნიშული გადაწყვეტილების დასაბუთებამ ფაქტიურად დაამკვიდრა საქართველოში პრაქტიკა, რომლის მიხედვითაც სხვისი სასაქონლო ნიშნით ან სავაჭრო ნიშნით უნებართვო სარგებლობა მხოლოდ აკრძალვით არ შემოიფარგლება და დამრღვევ მხარეს მოუწევს ფინანსური პასუხისმგებლობა მეორე მხარის მიუღებელ შემოსავალზე.
