28/02/2020
დღეს ჩენს ქვეყანაში არსებული გამოწვევიდან გამომდინარე, გაგაცნობთ დაავადებათა კონტროლისა და საზოგადოებრივი ჯანმრთელობის ეროვნული ცენტრის NCDC - რეკომენდაციებს რომლებიც დაგვეხმარება შევამციროთ კორონავირუსით დაინფიცირების რისკები.
ადამიანის ფიზიოლოგიიდან გამომდინარე, ანტივირუსული მედიკამენტების გამოყენება შესაძლებელია, თუმცა ისინი, როგორც წესი, მხოლოდ სიმპტომებს აუმჯობესებენ. გამოჯანმრთელება იმუნური სისტემის სიძლიერეზეა დამოკიდებული. ფატალური შედეგი, როგორც წესი, იმ შემთხვევებში დგება, როდესაც პაციენტის იმუნური სისტემა და ორგანიზმი დასუსტებულია.. ყველაზე დიდი რისკის ქვეშ იმყოფებიან მოხუცებული და სახვადასხვა ქრონიკული დაავადების მქონე ადამიანები, რომლებსაც გააჩნიათ იმუნიტეტის დეფიციტი.
❓რა არის კორონავირუსის სიმპტომები?
კორონავირუსით გამოწვეული ინფექციის ძირითადი ნიშნებია:
· რესპირატორული სიმპტომები;
· ცხელება;
· ხველა;
· ქოშინი და სუნთქვის გაძნელება;
· ძლიერი საერთო სისუსტე.
უფრო მძიმე შემთხვევებში, ინფექციამ შეიძლება გამოიწვიოს პნევმონია, მძიმე მწვავე რესპირატორული სინდრომი, თირკმელების უკმარისობა.
❓როგორ დავიცვათ თავი კორონავირუსით გამოწვეული ინფექციისგან?
პრაქტიკული რეკომენდაციები ინფექციის გავრცელების თავიდან ასაცილებლად :
· რესპირატორული ინფექციის მქონე ადამიანებთან კონტაქტისაგან თავის არიდება;
· საზოგადოებრივი თავშეყრის ადგულებისაგან თავის არიდება;
· დახურული სივრცის ხშირი განიავება;
· ხშირად დაიბანეთ ხელები საპნითა და წყლით არანაკლებ 20 წამის განმავლობაში ან გამოიყენეთ სპირტის შემცველი ხსნარი;
· თავი აარიდეთ დაუცველ კონტაქტს ფერმებთან და/ან გარეულ ცხოველებთან;
· რესპირატორული ინფექციის მქონე ადამიანებმა უნდა დაიცვან ხველის და ცემინების ეტიკეტი;
· ნუ შეეხებით თვალებს, ცხვირსა და პირს დაუბანელი ხელით;
· არ განახორციელოთ თვითმკურნალობა და ზემოთ ხსენებული სიმპტომების გამოვლენის შემთხვევაში მიმართეთ ექიმს.
