27/10/2023
#გარიგებები #ცვლილებები #რეესტრი
📢გაითვალისწინეთ:
❗შეიცვალა იმ გარიგებების დადების წესი, სადაც მხარე წარმოდგენილია უცხო ქვეყანაში გაცემული მინდობილობით.
2023 წლის 20 ოქტომბერს განხორციელებული ცვლილებით, „საჯარო რეესტრის შესახებ“ ინსტრუქციის 56-ე მუხლი ჩამოყალიბდა შემდეგი რედაქციით:
⚖️"ხელმოწერის ნამდვილობის დამოწმებას ექვემდებარება ნივთსა და არამატერიალურ ქონებრივ სიკეთესთან დაკავშირებული წერილობითი ფორმის როგორც ცალმხრივი, ისე ორმხრივი და მრავალმხრივი კერძოსამართლებრივი გარიგებები, გარდა ბინათმესაკუთრეთა ამხანაგობის კრების ოქმის, ერთობლივი საქმიანობის (ამხანაგობის) მონაწილეობით დადებული გარიგების, მინდობილობის, უცხო ქვეყანაში გაცემული მინდობილობის საფუძველზე დადებული გარიგების, ანდერძის, სამისდღეშიო რჩენისა და საქორწინო ხელშეკრულების, აგრეთვე, მოქმედი კანონმდებლობით გათვალისწინებული სხვა გარიგებებისა, რომლებზეც მხარეთა ხელმოწერები უნდა დამოწმდეს/დადასტურდეს მხოლოდ სანოტარო წესით.“
„სანოტარო მოქმედებათა შესრულების წესის შესახებ“ ინსტრუქციის 28-ე მუხლს დაემატა შემდეგი შინაარსის მე-6 პუნქტი:
⚖️"თუ გარიგება საჯარო რეესტრში რეგისტრაციას ექვემდებარება და მისი მხარე წარმოდგენილია უცხო ქვეყანაში გაცემული მინდობილობით, გარიგება უნდა დამოწმდეს ნოტარიუსის მიერ, საჯარო აქტის ფორმით.“
❗ცვლილებების შედეგად, ყველა გარიგება, რომელიც ექვემდებარება საჯარო რეესტრის ეროვნულ სააგენტოში რეგისტრაციას და სადაც მხარე წარმოდგენილია უცხო ქვეყანაში გაცემული მინდობილობით, უნდა დამოწმდეს ნოტარიუსის მიერ საჯარო აქტით.
⚖️ცვლილებებამდე, აღნიშნული გარიგებების დადება შესაძლებელი იყო მხოლოდ ხელმოწერების ნამდვილობის დამოწმებით საჯარო რეესტრის ეროვნული სააგენტოს თანამშრომლის ან ნოტარიუსის მიერ.
❗კანონით დადგენილი ფორმის დაუცველობის შემთხვევაში გარიგება არ დარეგისტრირდება საჯარო რეესტრში.
