06/05/2026
آپ کا دماغ ایک میدان ہے، اور دنیا کی امیر ترین کمپنیاں اس میدان پر قبضے کے لیے اربوں ڈالر خرچ کر رہی ہیں۔
تحریر شاہد سید مائنڈ ہیلر
جب جب آپ کچھ پڑھنا شروع کریں گے، یا کام کرنے لگیں گے درمیان میں فون چیک کرنے کا دل کرے گا۔ وہی لمحہ اس بات کا ثبوت ہے کہ میں جو کہہ رہا ہوں وہ سچ ہے۔
ایک دن میرے پاس ایک کاروباری آدمی آیا وہ کرسی پر بیٹھا تو اس کا ہاتھ فوری طور پر جیب میں گیا فون نکالا، اسکرین دیکھی، واپس رکھا۔ پھر دو منٹ بعد دوبارہ وہی عمل دھرایا خود اسے پتہ نہیں تھا کہ وہ یہ کیوں کر رہا ہے۔
کہنے لگا شاہد صاحب میرا کسی کام میں فوکس نہیں ہے میں پہلے گھنٹوں بیٹھ کر حساب کتاب کر لیتا تھا بغیر اٹھے۔ مگر اب دس منٹ میں ذہن بھاگنے لگتا ہے۔ میں گاہکوں سے بات کر رہا ہوں۔دماغ کہیں اور ہے۔ قرآن کھولتا ہوں تین آیتیں پڑھ کر ذہن ادھر ادھر ہو جاتا ہے۔ نماز میں کھڑا ہوں، دکان یاد آتی ہے۔ نیند میں بھی فکر ہے کہ صبح اٹھ کر پہلے واٹس ایپ چیک کروں گا۔
میں نے اسےکہا آپ کا مسئلہ توجہ کا نہیں آپ کے دماغ کا ڈوپامین سسٹم ہائی جیک ہو چکا ہے۔
وہ حیران ہوا۔
زیادہ تر لوگ یہ سوچتے ہیں کہ ڈوپامین خوشی کا کیمیکل ہے۔ یہ بالکل ادھوری بات ہے۔ ڈوپامین دراصل تلاش کا کیمیکل ہے۔ یہ خوشی نہیں دیتا بلکہ یہ خوشی ڈھونڈنے پر مجبور کرتا ہے۔ یہ وہ بے چینی پیدا کرتا ہے جو آپ کو اٹھاتی ہے، حرکت میں لاتی ہے، اگلی چیز کی طرف کھینچتی ہے۔ فطری جبلت میں یہ انسان کو خوراک ڈھونڈنے، پانی تلاش کرنے، محفوظ جگہ ڈھونڈنے پر مجبور کرتا ہے، یعنی ڈوپامین بقا کا انجن ہے۔
مگر آج یہی انجن انسٹاگرام کی اگلی پوسٹ، یوٹیوب کی اگلی ویڈیو، واٹس ایپ کا اگلا میسج، ٹک ٹاک کی اگلی ریل پر لگایا جا رہا ہے۔ اور سب سے خطرناک بات یہ ہے یہ سب چیزیں اس انجن کو کنٹرول کرنے کے لیے اس طرح ڈیزائن کی گئی ہیں کہ یہ کبھی بند نہ ہو۔
مثال کے طور پر 2017 میں فیس بک کے پہلے صدر شان پارکر نے ایک انٹرویو میں کہا "ہم نے فیس بک بناتے وقت سوچا کہ انسانی نفسیات کی کمزوری کو کیسے استعمال کریں۔ ہمارا سوال تھا ہم آپ کا زیادہ سے زیادہ وقت اور توجہ کیسے لے سکتے ہیں؟ اس کا جواب تھا لائک اور کمنٹ کی صورت میں تھوڑی تھوڑی ڈوپامین ہٹس۔ ہم جانتے تھے یہ کیا کر رہا ہے مگر ہم نے پھر بھی کیا۔"
یہ کوئی سازشی تھیوری نہیں بلکہ یہ اس آدمی کے اپنے الفاظ ہیں جس نے فیس بک بنایا۔ گوگل کے سابق ڈیزائن ایتھیسٹ ٹرسٹن ہیرس نے نیٹ فلکس کی ڈاکیومنٹری "دی سوشل ڈائلیما" میں بتایا کہ سیلیکان ویلی میں سینکڑوں انجینیئر روزانہ اس ایک سوال پر کام کرتے ہیں کہ آج آپ کا فون آپ کی توجہ مزید کتنے منٹ لے سکتا ہے؟
اسٹینفورڈ یونیورسٹی کی نیورو سائنٹسٹ ڈاکٹر اینا لیمکے جو اپنی کتاب "ڈوپامین نیشن" کی وجہ سے پوری دنیا میں مشہور ہوئیں، وہ کہتی ہیں کہ دماغ میں ڈوپامین ایک ترازو کی طرح کام کرتا ہے۔ جب کوئی لذت ملتی ہے، ترازو کا پلڑا خوشی کی طرف جھکتا ہے۔ مگر دماغ فوری طور پر توازن بحال کرنے کی کوشش کرتا ہے اور ترازو پھر سے تکلیف کی طرف جھکاتا ہے۔ یعنی ہر لذت کے بعد ایک چھوٹی سی اداسی، ایک چھوٹی سی بے چینی آتی ہے، اور یہ بے چینی آپ کو دوبارہ اسی لذت کی طرف دھکیلتی ہے۔
یہ لت کا سائیکل ہے۔ ہیروئن میں بھی یہی سائکل ہے اور انسٹاگرام میں بھی یہی ہے۔ فرق صرف شدت کا ہے، اصول ایک ہے۔
مگر سب سے خطرناک بات کیا ہے؟ جب آپ بار بار اسی ڈوپامین ہٹ کو دہراتے ہیں تو دماغ رفتہ رفتہ ریسیپٹرز کو کم کر دیتا ہے۔ یعنی اب اتنی خوشی نہیں ملتی جتنی پہلے ملتی تھی۔ تو پھر آپ اور زیادہ ڈوز چاہتے ہیں۔ اور دماغ لذت کی حساسیت اور کم کر دیتا ہے۔ اور یہ وہ چکر ہے جس سے نکلنا مشکل ہے کیونکہ اس میں ارادے کا نہیں، بیالوجی کا کام ہے۔
دیکھیں جب ڈوپامین سسٹم اوور لوڈ ہوتا ہے تو پری فرنٹل کورٹیکس یعنی دماغ کا سوچنے، فیصلہ کرنے اور فوکس کرنے والا حصہ کمزور پڑ جاتا ہے۔ وہ اپنا کنٹرول کم کرتا ہے نتیجے میں آپ کا دماغ لمبی سوچ نہیں سوچ سکتا وہ صرف اگلی ڈوپامین ہٹ چاہتا ہے۔
یہی وجہ ہے کہ آپ دس منٹ ٹک کر کتاب نہیں پڑھ سکتے مگر ریلز گھنٹوں دیکھ سکتے ہیں۔ یہی وجہ ہے کہ۔چند منٹوں کی نماز میں دھیان نہیں لگتا مگر یوٹیوب پر گھنٹے گزر جاتے ہیں۔ یہ آپ کی کمزوری نہیں یہ ایک انجینئرڈ جال ہے۔
قرآن میں اللہ نے سورہ قیامہ کی آیت نمبر 2 میں نفسِ لوامہ کا ذکر کیا کہ یہ وہ نفس ہے جو خود کو ملامت کرتا ہے۔ اور سورہ یوسف کی آیت 53 میں نفسِ امارہ کا ذکر ہے یہ وہ نفس جو برائی پر ابھارتا ہے، جو لذت کی طرف بھاگتا ہے، جو فوری تسکین چاہتا ہے۔ یہ وہی پارٹ ہے جسے آج کی نیورو سائنس "ڈوپامین ڈریون لمبک سسٹم" کہتی ہے۔ یعنی نفسِ امارہ وہ حصہ ہے جو کہتا ہے ابھی، فوری، اور زیادہ۔
نبی کریم صلی اللہ علیہ وسلم نے فرمایا کہ "تم میں سے زیادہ طاقتور وہ نہیں جو دوسروں کو پچھاڑے بلکہ وہ ہے جو غصے کے وقت اپنے نفس کو قابو کرے۔" یہ حدیث آج کے حالات میں یہ کہہ رہی ہے اصل طاقت ڈوپامین کی لہر کے سامنے ڈٹ جانا ہے۔
ڈاکٹر اینا لیمکے نے اپنے مریضوں کو ایک تجربہ کرایا ڈوپامین فاسٹنگ کے نام سے، اس میں چار ہفتے کے لیے وہ سب کچھ بندکیا جو ڈوپامین کی لہر کو مزید مستحکم بنانے میں مدد کرتا ہے جیسے سوشل میڈیا، ویڈیو گیمز، فضول ویڈیوز، میٹھا، الکوحل۔ اس تجربے میں پہلے دو ہفتے تو مریض تڑپے بے چینی، اداسی، بوریت، غصہ۔ ایسا لگا جیسے زندگی بے رنگ ہو گئی۔ تیسرے ہفتے سے دماغ کے ریسیپٹرز واپس بننے لگے۔ چوتھے ہفتے لوگوں نے کہا انھیں پرندوں کی آواز میں خوشی ملنے لگی۔ بچے کے ہنسنے پر آنسو آئے۔ سادہ کھانا لذیذ لگا۔ کتاب میں دل لگا وغیرہ وغیرہ۔
یعنی دماغ نے اپنی فطری حساسیت واپس پا لی وہ حساسیت جو ڈوپامین کی بمباری نے چھین لی تھی۔
اور یہاں میں آپ کو ایک اور تحقیق بتاتا ہوں ایم آئی ٹی کے ڈاکٹر ایرل ملر نے ثابت کیا کہ انسانی دماغ بیک وقت دو کام نہیں کر سکتا یہ صرف بہت تیزی سے ایک سے دوسرے کام پر شفٹ نہیں ہو جاتا ہے۔ ہر بار جب آپ فون دیکھ کر واپس کام پر آتے ہیں تو دماغ کو دس سے پچیس منٹ لگتے ہیں پوری طرح واپس آنے میں۔ اب آپ خود سوچیں کہ دن میں پچاس بار فون دیکھتے ہیں تو حساب لگائیں آپ کا پورا دن کیسے کھو جاتا ہے۔
وہ کاروباری صاحب جو پہلے آئے تھے میں نے انہیں تیس دن کا ایک پروگرام دیا۔ انسٹاگرام اور یوٹیوب کو فون سے نکالنا، صبح اٹھ کر پہلا کام فون نہیں بلکہ پانی پینا اور دس گہرے سانس، ہر کام سے پہلے دو منٹ خاموشی، اور رات کو سونے سے ایک گھنٹہ پہلے اسکرین بند۔
پہلے ہفتے انہوں نے فون کیا، بہت تکلیف ہو رہی ہے۔ بار بار فون اٹھانے کو جی چاہتا ہے۔ میں نے کہا یہ تکلیف علامت ہے کہ علاج شروع ہو گیا۔ تیسرے ہفتے انہوں نے بتایا کہ اپنے بیوی بچوں سے پہلی بار پوری طرح حاضر ہو کر گھنٹوں باتیں کیں فون جیب میں رہا۔ بیگم نے کہا بو، آج آپ واقعی بہت دنوں بعد مزا آیا جب ہم ساتھ تھے۔
دوسرا ایک انیس سال کا نوجوان تھا یونیورسٹی سٹوڈنٹ۔ کہتا تھاسرجی پڑھنے بیٹھتا ہوں تو دس منٹ میں فون اٹھا لیتا ہوں۔ امتحان سر پر ہے مگر کنٹرول نہیں ہوتا۔میں نے اسے ایک ہی تکنیک دی دو منٹ کا اصول۔ جب بھی فون اٹھانے کی خواہش ہو صرف دو منٹ رکو۔ بس دو منٹ۔ اگر پھر بھی دل کرے تو فون اٹھا لو۔ مگر ہرگز دو منٹ سے پہلے نہیں۔ کیوں؟ کیونکہ ڈوپامین کی لہر نوے سیکنڈ میں اپنے عروج پر آتی ہے اور پھر خود اترنا شروع ہو جاتی ہے اگر آپ نے اسے فیڈ نہیں کیا۔ یعنی صرف دو منٹ صبر کریں تو وہ لہر خود گزر جاتی ہے۔ اس نوجوان نے امتحان میں اچھے نمبر لیے اور میرے لیے اسپیشل ریواڑی کا ملتانی سوہن حلوے کا پارسل بھجوایا جا میں چار مختلف فلیور تھے۔ یہ ہوتی ہے محبت اور اصلی چاہت۔ 😉
اگر آپ بھی چاہتے ہیں کہ آپ کا دماغ بھی آپ کے کنٹرولمیں رہے تو پہلا اور سب سے اہم قدم یہ ہے کہ اپنا صبح کا پہلا گھنٹہ فون سے آزاد رکھیں۔ کیونکہ صبح اٹھنے کے بعد پہلا گھنٹہ دماغ کی پوری دن کی فریکوئنسی سیٹ کرتا ہے۔ اگر پہلا کام فون اور سوشل میڈیا ہے تو دماغ پورا دن اسی فریکوئنسی پر چلتا ہے۔ اگر پہلا کام سانس، ذکر، یا خاموشی ہے تو دماغ پورا دن اس سکون پر چلتا ہے۔
دوسرا قدم یہ کہ "ڈوپامین ڈیٹاکس" کے دن رکھیں۔ ہفتے میں ایک دن یا مہینے میں دو ویک اینڈ جب سوشل میڈیا، ویڈیوز، اور فضول اسکرین ٹائم بالکل بند۔ پہلی بار بہت مشکل ہوگا اسی میں علاج ہے۔
تیسرا قدم فرکشن بڑھائیں۔ اگر شوشل میڈیا اور کام کے درمیان ایک چھوٹی سی رکاوٹ ڈال دیںں تو اس شوشل میڈیا دیکھنے کا امکان ڈرامائی طور پر کم ہو جاتا ہے۔ مثال کے طور پر انسٹاگرام فون سے نکالیں ڈیلیٹ نہیں کریں، بس فون سے ہٹائیں۔ اور صرف لیپ ٹاپ پر رکھیں۔ یہ چھوٹی سی رکاوٹ ستر فیصد استعمال کم کر دیتی ہے۔
چوتھا قدم فوکس کی مسلز مضبوط بنائیں۔ ڈاکٹر کال نیوپورٹ جو "ڈیپ ورک" کتاب کے مصنف کہتے ہیں کہ فوکس بھی ایک عضلہ کی طرح ہے کہ استعمال سے مضبوط ہوتا ہے، بے کاری سے کمزور۔ روزانہ پچیس منٹ کا "ڈیپ ورک سیشن" شروع کریں ایک کام، فون دور، نوٹیفکیشن بند، مکمل حاضری۔ ہر ہفتے پانچ منٹ بڑھائیں۔ تین ماہ میں آپ کا فوکس پہچاننے کے لائق نہ رہے گا۔
پانچواں قدم اپنے کام کو ڈوپامین کا متبادل بنائیں۔ یہ میری پریکٹس کی سب سے بڑی دریافت ہے۔ جب ڈوپامین کی لہر آئے، فون اٹھانے کو دل کرے، اس لمحے پرسکون ہوکر تین گہرے سانس لیں اور وہ کریں جس کام کو کرنا ہے۔دل سے اور جسم سے کام کے دوران اچھا فیل کریں، انجواۓ منٹ کے ساتھ، چند بار میں ہی آپ کا ڈوپامین آپ کے کام کے ساتھ لنکڈ ہو جاۓ گا۔یہ فطری ڈوپامین ہے۔
حدیث مبارکہ ہے کہ (دنیا مومن کے لیے قید خانہ ہے)۔ یعنی یہاں فوری تسکین نہیں ملنی، یہاں صبر ہے، ضبط ہے، انتظار ہے۔ اور یہی صبر آپ کا دماغ بناتا ہے، آپ کی روح بناتا ہے، آپ کی زندگی بناتا ہے۔
کیونکہ ہم ایسی دنیا میں رہتے ہیں جہاں لذت ہر جگہ موجود ہے، فوری ہے، اور سستی ہے۔ مگر جو لوگ واقعی خوش ہیں وہ وہ ہیں جنہوں نے لذت کو انتظار کروانا سیکھا ہے اور جنہوں نے تکلیف سے بھاگنا چھوڑ دیا ہے۔
آپ بتائیں، آپ کے دن میں فون کتنی بار بے وجہ اٹھتا ہے؟ اور آخری بار آپ نے بغیر فون کے پوری طرح کسی کے ساتھ وقت گزارا کب تھا وہ؟ نیچے لکھیں یہ سوال خود ایک آئینہ ہے۔ شاہد سید
