08/10/2026
የክልሉ ገቢዎች ቢሮ በቀጣይ 100 ቀናት የገቢ አሰባሰብን ለማጠናከር የተግባር ዕቅድ ላይ በየደረጃው ከሚገኙ የገቢ አመራር አካላት ጋር የጋራ ውይይት አካሄደ
(መስከረም 28/2019 ዓ.ም) የማዕከላዊ ኢትዮጵያ ክልል ገቢዎች ቢሮ በቀጣይ 100 ቀናት የሚከናወኑ የገቢ አሰባሰብ ተግባራትን በዕቅድ ለመምራት በክልሉ ከሚገኙ ከዞን፣ ከልዩ ወረዳዎች እና ከከተማ አስተዳደሮች የገቢ አመራር አካላት ጋር በበይነ መረብ ውይይት አካሂዷል።
የውይይት መድረኩን የቢሮው ኃላፊ ወ/ሮ ቀመሪያ ረሻድ የመሩ ሲሆን፣ በቀጣይ የሚከናወኑ የገቢ አሰባሰብ ሥራዎች በግልጽ የተግባር አቅጣጫ፣ በተጠያቂነት እና በቅርብ ክትትል እንዲመሩ አስፈላጊው የአመራር አቅጣጫ በውይይቱ ተሰጥቷል።
በተለይም የገቢ አቅምን በሙሉ ለመጠቀም፣ የግብር ከፋይ ምዝገባንና የግብር መረጃ አያያዝን ለማጠናከር፣ የታክስ አሰባሰብ ተግባራትን በወቅቱ ለመፈጸም እና የቀረ ገቢን በተገቢው ለመሰብሰብ ትኩረት እንዲሰጥ ተጠቁሟል።
የግብር ሕግን በማስከበር የግብር ከፋዮችን ተገዢነት ማሳደግና በሁሉም የገቢ አማራጮች ላይ ልዩ ትኩረት ሰጥቶ ተግባራት ላይ መረባረብ የቀጣዩ 100 ቀናት ቁልፍ ተግባራት መሆናቸው ተገልጿል።
በክልሉ በቀጣይ 12.8 ቢሊየን ገቢ ለመሰብሰብ የታቀደ ሲሆን ዕዱን ለማሳካት ርብርብ ሊደረግ እንደሚገባ ተጠቁሟል።
ተግባራትን በየቀኑ በመገምገም ውጤት እንዲመጣ መስራት እንደሚጠበቅም ተመላክቷል።
እንዲሁም የገቢ አሰባሰብ ስርዓትን በቴክኖሎጂ ማዘመን፣ የደረሰኝ አጠቃቀምን ማስፋፋት፣ የግብር አወሳሰንና አሰባሰብ ሂደትን ማጠናከር እና የግብር ከፋዮችን አገልግሎት ማሻሻል በተግባር እንዲፈጸሙ አቅጣጫ ተሰጥቷል።
በየደረጃው የሚገኙ የገቢ መዋቅሮችም በዕቅዶቻቸው መሰረት ውጤታማነቱ እንዲረጋገጥ ተግባራትን በቅንጅትና በተጠያቂነት እንዲፈጽሙ ተጠይቋል።
የቢሮው ኃላፊ ወ/ሮ ቀመሪያ ረሻድ በመድረኩ እንዳስገነዘቡት፣ ቀጣዩ 100 ቀናት የገቢ አሰባሰብ አቅምን በሁሉም መዋቅሮች በማጠናከር የሚጠበቀውን ውጤት ለማስመዝገብ ወሳኝ ጊዜ መሆኑን በመረዳት ያለ ተግባራት መንጠባጠብ ትኩረት ተሰጥቶ መንቀሳቀስ ይጠበቃል ሲሉ አሳስበዋል።
በተለይም ከፊት ካለው አመራር እስከ ባለሙያ ድረስ በተቀናጀ አመራር፣ በተጠያቂነትና በተግባር ተኮር አሠራር በመስራት የክልሉን የገቢ አቅም ወደ ተሻለ ደረጃ ማሸጋገር እንደሚገባ አፅንዖት ሰጥተው በውይይት መድረኩ አንስተዋል።
