ممدوح حازم - Mamdouh Hazem

26/05/2026

كل عامٍ وأنتم بخير ، عيدكم مبارك وسعيد أعاده الله علينا وعليكم بالخير واليمن والبركات ❤️

23/05/2026

الحمد للّٰه على تمام الدبلومة المهنية (PCLC) المقدمة من MPL Legal Academy بإعتماد وشراكة Cambridge law studio 🤍

28/01/2026

31/12/2025

💡 نصيحة قانونية: العقد هو "قانون او كما عهدنا القول شريعة المتعاقدين"، والخطأ الصغير في الصياغة قد يكلفك سنوات من النزاع القضائي، احرص دائماً على مراجعة عقودك من قبل مختص.

أبرز الأخطاء الشائعة التي يقع فيها الكثيرون عند كتابة العقود:

العنوان الفضفاض: استخدام عبارة "عقد اتفاق" كعنوان؛ بينما الواقع أن العقد قد يكون (بيع، إيجار، توريد.. وغيره). كل عقد هو اتفاق، ولكن ليس كل اتفاق هو عقد.
التكييف الخاطئ: إعطاء العقد عنواناً لا يتفق مع طبيعته القانونية أو محتواه، مما يربك القضاء عند التفسير.

الثغرات القانونية والجزائية:
شرط التحكيم: صياغة شرط التحكيم بشكل غامض، أو إغفال تحديد مكان التحكيم والقانون واجب التطبيق.
القوة القاهرة: عدم تحديد الآثار المترتبة عند حدوث ظروف طارئة أو قوة قاهرة تعيق التنفيذ.
المدة الزمنية: إغفال تحديد النطاق الزمني للعقد (مدة السريان) بدقة.

أخطاء الأطراف والشكليات:
التمثيل القانوني: عدم التحقق من صفة الموقعين وصلاحيتهم القانونية للتوقيع.
المرفقات: إهمال الإشارة إلى ملحقات العقد ومستنداته، أو عدم ربطها بالعقد بشكل دقيق.
العملة والتقلبات: عدم تحديد عملة الوفاء بدقة وإهمال معالجة تذبذب قيمة العملة في العقود طويلة الأجل.

والأهم بدون صياغة عقدك او مراجعة صياغة عقد انت على وشك التوقيع عليه هو ابرز خطأ شائع لإنه يشمل اهمال تجنب الوقوع فيما سبق ذكره.

تحياتي
ممدوح حازم - Mamdouh Hazem
المحامي

30/12/2025

قرار محافظة الدقهلية رقم ٥٤٤ لسنة ۲۰۲٥ بتقسيم المناطق التي بها أماكن مؤجرة لغرض السكنى الخاضعة لأحكام القانون رقم 164 لسنة 2025 المشار اليه وفقا لما انتهت إليه لجان حصر المناطق التي بها أماكن مؤجرة لغرض السكنى

30/12/2025

تفسير قانون الايجار 164 لسنة 2025 - البوست رقم 7

هنتابع بقرارات مجلس الوزراء ولجان الحصر (التنفيذ الفعلي)

صدر إيه بالفعل؟
قرار مجلس الوزراء رقم 53 لسنة 2025 – لتنظيم:
- شروط تقديم طلبات التخصيص
- ترتيب الأولويات
- الجهات المسؤولة عن التخصيص

قرار رئيس مجلس الوزراء رقم 2789 لسنة 2025 – لتنظيم:
قواعد ونظام عمل لجان حصر وتقسيم المناطق

📌 يعني إيه الكلام ده؟

اللجان اتشكّلت
والتقسيم بدأ فعليًا في المحافظات
وقرارات المحافظين صدرت بالفعل في أكتر من محافظة

📌 هل ده معناه التطبيق فوري؟ ❌ لا
كل خطوة بقرار رسمي منشور ومعلن

الخلاصة العامة

المستأجر له بديل
المالك له جدول زمني واضح
الدولة موجودة كطرف منظم
التنفيذ تدريجي ومعلن

✴️ قرارات المحافظين بتقسيم المناطق… ليه مهمة؟

في قانون الإيجار رقم 164 لسنة 2025
مش لجان الحصر لوحدها اللي بتشتغل
القرار النهائي بيطلع من المحافظ.

📌 يعني إيه تقسيم المناطق؟
يعني كل محافظة بتقسم المناطق اللي فيها شقق إيجار قديم إلى:

مناطق متميزة
مناطق متوسطة
مناطق اقتصادية

📌 مين اللي بيصدر القرار؟
محافظ المحافظة المختص
بناءً على شغل لجان الحصر

📌 القرار ده بيبقى فين؟
يُنشر في الوقائع المصرية
ويتعلق في الوحدات المحلية وبيبقى متاح للجمهور

📌 ليه القرار ده مهم للمستأجر؟
علشان تعرف منطقتك تبع أنهي تصنيف
وعلى أساسه يتحسب الإيجار الجديد
ومفيش زيادة نهائية من غير القرار ده

📌 وليه مهم للمالك؟
لأنه سند قانوني لتحديد القيمة الإيجارية
ويمنع الخلاف والتقدير الشخصي
وبيخلي التنفيذ رسمي وقانوني

📌 هل كل المحافظات واحدة؟ ❌ لا
كل محافظة لها قرارها
وحسب طبيعة مناطقها

يبقى نفهم من كده:
من غير قرار المحافظ مفيش تصنيف ومفيش قيمة نهائية.

📌 مهم تعرف: السعر مش بيتحدد حسب رأي المالك ولا حسب شقة جنبك، المنطقة كلها بتبقى تصنيف واحد

فـ اعرف تصنيف منطقتك
بالتالي هتعرف حقوقك والتزاماتك صح.

💭 أمثلة لقرارات تقسيم مناطق (توضيح الفكرة فقط)
علشان الصورة تبقى واضحة:
– شارع رئيسي، خدمات كاملة، مواصلات = منطقة متميزة
– حي متوسط، خدمات عادية = منطقة متوسطة
– أطراف مدينة، خدمات أقل = منطقة اقتصادية

⚠️ للتأكيد تاني ده مثال توضيحي فقط!!!
التصنيف الحقيقي بيحدده قرار المحافظ فقط
مش الانطباع الشخصي ولا الكلام الدارج.

📌 القانون بيشتغل بالمنطقة
مش بالمبنى ولا بالشقة.

نفس الشارع يبقى:
– كله تصنيف واحد
– مفيش شقة متميزة وشقة اقتصادية في نفس المنطقة

هنختم بتحذير من الشائعات للملاك والمستأجرين

❌ مفيش حاجة اسمها:
– “الإيجار هيزيد بكذا من بكرة”
– “المنطقة دي أكيد متميزة”
– “سمعت إن القرار طلع”

– مفيش زيادة نهائية غير بعد:
1️⃣ لجان الحصر
2️⃣ قرار المحافظ
3️⃣ نشر القرار رسميًا

📌 أي مطالبة بقيمة إيجارية قبل القرار أو بدون مستند ملهاش سند قانوني.

خليك ماشي بالورق مش بالكلام.

تحياتي
ممدوح حازم - Mamdouh Hazem
المحامي

30/12/2025

تفسير قانون الايجار 164 لسنة 2025 - البوست رقم 6

هنتابع بحق المستأجر في تخصيص وحدة من الدولة

قانون الإيجار الجديد (164 لسنة 2025) ما قالش للمستأجر “اخرج وخلاص”

لكن فتح له باب بديل قانوني ⚖️

مين اللي له الحق في التقدم بطلب تخصيص وحدة من وحدات الدولة؟
المستأجر الأصلي بعقد إيجار قديم
أو الزوج/الزوجة اللي امتد له العقد (قبل) صدور القانون

سكنية أو غير سكنية

إيجار أو تمليك

ولكن بشرط مهم جدًا:
يقدّم إقرار مكتوب✍️
إنه هيخلي الشقة القديمة فور استلام الوحدة الجديدة

إمتى يقدّم الطلب؟
قبل انتهاء مدة الـ7 سنوات (للسكنية)
وقبل انتهاء مدة الـ5 سنوات (لغير السكنية)

هل له أولوية؟ ✔️ أيوه
المستأجر له أولوية في التخصيص
خصوصًا عند إعلان الدولة عن وحدات جديدة.

وفي حالة الزحمة؟ الأولوية بتكون حسب:
طبيعة المنطقة اللي كان ساكن فيها

تحياتي
ممدوح حازم - Mamdouh Hazem
المحامي

29/12/2025

تفسير قانون الايجار 164 لسنة 2025 - البوست رقم 5

هنتابع بالإيجار لغير السكنى بعد قانون 164 لسنة 2025

قانون الإيجار رقم 164 لسنة 2025
فرّق بين الشقق السكنية
والوحدات المؤجرة لغير غرض السكنى
(محلات – مكاتب – عيادات…).

📌 الإيجار بيتحسب إزاي؟
الإيجار الجديد = 5 أمثال الإيجار الحالي
يعني لو الإيجار الحالي:
100 جنيه × 5 يبقى 500 جنيه
200 جنيه × 5 يبقى 1000 جنيه

هل فيه حد أدنى؟ ❌ لا
القانون هنا ما حطش حد أدنى
بس حدد المضاعفة فقط.

هل فيه زيادة بعد كده؟ ✔️ أيوه
الإيجار يزيد سنويًا بنسبة 15٪

هل التقسيم (متميزة – متوسطة – اقتصادية) بيأثر؟ ❌ لا
التقسيم ده خاص بالسكني فقط

الخلاصة بإختصار

غير السكنى = 5 أمثال الإيجار الحالي
مفيش حد أدنى
فيه زيادة سنوية 15٪

تحياتي
ممدوح حازم - Mamdouh Hazem
المحامي

29/12/2025

تفسير قانون الايجار 164 لسنة 2025 - البوست رقم 4

هنتابع بالقيمة الإيجارية الجديدة "للشقق السكنية" بعد قانون 164 لسنة 2025

قانون الإيجار رقم 164 لسنة 2025
ما وحَّدش الزيادة على كل الشقق
لكن ربطها بتقسيم المنطقة.

الإيجار بيتحسب إزاي؟

🔹 المناطق المتميزة

20 مثل القيمة الإيجارية الحالية

حد أدنى 1000 جنيه شهريًا

🔹 المناطق المتوسطة

10 أمثال القيمة الإيجارية الحالية

حد أدنى 400 جنيه شهريًا

🔹 المناطق الاقتصادية

10 أمثال القيمة الإيجارية الحالية

حد أدنى 250 جنيه شهريًا

📌 لحد ما لجان الحصر تخلص شغلها
المستأجر يدفع 250 جنيه شهريًا مؤقتًا
وبعد صدور قرار المحافظ:
تُحسب الفروق
وتُسدد بالأقساط الشهرية

📌 يعني إيه الكلام ده؟
مفيش زيادة نهائية قبل التقسيم
الإيجار بيتحدد بقانون مش بتقدير شخصي
حق المالك محفوظ
والمستأجر محمي من الزيادة العشوائية

مثال عملي لحساب القيمة الإيجارية بعد القانون 164 لسنة 2025

🔹 الحالة الأولى: المنطقة اقتصادية
خلّينا نفترض الآتي 👇

مثال١: شقة إيجار قديم
الإيجار الحالي ليها مثلاً = 50 جنيه شهريًا
تعالى نحسب القيمة الإيجارية الجديدة

القانون قال : 10 أمثال
50 × 10 = 500 جنيه
والحد الأدنى للمنطقة الاقتصادية = 250 جنيه
يبقى القيمة الإيجارية الجديدة = 500 جنيه

مثال٢: طيب لو شقة إيجار قديم
الإيجار الحالي ليها مثلاً = 20 جنيه شهرياً
20 × 10 = 200 جنيه
الحد الادنى للمنطقة الاقتصادية = 250 جنيه
يبقى القيمة الإيجارية الجديدة = 250 جنيه

نلاحظ ايه؟
ان لو القيمة الإيجارية طلعت اكتر من الحد الأدنى بيتم الاخذ بها كقيمة ايجارية جديدة ، أما لو طلعت أقل من الحد الأدنى العبرة هنا بتكون بالأخذ بالحد الأدنى.

قياساً على ذلك
🔹 الحالة الثانية: المنطقة متوسطة

القانون قال: 10 أمثال
والحد الأدنى للمنطقة المتوسطة = 400 جنيه

🔹 الحالة الثالثة: المنطقة متميزة

القانون قال: 20 مثل
والحد الأدنى للمناطق المتميزة = 1000 جنيه

ملحوظة مهمة فيما يخص القيمة الإيجارية الجديدة:
🔸 الرقم النهائي بيتحدد بعد قرار المحافظ
🔸 أي مبالغ مؤقتة بتتحاسب فروقها بالأقساط
🔸 بعد كده بتبدأ الزيادة السنوية 15٪

📌 طيب ايه حكاية الأقساط دي؟
القانون راعى الناس
فقال 👇
لحد ما لجان الحصر تخلص شغلها
المستأجر يدفع 250 جنيه مؤقتًا
ولما قرار المحافظ يطلع يتحسب الإيجار الحقيقي
لو فيه فرق الفرق مايتدفعش مرة واحدة
يتقسم على أقساط شهرية

مثال:
لو القرار طلع بعد 6 شهور
والفرق 600 جنيه
يتدفع 100 جنيه كل شهر لمدة 6 شهور

بس كده 👌🏽

📌 طيب يعني إيه زيادة سنوية 15٪؟

يعني الإيجار يزيد كل سنة بنسبة ثابتة.
مثال: الإيجار = 400 جنيه
بعد سنة: 15٪ من 400 = 60
الإيجار الجديد = 460 جنيه
بعد سنة كمان: 15٪ من 460 = 69
الإيجار = 529 جنيه
وهكذا

اذاً الزيادة بتيجي مرة واحدة كل سنة مش كل شهر.

تحياتي
ممدوح حازم - Mamdouh Hazem
المحامي