https://www.facebook.com/1410590539201581/

Nestiom, Hurghada (2026)

20/07/2019

Welcome to power House 💪🏻

03/07/2018

▪️نزلت الجيم من زمان ومع التمرين والوقت شوفت نتايج حلوة بس مش قادر توصل لسر أجسام وقوة اللاعيبة المحترفين -غير الهرمونات طبعا- وتحرق دهون أسرع ؟
شوية نصايح نفسية وبدنية ممكن تساعدك تطور مستواك من حيث القوة والتطور العضلي واللياقة البدنية علشان توصل لمستوى متقدم .

1️⃣ إمزج بين الكارديو وتمارين القوة
من أحسن الطرق اللي بحبها في وقت التنشيف إني أدخل تمارين الكارديو وسط تمارين الحديد ، إستغل وقت الراحة بين المجموعات ونط الحبل أو إلعب كارديو بأي طريقة ، الإسلوب ده هيعلي من الـ VO2 عندك وبالتالي مستوى اللياقة وهتحرق سعرات حرارية أكتر ، ويا سلام لو تمارين الحديد دي تكون ديدليفت أو سكوات أو بار برس .

2️⃣ خليك مع العظماء
إوعى إوعى تهمل التمرينين دول (ديدليفت - سكوات) أعظم وأهم تمارين إخترعها البشر منذ بداية الخليقة ، عمرك ما هتشوف في الجيم حد بيكنسل تمرين الصدر إنما هتلاقي كتير بيهملوا تمرين السكوات والديدليفت ، الإتنين دول بالذات هم اللي هيطوروا من الـ Core ويزودوا قوتك بشكل خرافي .

3️⃣ بلاش تعمل مقارنات
واحد من أكتر النظريات اللي مؤمن بيها في الحياة هي إن المقارنات بتقتل إحساس المتعة ، حلو إنك تستخدم الناس كحافز ليك وسبب علشان تجتهد أكتر وتصر إنك تحقق أحلامك لكن ماتقعش في فخ المقارنات المحبطة بهدف المنافسة لإن دايما هتلاقي شخص أفضل منك وأقوى منك ومميز عنك .. قارن نفسك بنفسك وإفتكر بدايتك كانت إزاي ووصلت لفين وتخيل بعد فترة هتكون فين .

4️⃣ ما تخافش من الفشل
"عمرك ماهتنجح من غير ماتفشل" إحفظ القاعدة دي وإفهمها وتقبلها وطبقها على كل حياتك من أكبر الأحلام لأصغرها ، لو مافشتلش مش هتنجح ، جرب تشيل أكتر من أوزانك المعتادة وحاول وإفشل وخلي الدامبل يقع عليك مرة وآنجح المرة اللي بعدها ، زود كيلو واحد عن وزنك وماتخافش منه .. هتنجح .

5️⃣ مرن رجلك مرتين إسبوعيا
رجلك فيها أكبر مجموعات عضلية في جسمك يعني لما تشغلها هتزود قوتك وهتعلي الميتابوليزم وهتزود التستوستيرون ، ركز فيها على السكوات والديدليفت بأوزان عالية وتكرارات قليلة .

6️⃣ إعرف إحتياجك من السعرات الحرارية
لما بدأت أتمرن زمان ماكنتش فاهم ليه النتايج بتتأخر مع إني بتمرن كويس بالساعات وبلعب بطن كل يوم ، لحد ما فهمت إن اللعبة مش لعبة شيل أوزان ورقم واحد هي السعرات الحرارية ونوعية الأكل اللي بيدخل بوئك ، لازم تبقى عارف إنت محتاج إيه وقد إيه وإمتى ؟
إهتمامك بسعراتك هو اللي هيوصلك لهدفك بسرعة وبطريقة علمية ، شوف جسمك محتاج كاربوهيدرات ودهون وبروتين قد إيه والمصادر اللي هتاخد منها العناصر دي .

28/06/2018

🉐 نصايح للمبتدأين علشان يحبوا التمرين 🉐

الشباب الجديد في عالم كمال الأجسام بيبقى محتار وتايه وسط المعلومات والكلام الكتير وعايزين الخلاصة .. إستلم بقى الخلاصة

🎖(1) محدش بياكلها بالساهل ومحدش بيعمل عضلات ببلاش .. إتعب علشان تلاقي

🎖(2) خد من ١.٦ لـ ٢ جرام بروتين بس لكل كيلو من وزنك .. مش لازم تصرف كتير ولا تاكل كل يوم فرختين

🎖(3) شوف صاحب ينزل معاك التمرين تشجعوا بعض .. ما تتمرنش لوحدك علشان هتكسل بعد يومين

🎖(4) الأداء والتكنيك السليم أهم من الوزن التقيل .. بلاش غشومية

🎖(5) تمرين الرجلين مهم بالظبط زي تمرين باقي جسمك .. بلاش تطنشها علشان هتتبهدل تريقة

🎖(6) التغذية والدايت جزء مهم سواء بتضخم أو بتخسس .. يمكن أكتر من التمرين نفسه

🎖(7) ما تسمعش كلام حد يقولك خد هرمونات

🎖(8) إشرب ماية كتير طول الوقت وخلي الإزازة في إيدك .. من غير الماية هيجيلك إصابات كتير

🎖(9) أيام الراحة مهمة علشان جسمك يحصله إستشفاء وعضلاتك تزيد .. بلاش الحماس ياخدك وتتمرن طول الإسبوع

🎖(10) غير نظام تمرينك كل فترة علشان ما تحسش بالملل

🎖(11) إعمل لنفسك جدول تدريب إسبوعي مكتوب .. ماتنزلش الجيم تلعب اللي نفسك فيه

🎖(12) ماتبدأش تمرين الحديد من غير ماتسخن .. مش ناقصين إصابات الله يكرمك

🎖(13) إستخدم الأوزان الحرة أكتر من الأجهزة .. الأجهزة هتساعدك لكن مش هي الأساس

🎖(14) إصبر على النتايج وماتستعجلش علشان ماتحطبش .. مش هتبقى بيج رامي في شهرين

🎖(15) المكملات الغذائية مش هي الأساس .. إسمها مكملات يعني مجرد وسيلة مساعدة بنلجألها وقت الحاجة

🎖(16) دخل نظام الدروبسيت والسوبرسيت في تمرينك .. أساليب ممتعة في التمرين لكن هتفرهدك

🎖(17) ما تسمعش كلام حد يقولك خد هرمونات

🎖(18) كُل دهون صحية علشان تحرق دهون .. صفار البيض والمكسرات وزيت الزتون

🎖(19) مرن عضلات الضعيفة في بداية تمرينك .. ما تركنهاش لآخر التمرين علشان تديها حقها

🎖(20) إعمل تمارين الإطالة قبل وبعد تمارين الحديد

🎖(21) راقب جسمك وصور نفسك كل فترة .. النتايج اللي هتشوفها هي اللي هتخليك تكمل

🎖(22) الحاجات اللي نفعت مع صاحبك مش بالضرورة تنفع معاك .. إفهم جسمك علشان تعرف هو عايز إيه

🎖(23) نام كويس مش أقل من ٧ ساعات .. إدخل سريرك وسيب الموبايل وإنت هتنام على طول

🎖(24) إلعب كارديو (جري - مشي - عجلة) .. الكارديو هيفرق معاك في تمرينك ويزودك عضلات

🎖(25) كُل وجبة كبيرة فيها بروتين وكاربوهيدرات قبل التمرين بساعتين .. بطاطساية مسلوقة وصدر فرخة

🎖(26) ماتاخودش حبوب ولا حقن مجهولة لمجرد إن الكابتن قالك عليها .. كل اللي إتأذوا قبلك كانوا بسبب كابتن

🎖(27) شيل أوزان تقيلة على قد ما تقدر .. الأوزان الخفيفة دي إديها لأخوك الصغير يلعب بيها

🎖(28) مرن كل عضلة مرتين في الاسبوع .. هتلاقي أنظمة كتير تساعدك

🎖(29) ما تسمعش كلام حد يقولك خد هرمونات

🎖(30) إسأل كتير وإقرا كتير وإتعلم .. اللعبة بقت علم ودراسة مش بالفهلوة

🎖(31) ما تشيلش وزن تقيل غير وإنت معاك زميل يأمنك .. أبطال قدك مرتين إتصابوا بسبب التهور

🎖(32) إستخدم المالتي فايتمن والكرياتين .. من أهم المكملات اللي هتفيدك

🎖(33) ركز في الجزء السلبي من التكرار .. إنزل بالوزن بالراحة وببطأ ماتستعجلش

🎖(34) إحسب سعراتك الحرارية وشوف جسمك محتاج قد إيه .. لو مشيت بالبركة هتلاقي النتايج بتتأخر

🎖(35) إتعلم تلعب سكوات وديدليفت بأداء مظبوط .. من أهم التمارين اللي هتديك قوة

🎖(36) إتعلم تلعب سكوات وديدليفت بأداء مظبوط ..علشان برضه من أكتر التمارين اللي ممكن تجيبلك إصابة

🎖(37) ماتصرفش فلوسك على المكملات عمال على بطال .. وفرهم وهات بيهم فراخ وبيض ومكرونة أفيدلك

🎖(38) لو هتستخدم واي بروتين هات شكاير بروتين الحليب أرخص .. والله بروتين حقيقي وأنا نفسي بستخدمه

🎖(39) إطبخ أكلك من غير زيت وسمنة وسكر .. إقنع والدتك أو سيب البيت وعيش لوحدك

🎖(40) ما تسمعش كلام حد يقولك خد هرمونات

11/06/2018

بمجرد ما تقرر تبدأ هتلاقي اللي هيقولك مش هتقدر .. ما تحاولش .. مش لعبتك .. ماعندكش الجينات المناسبة .
إسمع الكلام اللي إتقالك وإحفظه كويس ، روح إمسك أخف دامبل ، إلعب بالبار فاضي وخليه يقع على صدرك ، تخيل نفسك بقيت الشخص اللي قالولك عليه مش هتقدر تكونه .. إرفع البار بكل طاقتك وإصرخ من تقل الوزن وإتعب و إتصاب وإرجع كمل تمرين ، إلعب لحد ما تبقى في يوم إنت الشخص اللي نفسهم يكونوا زيه .. إبقى إنت الحلم .

13/05/2018

🌙🕌 كـتـالـوج رمـضـان 🕌🌙

باقي على رمضان أيام كل سنة وإنتوا بخير وسعادة 🌸🌼

• إيه الدايت المناسب في رمضان ؟
• أتمرن قبل الفطار ولا بعد الفطار ؟
• هقدر أزود وزني في رمضان ولا هخسر عضلات ؟
• أتمرن في رمضان ولا آخد أجازة من الحديد ؟

كل دي أسئلة وحاجات شاغلة بال الناس قبل رمضان . الموضوع بسيط ومش مستاهل تعقيد ، فحاولت أكتبلكم موضوع جامع وشامل ويكون مرجع لمعظم الأسئلة اللي ممكن تكون بتدور في بالكم بخصوص شهر رمضان .

💥💥 الأخطاء الشائعة في رمضان 💥💥

🔹عدم النوم الكافي أو على العكس تماما ، النوم الزيادة عن اللزوم اللي بيؤدي لكسل وخمول.

🔹قلة الأكل .. الناس بتاكل سعرات حرارية أقل من إحتياجهم وبيرجعوا يقولوا رمضان خسسنا.

🔹الأكل الغير صحي .. قطايف بقى وكنافه وجلاش ووو..إلخ كل دي من الحجات اللي هتخزن دهون وتعملك خمول عشان بترفع نسبة الجلوكوز بشكل مفاجئ وسريع .

🔹المصيبة الأعظم .. فيه ناس بتبطل تمرين في رمضان وتقولك علشان مخسرش عضل ، متبطلوش تمرين يا جماعة أرجوكم ، أيوة في عوامل بتختلف بس مش الحل إنك توقف تمرين نهائي .

🔹لعب كارديو زيادة عن اللزوم وهو صايم .. وخصوصا الناس اللي بتلعب كارديو قبل الحديد سواء مباشرةً أو قبله بساعات ، فبيخلوه الصبح مثلا والحديد قبل الفطار ، الموضوع ده مشكلة عشان إنت بتكون صايم ومبتقدرش تعوض كمية السوايل المفقودة .

▪️▪️▪️▪️▪️

⭐️⭐️ المفاهيم الخاطئة ⭐️⭐️

🔹بطأ الحرق في الجسم: دراسات كتير أثبتت إن الصيام مش بيقلل الحرق وبرضه الوجبات كل ٣ ساعات مش بتزوده .

🔹فقدان كتلة عضلية وضعف عام: الصيام مش بيسبب فقدان عضلي ولا بتحس بضعف ، بل بالعكس التمرين وإنت صايم بيكون الأداء أعلى وبتحس إنك أقوى وأكتر تركيزا .

🔹قلة الطاقة: هيكون عندك طاقة لو كلت كويس ، والقصد بكويس إنك تاكل كامل إحتياجك من الاكل خلال فترة الفطار .

▪️▪️▪️▪️▪️

🔰🔰 إيه أفضل وقت للتمرين في رمضان ⁉️🏋🏻

أفضل وقت للتمرين هو آخر ساعة أو ساعة ونص في الصيام ويفضل يكون رفع أثقال فقط .. هتحس إنك أقوى وأكتر تركيزا لو محستش بكده يبقى إنت مش بتاكل كفاية خلال وقت الفطار أو هو إحساس نفسي مش أكتر .

▪️▪️▪️▪️▪️

🔰🔰 إزاي تننشف في رمضان ⁉️

الناس معتقدة إن مستحيل تنشف وتفقد دهون في رمضان ، المفاجأة إن الصيام بيزود حرق الدهون يعني تقدر تاكل كمية كارب أكتر من المفروضة في حالات التنشيف العادية وماتخزنش دهون !

((١)) ضم تمارين قوة لجدول تمارينك وإرفع أقصى أوزان تقدر تعملها وقلل العدات ، يعني ممكن تلعب تمرين أو ٢ بإسلوب ٥x٥ يعني ٥ مجموعات في ٥ عدات بأقصى وزن تقدر تشيله .

((٢)) كُل خضار كتير .. كُل أكل صحي كتير ، حاول يكون ٩٥٪‏ من أكلك يكون صحي وفيه ألياف ومعادن وفيتامينات كتير .

((٣)) إشرب ماية .. إشرب ماية كتير ، خصوصا في رمضان لان كمية فقد الماية في الصيام بتكون كتير وعشان ميحصلش تعب في التمرين أو شد عضلي لا قدر الله ، يعني على الاقل ٥ لتر ماية علشان الماية هتساعدك تحرق .

((٤)) بلاش كارديو .. إعتمد على التمارين المركبة اللي بتحرق كتير وبتشغل أكبر مجموعة ألياف عضلية ، وحاول متلعبش كارديو ولو طلبت جدا وعايز تلعب يبقى إلعب بشكل ثابت ومتزيدش عن ربع ساعة يعني عمرك ما تلعبHIIT في رمضان .

▪️▪️▪️▪️▪️

🔰🔰 إزاي تضخم وتعمل عضلات في رمضان ⁉️

الناس الرفيعة غالبا بتواجه مشكلة مع كمية الاكل والمشكلة الاعظم بالنسبالهم في رمضان ضيق الوقت فـ بيخسوا طبعا ومش بيعرفوا يزيدوا عضل .

🚩 شوية نصايح هتساعدكم في رمضان:

((١)) إشرب حليب كامل الدسم .. إشرب كتير في اليوم ، ممكن مثلا ٢ لتر حليب يوميا .

((٢)) كُل أكل فيه سعرات حرارية عالية زي المكرونة مثلا ، جرب برضه تاكل مكسرات كتير ، سعراتها عالية ، موز كتير ورز .

((٣)) عايز تبني عضلات ؟ حافظ على هدم أكبر عدد ممكن من الألياف العضلية ، يفضل برضه إنك تدخل تمارين قوة لقائمة تمارينك .

((٤)) شرب الماية .. مش هتحتاج ٥ لتر مايه زي لو بتنشف ، هتحتاج تشرب مايه طبعا بس بما إن الحليب حوالي ٨٠٪‏ منه ماية أساسا ، فمش هتحتاج أكتر من لترين ماية زيادة ع الـ ٢ لتر حليب .

((٥)) إعمل سموذي كتير واشربه .. زي مثلا إنك تضرب موز مع لبن مع مكسرات مع عسل في الخلاط ، بياخد مساحة أقل في المعدة وفيه كالوريز كتير .

((٦)) إحسب سعراتك .. إعرف إنت بتاكل إيه وفيه سعرات قد إيه ، مهم إنك تحسب السعرات زيك زي اللي بينشف عشان تلاقي نتايج .

((٧)) كُل .. كل كتيييييييييييييييييييييير

((٨)) نام ..نام كويس ، نااااام كويسسسسسس

▪️▪️▪️▪️▪️

🔰🔰 كلمة أخيرة :

اللعبة مدارس وكل مدرسة ليها طريقة معينة وتحترم وكل مدرسة بتجيب نتايج ، إعمل اللي يتوافق مع يومك وظروفك .. تتمرن قبل الفطار ، تتمرن بعده ، تمشي كيتو ، تمشي فيجن ، تمشي كارب سايكلينج ، تضخم ، تنشف ، كله بما تراه مناسب ليك وتشوف إنه مناسب لظروفك المعيشية وحياتك اليومية .. إنت ملزم بالاساسيات بس .. كل كويس جدا ، نام كويس جدا ، إشرب ماية كويس جدا والباقي كلها مدارس وكله بيجيب نتيجة .

23/04/2018

تعلم كيف تأكل بدون معلم ‼️🍔🍗

في البداية خليني أقولك معلومة أنا متأكد إنك حافظها ، مفيش فايدة من كل التمارين اللي بتلعبها من غير نظام غذائي مناسب لهدفك .
في البوست ده هتكلم عن كل النقط اللي ممكن تحتاجها في النظام الغذائي بتاعك بإعتبارك لاعب كمال أجسام محترف أهم نقطة في يومه هي التغذية والدايت .

🔰 الجزء الأول: خلاصة الخلاصة

1️⃣ كُل كمية مناسبة من البروتينات
جسمك علشان يبنى عضلات بيحتاج البروتين عنصر أساسي لكن في حدود إحتياجك (كشخص طبيعي) بنسبة ١.٦ جرام بروتين بس لكل كيلو من جسمك حسب آخر الأبحاث .
• مصادر البروتين الحيواني: اللحوم ، الأسماك ، الألبان والبيض
• مصادر البروتين النباتي: الصويا ، الفول ، العدس ، الفاصوليا والشوفان

2️⃣ إستخدم الواي بروتين بين الوجبات
لو ماكنتش بتقدر تكمل إحتياجك من البروتين من أكلك العادي على مدار اليوم يبقى مكمل الواي بروتين هيكون حل كويس يساعدك توفي إحتياجك .

3️⃣ ما تفوتش وجباتك أبدا
إنك تطنش وجباتك كإنك بالظبط فوت التمرين ، جسمك بيحتاج لكل العناصر الغذائية من البروتين والكارب والدهون علشان يحافظ على الكتلة العضلية اللي بناها .

4️⃣ كُل كاربوهيدرات معقدة
زي ما البروتين مهم جدا، كمان نفس الشيء بالنسبة لباقي العناصر الغذائية ، وجباتك لازم يكون فيها الخضار والكربوهيدرات المعقدة زي الشوفان والرز البني والبطاطس .

5️⃣ قلل من كمية الدهون اللي بتاكلها
الدهون نوعين مفيدة وضارة ، دايما ضيف لوجباتك الدهون المفيدة زي المكسرات وزيت الزتون وصفار البيض ، وإبعد قدر الإمكان عن الشيبسي والبيبسي والبرجر والبيتزا وأكل الشارع .

6️⃣ إبعد عن الأغذية المصنعة
كونك لاعب كمال أجسام يعني المفروض إنك بتاكل وجبات نضيفة ، بمعنى إنك تتجنب الأكل الغير صحي زي الوجبات السريعة والأغذية المصنعة ، الأكلات دي بتتحول لدهون مش عضلات ، شكل جسمك هيتحدد حسب اللي بتاكله .

7️⃣ ما تاكولش سكريات كتير
إبعد عن السكريات والحلويات لإن الحاجات دي مليانة سعرات حرارية فارغة بتاخد مكان سعرات صحية ممكن تستغلها في بناء كتلة عضلية ، فالأحسن إنك تمنع الكلام ده نهائيا وماتدخلهاش بيتك غير في المناسبات .

🔸🔹🔸🔹🔸

🔰الجزء التاني: الخطة البديلة (الفيل في المنديل)

1️⃣ خد وجبة فري كل فترة
الوجبة الفري مرة كل إسبوع هتساعدك تكمل إلتزامك بالدايت وهتفتح نفسك على التمرين باقي الإسبوع ، وحاول تستخدم الوجبة دي كوسيلة مكافأة لو حققت نتايج كويسة في فترة معينة ، كل اللي نفسه فيه وإديها برجر وبيتزا وبيبسي وبطاطس .. دلع نفسك .

2️⃣ إبدأ فكر في المكملات
بعد فترة من التمرين لما ربنا يكرمك وتعملك شوية عضلات إحتياجات جسمك من التغذية والعناصر هتزيد وممكن ماتعرفش تاخدها من أكلك العادي سواء من الفيتامينات والبروتين والكاربوهيدرات والأحماض الأمينية ، وقتها ممكن تفكر تستخدم المكملات الغذائية .
أهم المكملات اللي هتحتاجها هي المالتي فايتمن والكرياتين والأوميجا 3 والواي بروتين ، وماتسمعش لتجار المكملات لإنهم غالبا هيوهموك إن في أنواع مهمة وهي في الحقيقة ملهاش لازمة بالنسبالك .

🔸🔹🔸🔹🔸

🔰الجزء التالت: كسر الأساطير

1️⃣ قسم جدول وجباتك على حسب اللي يناسبك
في أسطورة بتقول إنك لازم تاكل ٥ أو ٦ وجبات في اليوم علشان تزود معدل الحرق وتخزن الجليكوجين في العضلات وتمنع الهدم ، الكلام ده بلح .
المهم هو كمية السعرات الحرارية والعناصر الغذائية اللي بتستهلكها مدار اليوم ، فـ لو بتجوع كتير قسم سعراتك على وجبات كتير ، لو يومك مزنوق ومابتحبش تاكل كتير يبقى قسمهم لـ ٣ أو ٤ وجبات كفاية قوي .

2️⃣ وجبة الفطار زي أي وجبة أخرى
ناس كتير من لاعيبة كمال الأجسام بيبالغوا في أهمية وجبة الفطار، في الحقيقة وجبة الفطار الصبح ملهاش تأثير إضافي على بناء العضلات ، فـ لو بتصحى متأخر ممكن تأجل وجبة الفطار لوقت متأخر شوية عادي .

🔸🔹🔸🔹🔸

❌شوية نصايح ع الماشي

•حضر وجباتك بنفسك وماتعتمدش عليهم في البيت
•كل الأطعمة اللي فيها سكريات قليلة
•إتمرن من ٦:٥ مرات في الإسبوع
•تمارين الكارديو جزء أساسي من جدولك التدريبي

⚠️ تحذيرات
•لو عندك حساسية من الحليب -اللاكتوز- يبقى أفضل مكمل بروتين بالنسبالك هو الواي بروتين المعزول
•زيادة البروتين بيصاحبها إرتفاع في الكولسترول ونقص في الكالسيوم .

14/04/2018

🉐 الترابط العقلي العضلي 🉐

أوقات كتير بعد ماتخلص تمرينك تستغرب إنك ماحسيتش بأي ألم في العضلة اللي لعبتها وكإنك مرنت عضلية تانية خالص ، ده بيكون بسبب إنك مابتستخدمش تكنيك الترابط العقلي العضلي .

💥في البداية قبل ما أشرح المصطلح بكلام كتير تعالى أقولك فيزيائيا إزاي العضلات بتتحرك ؟
فعل الحركة بيحصل عن طريق إشارات بيرسلها المخ للعضلات بيؤمرها تتحرك وتنفذ شكل الحركة اللي إنت تخيلتها وفكرت فيها بالتحديد ، فعلشان العضلة تشتغل معاك في التمرين لازم يكون المخ كمان مشارك في العملية وفي إتصال بينه وبين العضلات .

⛔️يعني أثناء التمرين المفروض إن في حاجتين بيحصلوا علشان العضلة تشتغل:
▪️إنك تدفع الوزن بإستخدام عضلات جسمك
▪️إنك تركز بمخك في تشغيل العضلة المستهدفة

◀️ مـثـال ▶️
يعني لو بتلعب تمرين بينش برس العضلة المستهدفة بتكون عضلة الصدر والمفروض إنك تقوم بعزل باقي العضلات التانية زي الترايسيبس والكتف أثناء الحركة ، لكن إنت غالبا بتستخدمهم لرفع الوزن فبتقلل الإستفادة الكاملة عن عضلة الصدر .

🔅في دراسة إتعملت علشان تتأكد من حقيقة النظرية
اللاعبين المشاركين فيها عملوا تمرين السكوات والبنش برس ، والباحثون طلبوا من اللاعبين رفع الوزن في البنش برس والتركيز على عضلة الترايسبس ، الباحثين إكتشفوا إن الإشارات الكهربية في الترايسبس زادت بشكل كبير وقلت الإشارات في عضلة الصدر .
بعد كده الباحثين طلبوا من اللاعبين التركيز برفع الوزن عن طريق عضلة الصدر ، وبالتالي زادت إشارات عضلة الصدر بشكل كبير وقلت الاشارات من عضلة الترايسبس ، ونفس الكلام بالنسبة لتمرين السكوات ، الاشارات إختلفت بين العضلة الأمامية وعضلة المؤخرة .

في النهاية ممكن الترابط العقلي العضلي يكون علاج لمشكلة العضلات الضعيفة لإنك لما بتتقنه بتشغل مجموعة ألياف أكبر فبالتالي العضلة حجمها بيزيد .

10/04/2018

⚛️ علاج العضلة الضعيفة ⚛️

▪️السؤال الأكتر شهرة والمشكلة العويصة اللي بتقابل معظم الرياضيين .. أعالج عضلاتي الضعيفة إزاي ؟!

♦️((١))• مرن عضلاتك الضعيفة مرتين في الإسبوع .. خسارة تستنى ٧ أيام كاملين علشان تمرنها تاني

♦️((٢))• إلعب بأوزان تقيلة لكن خد بالك إن الأداء يكون صح .. ماتفرحش لما تلعب بنص طن وصاحبك اللي بيساعدك هو اللي يشيله

♦️((٣))• هات تكرارات متوسطة من ٨ لـ ١٢ تكرار .. مش لازم تجيب ١٥٠ عدة على الفاضي

♦️((٤))• عدد الزوايا في التمرينة للعضلات الكبيرة من ٤ لـ ٦ زوايا والعضلات الصغيرة من ٢ لـ ٤ زوايا .. النص مليون زاوية اللي بتلعبهم ملهومش لازمة

♦️((٥))• عدد المجموعات في كل زاوية من ٣ لـ ٤

♦️((٦))• الراحة بين المجموعات من دقيقتين لتلات دقايق .. خد نفسك وجمع طاقتك الدنيا مش هتطير

♦️((٧))• إبدأ بالأجزاء الضعيفة في العضلة وخلّي القوية للآخر .. يعني لو الصدر العالي ضعيف إبدأ بيه دايما

♦️((٨))• إتمرن بالأوزان الحرة أكتر من التمرين بالأجهزة .. خليك مع الأولد سكول وتمارين الكومباوند تكسب

♦️((٩))• وجبة بعد التمرين ماتقلش أهمية عن التمرين .. دي لو ماكنتش أهم من التمرين نفسه

♦️((١٠))• ممكن تجرب المكملات زي الكرياتين والمالتي ڤايتمن .. وماتضيعش فلوسك على مكملات فارغة

04/04/2018

✨‏أفضل وقت لممارسة الكارديو:-

👈 هو بعد تمارين الحديد فجسمك يكون استهلك جليكوجين المخزن بالجسم اثناء رفع الاوزان مما يجعل مصدر الطاقة هي دهون الجسم 👌

👈 ‏ويكون افضل ولانقاص الوزن للمتقدمين؟!

🔸يكون الكارديو على فترتين 👇
١- اولاً في الصباح على معده فاضيه بس ماء..
٢- الثانية بعد تمرين الحديد مباشرة ..

🔸 مثال لتمارين الكارديو:-
١- مشي.
٢- جري.
٣- دراجة.
٤- اوربتراك.
٥- نط الحبل.
٦- سباحة.
٧- صعود درج.

🔸 مدة التمرين :-
- من ٣٠ الي ٤٠ دقيقه شرط "متواصل بدون توقف".

🔸 ‏فوائد الكارديو بشكل عام : 👇
1- حرق الدهون.
2 - رفع معدل الكالسيوم في العظام.
3 - رفع قدره الجسم على تحمل الحراره.
4 - رفع قدره الجسم على تحمل بروده الجو.
5 - زياده وصول الاكسجين الى المخ.
6 - خفض ضغط الدم.
7 - خفض نسبه تحول السكر الى دهون.
8 - خفض حاجه الجسم للانسولين.

17/02/2018

نصائح هامة لكــل رياضــي كمال الأجسام :)
1ــ ركز دائما على مكان الضعف عندما تقوم بتمرين او رفعة
2ــ لا تفكر في الوزن بل فكر بالأداء الصحيح للحركة
3ــ استخدم اوزان ثقيلة مع عدد تكرارات اقل
4ــ الأوزان الثقيلة تحفز النمو بشكل افضل من الأوزان الخفيفة
5ــ عليك ان تأخذ فترات راحة اقل أثناء التمرين ( دقيقة كحد اقصى) لن تكون قادرا على استخدام اوزان اكبر ولكن التحفيز الأجمالي لعضلاتك افضل
6ــ قم بشرب الماء أثناء التمرين ولكن ليس بكميات كبيرة رشفة كل 3ــ5 دقائق
7ــ تناول 5ــ 6 وجبات باليوم
8ٍّــ تناول وجبة بعد التمرين بنصف ساعة
9ــ يمنح الموز طاقة عالية فموزتين قبل التمرين تمد الجسم بالطاقة ل 90 دقيقة

16/02/2018

موضوع مهم جدا👇
________________

كلنا بيجى علينا وقت فى التمرين بنتعب وبنحس بدوخه واوقات بيبقا عندنا غثيان ومش بنقدر نكمل التمرين وبنسأل ايه السبب ؟ وبنبقا عاوزين الحل💪
اليك بعض الاسباب👇
__________________

-خلل في النظام الغذائي ( حرمان وعدم توفر المصادر الغذائية الأساسية ).
-تمرين قوي وفية مجهود ( بدون اكل كويس ).
-بدأت تمرين بعد ما أكلت مباشر .
-طريقة التنفس ( تكتم النفس ).
-خلل بوصول الأكسجين إلي المخ.
-الإرهاق الجسدي وعدم الراحة الكافية.
-الحالة النفسية.
-قلة النوم.
-جو المكان حار او رطب ولا توجد تهوية.
-تناول كفايين زيادة عن اللزوم ( قهوة + باور + فات برنر . وكلة في وقت واحد ).
-قاطع الملح ( الصوديوم ).
-نظام الزيرو كارب لفترة طويلة.
-مانع نفسك بشكل نهائي عن السكريات.
-قلة شرب الماء.
-انخفاض معدل السكر بالدم.
-نقص الفيتامينات والمعادن الأساسية.
-خمول الغدد.

👇
___________
1- نظام غذائي متكامل لجميع مصادر الأكل ( بروتين - كارب - فيتامينات - معادن - الدهون المفيدة - الألياف ).
2- النوم والراحة الكافية.
3- تجنب الوصول لمرحلة الإجهاد القاسي علي الجسم.
4- التنفس بأريحية أثناء تأدية التمرين.
5- شرب الماء أثناء التمرين

Nestiom

20/07/2019

03/07/2018

28/06/2018

11/06/2018

13/05/2018

23/04/2018

14/04/2018

10/04/2018

04/04/2018

17/02/2018

16/02/2018

Address

Telephone

Website

Alerts

Shortcuts

Share

Category