19/09/2026
كسمسار في المهندسين والعجوزة والدقي هقولك الخلاصة اللي بقولها لعملائي:
الارضي اللي تحتيه بيزمنت متاخديهوش سكن.
في عمايرنا القديمة مشكلته مش رطوبة بس، مشكلته ريحة الصرف والرطوبة بتطلع عليكي لو البيزمنت مش معزول. تاخديه امتى؟ لو هتعمليه مكتب او عيادة في شارع رئيسي زي شهاب او لبنان او عيسى حمدي - ايجاره دهب - لكن سكن لا.
الادوار العلوية
التالت والرابع والخامس دول توب السوق.
لا دوشة شارع ولا انتي عالية لو الاسانسير عطل، وماتور المية مش هتحتاجيه، وعشان كده اغلى متر في اي عمارة في المهندسين بيبقي في الادوار دي.
من السادس للتاسع: حلو لو البرج جديد وفيه 2 اسانسير - فيو وهوا احسن - بس لازم تسألي على ماتور مية خاص، المية في الدقي والعجوزة من السابع وطالع ضعيفة.
الاخير؟ متاخديهوش الا لو معاه روف مكتوب في العقد ومثبوت شهر عقاري ومتعزل كويس، غير كده في الصيف فرن وفي الشتا تلاجة.
الخلاصة
خليكي في 2 لحد 5 - ده اللي بيتباع اسرع وبيزيد سعره اسرع.
انا في صفحة سوق عقارات المهندسين والعجوزة والدقي بنزل كل يوم سعر المتر الحقيقي في المنطقة بالارقام من السوق مش اسعار وهمية، تابعوا الصفحة عشان تعرفوا السعر العادل قبل ما تشتروا.
ولو حد عايز يسأل على دور معين في عمارة معينة يبعتلي عنوانها وانا اقوله مميزاتها وعيوبها ببلاش
