24/12/2025
لقيت رسايل حوالي ٤ رسايل جايه من البنك مكتوب فيها
وراح ماسك التليفون وفتحه (تليفون سامسونج وجرابه جلد بيتفتح بحزام صغير مقطوع ) وراح مديهولي اقرا الرساله مكتوب فيها تم سحب مبلغ ١٥,٠٠٠ مصري من بطاقة الخصم المباشر المنتهية بـ ٠٠٠٠ من فرع ........ في / / ٢٠٢٣ الساعه ١١:٥٣ والرصيد المتاح ٣,١١٨,٢٣٠ مصري
وبعدها بحوالي ربع ساعه لقيت رساله تانيه لقيته بيقولي والأيام دي كان ابويا مات وراح قايلي واللي كان بيسحب كان بيسحب قبل الساعه ١٢ بالليل وبعد الساعه ١٢ بالليل مبلغ وتاني يوم يسحب بعد ١٢ بالليل وكده بقي قالي اتجننت ونزلت تاني شقه ابويا قلبت الدنيا علي محفظته ملقتهاش بس هقولك علي حاجه ابويا يا أستاذ كان عنده خزنه في اوضته كبيره وكان بيشيل فيها كل حاجه ومفاتيحها كنت بشوفه بيحطها في الجلابيه بتاعته قالي اخر مره كنت عند ابويا كان في فلوس في الخزنه ودهب امي
فقلت له وهو انت كنت اخر مره امتي عنده وهو أصلا بيفتح الخزنه قدامك عادي
قالي يا أستاذ انا كل يوم عنده ولما فتح الخزنه كان قبل ما يموت بحوالي ١٠ أيام علشان كان ناداني وقالي عايزك وراح فاتح الخزنه وطلع منها ٣٠٠٠ جنيه وقالي ١٠٠٠ ليك و١٠٠٠ لاخوك و١٠٠٠ لاختك علشان كل واحد فيكم يجيبله هدمه
ابويا كان فييس وبيحب يصرف علينا وعلي نفسه ابويا كان مدير بنك يا أستاذ وعمره ما استخسر فينا حاجه
قلت له كمل (مش عايز طبعا اخرج عن الموضوع) قالي لقيت المفاتيح قلت له قبل المفاتيح الفلوس اللي اتخصمت دي حضرتك بلغت او اتكلمت فيها مع حد قالي لا مواجهتش بيها حد
قلت له تمام وبعد لما لقيت المفاتيح
قالي فتحت الخزنه قسما بالله قسما بالله يا أستاذ ملقيتش فيها أي حاجه الا غويشه واحده بس
طبعا انا مش عارف مخي كان رايح ان اللي اخد الفلوس هو ابوه عادي والدهب برضه ابوه عادي ماهو ليه هشك في حد الراجل مات واتدفن وكان قاعد لوحده وسط عياله والدنيا حلوه وخصوصا ان مفيش حد معاه مشكله بس اللي مش عادي ازاي فلوس بتتسحب والراجل كان مات قلت له اول رساله اتخصم فيها المبلغ كانت بتاريخ كام
قالي كانت في نفس يوم العزا بالليل قلت له واخواتك قالي اخويا كان موجود بياخد العزا جنبي واختي كانت اكيد بتاخد العزا مع الحريم في الصوان اللي كان ورايا
طبعا انا مش هقدر اتهم حد ودماغي وقفت منه لانه دخل في حوالي ساعه ونص بيرغي بس وانا كنت خلاص صدعت وخايف أقوله فاضلك كتير يزعل
قلت له كمل وبعدين قالي انا ساعتها اتجننت طلعت الشقه وقلت لمراتي بكره تاخدي الواد وتروحي عند خالتك في الاسكندريه كام يوم قلت له ليه قالي انا كنت خايف عليهم ماهو ابويا الموته بتاعته مكانتش عجباني وقصه المحمول مش مضبوطه وقصه الدهب والفلوس مش راكبه معايا فقلت له يا أستاذ ماهو قصه موته اللي حضرتك مش مقتنع بيها كنت طلبت تشريحه لو شاكك قالي مش عايز جتت ابويا تتقطع (العقليه اللي زي دي مش بتقتنع بسهوله) وروحت رادد عليه وقصة الخزنه والدك رحمة الله عليه ممكن يكون اتصرف في الفلوس جاب حاجه عمل حاجه قالي وبالنسبه للفلوس اللي بتتخصم من حسابه كل يوم دي ايه قلت له هي دي بقي بداية فك الشفره قالي انا حاسس ان حضرتك تعبت مني قلت له لا متعبتش بس عايز أقول لحضرتك حاجه مهمه انا محتاج من حضرتك توكيل واعلام الوراثه وصورة بطاقتك وصوره بطاقة المرحوم وخليني ابدا افكر هعمل ايه وأخيرا قالي ممكن اسيب حضرتك دلوقتي واجهز الورق واجيلك
قام مشي واختفي عشر أيام وليته في المكتب وداخل ومعاه فايل من بتوع الشهر العقاري وفي المطلوب
الصراحه انا مكنتش عارف ابدا من فين اخدت الورق منه وقلت له كام يوم وكلمني
اول حاجه عملتها بعت انذار للبنك وتحديدا لمدير البنك بان أي اجراء هيتم علي البطاقه دي هوجه ليه تهمه الاشتراك في جريمه وحطيت النيابه العامه كسلطة اتهام طبعا مدير البنك في الطبيعي رده بمنتهي الهدوء وانا مالي مش من حقي اني أوقف حد طالما محدش أتكلم ووقف البطاقه لكن اللي حصل كان غير متوقع
اللي حصل لقيت مدير الفرع بيكلمني اول لما الإنذار راح عليه (ورق المكتب بتاعي عليه العنوان وأرقام التليفونات) وقالي كالاتي
أستاذ محمد مساء الخير مع حضرتك ..... مدير بنك ...... فرع ....... (والمفاجاه ان البنك ده اللي كان ماسكه المرحوم اللي القصه عليه وكان فاتح فيه حساب وان مدير الفرع ده مسك بعد لما المرحوم طلع معاش) وقتها بس مسكت اول خيط
انا رديت عليه اهلا وسهلا أستاذ ..... اتفضل معاك قالي حضرتك بعت انذار بتقول فيه وراح قايلي اللي باعته فرديت عليه اه تمام وبحمل المسؤوليه لو حد سحب أي قرش راح قايلي مش من حقي ولا من سلطاتي اني أوقف حد من سحب أي مبالغ
قلت له ولا من سلطاتك ولا حقك انك تكلم محامي تحكيله عن السلطات المخوله ليك من عدمه ومكالمتك دي اكدتلي شويه حاجات قالي شكرا وقفل
طبعا ان مدير فرع يتكلم بعد الإنذار اللي بعد ما استلمته من المحكمه ولقيت مكتوب فيه انه رفض الاستلام لازم يكون عليه كميه من علامات الاستفهام
قلت للموكل علي اللي دار وقالي
