20/11/2022
▪️مين قال إن المحامي الشاطر (لازم) يكسب القضية؟! 🤔
📌 لو انت ارتكبت جناية مثلا كانت عقوبتها الإعدام والقضية مقفولة مفيهاش براءة ساعتها مهمة المحامي الأساسية إنه يجيبلك مؤبد وهيبقي تم مهمته بنجاح زي قضية هشام طلعت -كان فيها فطاحل محامين البلد- الأساتذة / الديب وأبو شقة وآمال عثمان وعبد الرؤف مهدي وغيرهم كانت مهمتهم اللي نجحوا فيها إنهم يتحصلوا على حكم ١٥ سنة بدلا من حكم الإعدام الأول.
📍لذلك أحيانا تسمع محامي الجنايات يقول لموكله «القضية دي برائتها عشر سنين».
نفس الكلام في القضايا المدنية أحيانا قضيتك المدنية بتبقى خسرانة خسرانة حتى لو كان محاميك العلامة السنهوري ساعتها مهمة المحامي الأساسية إنه يخليها أطول فترة ممكنة في المحكمة لحد ما انت ترتب أمورك لما يصدر ضدك الحكم زي أحكام الطرد مثلا أو بطلان البيوع.
📌 وكذلك الأمر في قضايا الشيكات وإيصالات الأمانة ، ممكن تكون مهمة المحامي إنه يخليلك القضية أطول فترة ممكنة لحين ما ترتب أمورك وتقدر تسدد المبلغ أو تتصالح.
📍خلاصة الكلام.. المحامي لا هو حاوي ولا ساحر المحامي محكوم بنصوص قانون وبوقائع وبيحاول بقدر جهده إنه يحققلك أكبر مكسب ممكن حتى لو خسرت القضية.
