16/09/2024
أستاذ مالك: صباح الخير حضرتك معاون المباحث معتصم عامر ؟
- الضابط معتصم عامر : آه أنا معتصم عامر مين حضرتك ؟
- أستاذ مالك : أنا مالك على عشماوى المحامي.
- الضابط معتصم عامر : بص أنا لسه جاي ومكلتش, اخرج لأي أمين شرطة برا يعملك اللى أنت عاوزه.
- أستاذ مالك : والنبي يا بيه متتجعصش أوي كده واتكلم عدل.
- الضابط معتصم عامر : نعم !!!
- أستاذ مالك : نعم الله عليك، اتفضل اقرأ المصيبة اللى عملتها يا بيه.
أخذ معتصم عامر ما ألقاه مالك من أوراق أمامه على المكتب وفتحه ليجد محضر شرطة.
- الضابط معتصم عامر : أنت جايبلي محضر أنا اللى كاتبه وداخل تتهجم عليا فى مكتبي يا أستاذ، أنت لو مفهمتنيش أنت عاوز إيه بالظبط أقسم بالله هعرضك بكرة على النيابة بتهمة التعدي على ظابط شرطة.
- أستاذ مالك : لا إهدى عليا شوية واسمع المفيد, أنت جالك بلاغ بخصوص أب قتل بنته، وانتقلت عاينت الجثة، لما وصلت لموقع البلاغ، وأخدت أقوال الأب واعترف إنه هو اللى قتلها مش كده ؟
- الضابط معتصم عامر : أيوه بالظبط إيه بقى المشكلة ؟
- أستاذ مالك : المشكلة إن أصعب محضر يتعامل معاه المحامي هو المحضر اللى تتقال فيه الحقيقة، وأسهل محضر يتعامل معاه المحامي هو المحضر المتفبرك اللى عامله ظابط صغير زي المحضر اللى حضرتك عامله بالظبط.
العمل باختصار يتناول الجانب المظلم للقانون، الذي من الممكن استغلاله أسواء استغلال، ويتجسد هذا في بطل الرواية وهو محام حر يدعى أستاذ مالك، والذي كان في بداية حياته رمزا للشرف والطهارة، وتدور اللعبة ويتخذ الشر مكان الخير والعكس.
ويصبح أستاذ مالك هو من وضع مفهوما جديدا للجريمة المنظمة, كما أن معظم أحداث الرواية حدثت بالفعل في عالمنا، وأتينا بها من أروقة محاكم الجنايات المصرية؛ لنسخرها لصنع هذا العمل, مع العلم أن جميع أسماء الشخصيات ليست أسماء الأشخاص الحقيقية الموجودة في عالمنا.
