18/07/2026
من كام يوم كلمني عميل في التليفون وطلب يقابلني، حددنا موعد و شرفنا فى مكتبنا عشان نسمع تفاصيل موضوعه. الراجل كان بيتكلم بكل ثقة، وجاي ومستعد يدفع أي مبالغ بس مقابل إنه يرفع قضية طرد في عقد إيجار قديم ويخلي الشقة.
بدأ يحكي ويقول إن المستأجر الأصلي وزوجته الاتنين اتوفوا، لكن ابنهم لسه قاعد في الشقة ومتجوز فيها من وقت ما والده كان عايش، والمالك عايز يخرجه بأي طريقة وشايف إن موقفه مضمون مية في المية. وكمان أضاف بكل بساطة إن عقد الإيجار الأصلي مش معاه وضايع، وإنه هيروح يعمل محضر إثبات حالة وبناءً عليه نرفع القضية ونكسبها فوراً. طبعاً أنا كنت بسمعه وهادي جداً وفي بالي بقول "شكلك فاهم يا نصة".
لكن الشغل القانوني الصح مبيعتمدش على الكلام المرسل ولا الثقة الزيادة. لما قعدت أدرس تفاصيل الموضوع وأرتب التواريخ والأحداث بدقة، وقفت قدام نقطة جوهرية هي اللي قلبت موازين القضية دي بالكامل؛ اكتشفت إن الزوجة اتوفت الأول، والمستأجر الأصلي اتوفى بعدها.
خلونا نوضحها بالبلدي كده وبدون تعقيد، وليه النقطة دي صدمت المالك؟
حكم المحكمة الدستورية العليا استقر على إن امتداد عقد الإيجار القديم بيكون لجيل واحد بس من المستأجر الأصلي، يعني العقد بيمتد لمرة واحدة للمقيمين معاه من الدرجة الأولى وقت الوفاة.
الترتيب الزمني هنا هو اللي بيحدد مصير الشقة:
لو كانت الزوجة هي اللي اتوفت بعد جوزها (المستأجر الأصلي)، كان العقد هيمتد لها هي وبكده يكون جيل الامتداد الأول انتهى، فلما تتوفى بعده، الابن ميكونش ليه حق الامتداد وتترفع عليه قضية طرد والمالك يكسبها وهو حاطط بطيخة صيفي في بطنه.
أما في الحالة اللي قدامنا فالوضع اتعكس؛ الزوجة اتوفت الأول في حياة جوزها، وده معناه إن المستأجر الأصلي فضل هو صاحب الحق في العين لحد ما اتوفى، والابن كان مقيم ومستقر معاه ومتجوز في الشقة، بالتالي بوفاة الأب هنا بيحصل الامتداد القانوني لأول مرة لصالح الابن، ويمتد ليه العقد بقوة القانون طالما توافر شرط الإقامة، ومفيش أي ثغرة تخرجه.
لو المحامي مشي ورا حماس المالك وعينيه غفلت عن تفصيلة زمنية وتاريخية صغيرة زي دي، كان المالك هيدخل في سكة دعوى مصيرها الرفض من أول جلسة، ويخسر وقته وفلوسه على قضية خسرانة.
القانون في أصله تفاصيل دقيقة وتواريخ بسيطة بتقلب مراكز قانونية كاملة، وعشان كده دايماً بنصحك: فكر واستشير محامي فاهم ومتمكن قبل ما تاخد أي خطوة أو تدفع مليم واحد.
النجار للمحاماة
مستشار قانوني متخصص في العقارات ونزاعات المطورين، توثيق وإبرام العقود وتسجيلها، صحة التوقيع، ونزاعات الملكية.
للاستشارات القانونية والعقارية، يسعدنا تواصلكم وتحديد موعد للمقابلة عبر الواتساب فقط على الرقم المخصص للاستشارات 01016088769 .
كافة الاستشارات مدفوعة وغير مجانية.
تفاعلك ومتابعتك الدائمة لنا تضمن وصول كافة منشوراتنا القانونية إليك، شارك وعلق بتم ليصلك كل جديد.
#قانون #محاماه #تدريب
