03/08/2026
فيما يخص الإخوة المُقبلين على السفر إلى المملكة العربية السعودية.
نصيحة أخوية قبل أن تكون توعية نظامية:
١- قبل السفر من مصر اقرأ عقدك كويس جدًا، واسأل محامي، واختار المكتب اللي هتسافر من خلاله بعناية شديدة، واسأل عنه؛ لأن أغلب المكاتب أنت بالنسبة ليهم بيزنس ومصلحة، ولا يعنيهم ما قد تتعرض له بعد السفر لأي دولة عموما. وطبعا الكلام ده غير موجه للمكاتب المحترمة اللي بتتعامل مع شركات أو مؤسسات استقدام عمالة محترمة، وده لا يمنع الحيطة والحذر.
٢- اتفق على راتب محترم تعرف تعيش بيه؛ لأن الوضع مش زي ما أنت متخيل، وللأسف أغلب الناس بتكون سرقاها الحوجة والعوزة، فبتسافر على أي راتب وخلاص لحد ما تتصدم بواقع قاسي. كمان من المهم أن الراتب اللي هتتفق عليه، وكافة بنود العقد المتفق عليها، هي اللي تكون موجودة بعد السفر، ويكون المكتب الوسيط ضامن، ويتم وضع شروط معاهم، من ضمنها: في حالة حدوث أي إخلال من جانب الشركة أو المؤسسة او صاحب العمل عموما ببنود العقد اللي هتسافر بموجبه، تسترجع كافة المبالغ المدفوعة من طرفك، مع تحملهم كافة تكاليف تذاكر السفر ذهابًا وإيابًا. علشان كده بقولك اختار مكتب موثوق ومحترم تسافر من خلاله، لأنك هتتصدم.
٣- لازم تكون عارف إن عقدك الورقي اللي بتوقعه في مصر قبل السفر ده مجرد عقد بيترتب عليه صدور التأشيرة وغيره من الأوراق، احتفظ بيه وخلي معاك نسخة منه ولازم تكون كافة البنود والأجر ومدة العقد كل شيء لازم يكون واضح متخليش حد يستغلك ويبيع ويشتري فيك، وده مهم جدًا. وكمان لازم تكون عارف إن العقد ده هيتم تغييره بعد السفر لأن نظام الرقمنة بيفرض على صاحب العمل أن يكون العقد موثقًا إلكترونيًا عبر منصة (قوى) ودي المنصة التي تنظم علاقة العمل بين العامل وصاحب العمل. وخليك حريص جدًا إن البنود اللي هتسافر عليها من مصر تكون هي نفس البنود اللي هيتم توثيقها في عقد العمل الإلكتروني عبر منصة قوى.
٤- عند كتابة العقد من قبل صاحب العمل بيوصل إشعار للعامل عبر الجوال بوجود عقد عبر منصة قوى، يجب الموافقة عليه خلال ١٠ أيام ليتم توثيقه بشكل رسمي. لازم يتم الاطلاع عليه بعناية قبل الموافقة، وفي حالة وجود أي تعقيب أو الرغبة في تعديل أي بند، بيتم اختيار أيقونة التعديل، ومن ثم تنتظر موافقة صاحب العمل على التعديل. وليك الحق ترفض العقد، ولكن في حالة الموافقة، فكده العقد أصبح ساري وموثق وسندًا تنفيذيًا.
٥- ملحوظة: رسوم الاستقدام، ورسوم التأمينات الاجتماعية، ورسوم التأمين الطبي، وتذاكر السفر بيتحملها صاحب العمل، فمتخليش صاحب العمل يستغلك ويفرض عليك شيء غير نظامي، ومتتنازلش عن حقوقك نهائيًا، ومتخافش من أي تهديد؛ لأن نظام العمل بيضمن لك كافة حقوقك بشكل نظامي، وعلى فكرة ليك مكافأة نهاية خدمة، وليك كمان أجازة سنوية مستحقة ومدفوعة الأجر ٢١ يوم أول ٥ سنوات بعد كدا ٣٠ يوم، كمان لازم تكون عارف أن عقود عمل غير السعوديين لازم تكون محددة المدة، وعلى فكرة كمان الأجازة السنوية بتكون مستحق فيها لتذكرة ذهاب وتذكرة عودة يتحملها صاحب العمل.
٦- نقطة مهمة جدًا: لو مقبل على عقد عمل خارج البلاد، إياك ثم إياك ثم إياك توقع على سند لأمر تحت أي ظرف لصاحب العمل او المؤسسة او الشركة. هيتم إقناعك، وصاحب العمل هيحاول يستعطفك، ويقول لك "أنت ابن الشركة، وأنت ابن المؤسسة، وده ضمان، ولما تنتهي علاقة العمل هيتم إلغاء السند". أنا بقولك دا مش هيحصل ومتخليش نفسك تحت رحمة حد، و متوافقش نهائيًا، هتتصدم، وهتلاقي نفسك مطارد، وصادر ضدك طلب تنفيذ، وهيتم إيقاف جميع خدماتك، ده غير إنه هيصدر قرار بمنعك من السفر بموجب قرار ٤٦ وهتدخل في دوامة كبيرة أنت في غنى عنها. اللهم إني قد بلغت.
٧- إياك ثم إياك، بعد صدور الإقامة وتوثيق عقد العمل، حد يقول لك: ادخل نفاذ، وأعطني الرقم اللي وصلك، وتعطيه له بدون ما تكون فاهم وعارف نوع الطلب اللي هتوافق عليه. (نفاذ يعني توقيع إلكتروني)، يعني يقوم مقام التوقيع الورقي. إياك ثم إياك تعطي أي شخص رقم نفاذ، أو توافق على شيء بدون علم.
٨- مهم جدًا، لما تبدأ علاقة العمل، تحتفظ بكافة المستندات اللي بتثبت علاقة العمل مع صاحب العمل. أي مستند، أي ورقة، لازم تصور نسخة منها وتحتفظ بيها؛ لأنك هتحتاجها في وقت من الأوقات لو حصل نزاع، لا قدر الله، بينك وبين صاحب العمل. متمضيش على إنذار غير لما تطلع عليه، ومتمضيش على سند استلام غير لما تطلع عليه كويس.
٩- لازم في العقد توثق إيميل رسمي ليك (بريدًا إلكترونيًا) ولا تعطي الباسورد لصاحب العمل أو موظف ال HR بالذات لو كان مصري 😁، ورقم موبايل ثابت؛ لأن رقم الموبايل هيتم ربط كافة خدماتك من خلاله وإشعارك من خلاله. وكمان لازم تكون حافظ الإيميل ومحتفظ بكلمة المرور الخاصة به؛ لأن هيتم إشعارك من خلاله، وده وسيلة إثبات إلكترونية موثقة ومعمول بها في المملكة وأغلب دول الخليج.
١٠- لازم يتم توثيق الأجر الحقيقي في العقد، ولازم يكون الأجر بينزل كل آخر شهر على حسابك البنكي. ولو بتستلم بموجب إيصال استلام، لازم يكون مدونًا فيه كافة التفاصيل: اسمك، ورقم إقامتك، وقيمة الأجر اللي بتتقاضاه كاملًا، وأسم صاحب العمل، أو المؤسسة أو الشركة، ورقم السجل التجاري، وتاريخ وشهر الاستحقاق، ويكون موقعًا من صاحب العمل أو مختومًا بخاتم المؤسسة أو الشركة. وكمان لازم تصور نسخة منه وتحتفظ بيها، مهم جدًا.
١١- احترم النظام، ومتصدقش حد، وبلاش تسحب سيارة عن طريق التأجير التمويلي أو الأقساط إلا لما تكون متأكد إن عملك مستقر، ومتأكد إنك هتلتزم بالسداد في المواعيد؛ لأن غرامات التأخير عالية، ومن حق المعرض أو البنك، في حالة التعثر في السداد لمدة ثلاث أقساط متتالية، سحب السيارة والتنفيذ عليك.
١٢- إياك تستقبل حوالات مالية تخص العمل على حسابك لا سيما مناديب المبيعات والمُحصلين ... وغيرهم، لأن ممكن تلاقي نفسك متهم بجريمة تستر تجاري.
١٣- نصيحة متسافرش على وظيفة عامل توصيل أو سائق دراجة نارية مشاكلها كتير جداً وهتتبهدل، ومتسافرش على فيزا حرة.
- تجارب من واقع احتكاكي بقضايا المغتربين.
- ما خاب من استشار.
- ربنا يحفظ الجميع.