02/06/2024
Atalar və oğulları üçün Yadigar Sadıqlı paylaşdı:
“Oğlumun 15-16 yaşı olardı. Bir dəfə ata-bala getdik çörək yeməyə, baş-başa. Yeməyin ortasında başladım söhbətə.
Oğlum, dedim, gəncliyə qədəm qoyursan, irəlidə səni macəralar dolu dövr gözləyir. Gözəl, amma həm də təhlükəli dövrdür. Bir şeyi yadda saxla, həyatda elə anlar olur ki, qorxduğunu demək üçün cəsarət tələb olunur. Həmin anda “qorxmuram” demək əslində ən yekə qorxaqlıqdır. Oğlum təəccüblə “necə?” soruşdu.
Dedim, elə şeylər var ki, ondan “qorxmuram” deyən adam səmimidirsə, kəmağıldır, səmimi deyilsə, qorxaqdır. Məsələn, ola bilər, 2-3 ildən sonra bir tay-tuşunun sürdüyü maşına oturarsan, dəli kimi sürər, o zaman əslində həyatın üçün əndişə keçirəcəksən, amma qorxaq kimi görünməyə qorxduğundan “qorxuram” deməyəcəksən. Cəsarətli ol, denən ki, həyatım üçün qorxuram, saxla, düşəcəm. Əgər o anda qorxmadığını deyəcəksənsə, ya axmaqsan, ya da qorxaq. Axmaq olmadığını bilirəm, deməli, qorxaqlıq edəcəksən.
Hətta bəzən sənə istehza ilə “qorxursan bəyəm?” deyib təhrik edərlər. Təsdiqedici cavab verməkdən çəkinmə. Cəsarətli ol və qorxduğunu de. Qorxaq olub qorxmadığını demə.
Məsələn, bir gün dost-tanış əhatəsində birisi nəşə çıxarıb çəkər - inşallah, belə dostların olmaz da, amma yenə deyirəm, - sənə də təklif edərlər, imtina edəndə istehza ilə “qorxursan bəyəm?” deyərlər. Cəsarətlə cavab ver ki, hə, qorxuram və oradan uzaqlaş. Bütün pisliklər birinci dəfə “dadına baxmaqla” başlayır. Doğrudur, dadına baxanların hamısı aludəçi olmur, amma aludəçi olanların hamısı dadına baxanlardır.
Burada bir haşiyə çıxdım ki, üstünüzü polis alsa, onların valideynləri pul-para verib qurtaracaqlar. Məndən isə başqa şeylər tələb olunacaq, mən də imtina edəcəm, gedəcəksən içəri. Üstəlik, günahkar olduğun halda “oğlum günahsızdır, mənə görə tutdular” deyəcək həyasızlıq məndə yoxdur.
Sonra mövzuya qayıdıb başqa nümunələr də çəkdim, hamısı yadımda deyil. Axırda dedim, hər zaman cəsarətli ol, qorxmayanda da, qorxanda da. Bunu ayrıca cümlə kimi deyəndə qəribə ifadə alınır: qorxanda da cəsarətli ol. Amma mənası var, məncə.
İnsanın özündən asılı olmayan qəzalar var, Allah göstərməsin. Amma özün seçdiyin qəzalar da var. Oğlumun artıq 22 yaşı olub, fəxr edəcəyim insan kimi formalaşıb. Mənim o söhbətimin təsiri olubmu, bilmirəm. Ancaq oğlan övladları ilə belə söhbətlər edilməlidir, məncə. Paylaşdım, bəlkə məqbul sayıb siz də edərsiniz.”
