Vəkil Rəşad Əliyev

18/02/2026

"Cinayət yolu ilə əldə edilmiş əmlakın leqallaşdırılması (çirkli pulların yuyulması) dedikdə, əmlakın cinayət yolu ilə əldə edildiyini bilə-bilə onun həqiqi mənbəyini gizlətmək və ya cinayət törətmiş şəxsin məsuliyyətdən yayınmasına kömək etmək məqsədilə həmin əmlakın konversiyası və ya köçürülməsi, eləcə də bu məqsədlə maliyyə əməliyyatlarının və digər əqdlərin həyata keçirilməsi başa düşülür".

Bunu BiG.AZ-a açıqlamasında Vəkillər Kollegiyasının üzvü Rəşad Əliyev bildirib.
O, qeyd edib ki, bundan əlavə, əmlakın cinayət yolu ilə əldə edildiyini bilə-bilə onun həqiqi xarakterinin, mənbəyinin, yerləşdiyi yerin, ona sərəncam verilməsinin, yerdəyişməsinin, eləcə də həmin əmlaka dair hüquqların və ya onun kimə məxsus olmasının gizlədilməsi və ya ört-basdır edilməsi də cinayət tərkibi yaradır:

"Azərbaycan Respublikasının Cinayət Məcəlləsinin 193-1-ci maddəsinə əsasən, bu əməli törətmiş şəxslər cinayətin predmetinin dəyərinin 50 faizindən 70 faizinədək miqdarda cərimə və ya iki ildən beş ilədək müddətə azadlıqdan məhrum etmə ilə cəzalandırılır. Məhkəmə eyni zamanda üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrumetmə cəzası da tətbiq edə bilər.

Eyni əməllər qabaqcadan əlbir olan bir qrup şəxs tərəfindən, təkrar törədildikdə və ya qulluq mövqeyindən istifadə etməklə həyata keçirildikdə, beş ildən səkkiz ilədək müddətə azadlıqdan məhrumetmə cəzası nəzərdə tutulur.

Əgər əməl mütəşəkkil dəstə və ya cinayətkar birlik tərəfindən, yaxud xeyli miqdarda (50 min manatdan yuxarı) törədilərsə, yeddi ildən on iki ilədək müddətə azadlıqdan məhrumetmə ilə cəzalandırılır. Bu halda da əlavə olaraq müəyyən vəzifə tutma və ya fəaliyyətlə məşğul olma hüququndan məhrumetmə tətbiq oluna bilər".

16/02/2026

Şəxsi istehlak miqdarından artıq narkotik vasitə cinayət məsuliyyəti yaradır, şəxsi istehlak miqdarında isə inzibati məsuliyyətə səbəb olur

14/02/2026

Kredit götürən şəxs öldükdə borcu zamin, yoxsa varislər ödəməlidir?

12/02/2026

Ali Məhkəmənin "Şəxsiyyət hüquqlarının müdafiəsi haqqında" yeni Plenum qərarı barədə ARB24 kanalına müsahibə

12/02/2026

Vəfat edən şəxsin pensiya kapitalını ailə üzvləri ala bilərmi?

12/02/2026

Vəkil Rəşad Əliyev

11/02/2026

Yurd FM-in canlı yayımlanan "Radio Vəkil" proqramında 1 saat ərzində izləyicilərdən gələn hüquqi sualları cavablandırdıq.

02/02/2026

"Azərbaycan Respublikasının Qırmızı Kitabına daxil edilmiş və ya xüsusi mühafizə olunan heyvan və bitki növlərinin qorunması üzrə tələblərin pozulmasına görə ciddi cərimələr tətbiq olunur. Fiziki şəxslər bu pozuntulara görə 1 000-1 300 manat, vəzifəli şəxslər 3 000-4 000 manat, hüquqi şəxslər isə 6 000-8 000 manatadək cərimə edilirlər".

Bunu BiG.AZ-a açıqlamasında Vəkillər Kollegiyasının üzvü Rəşad Əliyev bildirib.
O, qeyd edib ki, həmçinin qanunsuz ov - yəni lazımi icazə olmadan, qadağan edilmiş yerlərdə, qadağan edilmiş vaxtda və ya qadağan edilmiş alət və üsullarla ov etmə - inzibati xəta hesab edilir. Bu zaman ov predmetləri müsadirə edilə bilər və ya edilmədən, şəxslər 1 000-2 000 manatadək cərimə oluna bilər, yaxud altı aydan iki ilədək müddətə ov hüququ məhdudlaşdırılır:

"Əgər qanunsuz ov xeyli miqdarda ziyan vurubsa, həmin əməllər cinayət məsuliyyətinə səbəb olur. Xüsusilə ovlanması tamamilə qadağan edilmiş quş və heyvanların qanunsuz ov edilməsi də cinayət əməli sayılır. Bu halda şəxslər Cinayət Məcəlləsinin 258.2.3-cü maddəsinə əsasən cəzalandırılır: üç min manatdan altı min manatadək cərimə, bir ilədək müddətə islah işləri, iki ilədək müddətə azadlığın məhdudlaşdırılması və ya iki ilədək müddətə azadlıqdan məhrum edilmə.

31/01/2026

31/01/2026

Vəkillər Kollegiyası üzvlərinin 31.01.2026-cı il tarixli Konfransı...

30/01/2026

Rəhbərlik işçinin ikinci işdə çalışmasına qarışa bilər?

Qanunvericiliyə əsasən, bir işçinin iki yerdə çalışması mümkündür. Yəni, iş saatları üst-üstə düşmədiyi təqdirdə, işçi paralel şəkildə fərqli bir şirkətdə də fəaliyyət göstərə bilər.

Lakin bəzi işəgötürənlər (birinci iş yeri) əməkdaşın digər bir yerdə işləməsini istəmədiklərini açıq şəkildə bildirirlər. Bu halda belə bir sual yaranır:

İşçi digər iş yerində çalışmaq qərarını yalnız şəxsi seçimlə verə bilərmi? Yoxsa mütləq şəkildə birinci iş yeri ilə razılaşdırmalıdır?

Vəkillər Kollegiyasının üzvü Rəşad Əliyev Valyuta.az-a açıqlamasında bildirib ki, Azərbaycan Respublikasının Əmək Məcəlləsinin 58-ci maddəsinə əsasən, iş vaxtından sonra əvəzçilik qaydasında əlavə iş yerlərində işləmək üçün əsas iş yerinin razılığı tələb olunmur:

"Lakin iş vaxtı ərzində bu fəaliyyətə yalnız işəgötürənin razılığı ilə yol verilir. Əmək müqaviləsinin şərtləri imkan verdiyi halda, işçi əsas iş vaxtından sonra digər müəssisələrdə də əmək müqaviləsi bağlayaraq fəaliyyət göstərə bilər. Bu zaman əmək funksiyası və əmək şəraiti əlavə iş yerinin işəgötürəni ilə razılaşdırılır".
R.Əliyev əlavə edib ki, əvəzçilik üzrə gündəlik iş vaxtı 4 saatdan, həftəlik isə 20 saatdan artıq ola bilməz:

"Bundan başqa, zərərli və ya təhlükəli şəraitdə çalışan işçilərin oxşar şəraitli əlavə iş yerində əvəzçilik üzrə fəaliyyət göstərməsinə yol verilmir. Yaşı 18-dən aşağı olan şəxslər isə yalnız əsas və əlavə iş yerlərindəki cəmi iş saatları onlar üçün nəzərdə tutulan qısaldılmış iş vaxtını keçmədiyi halda əlavə işlə məşğul ola bilərlər. Müəyyən vəzifəli şəxslər üçün - xüsusilə dövlət hakimiyyəti orqanlarındaçalışanlar üçün - əlavə iş yerində fəaliyyət göstərmək hüququ qanunvericiliklə birbaşa məhdudlaşdırılıb. Yuxarıda göstərilən hallar istisna olmaqla, iş vaxtından sonra əlavə işdə çalışmaq qadağan edilə bilməz. Bu əsasla əmək müqaviləsinə xitam verilməsi isə qanunvericiliyə ziddir”.

29/01/2026

Polis tutulan şəxsi nə qədər müddət saxlaya bilər?-VƏKİLDƏN AÇIQLAMA

"İnzibati xəta törətmiş şəxsin inzibati qaydada tutulması üç saatdan çox ola bilməz. Ancaq burada müəyyən istisnalar var. Belə ki, sərhəd rejimini, sərhədboyu (sərhədboyu zolaq) rejimini və ya Azərbaycan Respublikasının dövlət sərhədinin buraxılış məntəqələrində rejimi pozduğuna, avaralıqla məşğul olduğuna, əcnəbilərin və ya vətəndaşlığı olmayan şəxslərin Azərbaycan Respublikasında qanunsuz qalmalarına, habelə ölkədə olma qaydalarını pozmalarına görə barəsində inzibati xəta haqqında iş üzrə icraat aparılan şəxs törətdiyi xətanın hallarını, habelə onun şəxsiyyətini müəyyən etmək üçün, yaxud əcnəbilər və vətəndaşlığı olmayan şəxslər Azərbaycan Respublikasının hüdudlarından kənara inzibati qaydada çıxarma haqqında qərarın icrasından boyun qaçırdıqda və ya belə boyun qaçırmanı ehtimal etməyə kifayət qədər əsaslar olduqda inzibati qaydada tutma 24 saatadək müddətə və ya inzibati xəta törədənin şəxsiyyətini təsdiq edən sənədlər olmadıqda, hakimin qərarı ilə üç günədək müddətə tutula bilər".

Bunu BiG.AZ-a açıqlamasında Vəkillər Kollegiyasının üzvü Rəşad Əliyev bildirib.
O, qeyd edib ki, bundan başqa, fövqəladə və ya hərbi vəziyyət elan olunmuş ərazidə şəxs xüsusi verilmiş icazə vərəqələri olmadan komendant saatı vaxtında küçələrdə və başqa ictimai yerlərdə olduqda - komendant saatı bitənədək və ya onun üzərində şəxsiyyətini təsdiq edən sənəd olmadan komendant saatı vaxtında küçələrdə və başqa ictimai yerlərdə olduqda - tutulanın şəxsiyyəti müəyyən edilənədək müddətə inzibati qaydada tutula bilər:
"Həmçinin dini ekstremizm əleyhinə aparılan xüsusi əməliyyat zonasında fiziki şəxslərin şəxsiyyətini təsdiq edən sənədlər olmadıqda - tutulanın şəxsiyyəti müəyyən edilənədək, dini ekstremizm əleyhinə xüsusi əməliyyat aparan şəxslərin qanuni tələblərinə mane olmağa yönəlmiş hərəkətlər törədən şəxslər isə 48 saatadək inzibati qaydada tutula bilər.
Barəsində inzibati həbs tənbeh növünün tətbiqini nəzərdə tutan inzibati xəta haqqında iş üzrə icraat aparılan şəxs 24 saatadək və məcəllənin bəzi maddələrində göstərilən xətaları törətmiş şəxslər isə inzibati xəta haqqında işin mürəkkəbliyi və ya xəta törətmiş şəxslərin sayının çoxluğu işin araşdırılmasını gecikdirdiyi və ya başqa formada çətinlik yaratdığı hallarda, habelə şəxsin narkomaniyadan məcburi müalicəyə ehtiyacının olub-olmamasını müəyyənləşdirmək məqsədi ilə tibbi yoxlamaya göndərildiyi hallarda 48 saatadək müddətə inzibati qaydada tutula bilər.

Cinayət təqibi çərçivəsində tutulmuş şəxsin isə cinayət prosesini həyata keçirən orqan tərəfindən saxlanılması 48 saatdır. Həmin müddət keçənədək tutulmuş şəxsə ittiham elan edilməli, həbslə bağlı prokurorun təqdimatı olduqda isə o, məhkəməyə gətirilməli, məhkəmə təxirə salmadan işə baxmalı və həmin şəxs barəsində həbs qətimkan tədbirinin seçilməsi və ya onun azad edilməsi haqqında qərar çıxarmalıdır.

Ancaq bəzi ağır və xüsusilə ağır cinayətlərlə bağlı şübhəli və ya təqsirləndirilən şəxslərin sayının çoxluğu, işin xüsusi mürəkkəbliyi və ya toplanmış materialların həcminin böyüklüyü həmin hərəkətlərin 48 saat müddətində həyata keçirilməsinə mane olduqda, həmin müddət müstəntiqin əsaslandırılmış vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında məhkəmənin qərarı ilə 48 saatdan artıq olmayan müddətə uzadıla bilər".