10/09/2026
I dashur Profesor,
Ka disa njerëz që i takojmë në jetë dhe që na mësojnë një profesion, por ka edhe nga ata që, përtej profesionit, na mësojnë diçka shumë më të rëndësishme, si të bëhemi njerëz më të mirë.
Për mua, ky trajnim nuk ka qenë thjesht një mundësi për të marrë njohuri profesionale. Ka qenë një përvojë që do ta mbaj gjatë me vete, sepse përveç asaj që mësova për profesionin, mora edhe shumë këshilla për jetën.
Në çdo hap që kam bërë në jetë, më ka shoqëruar një këshillë e prindërve të mi, “Çfarëdo që të bëhesh, para së gjithash duhet të jesh njeri.”
Dhe pikërisht këtë pashë tek ju, Profesor.
Pashë një profesionist të jashtëzakonshëm, por mbi të gjitha pashë një njeri. Një njeri të thjeshtë, të drejtë, të sinqertë dhe me dëshirën e rrallë për t’i ndihmuar dhe për t’i ngritur të tjerët pa kërkuar asgjë në këmbim. Dhe pikërisht atëherë kuptova edhe më shumë se sa e vërtetë ishte këshilla që më kanë dhënë prindërit e mi.
Gjatë trajnimeve tuaja kuptova se të ndihmosh dikë të rritet, të besojë tek vetja dhe të bëhet më i mirë nuk të zvogëlon aspak. Përkundrazi, të larteson. Sepse madhështia e vërtetë e një njeriu nuk matet vetëm me atë që di apo me atë që ka arritur vetë, por edhe me njerëzit që ka ndihmuar të ecin përpara.
Thjeshtësia, drejtësia dhe profesionalizmi kanë shoqëruar çdo orë të këtij trajnimi. Dhe ajo që e bëri edhe më të veçantë ishte mënyra se si dija përcillej, jo thjesht si informacion, por si përvojë, si këshillë dhe si një shtysë për të besuar më shumë tek vetja.
Më kujtohen veçanërisht fjalët tuaja kur bëra për herë të parë një kontratë. Isha e pasigurt dhe kisha frikë se mos kisha gabuar. Por fjalët që më thatë atëherë, dhe mënyra e sinqertë me të cilën m’i thatë, më dhanë diçka që ndoshta nuk e kuptova plotësisht në atë moment, besimin se mundem.
Ndonjëherë një fjali e thënë në momentin e duhur mund të ketë më shumë vlerë se shumë libra. Dhe fjalët tuaja për mua ishin pikërisht të tilla. Më bënë të kuptoj se ndoshta mund të bëja gjëra shumë më të mëdha nga sa mendoja.
Ky trajnim më ka mësuar aq shumë sa nuk munda t’i mësoja dhe as t’i kuptoja në pesë vite universitet. Jo vetëm njohuri profesionale, por edhe mënyrën se si duhet të mendojë, të sillet dhe të punojë një jurist, me përgjegjësi, drejtësi, integritet, përkushtim, guxim dhe mbi të gjitha me njerëzillëk.
Dhe për këtë arsye, falënderimi im për ju nuk është vetëm falënderimi i një studenteje për profesorin e saj.
Është edhe falënderimi i një vajze që gjatë këtij rrugëtimi ka dëgjuar këshilla që shpesh i janë dukur sikur po ia thoshte një prind. Këshilla që nuk lidhen vetëm me një kontratë, një nen apo një çështje juridike, por me mënyrën se si duhet të ndërtojmë veten dhe karakterin tonë.
Ndoshta kjo është dhurata më e madhe që mund t’i japë një profesor një studenti, jo vetëm ta mësojë atë se çfarë të bëjë, por edhe t’i tregojë çfarë njeriu të bëhet.
Faleminderit për çdo njohuri, për çdo këshillë, për çdo fjalë të sinqertë dhe për çdo herë që më keni bërë të besoj pak më shumë tek vetja.
Faleminderit që më treguat, jo vetëm me fjalë, por me shembullin tuaj, se profesionalizmi dhe njerëzillëku mund të ecin gjithmonë bashkë.
Dhe nëse një ditë do të jem një juriste më e mirë, por mbi të gjitha një njeri më i mirë, një pjesë e kësaj merite do të jetë edhe e juaja.
Falënderimet e mia më të sinqerta për ju, Profesor.
Me shumë respekt dhe mirënjohje,
K.....
