Hukum Khan Habibi پوهندوی حکم خان حبیبی, Kabul (2026)

10/06/2020

د افغانستان جلغوزيو ته په ملي او بين المللی کچه د شهرت او اعتبار ورکولو د لومړني بنسټګر جناب پوهندوی حکم خان حبيبي خبرې واوري.
#نوټ:
دا بايد ټول ملت ته په زباد ورسيږي، د افغانستان تاريخ کې دې دا په زرينو کرښو ثبت کړي شي چې دغو جلغوزيو ته
په لومړي سر د افغاني محصول په توګه د شرف او اعتبار ورکولو کار ښاغلي حبيبي پيل کړ او هغه دی نن یې مونږ او
تاسو عملاً شاهدان يو.
حکومته!!!
څومره وياړلي ميډالونه مو د بې کارو او پردیو په ټټروونو
وټومبل، خو بدبختانه خپل کدرونه او شخصيتونه مو څنګه
چې لازمه وه ونه ستايل.
#اډمين.

13/01/2018

په نړیوال جام کې د پاکستان په وړاندې د افغان ۱۹ کلنو ملي لوبډلې بریا مو مبارک شه
د جنورۍ په ۱۳ مه په نيوزلېنډ هېواد کې د کرکټ د ۱۹ کلنو لوبډلو په نړیوال جام کې د افغان کرکټ ملي لوبډلې لومړنۍ بریا یووار بیا زموږ د ځورېدلي او جنګ ځپلي مسلمان ملت پر شونډو د خوښۍ موسکا راوسته او ډېری افغانانو پاکستان هېواد ته د پرلپسې دریمې لویې ماتي په ورکولو سره دا لویه بریا په پوره خوښیو ولمانځله .
زه د خوست د ولایتي ادارې په استازیتوب د کرکټ اتلو لوبغاړو،کرکټ بورډ ادارې او ټولو افغانانو ته د زړه له کومې مبارکي وایم او دعا کوم چې خدای تعالی(ج) دې زموږ د سولې د سفیرانې سترې او پرلپسې بریاوې په افغانستان کې د دایمي سولې او ټینګې ورورګلوۍ د منځته راتګ باعث وګرځوي.
درنښت
پوهندوی حکم خان حبیبي
خوست والي

28/12/2017

په خوست کې پنځه سوه کورنیو ته د تخمي چرګانو پروژې ورکړل شوې
دخوست په مرکز متون کې د کرنې او مالدارۍ ریاست په چوکاټ کې د باغ دارۍ او مالدارۍ د ملي برنامې په همکارۍ پنځه سوه کورنیو ته د (۱۸،۴) مېلیونه افغانیو په ارزښت د تخمي چرګانو پروژې ورکړل شوې چې تر اتلسو میاشتو پورې به ټول اړین وسایل،لوازم او واکسین هم ورکول کیږي.
هغه مراسم چې په همدې موخه د متون په چېغۍ سیمه کې جوړ شوي وو، په کې خوست والي پوهندوی حکم خان حبیبي، سرپرست امنیه قوماندان مل پاسوال محمد داود امین،د ملي امنیت رییس بریدجنرال برکت الله څمکني،د ولایتي شورا منشي قمرعلي لکڼوال،د اجرایه ریاست سلاکار یوسف جان فضلي،د باغ دارۍ او مالدارۍ ملي برنامې د زون مسوول عنایت الله ځلاند،قومي مشرانو،دیني عالمانو،مدني فعالانو،خبریالانو او د سیمې اوسېدونکو ګډون کړی وو.
په سر کې د باغ دارۍ او مالدارۍ ملي برنامې ولایتي مسوول رحمت الله رحمتي د پروژې په اړوند معلوماتي وینا وکړه او ویې ویل نن د هغو ۵۰۰ کورنیو لپاره د کورني اقتصاد د پیاوړتیا په موخه د چرګانو پروژې توزېع کیږي چې د یوې سروې په نتیجه کې مستحق پېژندل شوي دي.
په زون کې د باغ دارۍ او مالدارۍ د ملي برنامې مسوول عنایت الله ځلاند وویل چې ډېر زر به د تخمي چرګانو په دوام د مالدارۍ،کبانو او د شاتو د مچیو په برخو کې هم مهمې پروژې پيل کړي.
ورپسې د سیمه والو په استازیتوب قومي مشر محمد اعظیم جان خبرې وکړې.نوموړي په خوست ولایت کې موجوده امنیت،بیارغونه،علمي او فرهنګي پرمختګونه وستایل او د سیمه والو په استازیتوب یې د خوست ولایتي ادارې څخه مننه وکړه.ده وویل د زراعت په برخه کې ترسره شوي او روان پروګرامونه په تېرو څوارلسو کالونو کې بې ساري دي چې د خوست د کرنې او مالدارۍ په برخه کې یې زیات مثبت تغیرات رامنځته کړي دي.
خوست والي پوهندوی حکم خان حبیبي پدې خوښي وښوده چې د تېرو دوو کالونو راپدېخوا پدغه ولایت کې د کارډېف،باغ دارۍ او مالدارۍ د دوو مهمو برنامو په تطبیق او منظورۍ سره غوره پرمختګونه رامنځته شوي دي.د ده په وینا خوست د اب او هوا له کبله د کرنې او مالدارۍ په برخو کې غوره امکانات لري خو په تېرو څوارلسو کالونو کې هېڅ توجه ورته نه وه شوې. ده د خوست خلکو ته ډاډ ورکړ چې پدغه ولایت کې د کرنیز وضعیت د ښه کېدو او پياوړتیا،د اوبو مهار کولو، د ځنګلونو بیا احیا،د جغلوزیو په برخو کې د یوه لوی سوداګریز او پروسس مرکز او د ساړې خونې د جوړېدو او یو شمېر نورو مهمو زراعتي برخوکې اړین پلانونه ترکار لاندې دي، چې د هغې په تطبیق سره به خوست د کرنې او مالدارۍ په برخه کې پخپل ځان بسیا ولایت شي.
خوست والي پوهندوی حکم خان حبیبي زیاته کړه چې د تخمي چرګانو پروژې د کورني اقتصاد د پياوړتیا لپاره مهم ګام دی چې د باغدارۍ او مالدارۍ برنامې په چوکاټ کې واخېستل شو.د ده په خبره دغه ډول پروژې کولای شي چې د کورني اقتصاد په ښه کېدو کې مرسته وکړي او د بې وزله کورنیو ستونزې هوارې کړي.
نوموړي زیاته کړه چې که چېرې دا پروژې د اړونده ټيم لخوا د ورکړل شویو لارښوونو سره سمې تطبیق شي، نو کولای شو چې د فعالیت لمن یې تر نورو سیمو او ولسوالیوهم وغځوو.
ښاغلي حبیبي زیاته کړه چې خوست په هره برخه کې د پرمختګ په لوري ګړندی روان دی خو پدغه ولایت کې د باغونو کمی احساسیږي نو په همدې اساس یې د خوست په ولسونو په ځانګړي ډول د ځدراڼو او منګلو پر اوسېدونکو غږ وکړ، هرڅومره زر چې کیږي د نویو باغونو د جوړېدو لپاره دې عرایض ورکړي ترڅو په روان کال کې ورته په خپل وخت باغونه جوړ کړو.
نوموړي وویل په خوست کې د پانګې اچونې لپاره ښه زمینه برابره ده، امنیت تامین شوی او برېښنا په رارسېدو ده، نو په همدې اساس یې په پانګه والو غږ وکړ چې په خوست کې د کرنې او مالدارۍ په سکتور کې سرمایه ګزاري وکړي.
خوست والي وویل که چېرې زموږ کرنه مېکانېزه او د افغانستان روانې اوبه مهار کړل شي،نو موږ به نه یوازې د کرنیز وضعیت له پلوه پخپل ځان بسیا واوسو بلکې نورو هېوادونو ته به هم په لوړه کچه صادرات ولرو.ده هیله وښوده چې د ولسمشر ښاغلي محمد اشرف غني په مدبرانه هڅو او غوره پلانونو سره به دغه هدف ته ورسېږو.
د ولایتي شورا منشي قمرعلي لکڼوال په خپلو خبرو کې وویل چې د ولايتي ادارې په هلو ځلو سره د خوست د کرنې او مالدارۍ په سکتور کې د پام وړ پرمختګ شوی او په ډېرو برخو کې مثبت تغیرات رامنځته شوي دي.د ده په وینا د شنو خونو،د غوښینو او تخمکي چرګانو د فارمونو جوړېدل هغه څه دي چې د خلکو په ورځېني ژوند کې به مثبت بدلون راولي او د خوست خلک به د سبزي جاتو په شان د غوښینو چرګانو په برخه کې هم د ګاونډیو هېوادونو له وارداتو خلاص کړي.
له ویناوو وروسته پنځه سوه بې وزله کورنیو ته د اړینو وسایلو او لوازمو سره یو ځای د تخمي چرګانو پروژې د وېش لړۍ پیل شوه.

23/11/2017

په خوست کې د نشه یي توکو پرضد د مبارزې ریاست ته د دوه پوړې ودانۍ د جوړولو چارې پيل شوې
د پنجشنبې په ورځ دخوست ولایت په اداري کمپلېکس کې د نشه یي توکو پرضد د مبارزې ریاست ته د دولت د انکشافي بودجې څخه د (۱۴) مېلیونه افغانیو په ارزښت د دوه پوړیزې ودانۍ د جوړولو چارې د یو لړ ځانګړو مراسمو په ترڅ کې پيل شوې چې ساختماني کارونه به یې د قرارداد مطابق په د یو کال په موده کې سرته ورسیږي.
هغه مراسم چې په همدې موخه جوړ شوي وو، په کې خوست والي پوهندوی حکم خان حبیبي،د ولایت مقام مرستیال شېربادشاه ارګوني،د ولایتي شورا منشي قمرعلي لکڼوال،د نشه یي توکو سره د مبارزې ریاست رییس نجي الله همدرد ، د بېلابېلو دولتي ادارو رییسانو،مدني فعالانو او خبریالانو ګډون کړی وو.
خوست والي پوهندوی حکم خان حبیبي په خپلو خبرو کې وویل خوشاله دی چې په خوست کې په پرلپسې ډول دا دی د یوې بلې مهمې پروژې د بنسټ ډبره ږدو چې د ودانۍ په جوړېدو او بشپړېډو سره به د یاد مهم ریاست په کارونو کې اسانتیاوې رامنځته او دخلکو لپاره به د نشه یي توکو پرضد پیل شوي مبارزه کې موثر خدمات وړاندې کړي
نوموړي پدې خوښي وښوده چې خوست د هغو ولایتونو په سر کې ځای لري چې دلته د هر ډول نشه یي توکو کښت په بشپړ ډول صفر شوی دی خو د ده په وینا د نشه یي توکو قاچاق ،پېر او پلور لا هم په خوست ولایت کې شتون لري چې په وړاندې یې باید پيل شوې مبارزه نوره هم ګړندۍ شي.
ښاغلي حبیبي زیاته کړه چې د نشه یي توکو سره مبارزه یوازې د دغه ریاست او پولیسو دنده نده بلکې شرعي اوامرو او د افغانستان قانون ته په کتو سره هر وګړی مکلف دی چې ددغه شومې او ناوړه پدیدې په وړاندې شریک کار وکړي.
نو په همدې اساس یې په دیني عالمانو،قومي مشرانو،مدني ټولنو او د رسنیو په استازو او خبریالانو غږ وکړ چې د نشه یي توکو د بدې پدیدې په وړاندې له ممبر،حجرې،رسنیو او غونډو پواسطه جدي او عملي مبارزه پيل کړي،خلک د نشه یي توکو په اضرارو او ناوړه پایله وپوهوي، ترڅو په نشه یي توکو باندې د ځوانانو روږدي کولو ته د پای ټکی کېښودل شي.
خوست والي په ملي امنیتي ځواکونو هم غږ وکړ چې د نشه یي توکو په وړاندې مبارزه چټکه کړي او هر هغه څوک چې د نشه يي موادو په قاچاق،پېر او پلور کې لاس ولري، تثبیت او د قانون منګولو ته وسپاري.نوموړي په خپلو خبرو کې وویل چې په خوست ولایت کې په نشه یي توکو د روږدو کسانو د درملنې لپاره شل بستریز روغتون فعالیت کوو،خو د پرلپسې هلو ځلو وروسته اوس مهال په خوست کې د (۷۰) بستریز روغتون په شتون کې د روږدو کسانو درملنه کیږي.په کورنیو یې غږ وکړ چې که چېرې یې خپل ځوانان په نشه یي توکو روږدې وي، په عاجل ډول دې هڅه وکړي چې د معتادینو روغتون یې د درملنې لپاره ور معرفي کړي.
د نشه یي توکو پرضد د مبارزې ریاست رییس نجي الله همدرد دخوست ولایتي ادارې د مشرتابه څخه مننه وکړه چې همېشه یې د نشه یي توکو پر ضد د مبارزې په لاره کې عملي همکاري کړي او خلک یې پدغه لاره کې پراخې همکارۍ ته هڅولي دي.
نوموړي د اهم وویل چې ددې ودانۍ په جوړېدو سره به د دوی د کارکوونکو هغه اداري ستونزې چې اوسمهال موجودې دي، په بشپړ ډول هوارې شي
د مراسمو په پای کې د جوړېدونکي ودانۍ ساختماني کارونه د خوست والي او ورسره د مل پلاوي له لوري د بنسټ د ډبرې په کېښودلو سره پيل شول.
د یادولو وړ ده چې نن په همدې ورځ د خوست ولایت د نشه یي توکو پرضد د مبارزې ریاست ته نجي الله همدرد چې پخوا یې هم د همدې ریاست سرپرستي په غاړه درلوده،د سي بي ار په پروسه کې له بریالیتوب وروسته د خوست والي پوهندوی حکم خان حبیبي له لوري د ادارې کارکوونکو ته په رسمي توګه د رییس په صفت ور وپېژندل شو.
خوست والي د رییس او کارکوونکو څخه وغوښتل چې د نشه یي توکو په اړه د عامه پوهاوي پروګرامونه د مرکز څخه تر ولسوالیو هم وغځوي او پدغه لاره کې ددیني عالمانو،قومي مشرانو،مدني فعالانو او رسنیو پرمټ پراخ کمپاین وکړي، ترڅو هره کورنۍ د نشه یي توکو پرضد د مبارزې په لاره کې اوږه په اوږه شریک کار وکړي.

19/11/2017

د ۱۹ کلنو افغان ځوانانو تاریخي او لویه بریا مو مبارک شه
درنو هېوادوالو!
په اسیایي لوبو کې د ۱۹ کلنو افغان کرکټ لوبډلې لویه او تاریخي بریا دې تاسې او ستاسو ټولو درنو او پتمنو کورنیو ته مبارک وي.
زه واقعاً خوښ یم او ویاړم چې د ورزش په ډګر کې افغان ځوانانو په ځانګړي توګه د کرکټ لوبغاړو زموږ د افغانستان درې رنګه ملي بیرغ همېشه لوړ او رپاند ساتلی او په هر ډګر کې یې افغانانو ته زیاتې خوښۍ او لاسته راوړنې ور په برخه کړي دي.
پخوانیو خو په ځانګړي ډول د پاکستان هېواد سره د پای لوبې ننۍ سیالۍ چې یاد هېواد د کرکټ په برخه کې اوږده سابقه او تجربه لري، دا وښوده چې که چېرې افغانان له تحمیلي جنګونو او مشکلاتو خلاص شي نو په سیمه او نړۍ کې تر بل هرچا ښه استعداد لري.
په پای کې یووار بیا د کریکټ بورډ درنې رهبرۍ ،ټولو لوبغاړو،ورزشکارانو ،د ورزش مینه والو او په ټوله کې افغان غیور ولس ته د زړه له کومې مبارکي وایم او دعا کوم چې افغانان دې په هر ډګر کې سرلوړي او بریالي واوسي.
درنښت
پوهندوی حکم خان حبیبي
دخوست والي

16/11/2017

د علیشېرو په هارون خېلو سیمه کې د ۲۶ مېلیونه افغانیو په ارزښت د یوه پل د جوړولو چارې پيل شوې
د پنجشنبې په ورځ دخوست ولایت د علیشېرو او ترېزیو ولسوالۍ اړوند په هارون خېلو سیمه کې د ټولګټو چارو وزارت په انکشافي بودجه سره د یوه مهم پل د جوړولو کارونه پيل شول چې ساختماني کارونه به یې د قرارداد له مخېپه ۱۲ میاشتو کې سرته ورسیږي.
هغه مراسم چې په همدې موخه د یادې ولسوالۍ د هارون خېلو په سیمه کې نیول شوي وو، په کې خوست والي پوهندوی حکم خان حبیبي،د ولایتي شورا وکیل قدیم افغان،د ټولګټو چارو سرپرست جهانیار ،د امنیه قوماندانۍ د امنیت امر سمونمل عبدالحنان،د بېلابېلو دولتي ادارو رییسانو،قومي مشرانو،دیني عالمانو،مدني فعالانو،خبریالانو،د سیمې اوسېدونکو او د یادې ولسوالۍ ولسوال محمد یونس ځدراڼ ګډون کړی وو.
خوست والي پوهندوی حکم خان حبیبي پدې خوښي وښوده چې نن یووار بیا دخوست په علیشېرو او ترېزیو ولسوالۍ په هارون خېلو سیمه کې د یوه بل مهم پله د جوړولو چارې پيلوي.د ده په وینا دغه پل به (۴۰) متره اوږدوالی او (۸) متره پلنوالی یا عرض ولري چې ټول ساختماني کارونه یې باید د قرارداد مطابق په یو کال کې سرته ورسیږي.نوموړي اړونده ادارې او قراردادي شرکت ته لارښونه وکړه چې د پروژې کیفیت ته په جدي توګه پاملرنه وکړي ترڅو کارونه یې په ښه کیفیت سره په خپل وخت بشپړ شي.
خوست والي پوهندوی حکم خان حبیبي زیاته کړه چې د دې پل زیات ارزښت پدې کې دی چې غځېدلی سړک د ډيورېنډ کرښې ته رسېدلی او په راتلونکي کې به د نورو لارو ترڅنګ د سوداګریزو چارو لپاره یوه مهمه فرعي لار واوسي.
ښاغلي حبیبي وویل چې خوست د نورو ولایتونو په پرتله د پلونو ،استنادي دېوالونو او سربندونو جوړېدو ته ډېره اړتیا لري،ځکه دلته د موسمي بارانونو د اورېدو په پایله کې هرکال خونړي سېلابونو راوځي چې دخلکو ته د تګ راتګ پر وړاندې ستونزې جوړوي او ترڅنګ یې د کرنیزو ځمکو د تخریب باعث ګرځي.په همدې اساس ولایتي ادارې دغې برخې ته زیاته توجه کړي چې په لړ کې یې د استنادي دېوالونو او سربندونو ترڅنګ دخوست په مرکز او ځينو ولسوالیو کې ډېر پلونه جوړ شوي او ځينې یې د تدارکاتو په ملي کمېټه کې تر مراحلو او ډېزین دي.ده د سیمې خلکو ته دا هم وویل چې د اوبو او برېښنا وزارت څخه راغلي پلاوي دخوست په لسو ولسوالیو کې د استنادي دېوالونو او سربندونو اتلس پروژې سروې کړي دي.
د ولایتي شورا وکیل قدیم افغان په خوست کې ترسره شوي کارونه وستایل او سیمه والو ته یې وویل چې د پلونو او نورو پروژو د منظورۍ او پلي کولو په برخه کې ولایتي ادارې ډېر کار کړی او لا هم هڅه روانه ده چې د ولايتي ادارې په هڅو د علیشېرو په ګډون په یو شمېر نورو ولسوالیو کې د پلونو او سړکونو پروژې پيل شي.
د پروګرام په وروستۍ برخه کې د پل چارې د خوست والي او ورسره تللي پلاوي له لوري د بنسټ د ډبرې په کېښودو سره رسماً پيل شوې.
وروسته خوست والي او ورسره تللی پلاوی د علیشېرو ولسوالۍ اړوند د تورکاڼي سیمې ته ولاړل او هلته یې د تورکاڼي په نوم هغه ځای له نږدې وکوت چې د دوه منده شمل ولسوالۍ د ذخېروي بند وروسته د بند جوړولو لپاره مناسب او ګټور بلل کیږي.
خوست والي په خپلو خبرو کې وویل چې د دوه منده شمل ولسوالۍ د ذخېروي بند د تدارکاتو په ملي کمېټه کې تر کار لاندې دی او د هغه په تعقیب کې به پوره هڅه وکړي چې د تورکاڼي بند په مرکز کابل کې د مالیې وزارت له مشرتابه او نورو اړونده مسوولینو سره شریکه کړي ترڅو په راتلونکي کې د دې بند د جوړېدو لپاره هم عملي اقدامات ترسره شي.
ورپسې د ولایتي ادارې مشرتابه او ورسره مل پلاوی د هارون خېلو په سیمه کې د سیمې له اوسېدونکو سره ځانګړي ناسته وکړه او د خلکو ستونزې او مشکلات یې په مخامخ ډول واورېدل.د سیمې مشرانو،دیني عالمانو او ځوانانو پدې خوښي څرګندوله چې په خوست کې ښه امنیت شتون لري او ځایي اداره د متوازن انکشاف د اصل پربنسټ لېرې پراتو ولسوالیو ته ځانګړي توجه لري.

12/11/2017

مشرانو جرګې خوست والي د غوره خدمت له امله پر تقدیرنامه وویاړه
د هېواد د مشرانو جرګې رییس فضل هادي مسلمیار د دغه جرګې په استازیتوب خوست والي پوهندوی حکم خان حبیبي په خوست کې د ترسره کړیو هلو ځلو او ښه خدمت له امله په ځانګړي تقدیرنامه وویاړه او هیله یې وښوده چې د نوموړي په شتون کې به خوست نور هم د ابادۍ،پرمختګ او امنیت په ډګر کې د پرمختګ بېساري قدمونه واخلي.
ښاغلي مسلمیار پدې خوښي وښوده چې خوست د شمالي وزیرستان او کرم اېجنسۍ سره د پراخې پولې سره ، سره بیا هم د هېواد په کچه د ډاډمنو ولایتونو په قطار کې ځای لري.د نوموړي په وینا دا هرڅه د یوه ښه مدیریت په نتیجه کې منځته راځي چې له دې امله مشرانو جرګه خوست والي په یوه ځانګړي تقدیرنامه نازوي.
د مشرانو جرګې رییس په خوست کې د حکومت او ولس ترمنځ ټينګې اړیکې،د والي پر مشرۍ د ټولو ملکي او پوځي ادارو ترمنځ ښه همغږي او په بېلابېلو برخو کې ترسره شوي پرمختګونه وستایل او هیله یې وښوده چې پدغه ولایت کې د ولس او حکومت ترمنځ نږدې اړیکې به وکولای شي چې د سولې او ثبات په لاره کې مهمې ګټورې تمامې شي.
خوست والي پوهندوی حکم خان حبیبي د مشرانو جرګې رییس ښاغلي فضل هادي مسلمیار ته دخوست په امنیتي،سیاسي،اقتصادي ،فرهنګي او ټولنیز وضعیت هر اړخیزه معلومات ورکړل او ډاډ یې ورکړ چې دخوست ځایي اداره او مېشت ولسونه ژمن دي چې خپلو ګډو همکاریو او هلو ځلو ته به دوام ورکوي او چا ته به ددې اجازه ورنه کړي چې په خوست کې خپل شوم اهداف تطبیق کړي.
ښاغلي حبیبي د مشرانو جرګې له مشر څخه مننه وکړه چې د نوموړي کړنې او هلې ځلې یې وستایلې او ډاډ یې ورکړ چې دی به خپلو هڅو او تلاشونو ته په ورته توګه ادامه ورکړي ترڅو دخوست د خلکو ټولې هغه ستونزې چې د دوی په ورځېني ژوند کې خورا جدي بلل کیږي ، یوه په یوه هواره شي.

12/11/2017

خوست والي په پلازمېنه کابل کې تر مهمو لیدنو او کتنو وروسته بېرته خوست ولایت ته راستون شو
خوست والي پوهندوی حکم خان حبیبي چې څو ورځې وړاندې پلازمېنې کابل ته په یوه رسمي تللی وو، د افغان ولسمشر ښاغلي محمد اشرف غني،د هېواد د لومړۍ مېرمنې او همدا راز د مالیې وزارت وزیر ښاغلي اکلیل حکیمي سره تر مهمو لیدنو او کتنو وروسته بېرته خوست ولایت ته راستون شو.
په سر کې خوست والي د هېواد د جمهور رییس ښاغلي محمد اشرغني سره ځانګړي لیدنه وکړه.
په لیدنه کې خوست والي د هېواد جمهور رییس ته د خوست ولایت په امنیتي وضعیت،غوره حکومتدارۍ،د ولس او حکومت ترمنځ په نږدې اړیکو،په ترسره شویو هر اړخیزه پرمختګونو او اړتیاوو ترتیب کړی ګزارش وړاندې کړ.
ښاغلي حبیبي د دوه منده شمل ولسوالۍ د ذخېروي بند ،قلندر ولسوالۍ ته د غځېدلي سړک او دیوه بشپړ ملکي نړیوال هوایي ډګر په جوړېدو ټينګار وکړ او هیله یې وښوده چې دغه مهمې پروژې دې په لومړیتوب کې ونیول شي.
د هېواد ولسمشر ښاغلي محمد اشرف غني دخوست په اوسني وضعیت خوښي څرګنده کړه او پدغه ولایت کې رامنځته شوې حکومتداري،ډاډمن امنیت،د حکومت او ولس ترمنځ نږدې اړیکې،شته همغږي اوغوره مدیرت وستایل.
ښاغلي جمهور رییس خوست والي ته ډاډ ورکړ چې د نوموړي د غوښتنو په تړاو به اړونده وزارتونو او ادارو ته هدایت ورکړي چې پر غوښتنو یې جدي او عملي کار وکړي.
وروسته خوست والي پوهندوی حکم خان حبیبي د هېواد د لومړۍ مېرمن سره ولیدل.
په لیدنه کې دخوست د هر اړخیزه وضعیت ترڅنګ د مېرمنو په حالت،تاوتریخوالي،مدني فعالیت او لاسي صنایعو لومړۍ مېرمن ته اړین معلومات ورکړل شول او له هغې یې غوښتنه وکړه چې دخوست د مېرمنو سره په ځينو مهمو پروګرامونو کې مرسته او همکاري وکړي.
د هېواد لومړۍ مېرمنې دخوست په عمومي حالت او په ځانګړي ډول پدغه ولایت کې د پوهنې په ډګر کې د مېرمنو او انجونو په فعال ګډون او پرمختګ خوښي څرګنده کړه او ژمنه یې وکړه چې د نورو مهمو فعالیتونو ترڅنګ به دخوست د مېرمنو لاسي صنایعو ته د پام وړ وده ورکړي.
له هغې وروسته خوست والي د مالیې وزارت وزیر ښاغلي اکلیل حکیمي سره ځانګړي لیدنه وکړه.
په لیدنه کې خوست والي د ښاغلي اکلیل حکیمي څخه مننه وکړه چې همېشه یې دخوست په ابادۍ او پرمختګ کې د ولایتي ادارې لاسنیوی کړی دی.ښاغلي حبیبي پدغه لیدنه کې د بودجې پرمصرف،دخوست په هراړخیزه انکشاف او په راتلونکي مالي کې د ځینو نویو او مهمو پروژو په شاملېدو بحث وکړ.
د مالیې وزارت وزیر ښاغلي اکلیل حکیمي هم په خپلو خبرو کې دخوست پرمختګونه او بې ساری ډاډمن امنیت وستایه او ژمنه یې وکړه چې نوموړی به د ولایتي ادارې سره په ټولو هغو برخو کې مرسته او همکاري کوي چې د نوموړي پر وس پوره وي.
ده خوست والي ته ډاډ ورکړ چې په راتلونکي مالي کال کې به د نوموړي غوښتنې مدي نظر نیسي .

31/10/2017

خوست والي او د سرحدونو او قبایلو چارو وزارت د معین په مشرۍ راغلي پلاوي د ګربزو په ګلان کمپ کې د کډوالو له حالت څخه لیدنه وکړه
د سه شنبې په ورځ خوست والي پوهندوی حکم خان حبیبي،د سرحدونو او قبایلو چارو وزارت د جرګو او مرکو معین ښاغلي محمد یعقوب احمدزي په مشرۍ راغلي پلاوي پداسې حال کې د ګربزو ولسوالۍ کې د وزیرستاني کډوالو کمپ ته ولاړل چې د اجرایه ریاست سلاکار رییس خان ببرکزي،د ملکي او پوځي ادارو مسوولینو،د ولایتي شورا مرستیال او غړو،د ملګرو ملتونو د عالي کمېشنرۍ د ولایتي دفتر مسولینو ،د بېلابېلو ملي او بین الملي موسسو استازو،د خوست د مرکز او ولسوالیو قومي مشرانو،دیني عالمانو،مدني فعالانو،خبریالانو او د کډوالو مشرانو او ځوانانو یې ملتیا کوله.
هغه ناسته چې په همدې موخه د ملګرو ملتونود عالي کمېشنرۍ (UNHCR) د ولايتي دفتر په همکارۍ جوړه شوي وه په کې د یاد دفتر پر مسوول اوبچا سربېره د سولېډېرټي مسوول ډېوډ او د یو شمېر نورو خیریه موسسو نماینده ګانو شتون درلود او ورغلي پلاوي ته یې د خپلو کړنو ،فعالیتونو ،پلانونو او د وزیرستاني کورنیو سره د ترسره شویو او روانو کومکونو په تړاو معلومات ورکړل. دوی ورغلي پلاوي ته ډاډ ورکړ چې خپلو کومکونو ته به دوام ورکوي او څه یې چې په وس پوره وي، له کډوالو به یې درېغ نه کړي.
د کډوالو په استازیتوب ملک حبیب او مېرمن روبینا خبرې وکړې.دوی د شویو مرستو او کومکونو په تړاو د افغان دولت په چوکات کې د ولايتي ادارې،خوست مېشتو ولسونو او موسسو څخه مننه وکړه او ویې ویل د ولایتي ادارې ملکي او پوځي ادارې ورسره د وروڼو په څېر چلند کړی چې دوی ورڅخه زیات متاثره شوي دي.
ویناوالو د راتلونکي ژمي ساړه ته په پام سره د کډوالو د ژوند،حالت ،ستونزو او اړتیاوو پربنسټ ورغلي پلاوي ته وړاندیزونه وکړل او هیله یې وښوده چې د یادو غوښتنو په عملي کېدو کې ورسره اړونده ادارې او موسسات مرسته وکړي.
خوست والي پوهندوی حکم خان حبیبي په خپلو خبرو کې د ملګرو ملتونو د عالي کمېشنرۍ او ټولوملي او نړیوالو موسسو څخه مننه وکړه او ویې ویل دوی همېشه د ولایتي ادارې غوښتنې منلي او د کډوالو کورنیو سره یې د خپلو امکاناتو په رڼا کې اړین کومکونه کړي دي.ده هیله وښوده چې د (UNHCR) په ګډون به ټول موسسات خپل کومکونه جاري وساتي او د امکان په صورت کې ورته د شته مرستو اندازه ډېره کړي.
ښاغلي حبیبي کډوالو ته په خپلو خبرو کې وویل چې موږ همېشه ځانونه ژمن بللي او ژمن یو چې ستاسو ستونزو ته پخپل وخت اړینه رسېده ګي وکړو او پدغه برخه کې مو خپلې هڅې ندي سپمولي .
خو له بده مرغه په ځينو هېوادونو کې رامنځته شویو بحرانونو او مهاجرتونو د کډوالو پر مرستو اغېز وکړ او د کومکونو په مقدار کې کمووالی راغی.خو د نوموړي په وینا بیا یې هم د کډوالو ټولې ستونزې ترلاسه کړي او په خپل وخت یې د اړونده ارګانونو او موسسو سره شریکې کړي دي ، ترڅو ستاسو سره دوامداره مرستې وشي.
خوست والي پوهندوی حکم خان حبیبي ډاډ ورکړ چې هېڅ وخت به مو په ستونزو کې پرې نږدي، بلکې افغان حکومت په ځانګړي ډول ولایتي اداره به مو هر وخت په خدمت کې وي. خو د کډوالو له مشرانو او دیني عالمانو یې وغوښتل چې هېچا ته په هېڅ نوم د دې اجازه ورنه کړي چې ستاسو د سپېڅلي نوم او کمپ څخه په ناوړه ګټې اخېستنې غیرقانوني کړنې ترسره کړي.
د سرحدونو او قبایلو چارو وزارت معین ښاغلي محمد یعقوب احمدزي د کډوالو مشرانو او نماینده ګانو ته د دولت د رهبرۍ سلامونه او نېکې هیلې وړاندې کړې او ډاډ یې ورکړ چې ټول دولت او ولس د دوی ترڅنګ ولاړ دی او هېڅ وخت به یې مشکلو ته ورنه کړي.نوموړي دخوست د قومونو څخه هم مننه وکړه چې د ډيورېنډ کرښې پورې غاړې مېشتو وروڼو ته یې په خپله غېږه کې ځای ورکړ او د سکنیو وروڼو او خویندو په څېر ورسره چلند کوي.
ښاغلي احمدزي وویل په سیمه کې ځينې کړۍ په لوی لاس داسې تبلیغات کوي چې قبایل ترهګر دي ، حال دا چې قبایل ترهګر نه بلکې د کرښې دواړو غاړو ته مېشت قومونه د سولې او امن خوښوونکي دي خو جنګ او ترهګري ورباندې قصداً تحمیل شوي ده.په همدې اساس یې د دواړو غاړو له مشرانو وغوښتل چې خپل قومي جوړښتونه تقویه کړي،د سولې او ثبات د ټینګښت لپاره مشترکې هلې ځلې وکړي او چا ته نور د دې اجازه ورنه کړي چې په یوه او بل نوم یې وځپي.ده ډاډ ورکړ چې قبایل زموږ وروڼه دي او هرڅومره چې وغواړي دوی کولای شي په ډاډه زړه سره همدلته واوسي.
نوموړي په ملګرو ملتونو هم غږ وکړ چې خپلې مرستې او کومکونه دوامداره وساتي او د ژمي ساړه موسم ته په کتو سره دې د ژمنیو توکو مرسته وکړي.
وروسته د (UNHCR) له لوري یوې کونډې مېرمنې ته د خیاطۍ ماشین او ورسره اړین توکي او همداشان (۹) نورو هغو ناروغو مرمنو ته نغدي مرسته ورکړه چې د ډاکټرانو په وینا یې د لګښت اټکل شوی وو.
د مراسمو په پای کې د ملګرو ملتونود عالي کمېشنرۍیا (UNHCR) ولايتي دفتر مسوول ښاغلي ( اوبچا) له لوري خوست والي پوهندوی حکم خان حبیبي ته د ملي او بین المللي موسسو ترمنځ د ښې همغږۍ د منځته راتګ ،د کډوالو ستونزو ته په خپل وخت د ښې رسېده ګۍ او پدغه ولایت کې د ښه مدیریت په نوم ترتیب شوي تقدیرنامه ورکړل شوه.

31/10/2017

د قبایلو تاریخي لېسې ته د (۶۰) مېلیونه افغانیو په ارزښت د ودانیو چارې پيل شوې
د سه شنبې په ورځ په خوست ولایت کې د قبایلو تاریخي لېسې ته چې په تېرو لسیزو کې له فعالیته لوېدلي وه، د سرحدونو او قبایلو چارو ریاست په چوکاټ کې د (۶۰) مېلیونه افغانیو په ارزښت د یو لړ ځانګړو مراسمو په ترڅ کې د ودانیو د جوړولو چارې پيل شوې چې ساختماني کارونه یې د قرارداد مطابق په (۱۳) میاشتو کې سرته رسیږي.
هغه مراسم چې په همدې موخه جوړ شوي وو، په کې خوست والي پوهندوی حکم خان حبیبي،د سرحدونو او قبایلو چارو د جرګو او مرکو معین محمد یعقوب احمدزي په مشرۍ راغلي پلاوي،د اجرایه ریاست سلاکار رییس خان ببرکزي ،د ولایتي شورا مرستیال او غړو،د بېلابېلو ملکي او پوځي ادارو مسوولینو،قومي مشرانو،دیني عالمانو،د قبایلو مشرانو ،ځوانانو ،مدني فعالانو او خبریالانو ګډون کړی وو.
خوست والي پوهندوی حکم خان حبیبي د قبایلو لېسې په تاریخي ارزښت او اهمیت خبرې وکړې .ده پدې خوښي وښوده چې نن د هغه مهمې پروژې د بنسټ ډبره ایښودل کیږي چې د کرښې دواړو خواوو اوسېدونکو ته به د علم ډېوې بلې او د هغوی ترمنځ به شته اړیکې نورې هم نږدې کړي.
نوموړي زیاته کړه چې پدې پروژه کې به تدریسي او د لیلیې لپاره ځانګړي تعمیرونه جوړ شي او همداشان دا لېسه به د جومات ترڅنګ د کمپیوټرلېب سېسم سربېره ټول هغه اړین ملحقات ولري چې په تدریسي او لیلیه کې ورته اړین بلل کیږي.
خوست والي د اقتصاد ریاست په ګډون د ولایت په کچه د نظارت له ټيم څخه وغوښتل چې د پروژې له چارو څخه په دوامداره توګه نظارت وکړي ، ترڅو ټول ساختماني کارونه یې د پلان،نقشې، معیار او قرارداد مطابق په خپل وخت او ښه کیفیت سره سرته ورسیږي.
نوموړي د سرحدونو او قبایلو چارو وزارت راغلي پلاوي ته وویل چې د لویې پکتیا ولسونو په ټول تاریخ کې هڅه کړې چې د خپلې خاورې او ولس څخه دسر او مال په قربانۍ سره دفاع وکړي او د خوست مشران،دیني عالمان او ځوانان لا هم ژمن دي چې پدغه لاره کې به د خپل دولت سره اوږده پر اوږه قرباني ورکوي.
خو د یاد وزارت له پلاوي یې وغوښتل چې په خوست کې د جرګو او مرکو اصیل فرهنګ ،د قبایلو سره پراخې پولې او ځينې وخت پدغه ولایت کې د قومونو ترمنځ شخړو ته په کتو سره د سرحدونو او قبایلو چارو ریاست په پراخه ځمکه کې د جرګو ،مرکو او د قبایلو د مشرانو د اوسېدو لپاره یو لوی تالار او مېلمستون جوړ کړي او ترڅنګ دې د قبایلو چارو ریاست ته چې وداني یې ډېره پخوانۍ او د کارونو لپاره په هېڅ ډول بسنه نه کوي، نوي ودانۍ جوړه کړي.
د ولایتي شورا مرستیال جان میرځاځي،دیني عالم ګل رحیم او قومي مشر حاجي حافیظ الله جان ګربز د قبایلو لېسې لپاره په جوړېدونکي ودانیو او همداشان د بیا ځل دپاره دهمدې تاریخي لېسې په جوړېدو او فعالېدو خوښي وښوده او هیله یې وښوده چې د دې لېسې په جوړېدو او فعالېدو سره د کرښې دواړو غاړو پراتو ولسونو ته پدې خاطرد زده کړې ښه زمینه برابره شي، چې دلته د زده کړې لپاره د لیلیې په ګډون ټولې اسانتیاوې برابرېږي.
د قبایلو په استازیتوب ډاکټرحیات مسعود د قبایلو لېسې د بنسټ ډبرې د کېښودو له امله د کرښې دواړو غاړو پراتو ولسونو ته مبارکي وویله او دا ګام یې د لر او بر لپاره یو ښه زېری وباله.
د مسعود په وینا د دې لېسې په بیا فعالېدو سره به ګڼ شمېر هغه اوسېدونکي چې د ډيورېنډ کرښې دواړو غاړو ته مېشت دي، په ډېرې اسانۍ سره زده کړو ته لاس رسی ومومي.نوموړي هم په دولت غږ وکړ چې د دوی د مشرانو او ستونزو د هواري لپاره دې د پخوا په شان د سرحدونو او قبایلو چارو ریاست په چوکاټ کې مېلمستون او د جرګو او مرکو لپاره ځانګړي تعمیرونه جوړ او فعال کړي.
د سرحدونو او قبایلو چارو وزارت د جرګو او مرکو معین ښاغلي محمد یعقوب احمدزي د قبایلو لېسې د بیا جوړېدو او فعالېدو په مناسبت دخوست ولایتي ادارې هلې ځلې وستایلې او د پروژې د منظورۍ او عملي پيلېدو له امله یې د کرښې دواړو غاړو پراتو ولسونو ته مبارکي وویله او ژمنه یې وکړه چې وزارت به پوره هڅه وکړي ټولې هغه ستونزې چې زموږ سرحدي او قبایل ولسونه ورسره مخامخ دي، د حل په موخه به یې د خپلو امکاناتو په رڼا کې لازم اقدامات کوي.
نوموړي د سولې او ثبات په ټينګښت کې د ولسونو رول مهم وباله ،په همدې اساس یې دخوست له دیني عالمانو،قومي مشرانو او ځوانانو وغوښتل چې پدغه برخه کې دولت ته لاس ورکړي او د شته ستونزو په هواري کې ملي مسوولیت ادا کړي.
ښاغلي احمدزي دا هم وویل چې د هېواد او ولس دښمنان هره شېبه په کمین کې ناست دي،هغوی غواړي چې افغانان په ډلو او ټپلو ووېشي ، ترڅو خپلو شومو موخو ته ځان ورسوي، په همدې اساس یې په ولس غږ وکړ چې هر ډول خپلمنځي ستونزې د جرګو او مرکو پرمټ هوارې کړي او هېڅ وخت چا ته د دې اجازه او فرصت برابر نه کړي چې د دوی له قومي او کلیوالي جنجالونو څخه د افغانستان دښمن د ځان په ګټه کار واخلي.
د سرحدونواو قبایلو چارو ریاست معین ښاغلي محمد یعقوب احمدزي رسنیو ته وویل چې د قبایلو لېسې په جوړېدو سره به هغه پخواني ارتباط بېرته ټينګ شي چې د قبایلو او د کرښې دې غاړې ته د مېشتو ولسونو ترمنځ موجود وو.
د مراسمو په پای کې د خوست والي،د سرحدونو او قبایلو چارو وزارت د معین په مشرۍ راغلي پلاوي او یو شمېر نورو دولتي او غیر دولتي چارواکو له لوري د قبایلو لېسې د بنسټ ډبره کېښودل شوه.

28/10/2017

خوست والي :هغو ولسوالیو ته لومړیتوب ورکوو چې د نورو ولسوالیو په نسبت کمې پروژې په کې پلي شوي دي
دا څرګندونې خوست والي پوهندوی حکم خان حبیبي په هغه ناسته کې په ډاګه کړې چې د دوه منده شمل او قلندر ولسوالیو د مشرانو،دیني عالمانو او ځوانانو سره د دوی د ستونزو د تشخیص او هغوی ته د ترسره کړیو کړنو او فعالیتونو په تړاو دحساب ورکوونې په موخه رابلل شوي وه.
دغه مراسم چې دخوست په مېلمستون ودانۍ کې جوړ شوي وو، په کې د خوست والي ترڅنګ د امنیه قوماندانۍ د امنیت امر سمونمل عبدالحنان ترڅنګ د بېلابېلو ادارو رییسانو او د دواړو ولسوالیو ولسوالانو هم ګډون کړی وو.
په سر کې د نورو په استازیتوب ظاهرخان سېدخېل،عبدالحنان منګل او یو شمېر نورو قومي مشرانو،دیني عالمانو او ځوانانو خوست ولایت مقام له دغه ګام څخه مننه او خوښي څرګنده کړه چې د لرې پرتو ولسوالیو اوسېدونکي یې راغوښتي ترڅو د سیمه والو ستونزې واوري او همداشان دخپلو ادارو په چوکاټ کې ترسره شوي او روان فعالیتونه ورسره په مخامخ ډول شریک کړي.دوی د خپلو ولسوالیو په کچه شته ستونزې،اړتیاوې او غوښتنې د خوست ولایتي ادارې مشرتابه سره شریکې کړې او د هغې په حل او هواري کې یې د خوست والي او اړونده سکتوري ادارو څخه د همکارۍ غوښتنه وکړه.
راغلو مشرانو په ځانګړي ډول د پوهنې،روغتیا ،استنادي دېوالونو،سړکونو،سربندونو او د ځنګلونو د بیا احیا په برخه کې د پروژو غوښتنه وکړه او ژمنه یې وکړه چې په خپلو سیمه کې به امنیت ساتي او هېچا ته به د دې اجازه نه ورکوي چې د بیارغونې د پروژو په وړاندې خنډونه جوړ کړي.
مشرانو او ځوانانو ولایتي ادارې ته ډاډ ورکړ چې د دواړو ولسوالیو مشران به د نظام او د خپلې ولایتي ادارې سره اوږه پر اوږه ولاړ وي ،د امنیت د ټينګښت او د سولې او ثبات په منځته راتګ کې به نه ستړي کېدونکي هلې ځلې کوي.
خوست والي پوهندوی حکم خان حبیبي د دواړو ولسوالیو د مشرانو او ځوانانو ګیلې او نیوکې تر یوه بریده پرځای وبللې او ویې ویل په خوست ولایت کې سپېرې ،دوه منده،موسی خېلو،قلندر او صبریو ولسوالیو ته لکه څه ډول چې په کار وه، هماغه شان توجه نده شوې ، په همدې اساس یې د غونډې برخوالو ته ډاډ ورکړ چې ولایتي اداره په بشپړ ډول ژمنه ده چې د متوازن انکشاف اصل ته په پام سره به همدې پنځو ولسوالیو ته لومړیتوب ورکوي.نوموړي د سکتوري ادارو ریسانو په ځانګړي ډول د عامې روغتیا او پوهنې رییسانو ته لارښونه وکړه چې د نورو سکتوري ادارو له رییسانو سره یو ځای یادو ولسوالیو ته کاري سفرونه وکړي ترڅو هلته د سیمې له مشرانو،سپين ږیرو او ځوانانو سره د ځانګړو ناستو په ترڅ کې ټولې ستونزې په دقیق ډول راټولې او وروسته یې په راتلونکي پلان کې د لومړیتوبونو په اساس ځای پرځای کړي.
ښاغلي حبیبي د غونډې برخوالو ته وویل چې خوست د پرمختګ پر لوري ګړندي ګامونه اخلي، د وارداتي برېښنا په را لېږدولو کار روان دی،د هوایي ډګر پروژه په بشپړېدو ده او د دوه منده لوی ذخېروي بند د تدارکاتو په ملي کمېټه کې تر کار لاندې دی.همداشان له څوارلسو کالونو وروسته په خوست ولایت کې د شنو خونو ترڅنګ د چرګوړو د تولید او غوښینو چرګانو زیات شمېر فارمونه جوړ شوي،سلګونه جریبه نوي باغونه جوړ شوي،اصلاح شوي تخمونه او سرې دهقانانو ته پخپل وخت توزېع شوي او سږ کال یې د نورو کالونو په پرتله درې برابره زیات اصلاح شوی تخم راوړی دی.نوموړي د دوه منده شمل د ذخیروي بند په اړه د غونډې په جریان کې د اوبو او برېښنا وزارت وزیر سره ټېلېفوني اړیکه ونیوله ترڅو ولس ته معلومه شي چې مراحل یې تر کومه بریده پرمخ تللي دي.
خوست والي وویل چې پدې هڅه کې دی چې د جلغوزیو لپاره د ټول افغانستان په کچه د پروسس اوتولید مرکز په خوست ولایت کې جوړ شي، ترڅو په همدې ځای کې تر پروسس وروسته د افغانستان په نوم نړیوال مارکېټ ته صادر شي.د ده په وینا د همدې کار لپاره د یوه مشترک ټیم پواسطه هر اړخیزه طرحه جوړه شوې چې د ځينو بدلونو وروسته به د افغانستان د اقتصاد عالي شورا ته وړاندې شي. نوموړي زیاته کړه چې د زراعت په برخه کې نورې برنامې هم ترلاس لاندې دي چې په تطبیق او بشپړېدو سره به دخوست زراعتي بڼې ته د پام وړ بدلون ورکړي.نوموړي د قلندر او دوه منده ولسوالیو له مشرانو او ځوانانو وغوښتل چې د سیمې اب او هوا ته په کتو سره که هرڅومره د مېوه لرونکو ونو باغونه وغواړئ، ځای پرځای به یې منظوري ورکوي.
نوموړي له ولسونو وغوښتل چې د ځنګل وهنې په مخنیوي کې لازمه همکاري وکړي او دغه عامه شتمنۍ وساتي.ده وویل چې د ځنګلونو د بیا احیا لپاره یې په یوه مهمه پروژه کار پيل کړی چې په منظورېدو او پلي کېدو سره به پدغه سیمه کې ځنګلونه بیا شنه او سمسور شي.
خوست والي پوهندوی حکم خان حبیبي د سیمه له مشرانو،دیني عالمانو او ځوانانو وغوښتل چې د خپل نظام او حکومت سره خپلې همکارۍ نورې هم پراخې کړي، ترڅو دخوست په هره لوېشت سیمه کې د ښه امنیت په شتون سره د بیارغونې مهمې پروژې پلي شي. ده ډاډ ورکړ چې د سړکونو او پلونو د منظورۍ چارې چې د تدارکاتو په پروسه کې دي، په جدي ډول تعقیب کړي او هغه پلاوی چې د نویو سړکونو د سروې لپاره دعوت شوی دی، د هغوی پرمټ به د سپېرې د سړک په ګډون نورې مهمې پروژې هم سروې کړي، ترڅو د راتلونکي لپاره په اساسي ډول سروې شوي وي.نوموړي ژمنه وکړه چې دا ډول ناستې چې د ولس او دولت ترمنځ د اړیکو په ټينګښت،د همکاریو په پراختیا،د ولس د ستونزو په تشخیص او د هغې په رفع کولو کې خورا مهم رول لري، دوام ورکړي.
وروسته د امنیه قوماندانۍ د امنیت امر ،د پوهنې ،عامې روغتیا،کلیو ،پراختیا او بیارغونې،شمل خرم دریایي فرعي حوزې،د مخابراتو او معلوماتي تکنالوژۍ او یو شمېر نورو ریاستونو رییسانو په دوه منده شمل او قلندر ولسوالیو کې په ترسره کړیو پروګرامونو ترتیب کړي ګزارشونه وړاندې او همداشان د راتلونکو برنامو په تړاو یې د همدې ولسوالیو لپاره جوړ کړي پلانونه مخامخ شریک کړل.وروسته د غونډې برخوالو د ټولو اړونده رییسانو څخه په بېلابېلو برخو کې پوښتنې وکړې چې د هغوی له لوري ورته قناعت لرونکي ځوابونه ورکړل شول.

Hukum Khan Habibi پوهندوی حکم خان حبیبی

10/06/2020

13/01/2018

28/12/2017

23/11/2017

19/11/2017

16/11/2017

12/11/2017

12/11/2017

31/10/2017

31/10/2017

28/10/2017

Address

Telephone

Website

Alerts

Shortcuts

Share