10/08/2026
🚨 إذا حدا وعدك بـ100 دولار وقلّك رح يصيروا 1000… وقف فوراً واقرأ هالبوست! 🚨
⚖️ من واقع قضايا الاحتيال اللي عم نشوفها، الموضوع مو قصة شخص واحد… للأسف في ناس كتير عم تخسر مصاريها بنفس الطريقة.
واحد حكى معي على الماسنجر وقال:
"أستاذ، تعرفت على شركة بتعطي أرباح على الفيسبوك، طلبوا مني حوّل 100 دولار شام كاش."
حوّل… 💸بعدها بعتوله:"مبروك، صار حسابك 200 دولار! حوّل 200 وبيصيروا 1000."
حوّل الـ200… 😐
وبعد شوي:"مبروك! صار إلك 2000 دولار… حوّل 1000 حتى يتم تفعيل السحب." 💰📈
حوّل الألف…
وبعدها؟🚫 حظر… اختفاء… ولا عاد في شركة ولا أرباح ولا مصاري!
سألني:"أستاذ، شو النتيجة؟"
قلتله بكل بساطة:😂 الـ1300 إلهم… والصفر إلك!
⚠️ والأخطر إن هالأسلوب عم يتكرر مع كتير ناس، مو بس عن طريق فيسبوك وماسنجر.
في ناس عم تنصب بحجة التداول والاستثمار والعملات الرقمية، وفي ناس عن طريق برامج ومنصات وهمية بتفرجيك أرباح على الشاشة وبتخليك تصدق إن حسابك عم يكبر 📊💰.
بيبلش الموضوع بمبلغ صغير…وبعدين بيقولولك:"ادفع حتى تضاعف أرباحك.""ادفع رسوم سحب.""ادفع ضريبة.""حوّل حتى نفعّل الحساب."وكل مرة بيكون في سبب جديد لتحويل مبلغ إضافي.
وبمجرد ما توقف عن الدفع أو تطلب سحب أموالك… ممكن تلاقي حالك محظور وما عاد تقدر توصل لشي. 🚫
⚖️ النصيحة القانونية المهمة:قبل ما تحوّل أي مبلغ، تأكد من هوية الجهة، وجودها القانوني وترخيصها إذا كان نشاطها يتطلب ترخيصاً، ولا تعتبر الأرباح الظاهرة على تطبيق أو منصة دليلاً على وجود أموال حقيقية قابلة للسحب.
وإذا تعرضت للاحتيال، لا تحذف أي دليل. احتفظ بالمحادثات، أرقام الهواتف والحسابات، إيصالات التحويل، أسماء الصفحات، الروابط، صور المحادثات وأي معلومات عن الأشخاص أو الجهات المتورطة، واستشر محامياً أو الجهة المختصة
🔴 وأهم نصيحة: لا تحاول استرجاع خسارتك عن طريق دفع مبلغ جديد لشخص يدّعي أنه قادر على استرداد أموالك.أحياناً بتكون هاي مجرد مرحلة ثانية من الاحتيال.
❤️ المصاري اللي بتتعب عليها سنين، لا تسلّمها لشخص وعدك بربح خلال أيام.
الربح السريع مو دائماً فرصة… أحياناً بيكون فخ. 🪤💸
🟥 تذكّر:
الطمع لحظة… لكن خسارة المصاري ممكن تضل سنين.
إذا الربح سهل لدرجة ما بيصدّق، غالباً في شي لازم ما تصدّقه. 😉
📢 انشر البوست، يمكن يوصل لشخص قبل ما يحوّل أول دفعة.
المحامي حمزة الطويل - Lawyer Hamza Al-Taweel ⚖️🎖️
