08/09/2020
☆ Qoys hagaagay waa Qaran hagaagay!!
::::: Guryaha Farxadda leh waxaa kasoo baxa carruur faraxsan oo adduunka dhan farxad ku kooba.
Farxaddu waa tiir ka mid ah tiirarka caafimaadka, sidaa darteed haddii ay farxaddu ka maqnaato jawiga guriga, waxaa Jira cudur soo dhex galay gurigaas, oo beddelay farxadda, Cudurkaasoo keeni kara dumidda qoyska- waa cudurka lagu magacaabo: Khilaaf, waxaase muhiim ah in la daba galo waxa keenay cudurkaas, iyo u ded degidda hab xalinta khilaafkaas.
Dunida oo dhan ma jiro meel lala barbardhigi karo guri farxad leh oo qurux iyo raaxo leh, sida uu Andersen ku sheegay buugiisa (Dariiqaaga Caafimaadka iyo Farxaddaada); Meel kasta oo aan safar ku tagno iyo meel kasta oo aan joogno, ma helno guri ka fiican kan hadhka farxadda leh dul hoganaya.
Farxad iyo Guri waa laba eray oo macno ahaan isku macno sameyn karaya, waa haddii ay aabaha iyo hooyada is ogolaadaan, is ogaadaan, isna qaddariyaan, Xaqqa qoysnimadana ilaaliyaan, Waxaa markaa xaqiiq ah inay taa u horseedi doonto qoyskan nolol barakaysan oo sax ah.
Guri farxad leh waa guri aan laga dhex helin wax khilaaf ah ama isku dhac ah, oo aan laga maqal hadalada xanafta leh, ama dhaliil qadhaadh.
Waa guriga ay xubnaha qoysku ku hoydaan oo ay ka helaan raaxo, xasillooni iyo kalsooni.
Mas'uuliyadda helitaanka "farxadda guriga" waxay dusha ka saaran tahay waalidiinta.
Waxa badanaa Kharriba ama baabi'iya guriga, waa carrabka fiiqan ama dabeecadaha qallafsan oo soo dadajiya fitnada.
Inta badan waxaa burburiya tiirarka "farxadda guriga", jacaylka Kali talisnimada iyo daacad-darrada ka timaadda mid ka mid ah waalidiinta.
Carruurta waa kuwa daawanaya nolosha waalidiinta, waxayna ku koraan jacaylka kali-talisnimada, fitnada, hadalka qadhaadh iyo daacadnimo la’aanta; Marka xubnaha qoysku ku koraan sifooyinkaas iyo dabeecaddaas, raad kasta oo farxad ah oo gurigaas ka jira ayaa baaba'aya, khatar darran ayuuna hab dhaqankaas ku keeni karaa dadka iyo deegaankaba.
Taas beddelkeedana waa la sameyn karaa haddii uu waalidku si daacadnimo ah, kalgacal, naf hurnimo, daacadnimo iyo si farxad leh ula noolaadaan ubadkooda, caruurtooduna ay ku koriyaan isla sidaa, waxaa kordhaya tayada jiilka nabadda jecel, waxweynna kusoo kordhiya adduunka, farxadna u keenaya qoysaska iyo Guud ahaan bulshada.
