Eslam Matar.

Eslam Matar. Contact information, map and directions, contact form, opening hours, services, ratings, photos, videos and announcements from Eslam Matar., Lawyer & Law Firm, Khartoum.

محامية ومستشارة قانونية متخصصة في قانون الشركات والتجارة نساعدك تتخذ القرار القانوني الصح من البداية قبل ما تحصل خسارة كان ممكن تتجنبها تأسيس شركات صياغة عقود علامات تجارية نزاعات تجارية
كما نقدم استشارات في القضايا المدنية والشرعية
والجنائية

حين يتحول العقد إلى كابوس.. المماطلة والتسويف لما يهدوا الثقة ‼️​مافي زول في الوقت الحالي بقدر ينكر الظروف الاقتصادية وا...
15/08/2026

حين يتحول العقد إلى كابوس.. المماطلة والتسويف لما يهدوا الثقة ‼️
​مافي زول في الوقت الحالي بقدر ينكر الظروف الاقتصادية والاجتماعية المعقدة المارّ بيها الشارع والسوق السوداني والظروف دي ممكن تمر بأي زول فينا وتضغط عليه..
​بس في خط فاصل واضح ومهم جداً:
​بين زول بيواجه ظروفه بشجاعة وشفافية: بيجي يتكلم بكل وضوح ويسعى لحلول يرضى بيها الطرفين

​وبين زول بيتخذ من الظروف دي ذريعة للمماطلة والتسويف عشان يتهرب من التزاماته المالية
​
​المعاملات المالية في كل الظروف مبنية على أصل أصيل وقاعدة قانونية ثابتة (العقد شريعة المتعاقدين)
العقد دا ما مجرد حبر على ورق دا التزام و أمانة و ومسؤولية واجبة الوفاء.
​الواقع العملي اليومي للنزاعات العقارية بيكشف لينا عن ظاهرة عملت شرخ كبير وتراجع في استقرار الاستثمار العقاري:
​مماطلة المستأجر والامتناع عن سداد الإيجار في المواعيد المتفق عليها.
​مقابلة المالك في كل شهر بأعذار وهمية ووعود متكررة ما ليها نهاية.
​اضطرار أصحاب العقارات في النهاية للجوء للمحاكم والطرق القضائية عشان يطالبوا بحقوقهم.

​خطورة التساهل مع التسويف

​التساهل المتكرر مع المماطلة ما بس بيعطّل حقوق المالك المالية دا كمان بيفتح باب كبير لنزاعات قانونية طويلة ومعقدة كان ممكن نتجنبها تماماً من الأول بالالتزام و الصدق والشفافية.
​ببساطة العلاقات الإيجارية ما مجرد أرقام وحسابات دي في الأول والأخير معاملات إنسانية قايمة على المودة و الاحترام المتبادل

​
​لو كنت مالك عقار وتفاجأت بمستأجر بيكرر الأعذار والمماطلة ح تتصرف معاه كيف⁉️
​



فتحوا صفحة باسمك أو صورتك؟ دي ما مجرد حركة بايخة دي جريمة انتحال شخصية يعاقب عليها القانون! ⚖️⚠️الايامات دي المشكلة دي ...
08/08/2026

فتحوا صفحة باسمك أو صورتك؟ دي ما مجرد حركة بايخة دي جريمة انتحال شخصية يعاقب عليها القانون! ⚖️⚠️

الايامات دي المشكلة دي بقت شائعة جداً في الميديا.. تفتح فيسبوك أو أي منصة تتفاجأ بإنو في شخص مجهول فتح صفحة باسمك وصورتك أو باسم شركتك ومشروعك التجاري.

انتحال الشخصية الإلكترونية بقى منتشر جداً والسكوت في الحالة دي أكبر خطأ ممكن ترتكبه لأن المنتحل ممكن:

❌ يطلب قروش ومساعدات مالية من ناس تعرفهم باسمك.

❌ يشوه سمعتك ونزاهتك التجارية أو الشخصية.

❌ يورطك في مشاكل وقضايا أنت مالك يد فيها .

قانون مكافحة جرائم المعلوماتية واضح وصريح جداً في تجريم الفعل ده وحماية الناس عشان كده لو السلوك ده حصل معاك اتصرف فوراً وما تسكت!

🛠️ تعمل شنو لو الفعل ده حصل معاك :

⭕ اعمل اسكرين شوت للحساب وأهم حاجة تحفظ رابط الصفحة (URL) مش بس اسمها.

⭕ اعمل ريبورت (Report) للحساب من داخل التطبيق بإنو انتحال شخصية لتقييد حركته سريعة.

⭕ نزل تنبيه سريع في حسابك الأصلي إنو في حساب مزيف بيتكلم باسمك.

⭕ امشي فوراً لـ نيابة جرائم المعلوماتية وافتح بلاغ رسمي .

💡 ببساطة :

القانون موجود عشان يحميك ويجيب ليك حقك بس هو ما بيتحرك براهو أنت اتحرك وخد الخطوة الأولى وخلي الباقي على القانون

هل حصل قبل كده وشفت حساب انتحل شخصيتك أو اسم مشروعك؟ ولو حصل اتصرفت كيف؟ ورينا في التعليقات عشان الكل يستفيد 👇



أولادك معاكي ⁉️ دي الحضانة.. بس الولاية كلام تاني ‼️كتير من الآباء والأمهات بيعتقدوا إنو الحضانة والولاية حاجة واحدة أو ...
07/08/2026

أولادك معاكي ⁉️ دي الحضانة.. بس الولاية كلام تاني ‼️

كتير من الآباء والأمهات بيعتقدوا إنو الحضانة والولاية حاجة واحدة أو مفهوم واحد، وبالخصوص عند الأمهات في حالات الانفصال؛ بتحس إنه طالما الطفل عايش معاها فهي المسؤولة منه مسؤولية كاملة من غير تدخل الأب، يعني بتعتبر نفسها هي الحاضن والولي على الطفل.

لكن لمن تجي تطلع أوراق رسمية أو تباشر أي إجراءات أخرى، تتفاجأ بأنها غير مقبولة لمباشرة الإجراءات دي، وبتحتاج وجود الأب لمباشرة وتكملة الأوراق الرسمية.. ليه؟ لأن الأب هو الولي الشرعي.

تعالوا نعرف الفرق بين الحضانة والولاية:

🔹 الحضانة: هي الرعاية اليومية من أكل، نوم، تربية، ومتابعة.. وهي في الأصل حق للأم (أو النساء اللاتي يحق لهن الحضانة شرعاً).

🔹 الولاية: هي القرارات الرسمية والقانونية الخاصة بالطفل (زي استخراج الأوراق الرسمية، السفر، والتعليم).. ودي في الأصل من حق الأب، حتى لو الطفل عايش مع الحاضنة.

ببساطة كده: ممكن تكوني حاضنة، لكن ما عندك الحق في الولاية!
معرفة الحقوق والحدود القانونية بتبعد الطرفين عن النزاع والتعطيل.. لو أنت أو أنتِ ما عارفين حقوقكم وحدودها، اعرفوها من هسّع.



بيتك ومأجّرو؟ اعرف متين القانون يرجع ليك مفتاحك! 🗝️⚖️العلاقة بين المؤجر والمستأجر قايمة على التوازن المالك من حقه يحمي ع...
04/08/2026

بيتك ومأجّرو؟ اعرف متين القانون يرجع ليك مفتاحك! 🗝️⚖️

العلاقة بين المؤجر والمستأجر قايمة على التوازن المالك من حقه يحمي عقاره ومُلكه والمستأجر من حقه الاستقرار والراحة.

بس في ظل الظروف والتغيرات الحاصلة دي، كثير من ملاك العقارات ما عارفين كيف يستردوا عقارهم ومُلكهم بالشكل الصحيح.. جاء قانون إيجار المباني لسنة 1991 وحسم الموضوع ده وسمح للمالك باسترداد عقاره بقوة القانون في حالات محددة:

1️⃣ مماطلة أو امتناع المستأجر عن دفع الأجرة المتفق عليها.

2️⃣ الحاجة الماسة للمالك أو أحد والديه أو أولاده (بشرط إثبات الحوجة دي أمام المحكمة).

3️⃣ التأجير من الباطن: يعني المستأجر يؤجر المبنى لشخص ثاني بدون موافقة صاحب العقار

4️⃣ الإزعاج المتكرر: افتعال المستأجر أو الساكنين معاه إزعاج متكرر للجيران.

5️⃣ استخدام المبنى في أفعال غير مشروعة أو منافية للآداب.

6️⃣ ترك العقار: عدم استخدام المستأجر للمبنى لمدة 6 أشهر متتالية بدون سبب معقول.

7️⃣ التعديلات الجوهرية: عمل إضافات أو تعديلات جوهرية في المبنى بدون إذن المالك.

8️⃣ إساءة الاستعمال أو التسبب في ضرر إنشائي للمبنى.

9️⃣ انتهاء مدة الإجارة التعاقدية والحكمية.

معرفتك بأحكام قانون إيجار المباني هي خطوتك الأولى لحماية حقوقك ومُلكك.

انتظروني في البوستات الجاية حنتكلم عن كل نقطة بالتفصيل والخطوات القانونية الخاصة بيها ⚖️

هل واجهتك مشكلة في وحدة منها قبل كده⁉️



في الظروف الحالية من حرب ونزوح وأزمات اقتصادية واجتماعية كتير من النساء فقدوا التواصل مع أزواجهن؛ سواء كان بسبب السفر ا...
01/08/2026

في الظروف الحالية من حرب ونزوح وأزمات اقتصادية واجتماعية كتير من النساء فقدوا التواصل مع أزواجهن؛ سواء كان بسبب السفر النزوح أو الاختفاء وانقطاع الأخبار لشهور طويلة.

في الحالة دي الضرر كله واقع على الزوجة.. عشان كده الشريعة والقانون السوداني اتعاملوا مع الموضوع ده بصورة حاسمة لحماية المرأة من وضع "المعلقة".

قانون الأحوال الشخصية لسنة 1991 أدى الزوجة الحق في طلب "التطليق للغيبة" بس الحق ده عنده شروط لا بد منها:

1⃣ إذا كان غياب الزوج لمدة سنة أو أكثر بدون عذر مقبول
2⃣ إذا كان غائباً وما بنفق، هنا عندها الحق ترفع دعوى تطليق للغيبة وعدم الإنفاق معاً.
دعاوى التطليق للغيبة الهدف الأساسي منها هو حماية المرأة و كرامتها ورفع الضرر عنها.

📌 في بوست آخر ح نتكلم بالتفصيل عن الفرق بين الغايب والمفقود.

⚖️ ببساطة.. القانون عارف حقك كويس بس أنتِ لازم تكوني عارفاه وعارفة كيف تحافظي عليه وما تخليه يضيع.

💬 عندك استفسار يخص حالات الغياب أو إجراءات التطليق؟
اكتبي في التعليقات وبنرد عليكي

أكبر غلطة ممكن تعملها لمن تأجر شقة أو محل دون عقد مكتوب‼️ ❌بعد تعب وتفتيش طويل لقيت المحل أو الشقة المناسبة.. جيت تأجر ل...
30/07/2026

أكبر غلطة ممكن تعملها لمن تأجر شقة أو محل دون عقد مكتوب‼️ ❌

بعد تعب وتفتيش طويل لقيت المحل أو الشقة المناسبة.. جيت تأجر لقيت صاحب العقار صحبك، قريبك، أو زميلك، وقلت: مافي داعي نعمل عقد، الثقة موجودة بيناتنا.

هنا تحديداً انت وقعت في أكبر غلطة ممكن تحصل في المعاملات المالية والعقارية!

في عالم المال والعقارات، حسن النية والثقة والعواطف لا تبني التزاماً قانونياً، والاتفاقات الشفهية بتختفي تماماً عند أول أزمة أو اختلاف مالي. الاعتماد الشفهي ده عبارة عن تنازل طوعي منك عن حمايتك القانونية.

تعال نشوف الاتفاق الشفهي بيعمل شنو عند غياب العقد المكتوب:

أولاً: بالنسبة للمستأجر 🏠
بتفتكر إنك لما تدفع قيمة الإيجار شهرياً ودون تأخير كده أمنّت موقفك في العقار؟ دفع الإيجار بيحميك جزئياً، لكن ما بيحميك حماية كاملة، ولازم وجود عقد لأنك حتواجه مشاكل ونزاعات ثانية زي:

1⃣الزيادات التعسفية المفاجئة: بدون عقد، انت أديت المالك صلاحية زيادة الأجرة في أي وقت. وهنا حتكون قدام خيارين لا ثالث لهما: إما الموافقة على الزيادة أو الخروج المباشر!

2⃣الإخلاء المفاجئ: الاتفاق الشفهي ما بيكون محدد بمدة زمنية صريحة، وفي أي لحظة المالك ممكن يطالبك بالإخلاء وإنهاء الاتفاق وتركي في حيرة.

ثانياً: بالنسبة للمؤجر (مالك العقار) 🔑

كتير من الملاك بيعتقدوا إن عدم كتابة العقد بيدي الحرية للتخلص من المستأجر في أي وقت، ونسوا المشاكل الثانية الكبيرة الممكن تحصل بسبب غياب العقد:

1⃣صعوبة إثبات الالتزامات والمتأخرات: إثبات شروط العلاقة الإيجارية والمتأخرات أمام القضاء بيستهلك منك وقت وجهد جبار، كان ممكن تحسمه في ورقة واحدة!

2⃣الأضرار والتخريب: إذا أحدث المستأجر أضراراً بالعقار أو عمل تعديلات بدون إذنك، حتلقى صعوبة شديدة في إثبات "الحالة الأصلية" للعقار. العقد هو المستند الوحيد البيثبت كيف سلمت العقار.
3⃣التأجير من الباطن أو تغيير النشاط: بتأجر لشخص وتتفاجأ بعد فترة إنه أجر المحل لزول تاني من الباطن، أو غير النشاط لنشاط بيسبب ضرر لهيكل العقار أو بيجيب مشاكل قانونية.

ببساطة.. 💡
إذا كنت مؤجر أو مستأجر، القضاء ما بتعامل بالعواطف أو الكلام الشفهي، القضاء بتعامل مع الأدلة والوثائق.

العقود المكتوبة والبنود الواضحة المباشرة مش دليل سوء ظن، دي حماية ليك ولحقك من الخلافات والنزاعات المستقبلية.

قبل ما تسلّم المفتاح أو تدفع العربون.. جهّز عقدك وبنودك الواضحة. 📝



أداكي ورقة الطلاق ⁉️ الحقوق والالتزامات ما راحت.. دي حاجات واجبة عليهو بالقانون بعد الطلاق ‼️كتير من الرجال لما المشاكل ...
28/07/2026

أداكي ورقة الطلاق ⁉️ الحقوق والالتزامات ما راحت.. دي حاجات واجبة عليهو بالقانون بعد الطلاق ‼️

كتير من الرجال لما المشاكل والواجبات تزيد عليهو، أقرب وأسهل حل عنده إنه يسلمك ورقة طلاقك عشان يرفع يده من المسؤولية.

وفي نفس الوقت، كتير من النساء في عز الضغوطات والمشاكل دي بتفرح إنها شالت ورقة طلاقها وحريتها وبدت طريقها بعيد عنه.

بس الحقيقة القانونية غير كده تماماً.. القانون بيقول إن الطريق لسه ما انتهى بتسليم ورقة الطلاق، بل بالعكس! بعد الطلاق بتظهر حقوق وواجبات والتزامات فرضها القانون لحماية المطلقة وأطفالها.

شنو هي الحقوق والالتزامات الواجبة عليه بعد الطلاق؟

1⃣ حقك في نفقة المتعة:
القانون بيلزمه بدفع مبلغ متعة لجبر الخاطر بيقدره القاضي بناءً على حالته المادية

2⃣حقك في نفقة العدة:
واجبة عليه طوال فترة العدة الشرعية.

3⃣حقك في نفقة الأطفال:
الأب ملزم قانوناً وبشكل ثابت ومستمر بـ: (المأكل، المشرب، الملبس، المسكن، التعليم، والتطبيب)

4⃣ مؤخر الصداق:
مؤخر الصداق المكتوب في القسيمة بيستحق السداد فور وقوع الطلاق وانقضاء العدة، وما بيسقط إلا بالأداء أو الإبراء الصريح.

⚖️ ببساطة.. القانون عارف حقك كويس، بس أنتِ لازم
تكوني عارفاه وعارفة كيف تحافظي عليه وما تخليه يضيع.

#نفقة

المستشار القانوني ما تكلفة زايدة.. المستشار القانوني أمان بيوفر عليك خسائر ما بتتحملها! 🛡️أغلب أصحاب الشركات بيفكروا: "أ...
07/07/2026

المستشار القانوني ما تكلفة زايدة.. المستشار القانوني أمان بيوفر عليك خسائر ما بتتحملها! 🛡️

أغلب أصحاب الشركات بيفكروا: "أنا لسه في البداية، ما محتاج مستشار قانوني، وما عندي ميزانية ليهو.. بجيبو بعدين".

وفعلاً بيبجيبوهو.. بس متين؟ 🤔

🔴 بعد ما العقد يتوقع غلط.
🔴 بعد ما يحصل نزاع كبير وخلاف يهدد الشراكة.
🔴 بعد ما شخص آخر يسبقهم ويسجل علامتهم التجارية باسمه!

في اللحظة دي بالذات، تكلفة المستشار القانوني بترتفع عشرة أضعاف! 📈
ومش لأن المستشار غلّى سعره، لأ.. لأن الوقت الممكن تتحل فيه المشكلة ببساطة وبأقل الخسائر.. فات!

الخلاصة:

المستشار القانوني ما بيجي بعد ما تقع الفأس في الرأس عشان يحل المشكلة.. المستشار القانوني وظيفته يمنع وقوع المشكلة من الأساس.

💬 سؤال لأصحاب الشركات والمشاريع:
متى آخر مرة راجعت فيها الوضع القانوني لشركتك أو مشروعك؟ شاركني إجابتك



90٪ من الشركات ما بتنهار بسبب السوق، لكن بتنهار بسبب سؤال ما أتسأل أثناء التأسيس‼️أصحاب الشركات بياخدوا زمن، وتعب، وجهد ...
05/07/2026

90٪ من الشركات ما بتنهار بسبب السوق، لكن بتنهار بسبب سؤال ما أتسأل أثناء التأسيس‼️

أصحاب الشركات بياخدوا زمن، وتعب، وجهد في دراسة السوق وبناء المنتجات، لكن بينسوا أو بيغضوا الطرف عن سؤال مهم جداً:
ماذا لو اختلفنا؟ ⁉️

لما يجي وقت الاختلاف، بيلاقوا كل التعب والجهد والزمن القضوهو في بناء الشركة ما فيهو ورقة واحدة تحميهم من بعض!

وببساطة كدة لأنو:
🔴 ماف توزيع واضح للملكية.
🔴 ماف توضيح لآلية اتخاذ القرار.
🔴 ماف مخرج قانوني منظّم.

الثقة بين الشركاء هي أساس الشغل، بس الثقة عمرها ما كانت بديل للورقة القانونية.
عقود الشراكة الابتتكتب من البداية ما معناها "ماف ثقة"، إنما معناها إنكم بنيتوا شركة تقدر تقيف وتصمد لما تجيها الظروف والخلافات والنزاعات.

أسئلة لازم أي شركاء يجاوبوا عليها قبل البداية:
🔴 مين بيملك كم؟ (بأرقام ونسب مكتوبة، مش باتفاق شفهي).
🔴 مين بياخد القرارات؟ (تحديد حدود صلاحية كل شريك).
🔴 كيف بيخرج الشريك لو أراد الخروج؟ وكيف بتتحل الخلافات؟

الشركات المستمرة بشكل سلس ومن دون مشاكل، ما استمرت لأنو شركاءها "حلوين وطيبين" مع بعض.. استمرت لأنهم من البداية كتبوا بوضوح تام العقودات اللازمة لنظام الشراكة والعمل المشترك

شاركوني في التعليقات:

من واقع تجربتكم أو رؤيتكم للسوق، شنو أكتر بند قانوني بيغفلوا عنه الشركاء في البداية وبيكون سبب في نهاية الشركة؟



وقّعت عقداً يحتوي على بنود مبهمة؟ المشكلة ما بتظهر اليوم لكن بتظهر عند أول خلافخلال عملي مع أصحاب المشاريع ورواد الأعم...
28/06/2026

وقّعت عقداً يحتوي على بنود مبهمة؟

المشكلة ما بتظهر اليوم لكن بتظهر عند أول خلاف

خلال عملي مع أصحاب المشاريع ورواد الأعمال لاحظت أن كثيراً من النزاعات التجارية لم تبدأ يوم الخلاف بل بدأت يوم توقيع العقد المحتوي على بنود قابلة للتأويل

البند المبهم ما مجرد ضعف في الصياغة بل هي أكبر مساحة يختلف فيها الطرفان لاحقاً حول ما كان كلٌ منهما يقصده.
عندما ينص العقد على عبارات مثل
(التسليم في أقرب وقت ممكن) … ما المقصود بـ أقرب وقت ؟
(بجودة مناسبة) … ما هو معيار الجودة؟
(تعويض عادل) … كيف نحسب هذا التعويض؟
إذا لم يحدد العقد الإجابة هنا بنتركها لتقدير القاضي بعد سنوات من النزاع

قبل توقيع أي عقد اسأل نفسك:

✔ هل المدة محددة بأرقام وتواريخ واضحة؟
✔ هل معايير الجودة قابلة للقياس ومرجعها محدد؟
✔ هل المسؤولية وآلية التعويض منصوص عليهما بوضوح؟

العقد ليس مجرد إجراء لإتمام الاتفاق بل هو وسيلتك لإدارة المخاطر إذا سارت الأمور على غير المتوقع.

لذلك مراجعة العقد قبل التوقيع ليس تعطيل للأعمال بل هي استثمار في حماية الشركة وتقليل احتمالات النزاع.
هل قبل اليوم وقعت على عقد أثناء التوقيع كان واضح ثم بعدها وجدت بند مبهم وغير واضح منتظرة تجربتك في التعليقات


Address

Khartoum

Website

Alerts

Be the first to know and let us send you an email when Eslam Matar. posts news and promotions. Your email address will not be used for any other purpose, and you can unsubscribe at any time.

Shortcuts

Share

Category