الخير للمحاماة و التدريب القانوني

الخير للمحاماة و التدريب القانوني Contact information, map and directions, contact form, opening hours, services, ratings, photos, videos and announcements from الخير للمحاماة و التدريب القانوني, Legal Service, السودان, Khartoum.

❌
انا هنا عشان اعلمك وافهمك القانون عشان كدا بشرح ليك بالدارجيه العاميه البسيطه و ممكن اشبكك كلام قانوني بحت لمن تغرق بس الورجغه العربيه دي قاعده عندك في مذكراتك و الكتب البتقرأ منها دي ✔️👌

28/03/2026

عايز تكون شِفت في الجنائي ؟ 🤸‍♂️

امسك في المعلومه دي قوي سواء كنت محامي مبتدئ او طالب معادله 👋
ما بنقدر نطلق على اي فعل و نقول عليه جريمه إلا بتوافر شروط معينه في الفعل و الفاعل وإلا كان على الإباحه "لان الأصل في الأشياء الإباحه " صحيح 🙃
يلا الشروط دي بنقول عليها اساس المسئوليه او أركان المسئوليه الجنائيه و هي كالأتي :
١/ ان يكون الفعل مُجٌرم
" اي منصوص عليه في تشريع جنائي " ✔
٢/ ان يكون الفاعل بالغ عاقل مختار
" راجع شرح المصطلحات دي لانها مهمه شديد " ✔
٣/ توفر القصد او الإهمال
" و دا الركن المعنوي او القصد الجنائي ، لان القاعده القانونيه تنص لا جريمه بلا قصد " ✔

دا الميزان البتوزن بيه الوقائع قبل ما تدي إستشاره او تتولى الاتهام او الدفاع او تبدأ إجابتك في الإمتحان 👌

❤

27/03/2026

💕⚖️

إلى جيل "الروب الأسود" أبطال العداله حماة الحق
عايزك تخت في بالك يا استاذنا انه الخطوة الأولى في القيد ما مجرد إجراءات، دي بداية مشوار طويل.. يا بتبنيهو صح، يا بتهدمو من أول عريضة.
​عشان تمشي بخطى ثابتة، دي خلاصة تجربتي في نقاط مبسطه شديد و خير الكلام ما قل و دل:
​1/ القلم هو السلاح.. ما اللسان ✍️
​المحاماة ما "فصاحة" ورفع صوت، هي قوة منطق في الورق
​وزي ما قال الدكتور السنهوري: "المحامي الذي لا يقرأ كل يوم، يجهل القانون كل يوم." اقرأ السابقة القضائية قبل ما تنوم، والمادة قبل ما تدبج العريضة

​ 2/هيبتك هي عنوانك 🤵‍♂️🤵🏼‍♀️
​الهندام والمواعيد ما ديكور، دي ثقة الموكل فيك. الموكل لو لقاك مهندم ومنضبط في زمن الجلسة، بيطمن إنو حقو في إيد أمينة
​يقول جان مارك فارون: "المحامي هو مرآة العدالة، فإذا اتسخت المرآة، تشوهت الحقيقة"

​🤝 3. أمانة الموكل.. "دين في رقبتك" 👌
​الموكل بيجيك وهو غرقان، ما تبيع ليهُ "الوهم" عشان الأتعاب. وريهُ الحقيقة المرة أحسن من الأمل الكاذب.
​تذكر كلمة اللورد دينينغ: "واجب المحامي الأول هو تجاه العدالة"

​ 4/ خليك بير أسرار.. لا بتخر لا بتجيب 🤫
​أسرار الناس عندك أمانة مقدسة و اتذكر انه المحامي الصيته سمح هو البيعرف يمسك لسانه
​هنري بروجهام قالها بوضوح: "المحامي هو حارس أسرار المجتمع"

​🤝 5/الزملاء.. سند ما خصوم 💗🤝
​برة القاعة إحنا زملاء وأساتذة، وفي القاعة "سجال قانوني" باحترام. الأدب مع القضاة والزملاء بيفتح ليك أبواب العلم والتقدير.
​ختاماً: المحاماة مهنة "نفس طويل".. خلي صدرك واسع و اجتهد و ما تستعجل
​بالتوفيق لكل الزملاء الاجلاء في رحلة البحث عن الحق 🖋️⚖️
​
⚖️

😑💔روق و هدئ اعصابك الموضوع بسيط و م بحتاج تنكد على روحك ساي 😅✔️ااي كيس معروف بنحلهو بتلاته خطوات صاح •المبدأ القانوني•ش...
26/03/2026

😑💔

روق و هدئ اعصابك الموضوع بسيط و م بحتاج تنكد على روحك ساي 😅✔️
ااي كيس معروف بنحلهو بتلاته خطوات صاح
•المبدأ القانوني
•شرح المبدأ
•تطبيق المبدأ على الوقائع

طيب ياخ انا اعرف اطلع ديل كيف🌚؟

شوف يا حبيب صحصح معاي و اسمع كلامي دا كويس و طبق عليه 👂👏
#أولآ شايف عنوان درسك الفي كراسك يلا العناوين دي كلها مبادئ قانونيه ✔️
(يلا انت تقرأ الكيس كويس و تشوف اكتر عنوان درس بشبهو شنو وشوفت عنوان الدرس دا المبدأ حقك ال حتكتبه🏌️‍♀️🙅‍♂️)
مثلآ ذي شنو 🧐
التدليس كعيب إراده ، الغلط، الوعد بالتعاقد، الاستفزاز، الدفاع الشرعي، التعدي، الجنائي، القيود الوارده على فتح الدعوى، الاختصاص المحلي........ الخ
ومرات بتلقى واضع الامتحان جايب ليك المبدأ جاهز عشان ما تحوم كتير
مثلآ يقول ليك
و دفع المتهم بأنه كان يمارس حقه في الدفاع الشرعي.
او ادعى المدعي بان المدعى عليه كان مدلسآ.
او دفع محامي الدفاع بان البينه لم يتم الحصول عليها بإجراء صحيح.... الخ
وقع ليك 😉👏✔️
#ثانيآ شرح المبدأ دا بتشرح فيه درسك الاتناولته وقائع الكيس يعني بتشوف القانون و المحاكم قالت شنو في موضوع الكيس و بتكتب كلامهم في شرحك للمبدأ🏌️‍♀️🙅‍♂️👂
#تطبيق المبدأ
لمن تجي تكبق ما عليك الا تخت الوقائع في قالب القانون يعني شوف القانون قال شنو وطبق كلامه على وقائعك ال في الكيس 👨🏼‍⚖️🔥

طيب يا ناس الكلام دا فيه شنو؟وليه انتو مصعبنهو على روحكم؟ الموضوع ساهل صاح ولا لسه شايلين نفس الفكره 🙂🕛

يااا ريت تردو لي على الاسئله دي في الكومنتات 🎉

08/02/2025

❤


#نموذج طلب إفراج بالضمان

يعتبر اول طلب يتقدم بيه الدفاع بعد فتح الدعوى الجنائيه و القبض على المتهم لإطلاق سراح المتهم بالضمان(تحت المواد 105 و ما بعدها من قانون الإجراءات الجنائية النافذ )
- "بعد كتابة البيانات الاساسيه"
بوافر الاحترام و اسمى التقدير و إنابة عن المتهم في البلاغ بالرقم اعلاه نلتمس الافراج بالضمان عن المتهم و لدينا ضامن كفؤ ويقيم داخل دائرة إختصاص عدالتكم .


الطلب احيانآ قد يحتاج الى حيثيات مثلآ تبين تاريخ القبض و الفتره القضاها المتهم في الحراسه و انو التحري معاهو اكتمل و كدا و دي مسأله فنيه بترجع لمنهجيتك في صياغة الطلبات .
الافراج قد يكون بالضمان العاديه ، مالم يكون البلاغ متعلق بمال او بيوجب التعويض هنا لابد من الايداع حتى يتم الإفراج .

راجع قانون الإجراءات الجنائيه المواد 105 و ما بعدها 📝⚖️

08/02/2025

♥🏌️‍♀️

نصيحه مني ليك...
الاحوال الشخصيه م تنتكل فيها ع الميراث بس لانه بضيعك خليك حريص و ظبط الزواج و الفرقه و ما تنسى الهبه و الوقف و الوصيه و ماف قسم اهم من التاني وبعدين انت م عارف واضع الامتحان ممكن يجيب شنو ويخلي شنو وبطل تتعامل مع الامتحان بفهم الترشيح عشان م يكتما فيك ولو داير تشوف كلامي دا راجع الإمتحانات السابقه 📝
ناس المجلس ديل ما تديهم فرقه خليك بتاع كلو و ابقى نجيض و وريهم إنك شِفت و واقعه ليك 😎👋

07/02/2025

😊😍📯

•الثمن حق الزوجه براها(لمن يكون المرحوم عندو اولاد سواء كان ولد و لا بنت) و عندها الربع لمن ما يكون عنده اولاد✔️

• الزوج بشيل النصف لو المرحومه ما عندها اولاد، ولو عندها اولاد بشيل الربع

•ثلث الباقي حق الام براها (لمن يكون معاها الزوج و الاب ودي بسمهوها المسأله العمريه) و عندها الثلث لمن تكون هي و الاب براهم و بتأخد السدس لو المرحوم عندو اولاد ✔️

• البنت عندها النصف لمن تكون براها وما عندها اخو في درحتها يعصبها و لمن يكونن اكتر من واحده بشيلن التلتين برضو لمن ما يكون في اخو يعصبهن ✔️

• بنات الابن بحلن محل البنات لو البنات مافي و بيرثن نفس ميراثهن دا كلهو لو بقى ابوهن مافي لانه ابوهن بحجبن✔️

• التلت دا حق الاخوه لام في حالة كانو اكتر من واحد و بشيلو السدس لو اتعددوا (مالم يكونو محجوبين)

•الاخت الشقيقه عادي بتبقى عاصب لمن تكون مع البنات و ما كان في عاصب اولى منها

•الجدات ما عندهن حاجه غير السدس و بيحجبن بالأم

#اخيرآ ديل ما بيحجبو حجب حرمان يعني إياك تحجبهم سامعني

الابناء ذكورآ و ايناثآ
الوالدان الاب و الأم
الزوجان

⚖️

06/02/2025

⚖

و انت بتقرأ في مادة العقد قسمه للمراحل التلاته دي عشان تسهل على عقلك الماده و تقدر تفهمها اتفقنا :

١/ مرحلة ما قبل نشؤ العقد ( الدعوه للتعاقد ) .

٢/ مرحلة نشؤ العقد ( الرضا بعناصره الإيجاب و القبول ، و المحل و السبب بشروطهم المعتبره قانونآ ).

٣/ مرحلة انتهاء العقد ( الانتهاء بإرادة الطرفين ، بإرادة احد الأطراف ، الفسخ القانوني ).

حنشرح المراحل دي كلها في بوستات مفصله بطريقه بسيطه و مفهومه ان شاءالله ❤

05/02/2025

#الجنائي ⚖️
📝

بعد البوست دا تاني ماف كيس 130 بقيف ليك في طريقك ان شاءلله يلااا ارح 😍🚶

المشرع ذكر (يعد القتل قتلآ عمدآ إذا قصد الجانئ القتل أو قصد الفعل و كان الموت نتيجة راجحه لفعله)
صحصح معاي و استوعب كلامي دا كويس 👇

الركن المعنوي لجريمة ال ١٣٠ بجيني بطريقتين
1/قصد مباشر او صوره مباشره «قصد القتل»
المحكمه العليا قالت القصد المباشر يستشف من اعتراف المتهم بنيته في إذهاق الروح
يا متهم المجنى عليه دا قتلته؟ قتلته يا مولانا و لو حيا تاني بقتله
(في الكيس بجيك انو المتهم مقر بنيته في القتل)

2/ قصد غير مباشر او الصوره غير المباشر «قصد الفعل و الموت نتيجه راجحه»
وهنا المتهم بتلقاهو معترف بالفعل بس ناكر نية القتل
يا متهم المجنى عليه دا قتلته؟ و الله يا مولانا انا ضربته بس ما كنت قاصد اقتله
( اغلب الكيسات بتجي بالطريقه دي)

طيب يعني شنو نتيجه راجحه و انا اعرف كيف الموت كان حيكون نتيجه راجحه لفعل المتهم؟
#اولآ النتيجه الراجحه هي النتيجه التي عدم حدوثها يثير الدهشه عند الرجل العادي
(فلان دا طقوهو بفأس في راسه و ما جاتو حاجه؟ ياخ معقووله 😲) بس شوفته ياها ذاته😉
#ثانيآ المحكمه العليا وضحت في الممارسه العمليه انو قصد المتهم يستشف من خلال المعايير الأتيه (يجب ان تكون المعايير متماسكه و مجتمعه):
١- معيار الأداة المستخدمه «الاله الاستخدمها الجانئ _سكين، مسدس، عصايا، طوبه....الخ»

المحكمه العليا ذكرت قصد المتهم يستشف من خلال الاداة المستخدمه
٢- طريقة استخدام الاداة «القوة الاله من خلال طريقة استعمالهو ليها»
انا ممكن اطقك بقلم في راسك و ما تجيك حاجه صح! طيب لو طعنتك بيه 🧐 افتكر فهمت قصدي
٣- مكان الضربه « الاجزاء المميته في جسم الانسان هي الراس و الصدر و البطن و منطقة تجمع الشرايين»
يعني المناطق دي لو طقهو فيها اي زول الموت بيكون نتيجة راجحه
٤- التقرير الطبي « و دا حيجاوب لي على سؤال؟ هل الضربه التي تلقاها المجنى عليه ضربة تفضي الى الموت في غالب الاحوال»

لو العوامل دي كلها اجتمعت في الوقائع يبقى الجانئ كان قاصد يقتل المجنى عليه حتى لو ما اعترف بنيته في القتل 👏

ليصلك كل جديد ⚖️

04/02/2025

لو مستفيدين مننا تاقهو غيركم يجو يستفيدو و خصوصآ الناس الممتحنه ✨ ما تبقى اناني و تغنج براك و صدقني كل معروف بتقدمو لغيرك بتلقاهو اول ما تتزنق 🌚👌
الناس تتاقي بعض لانه حيكون في شغل بختلف الأيام الجايه 🙌🏻
ولو ما مستفيدين كلمونا نوقف عشان ما نضيع وقتنا و جُهدنا ساي 🙂👏

04/02/2025

🙅‍♂️📯??

❌🧐📯

إحتد النقاش بين سمير و جاره بشير حول امتار بالارض التي تفصل بين منزلهما وكل منهم كان يدعي ملكيتها له و بادر سمير جاره بشير بالإساءه و ما كان من بشير الا ان قام بضرب سمير على رأسه بالعصا التي كانت ملقاء بالقرب منه إلا ان سمير تمكن من إقتلاع العصا التي كانت بيد بشير وقام بضربه بالعصا على وجهه و راسه فارداه قتيلآ
قدم سمير للمحاكمه تحت الماده 130 جريمة القتل العمد إلا ان سمير دفع بأنه كان يستخدم حقه في الدفاع الشرعي
انت قاضي محكمة الموضوع بين حكمك؟

طبعآ في ناس حتجي تنظر كالأتي
_ سمير كان في حالة دفاع شرعي🌚
_ سمير كان في حالة الدفاع بس مافي تناسب لانه ما كان يضربه ضربتين فحيستفيد من الدفع الجزئي 😏...الخ

شوف يا غالي انت بعد ما تكتب المبدأ (حق الدفاع الشرعي) و تجي تشرحه وتكتب كلام المشرع و السوابق عليك الله لمن تجي تطبق حاول تطبق صاح و ما تورجغ فاهمني انت

حق الدفاع عشان ينشأ لازم يكون في شنو؟ خطر حال وشيك الوقوع
الخطر الحالي والوشيك الكان مواجه سمير شنو؟ العصايا
طيب سمير عمل شنو؟ قلع العصايا
يبقى الخطر مالو؟ زال
و طالما الخطر زال مافي حق دفاع شرعي و دفعه دا يبلو و يكشح مويته «ما تجي تقول لي هو لو ما عطلو ما كان بخليهو 🌚»
يبقى ضربه لبشير بعد ما قلع العصايا شنو؟ تعدي (نظام داير يتسد حقه صاح😅»
يبقى نعمل ليه شنو؟ نردمه
نردمه بكم؟ 130

معليش اندمجت مع طريقة استاذ الرياضيات داك 😂


• شروط النشؤ «يعني عشان يكون في حق دفاع»
الخطر الحال او الوشيك الوقوع+تعزر الوصول للسلطه العامه (الجهات الأمنيه)
• شروط الممارسه «عشان نديك الحق تستعمله»
توجيه الدفاع لمصدر الخطر+توجيه الدفاع بالقدر المناسب

لو اتوفرت شروط النشؤ و الممارسه المتهم بستفيد من حق الدفاع كدفع كلي (اي سبب إباحه)
اما لو اتوفرت شروط النشؤ و اخل المتهم بشروط الممارسه بستفيد من حق الدفاع كدفع جزئي ( فعله بكون شبه عمد)

اما لو الاتنين بقى فيهن خلل يبقى دا ركب الكركابه و ما عندو حق دفاع 🥱

#اخيرآ ما يخموك ويقولو ليك التطبيق على الوقائع ما مهم لالا مهم و شديد كمان لانه المصحح ما داير حفظك للنص هو داير يتأكد من فهمك للنص وفهمك دا بشوفو في تطبيقك للنص
يلا ابقى مارق و جايين على الباقي ما ناسينو 🚶

لغيرك ⚖

Address

السودان
Khartoum

Telephone

+249917536772

Website

Alerts

Be the first to know and let us send you an email when الخير للمحاماة و التدريب القانوني posts news and promotions. Your email address will not be used for any other purpose, and you can unsubscribe at any time.

Shortcuts

Share

Category