23/05/2026
لکی مروت: ضلع لکی مروت پولیس نے عیدالاضحیٰ کے موقع پر امن و امان کی صورتحال برقرار رکھنے کیلئے فل پروف سکیورٹی پلان تشکیل دے دیا۔
ڈی پی او لکی مروت نزیر خان نے تمام سرکل ایس ڈی پی اوز اور جملہ ایس ایچ اوز کو عیدالاضحیٰ کے حوالے سے باقاعدہ سکیورٹی پلان پر عملدرآمد کی ہدایات جاری کرتے ہوئے عید اجتماعات، مساجد، عید گاہوں، تجارتی مراکز اور اہم و حساس مقامات کی سکیورٹی فول پروف بنانے کی ہدایات جاری کیے۔ ضلع بھر کے داخلی و خارجی راستوں پر قائم ناکہ بندی پوائنٹس پر چیکنگ کا عمل مزید سخت کر دیا گیا ہے جبکہ ٹریفک کی روانی برقرار رکھنے کیلئے خصوصی روٹس بھی مقرر کر دیئے گئے ہیں۔
تفصیلات کے مطابق عیدالاضحیٰ کے دوران شہریوں کو پرامن ماحول فراہم کرنے کیلئے لکی مروت پولیس کی جانب سے جامع سکیورٹی اقدامات اٹھائے گئے ہیں۔ تجارتی مراکز اور بازاروں میں غیر معمولی رش کو کنٹرول کرنے کیلئے خصوصی ٹریفک پلان مرتب کیا گیا ہے جبکہ ضلع بھر میں ٹریفک پولیس کی اضافی نفری مختلف اہم مقامات پر تعینات کر دی گئی ہے۔
اسی طرح ضلع بھر میں قائم سنیپ چیکنگ پوائنٹس پر بھی پولیس اہلکار فرائض سرانجام دیں گے۔ تمام سرکل ڈی ایس پیز اور ایس ایچ اوز کو اضافی گشت بڑھانے، شاہراہوں، حساس مقامات، مساجد اور عید گاہوں پر اضافی نفری تعینات کرنے کی خصوصی ہدایات جاری کی گئی ہیں۔مویشی منڈیوں ،بازاروں اور مارکیٹوں میں سفید پارچات میں پولیس اہلکار بھی تعینات کیے گئے ہیں جبکہ موبائل پٹرولنگ میں اضافہ کر دیا گیا ہے۔
ڈی پی او لکی مروت نزیر خان نے کہا کہ عیدالاضحیٰ کے دوران امن و امان کی فضاء برقرار رکھنے کیلئے پولیس کی بھاری نفری ضلع بھر میں تعینات رہے گی تاکہ شہری بلا خوف و خطر اپنی مذہبی و سماجی سرگرمیاں انجام دے سکیں۔
انہوں نے عوام الناس اور تاجر برادری سے اپیل کی کہ موجودہ حالات کے پیش نظر اپنے اردگرد مشکوک افراد، اشیاء، گاڑیوں،موٹر سائیکل ،بیگز وغیرہ پر کڑی نظر رکھیں اور کسی بھی مشکوک سرگرمی کی فوری اطلاع مقامی پولیس یا پولیس کنٹرول روم نمبر 0969.538253 پر دیں تاکہ کسی بھی ناخوشگوار واقعہ سے بروقت نمٹا جا سکے۔
