25/02/2026
چیئرمین الیکشن بورڈ لاہور ہائی کورٹ بار ایسوسی ایشن، لہراسب خان گوندل ایڈووکیٹ نے اعلان کیا ہے کہ لاہور ہائی کورٹ بار ایسوسی ایشن کے انتخابات 28 فروری 2026 کو منعقد ہوں گے۔ پولنگ کا وقت صبح 9 بجے سے شام 5 بجے تک بغیر کسی وقفے کے جاری رہے گا۔
انہوں نے تمام ووٹر ممبران سے گزارش کی ہے کہ وہ اپنا قومی شناختی کارڈ اور بار ممبرشپ کارڈ ہمراہ لائیں، کیونکہ ان دستاویزات کے بغیر مین گیٹ سے داخلہ ممکن نہیں ہوگا۔
چیئرمین الیکشن بورڈ کے مطابق لاہور ہائی کورٹ بار ایسوسی ایشن کے بائیومیٹرک ووٹرز کی مجموعی تعداد 32,488 ہے۔ اس مقصد کے لیے الیکشن بورڈ کی جانب سے 8 پولنگ بوتھ قائم کیے گئے ہیں، جن میں سے ایک پولنگ بوتھ خواتین ووٹرز کے لیے مختص کیا گیا ہے۔
انہوں نے مزید بتایا کہ انتخابی عمل کو مؤثر اور تیز رفتار بنانے کے لیے 125 کمپیوٹر سسٹمز نصب کیے گئے ہیں تاکہ ووٹرز آسانی اور سہولت کے ساتھ اپنا ووٹ کاسٹ کر سکیں۔
تمام وکلاء کو ان کا ووٹر نمبر اور بوتھ نمبر لاہور ہائی کورٹ بار ایسوسی ایشن کے الیکشن بورڈ کی جانب سے بذریعہ ایس ایم ایس بتا دیا جائے گا، تاکہ انہیں پیشگی معلوم ہو کہ انہوں نے کس پولنگ بوتھ پر جا کر اپنا ووٹ کاسٹ کرنا ہے۔
اس موقع پر چیئرمین الیکشن بورڈ کے ہمراہ ڈپٹی چیئرمین لاہور ہائی کورٹ بار ایسوسی ایشن سردار محمد صادق طاہر اور ڈپٹی چیئرمین حسیب اللہ خان بھی موجود تھے۔
