23/05/2025
**پرائیویٹ ہاؤسنگ سوسائٹیز میں رجسٹری معاملات پر لاہور ہائیکورٹ کا اہم فیصلہ**
*چھ ہفتوں میں رجسٹری مکمل کرنے کی ہدایت
لاہور ہائیکورٹ نے پرائیویٹ ہاؤسنگ سوسائٹیز میں رجسٹریوں کے حوالے سے ایک اہم آئینی درخواست پر فیصلہ سناتے ہوئے لاہور ڈویلپمنٹ اتھارٹی (ایل ڈی اے) کو حکم دیا ہے کہ شہری کی پراپرٹی رجسٹری کے معاملے کو چھ ہفتوں میں نمٹایا درخواست گزار کے مطابق اُس نے ساحر ایسوسی ایٹس کو ایک مکان کی خریداری کے لیے لاکھوں روپے ادا کیے، لیکن مکمل رقم وصول ہونے کے باوجود سوسائٹی نے قانونی رجسٹری دینے کے بجائے صرف ایک سفید کاغذ کا ٹکڑا تھما دیا۔عدالت نے دوران سماعت قرار دیا کہ شہری کی شکایت جائز ہے اور ایل ڈی اے کو لازم ہے کہ وہ حکومت پنجاب کی جانب سے موصول ہونے والی اپیل پر قانون و پالیسی کے مطابق فوری کارروائی کرے۔ عدالت نے واضح کیا کہ متعلقہ افسر یا اس کا نامزد کردہ نمائندہ ضروری کارروائی مکمل کرے، اور سائل کو قانونی حق دلایا جائے۔قانونی حلقوں نے اس فیصلے کو ایک اہم پیش رفت قرار دیا ہے جو پرائیویٹ ہاؤسنگ سوسائٹیز کی بے ضابطگیوں کا شکار ہزاروں متاثرین کے لیے ایک مثال بنے گا۔
مندرجہ ذیل حکم نامہ لاہور ہائیکورٹ کے فیصلے کا اردو خلاصہ ہے:
---
لاہور ہائیکورٹ، لاہور
عدالتی محکمہ
رٹ پٹیشن نمبر: 30641 / 2025
محمد عامر رمضان بنام حکومت پنجاب و دیگر
مورخہ: 19.05.2025
عدالت میں محترمہ ثمینہ دانش بخاری (درخواست گزار کی وکیل) اور جناب سلمان آصف وڑائچ (معاون ایڈووکیٹ جنرل) پیش ہوئے۔
محترمہ ثمینہ دانش بخاری نے مؤقف اختیار کیا کہ حکومت پنجاب کے ہاؤسنگ، اربن ڈیویلپمنٹ اینڈ پبلک ہیلتھ انجینئرنگ ڈیپارٹمنٹ نے مورخہ 07.05.2025 کو ایک خط کے ذریعے (ریفرنس نمبر SO(H-II)3-1/2025(LF)) درخواست گزار کی اپیل ڈائریکٹر جنرل، لاہور ڈیویلپمنٹ اتھارٹی (جو کہ فریق نمبر 3 ہیں) کو مزید کارروائی کے لیے بھیجی۔ یہ اپیل اسی روز موصول بھی ہو گئی۔ لیکن درخواست گزار کے متعدد بار رجوع کرنے کے باوجود کوئی پیش رفت نہ ہوئی۔
عدالت نے جب اس معاملے میں حکومتی وکیل سے استفسار کیا تو وہ کوئی تسلی بخش جواب نہ دے سکے۔
حکم:
فریق نمبر 3 (ڈائریکٹر جنرل، ایل ڈی اے) کو ہدایت کی جاتی ہے کہ وہ حکومت پنجاب کی طرف سے بھیجی گئی اپیل کو قانون، قواعد و ضوابط اور متعلقہ پالیسی کے مطابق، متعلقہ فریقین کو سن کر، خود یا کسی مجاز افسر کے ذریعے چھ ہفتوں کے اندر نمٹا دیں، جس کا آغاز اس حکم نامے کی تصدیق شدہ نقل موصول ہونے سے ہوگا۔
درخواست نمٹا دی گئی۔
