08/05/2026
❗️”Эрдэнэс Оюу толгой ХХК"-ийн захирал асан, яллагдагч Э.Ганхүү ямар хэрэгт буруутгагдав, тэр хэн бэ?
"Эрдэнэс Монгол” ХХК-ийн Төлөөлөн удирдах зөвлөлийн 2011 оны 28 дугаар тогтоолоор түүний охин компани хэлбэрээр 100 хувь төрийн өмчит “Эрдэнэс Оюу Толгой” ХХК-ийг үүсгэн байгуулж, “Оюу Толгой” ХХК -ийн төрийн эзэмшлийн 34 хувийн хувьцааг албан ёсоор эзэмших болсон. Төрийн өмчит компани болох “Эрдэнэс Оюу Толгой” ХХК-ийн гүйцэтгэх удирдлага, удирдлагын баг хариуцлагатай ажиллаж чадсан уу? гэдэг асуултын хариултыг өнөөдөр хангалтгүй, эсхүл муу гэсэн үнэлэлт өгчихөд үнэнд нийцсэн гэж хэлж болно. Учир нь гүйцэтгэх захирал нь гэмт хэрэгт холбогдож, яллагдагчаар татагдчихаад байна.
2025 оны 12 дугаар сарын 15-нд “Эрдэнэс Оюу толгой” ХХК-ийн гүйцэтгэх захирал Э.Ганхүүг Авлигатай Тэмцэх Газар(АТГ)-аас 48 цагийн хугацаатай баривчилсан ч суллаж, хилийн хориг тавьсан. Энэ баривчилгаа түүнийг ямар гэмт үйлдэл хийсэн гэх үндэслэлээр болсон бэ?
Өнөөх л албан тушаалтны хууль бус шийдвэр, ашиг сонирхол. Тус компаний албан ёсны хаяг нь: Нийслэлийн Сүхбаатар дүүргийн 1-хороо, Соёл амралтын хүрээлэн /14240/, олимпийн гудамж 13 дугаартай барилгын 1004 тоот. Энэ байр нь Хотын А зэрэглэлийн бүсэд, Эрүүл мэндийн яамын баруун талд, Аюуд тауртай зэрэгцэн оршдог, Моннис таур буюу тансаг зэрэглэлийн оффис. “Оюутолгой” ХХК-наас шилжүүлсэн 20 сая ам.доллараас 8.2 тэрбум төгрөгөөр авсан энэхүү оффис тухайн үеийн энэ зэрэглэлийн оффисын талбай 1 м2 нь 10 сая орчим байхад, 16 саяар авсан, тендерээ зарлахдаа хотын А бүсэд, давхарыг нь хүртэл зааж, хотынхоо төвд шилэн өрөөнөөсөө их хотоо өндөр дээрээс харуулдан суухаар захиалсан гэхчлэн зориуд урдаас авах байр нь нэгэнт тодорхой болсон байсан, урьдчилж мөнгийг шилжүүлсэн зэрэг ноцтой баримтуудыг АТГ-аас шалгаж байна.
“Эрдэнэс Монгол” ХХК-ийн Төлөөлөн удирдах зөвлөлийн 2025 оны 4 дүгээр сарын 08-ны өдрийн 57 дугаар тогтоолоор Гүйцэтгэх захирал, Ерөнхий нягтлан бодогч, Нэгдсэн стратеги төлөвлөлтийн газар болон 5 хэлтэст нийт 31 орон тоотойгоор баталсан. Гэвч, Э.Ганхүү дутуу орон тоотой ажилладаг, халаа сэлгээ их, зарим албан хаагчдыг ажилд авахдаа хууль бусаар танил тал, ашиг сонирхлын үндсэн дээр сонгож, дураараа авирладаг байсныг ч эх сурвалж хэлж байна. Мөн тус компаний эзэмшлийн албаны машинд цэнхэр номер зүүдэггүй, зөвхөн хувийн хэрэгцээндээ ашигладаг, ажлын цаг баримталдаггүй таалллаараа ажилдаа ирдэг гээд олон олон алдаа дутагдал гаргажээ.
Энхтуяагийн Ганхүү нь:
-2001- 2002 онд Нийслэлийн Нийтлэг үйлчилгээний газарт ахлах нягтлан бодогч,
-2002- 2010 онд Нийслэлийн Засаг даргын Тамгын газрын, Санхүү, төрийн сангийн хэлтэст мэргэжилтэн,
-2010-2020 онд Нийслэлийн Засаг даргын Тамгын газрын Санхүү, төрийн сангийн хэлтсийн дарга,
-2020 оны 8 сараас Барилга, хот байгуулалтын яамны Бодлого төлөвлөлтийн газрын Хөрөнгө оруулалт, үйлдвэрлэлийн хэлтсийн дарга,
-2020 оны 11 сараас Барилга, хот байгуулалтын яамны Санхүү, хөрөнгө оруулалтын газрын даргаар тус тус ажиллан,
-2023 оны 7 сард ХНХЯ-ны Төрийн нарийн бичгийн даргыг түр орлон гүйцэтгэгч
-2024 оны 2 дугаар сараас “Эрдэнэс Оюу толгой” ХХК-ийн гүйцэтгэх захирлаар Э.Ганхүүг томилохоор тохирчээ гэсэн мэдээллүүд гарсны дараа томилогдон ажилласан.
2001 оноос 2020 он хүртэл 19 жил тасралтгүй нийслэлийн санхүү, төсвийг хариуцах ажлыг хийж ирсэн, хувийн болон гэр бүлийнх нь харилцаа хамаарал түүний тасралтгүй томилгоонуудынх нь ар тал болсоор ирсэн гэхэд хилсдэхгүй. Мөн УИХ-ын гишүүн Х.Булгантуяа ХНХ-ын сайдаар ажиллаж байхдаа Э.Ганхүүг Төрийн нарийн бичгийн даргаар томилуулж, хамтран ажиллаж байв.
Оюутолгой ХХК-тай хийх хэлэлцээр ид үргэлжилж буй үед ажлын хэсгийн гишүүдийг алмайруулсан нэг зүйл нь түүний англи хэлний мэдлэг байлаа. Олон улсын зэрэглэлтэй төрийн өмчит компаний гүйцэтгэх удирдлага англи хэлний ярианы ч чадваргүй байгаад хэлэх үг алга гэж…
Ийнхүү, төрийн албанд 25 жил тасралтгүй ажилласан нэгэн албан хаагч, удирдах албан тушаалаа өгч дараагийн хүн хэн байх сонгон шалгаруулалт зарлагджээ. Итгэл даах нэгэн байгаасай.
