28/04/2026
လက်ထပ်ယူပါမည်ဟု အမျိုးသားက အမျိုးသမီးအား အယုံသွင်းပြီး ကာမရယူပြီးနောက် လက်ထပ်ရန်ငြင်းဆိုခြင်းသည် ရာဇသတ်ကြီးပုဒ်မ ၄၁၇ အရ လိမ်လည်မှုမြောက်၊ မမြောက်
--------------------------
- ရာဇဝတ်မှုမြောက်ရန်အတွက် ပဋိသန္ဓေရှိရန် လို၊ မလို
- ရာဇသတ်ကြီးပုဒ်မ ၄၁၅ နှင့် ၄၁၇ တို့သည် ပစ္စည်းနှင့်ပတ်သက်သည့် ပြစ်မှုများပြဋ္ဌာန်းထားသည့် ရာဇသတ်ကြီးအခန်း (၁၇) တွင် ပါဝင်နေရာ အမျိုးသမီး၏ကာမကို လိမ်လည်ခြင်းနှင့် သက်ဆိုင်မှု ရှိ၊ မရှိ
--------------------------
ပြည်ထောင်စု နှင့် ကိုကျင်ဝှက်၊ ၁၉၆၇ ခုနှစ်၊ မြန်မာပြည်စီရင်ထုံး၊ စာ ၄၆ အမှုတွင် အမျိုးသားက အမျိုးသမီးကို လက်ထပ်ပါမည်ဟု အယုံသွင်းပြီး ကာမရယူသဖြင့် အမျိုးသမီး၌ ကိုယ်ဝန်ရှိလာသောအခါ လက်ထပ်ရန်ငြင်းဆိုခြင်းသည် ရာဇသတ်ကြီးပုဒ်မ ၄၁၅ ၏ ဒုတိယပိုင်းအရ၊ လိမ်လည်မှုမြောက်နိုင်သည်ဟု ယူဆခဲ့သည်။
သို့ရာတွင် မောင်ကြည်ဝင်း နှင့် ပြည်ထောင်စု၊ ၁၉၇ဝ၊ ရာဇဝတ်ပြင်ဆင်မှု ၃၃ (ခ) အမှု၌ ထိုကဲ့သို့ငြင်းဆိုခြင်းသည် ရာဇဝတ်ပြစ်မှုကျူးလွန်ရာမရောက်၊ နစ်နာသူက တရားမကြောင်းဖြင့် အရေးဆိုရန်အခွင့်အရေးရှိသည်ဟု ဆုံးဖြတ်ခဲ့သည်။
ယင်းဆုံးဖြတ်ချက်များမှာ နှစ်ဦးထိုင်ခုံရုံးမှ ချမှတ်ခဲ့သည့် ဆုံးဖြတ်ချက်များဖြစ်ရာ အဆိုပါပြဿနာများ၏ အခြေအနေပေါ် ဝိဝါဒကွဲပြားမှုမရှိအောင် စုံညီခုံရုံးဖြင့်ကြားနာစိစစ်ရန် တင်ပြခဲ့ခြင်းဖြစ်သည်။
ဤအမှုတွင် ပေါ်ပေါက်သည့်ပြဿနာမှာ အများပြည်သူတို့နှင့် သက်ဆိုင်သည်သာမက၊ စိတ်ဝင်စားစရာ ဥပဒေပြဿနာတရပ်ဖြစ်သည့်အလျောက်၊ နိုင်ငံတော်ရှေ့နေချုပ်အဖြစ် ဥပဒေပညာရှင် ဒေါက်တာဧမောင် နှင့် ဦးကျော်မြင့်တို့အား ရုံးသယဟအဖြစ် လိုက်ပါဆောင်ရွက်ကြရန် မေတ္တာရပ်ခံခဲ့သည်။
လျှောက်ထားသူ၏ ရှေ့နေကြီး ဦးကံမြိုင်က လက်ထပ်မည်ဟု ကတိပြုပြီး ပေါင်းသင်းလာသည့် နောက်ပိုင်းတွင် လက်ထပ်ရန်ငြင်းဆိုခြင်းသည် ကတိပျက်ကွက်ခြင်းသာဖြစ်၍ ရာဇဝတ်မှုကျူးလွန်ရာမရောက်ပါ။ အကယ်၍ ရာဇဝတ်မှုမြောက်သည်ဟု ဆိုလျှင်လည်း ပဋိသန္ဓေရရှိသည့်ကိစ္စနှင့် ပဋိသန္ဓေ မရသည့်ကိစ္စတို့ကို ခွဲခြား၍ စဉ်းစားသင့်ပါသည်။ အမျိုးသမီး၌ ပဋိသန္ဓေမရှိလျှင် ၎င်းအား နစ်နာစေသည်ဟု ဆိုနိုင်မည်မဟုတ်၍ ရာဇသတ်ကြီးပုဒ်မ ၄၁၅ နှင့် အကျုံးဝင်မည် မဟုတ်ပါဟု တင်ပြသွားသည်။
ဒေါက်တာဧမောင်က အမျိုးသားသည် အမျိုးသမီး၏ ကာမကိုရယူစဉ်အချိန်က လှည့်ဖြားခြင်းရှိ၊ မရှိ ဆိုသော ကြောင်းခြင်းရာအပေပါ် ရာဇတ်မှု ကျူးလွန်ခဲ့ပါသလောဆိုသည့် ပြဿနာကို ဆုံးဖြတ်ရပါမည်။ လှည့်ဖြားခြင်းရှိကြောင်း ပေါ်ပေါက်လျှင် ရာဇသတ်ပုဒ်မ ၄၁၅ ၏ ဒုတိယပိုင်းနှင့် အကျုံးဝင်နိုင်ပါသည်။ လှည့်ဖြားခြင်းခံရသဖြင့် ကာမကိုပေးခဲ့ရခြင်းဖြစ်လျှင် ပဋိသန္ဓေမရှိသော်လည်း အမျိုးသမီးအား နစ်နာစေရာရောက်ပါသည်ဟု တင်ပြသွားသည်။
ရှေ့နေချုပ်ကိုယ်စား အစိုးရရှေ့နေ ဒေါက်တာမျိုးထွန်းလင်းက ရာဇသတ်ကြီးပုဒ်မ ၄၁၅ နှင့် ၄၁၇ တို့သည် ပစ္စည်းနှင့်ပတ်သက်သည့် ပြစ်မှုများပြဋ္ဌာန်းထားသည့် ရာဇသတ်ကြီးအခန်း (၁၇) တွင် ပါဝင်နေပါသည်။ ပုဒ်မ ၄၁၅ ၏ ဥပမာများတွင်လည်း ပစ္စည်းနှင့် စပ်လျဉ်း၍ လိမ်လည်လှည့်ဖြားသည့် ကိစ္စများကိုသာ ဖော်ပြထားသဖြင့် လှည့်ဖြား၍ အမျိုးသမီး၏ကာမကို ရယူခြင်းကြောင့် အမျိုးသားသည် ရာဇဝတ်မှုကျူးလွန်ရာ မရောက်ပါဟု တင်ပြသွားသည်။
လိမ်လည်မှုကို ရာဇသတ်ကြီးပုဒ်မ ၄၁၅ တွင် အဓိပ္ပာယ်ဖွင့်ဆိုထားရာ ယခုပေါ်ပေါက်နေသည့် ပြဿနာသည် ထိုပုဒ်မ၏ ဒုတိယပိုင်းနှင့် သက်ဆိုင်သည်၊ ၎င်းဒုတိယပိုင်းမှာ ဤသို့ဖြစ်ပေသည်။
“တစ်ဦးတစ်ယောက်သောသူအား လှည့်ဖြားခြင်းအားဖြင့် ထိုသို့လှည့်ဖြားခြင်း ခံရသောသူက အကယ်၍ လှည့်ဖြားခြင်း မခံခဲ့ရသော် မိမိပြုမည်မဟုတ်သော၊ သို့တည်းမဟုတ် မိမိပျက်ကွက်မည် မဟုတ်သော အရာကို ပြုစေရန်သော်လည်းကောင်း၊ မပြုဘဲ ပျက်ကွက်စေရန် သော်လည်းကောင်း၊ ထိုသို့လှည့်ဖြားခြင်း ခံရသောသူအား တမင်သွေးဆောင်လျှင် ထို့ပြင် ထိုပြုလုပ်မှုက၊ သို့တည်းမဟုတ် ထိုပျက်ကွက်မှုက ထိုသူ၏ ကိုယ်ကိုဖြစ်စေ၊ စိတ်ကိုဖြစ်စေ၊ ဂုဏ်သရေကိုဖြစ်စေ၊ ပစ္စည်းကိုဖြစ်စေ၊ ပျက်စီးနစ်နာစေခြင်းသော်လည်းကောင်း၊ အန္တရာယ်သော်လည်းကောင်း၊ ဖြစ်စေလျှင်၊ သို့တည်းမဟုတ် ထိုသို့ဖြစ်စေတန်လျှင် ထိုသူသည် လိမ်လည်သည်မည်၏”
အထက်ပါအပိုင်းနှင့် အကျုံးဝင်ရန် -
(က) တရားခံက တစ်ဦးတစ်ယောက်အား လှည့်ဖြားခြင်း၊
(ခ) လှည့်ဖြားခြင်းခံရသူက အရာတခုကိုပြုခြင်း၊
(ဂ) လှည့်ဖြားခြင်းမခံရသော် ထိုသူသည် ထိုအရာကို ပြုမည်မဟုတ်ခြင်း၊
(သို့မဟုတ်) ပျက်ကွက်မည် မဟုတ်ခြင်း
(ဃ) တရားခံက ထိုသူအား တမင်သွေးဆောင်ခြင်းနှင့်
(င) ထိုသူ၏ ပြုလုပ်မှု၊ သို့မဟုတ် ပျက်ကွက်မှုကြောင့် ၎င်း၏ကိုယ်ကိုဖြစ်စေ၊ စိတ်ကိုဖြစ်စေ၊ ဂုဏ်သရေကိုဖြစ်စေ အန္တရာယ်ဖြစ်စေခြင်း စသည့် အင်္ဂါရပ်များရှိရန်လိုပေသည်။
အင်္ဂါရပ် (င) တွင် ပစ္စည်းကိုသာမက၊ ကိုယ်၊ စိတ်၊ ဂုဏ်သရေတခုခုကို ပျက်စီးနစ်နာစေလျှင် အန္တရာယ်ဖြစ်စေလျှင် လိမ်လည်မှုမြောက်သည်ဟု ဆိုထားသဖြင့် လိမ်လည်မှုသည် ပစ္စည်းနှင့်ပတ်သက်သောကိစ္စသာလျှင် အကျုံးဝင်သည်ဆိုခြင်းကို လက်ခံရန်မဖြစ်နိုင်ပေ။
ဥပဒေတရပ်၏ ပုဒ်မတခုခုကို အဓိပ္ပါယ်ကောက်ယူရာ၌ ထိုဥပဒေရှိ ခေါင်းစဉ်အား ယင်းဥပဒေအား ပြဋ္ဌာန်းရသည့်ရည်ရွယ်ချက်ကို ခန့်မှန်းရာတွင် လမ်းညွှန်သဖွယ် အသုံးပြုနိုင်မည်ဖြစ်သည်။ ခေါင်းစည်းသည် ဥပဒေပါစကားရပ်၏ တစိတ်တဒေသ မဟုတ်သဖြင့် ဥပဒေ၏ စကားရပ်မှာ ရှင်းလင်းပြတ်သားနေလျှင်၊ ခေါင်းစည်းသည် ထိုဥပဒေ၏ စကားရပ်များကို မလွှမ်းမိုးနိုင်ပေ။ ဥပမာများတွင်လည်း ဥပဒေကဆိုလိုသည့် အချက်အလက်အားလုံး မပါဝင်နိုင်။ သို့ဖြစ်ရာ ပုဒ်မ ၄၁၅ သည်၊ ပစ္စည်းနှင့် ပတ်သက်သည့် ခေါင်းစည်းပါသောအခန်းအောက်တွင်ရှိသည့် အကြောင်းကြောင့် ပစ္စည်းနှင့် မပတ်သက်သော ပြစ်မှုနှင့် လုံးဝအကျုံးမဝင်ဟု မဆိုနိုင်ချေ။
ရာဇသတ်ကြီးပုဒ်မ ၄၁၅ အရ၊ လိမ်လည်မှုမြောက်သည်၊ မမြောက်သည်ဆိုသော ပြဿနာကို ဆုံးဖြတ်ရာတွင် အထက်၌ဖော်ပြခဲ့သည့် အင်္ဂါငါးရပ်နှင့် ပြည့်စုံရန်လိုပေသည်။ ထိုအင်္ဂါရပ်များနှင့် ပြည့်စုံခြင်း ရှိ၊ မရှိဆိုသော ပြဿနာကိုမူ အမှုကိုလိုက်၍ ကြောင်းချင်းရာအပေါ် အခြေပြုပြီး ဆုံးဖြတ်ရမည်ဖြစ်သည်။
ထို့ပြင် ကိုယ်ဝန်ရှိသည့်ကိစ္စ၊ ကိုယ်ဝန်မရှိသည့်ကိစ္စဟူ၍ ခွဲခြားထားရန်လည်း အကြောင်းမရှိဟု ယူဆသည်။ အဘယ့်ကြောင့်ဆိုသော် လက်ထပ်မည်ဟု လှည့်ဖြားသဖြင့် ယုံကြည်ပြီး ကာမပေးအပ်ခံသည့် အမျိုးသမီးသည် ကိုယ်ဝန်ရှိသည်ဖြစ်စေ၊ မရှိသည်ဖြစ်စေ၊ ကိုယ်၌ဖြစ်စေ၊ စိတ်၌ဖြစ်စေ၊ ဂုဏ်သရေ၌ဖြစ်စေ နစ်နာခြင်းခံရပြီး ဖြစ်သည်မှာ ယုံမှားဘွယ်မရှိခြင်းကြောင့်ပင် ဖြစ်သည်။
အထက်ပါအကြောင်းများကြောင့် ပြည်ထောင်စု နှင့် ကိုကျင်ဝှက်၊ ၁၉၆၇ ခုနှစ်၊ မြန်မာပြည်စီရင်ထုံး၊ စာ ၄၆ အမှုတွင် ယူဆခဲ့သည့်အတိုင်း အမျိုးသားတဦးက အမျိုးသမီးတဦးကို လက်ထပ်ယူပါမည်ဟု အယုံသွင်းပြီး ကာမရယူပြီးနောက် လက်ထပ်ရန်ငြင်းဆိုခြင်းသည် ရာဇသတ်ကြီးပုဒ်မ ၄၁၇ အရ လိမ်လည်မှုမြောက်နိုင်သည်ဟု ဆုံးဖြတ်လိုက်သည်။ တကယ်ပြစ်မှုမြောက်သည် မမြောက်သည်ကိုမူ အထက်၌ဖော်ပြခဲ့သည့်အတိုင်း ကြောင်းချင်းရာအပေါ်သုံးသပ်၍ ဆုံးဖြတ်ရမည်သာဖြစ်သည်။
ယခုအမှုတွင် မောင်သန်းထွန်းက မခင်နှင်းရီအား အတည်တကျ လက်ထပ်ပေါင်းသင်းမည်ဟု ပြောသည်ကို မခင်နှင်းရီက ယုံကြည်သဖြင့် ၎င်း၏ကိုယ်ကို ပုံ၍အပ်ခဲ့ပြီး နောက်ပိုင်းတွင် ကိုယ်ဝန်ရှိလာသောအခါ မောင်သန်းထွန်းက လက်ထပ်ရန်ငြင်းဆိုနေကြောင်း စွပ်စွဲချက်ရှိနေသည်။ ထိုစွပ်စွဲချက်ကို မောင်သန်းထွန်း အနေဖြင့် ဖြေရှင်းရန်တာဝန်ရှိနေရာ မောင်ဝင်း နှင့် ပြည်ထောင်စု၊ ၁၉၆၆၊ မတစ၊ စာ ၆၉၁၊ စီရင်ထုံး၌ မိန့်မြွက်ထားသည့်အတိုင်း စွဲချက်ကို ပယ်ဖျက်ပေးရန် အကြောင်း မပေါ်ပေါက်သေးသဖြင့် မန္တလေးမြို့ စက်ရှင်တရားသူကြီး၏ ထောက်ခံချက်ကို လက်မခံဘဲ အထက်ပါမှတ်ချက်များနှင့်တကွ ပြန်လည်ပေးပို့လိုက်သည်။
--------------------------
ကဏ္ဍအလိုက်စာစုများ
https://www.facebook.com/share/p/1LdpiP8kD6/
--------------------------
မြန်မာဓလေ့ထုံးတမ်းဥပဒေ၊ အမွေနှင့်သက်ဆိုင်သောစာစုများ
https://www.facebook.com/share/p/1eowQea23r/
စာချုပ်စာတမ်း/ အိမ်ခြံမြေကိစ္စရပ်များနှင့်သက်ဆိုင်သောစာစုများ
https://www.facebook.com/share/p/1E8QABhPrq/
ချစ်သူ၊ အိမ်ထောင်ဖက်များနှင့် သက်ဆိုင်သောစာစုများ
https://www.facebook.com/share/p/1CRfdWE9Sr/
တရားမမှုဆိုင်ရာစာစုများ
https://www.facebook.com/share/p/17zwFbWWb3/
ရာဇဝတ်မှုဆိုင်ရာစာစုများ
https://www.facebook.com/share/p/18YfhtFdmU/
ပြဋ္ဌာန်းဥပဒေများ၏
သိကောင်းစရာမှတ်စုများ
https://www.facebook.com/share/p/1HvJmdfkSg/
ပေါင်နှံချေးယူငှားရမ်းခြင်းနှင့်သက်ဆိုင်သောစာစုများ
https://www.facebook.com/share/p/1bTPKKr8LX/
အထွေထွေကိစ္စရပ်များ
https://www.facebook.com/share/p/1B8NMNBS39/
အထွေထွေလျှောက်လွှာပုံစံများ
https://www.facebook.com/share/p/1FcUMMVBY2/
--------------------------
Polaris Your's Personal Lawyer
29/4/2026
For Legal Consultation -
☎️/ Viber - 09 767 3525 76
